ညီညွတ်ရေးအတွက် ပေးဆပ် ကြဖို့ ဒေါ်အောင်ဆန်းစုကြည် တိုက်တွန်း

အမျိုးသားဒီမိုကရေစီအဖွဲ့ချုပ် ဥက္ကဌ ဒေါ်အောင်ဆန်းစုကြည် တိုင်းရင်းသား လွှတ်တော်ကိုယ်စားလှယ်တွေနဲ့ ဖေဖော်ဝါရီလ ၂၉ ရက်နေ့က နေပြည်တော် စည်ပင်ရိပ်သာမှာ တွေ့ဆုံစဉ်။ Photo: Win Ko Ko Latt/RFA
ပြည်ထောင်စုအတွက် အားလုံးက လိုချင်တာတွေ တောင်းဆိုနေမယ်ဆိုရင် ညီညွတ်ရေးကို တည်ဆောက်နိုင်မှာ မဟုတ်သလို အားလုံးက ပေးဆပ်မှုနဲ့ ချဉ်းကပ်မှသာ ညီညွတ်ရေးကို ရောက်နိုင်မှာဖြစ်ကြောင်း အမျိုးသား ဒီမိုကရေစီအဖွဲ့ချုပ် ဥက္ကဌ ဒေါ်အောင်ဆန်းစုကြည် က ပြောပါတယ်။

ဒီကနေ့ နေပြည်တော် စည်ပင်ဧည့်ရိပ်သာမှာ တိုင်းရင်းသား လွှတ်တော်ကိုယ်စားလှယ်တွေနဲ့ တွေ့ဆုံပွဲ မှာ ဒေါ်အောင်ဆန်းစုကြည်က အဖွင့်မိန့်ခွန်းပြောကြားစဉ် ထည့်သွင်းပြောတာ ဖြစ်ပါတယ်။

"ကိုယ်ဘာလိုချင်လဲဆိုတာပဲ ပထမတောင်းဆိုမယ်ဆိုလို့ရင် အားလုံးက ငါဒါလိုချင်တယ်၊ ငါဒါလိုချင်တယ်ဆိုရင် ဘယ်လိုလုပ် ကျမတို့ ညီညွှတ်မှုရမလဲ၊ ကျမဖြစ်စေချင်တာက အားလုံးက ဒီပြည်ထောင်စုကြီး ခိုင်မာဖို့ အတွက် ပြည်ထောင်စုကြီး သာယာဖို့အတွက် ကျနော်တို့က ဒါပေးလို့ရတယ်၊ ကျမတို့ကတော့ ဒါပေးလို့ရတယ်၊ ကျမတို့ ပေးချင်တယ်၊ ကျနော်တို့ ပေးချင်တယ် ဆိုတဲ့ စိတ်ဓါတ်နဲ့ ဒီကိစ္စကို ချဉ်းကပ်စေချင်တယ်"

အန်အယ်လ်ဒီရဲ့ မဟာမိတ် တိုင်းရင်းသားနိုင်ငံရေးပါတီတွေဟာ ၂၀၁၀ ရွေးကောက်ပွဲတုန်းက အတူတူမ၀င်ဖို့ ရပ်တည်ပေးခဲ့တာဖြစ်ကြောင်း၊ အဲ့ဒီအတွက် လေးစားမိကြောင်းလည်း ပြောပါတယ်။

ပြည်ထောင်စုကို ဘယ်လိုပုံစံမျိုးနဲ့ ထူထောင်ကြမလဲ ဘယ်လိုလုပ်ကြမလဲဆိုတာကို အကြံပေးဖို့ကို လည်း ဒေါ်အောင်ဆန်းစုကြည်က တက်ရောက်လာတဲ့ တိုင်းရင်းသား လွှတ်တော်ကိုယ်စားလှယ်တွေကို ဖိတ်ခေါ်လိုက်ပါတယ်။

ဒါ့အပြင် ပြည်ထောင်စုလို့ ပြောကြတဲ့အခါ နောင်လာနောက်သားတွေကို ဘယ်လိုပြည်ထောင်စုမျိုးကို ထားခဲ့မလဲ၊ နိုင်ငံရေးတင်မကဘဲ လူမှုရေးအရ ဘယ်လိုပြည်ထောင်စုမျိုးကို ထားခဲ့မလဲဆိုတာကိုလည်း ထည့်သွင်းစဉ်းစား ရမှာဖြစ်ကြောင်းလည်း ပြောပါတယ်။

ဒီအတွင်း အမျိုးသားဒီမိုကရေစီအဖွဲ့ချုပ် ဗဟိုအလုပ်အမူဆောင်အဖွဲ့ရဲ့ အတွင်းရေးမှူးအဖွဲ့ ဖွဲ့စည်းဘို့ မနေ့ကကျင်းပတဲ့ ဗဟိုအလုပ်အမှုဆောင်အဖွဲ့ အစည်းအဝေးကဆုံးဖြတ်လိုက်ပြီး ဒီကနေ့ ဖွဲ့စည်းလိုက်တယ်လို့  NLD ပါတီရုံးက ထုတ်ပြန်ပါတယ်။

ထုတ်ပြန်ထားတဲ့စာမှာ အဖွဲ့ချုပ်အမာခံပါတီဝင်အများအစုမှာ ရွေးကောက်ပွဲအနိုင်ရရှိပြီး လွှတ်တော်တွင်း ရောက်ရှိသွားတာကြောင့် ပါတီရဲ့လုပ်ငန်းစဉ်တွေ အားလျော့မသွားအောင် ကြီးကြပ်ဆောင်ရွက်နိုင်ရေးအတွက် အတွင်းရေးမှူးအဖွဲ့ကို ဖွဲ့စည်းရတာဖြစ်တယ်လို့ ဆိုပါတယ်။

အဖွဲ့ကို ပါတီ ဗဟိုကော်မတီဝင် ၅ ဦးနဲ့ ဖွဲ့စည်းလိုက်တာဖြစ်ပြီး ဦးဝင်းထိန်၊ ဦးဝင်းမြင့်၊ ဒေါက်တာဇော်မြင့်မောင်၊ ဦးဥာဏ်ဝင်းနဲ့ ဦးဟံသာမြင် တို့နဲ့ ဖွဲ့စည်းလိုက်ပါတယ်။

အလားတူ ပါတီက အရံဗဟို အလုပ်အမှုဆောင်ကော်မတီဝင် မန်းဂျော်နီကို ဗဟိုကော်မတီဝင်အဖြစ် တာဝန်ပေးအပ်လိုက်တယ်လို့လဲ NLD ဗဟိုလုပ်အမှုဆောင်အဖွဲ့က ဒီကနေ့ နေ့စွဲနဲ့ သီးခြားထုတ်ပြန်ထားပါတယ်။

RFA Burmese
http://www.rfa.org/burmese

ငြိမ်းချမ်းရေးအတွက် တိုင်းရင်းသားတွေနဲ့ ဒေါ်စုဆွေးနွေး

ဒေါ်အောင်ဆန်းစုကြည်နှင့်တိုင်းရင်းသားကိုယ်စားလှယ်များတွေ့ ဆုံ (Photo-NLD Chairperson)
အမျိုးသား ဒီမိုကရေစီအဖွဲ့ချုပ် ဦးဆောင်မယ့် နောက်တတ်လာမယ့် အစိုးရ ကျရင် ပြည်တွင်း ငြိမ်းချမ်းရေး နဲ့ ဖယ်ဒရယ် ပြည်ထောင်စု တည်ဆောက်ဖို့ အပါအ၀င် တိုင်းပြည်ရဲ့ တရားဥပဒေ စိုးမိုးရေးတို့ကို တိုင်းရင်းးသားတွေနဲ့အတူ လက်တွဲလုပ်ဆောင်သွားမယ်လို့ ဒေါ်အောင်ဆန်းစုကြည်ကပြောဆိုလိုက်ပါတယ်။   ဒီကနေ့ နေပြည်တော်စည်ပင်ရိပ်သာဝင်းမှာ ဒေါ်အောင်ဆန်းစုကြည်က ပြည်သူ့လွတ်တော်နဲ့ အမျိုးသားလွတ်တော်တို့က တိုင်းရင်းသား လွတ်တော် ကိုယ်စားလှယ်တွေနဲ့ တစ်နာကျော်ကြာတွေ့ဆုံပြီး လက်တလော တိုင်းရင်းသား ဒေသတွေမှာ ဖြစ်ပျက်နေတဲ့ တိုက်ပွဲတွေ အပါအ၀င် တိုင်းရင်းသား ဒေသတွေရဲ့ လိုအပ်ချက်တွေကို အဓိကထား ဆွေးနွေး သွားခဲ့ကြပါတယ်။ အပြည့်အစုံကိုတော့ ဗွီအိုအေမြန်မာပိုင်းသတင်းထောက် ကိုထက်အောင်က ပြောပြပေးမှာပါ။

ရွေးကောက်ပွဲ အနိုင်ရ အမျိုးသားဒီမိုကရေစီအဖွဲ့ချုပ် ဥက္ကဌ ဒေါ်အောင်ဆန်းစုကြည်ဟာ ဒုတိယအကြိမ် ပြည်သူ့လွတ်တော်နဲ့ အမျိုးသားလွတ်တော်တို့မှာ ရှိတဲ့ တိုင်းရင်းသား ကိုယ်စားလှယ်တို့ကို ဖတ်ခေါ်ပြီး နေပြည်တော် စည်ပင်ရိပ်သာဝင်းမှာ ဒီကနေ့ ညနေပိုင်းမှာ တွေ့ဆုံခဲ့ပါတယ်။ နောက်တတ်လာမယ့် အစိုးရ သစ်လက်ထက်ကျရင် တစ်နိုင်ငံလုံး အပစ်အခတ်ရပ်ဆဲရေးနဲ့ တိုင်းရင်းသားများ တန်းတူညီမျှပါဝင်တဲ့ ဖယ်ဒရယ်ပြည်ထောင်စုကို တည်ထောင်သွားမယ်လို့ ဒေါ်အောင်ဆန်းစုကြည်က အဓိကထား တိုက်တွန်းပြောဆိုသွားခဲ့တယ်လို့ အမျိုးသား ဒီမိုကရေစီအဖွဲ့ချုပ်ရဲ့ဗဟိုအလုပ်အမှုဆောင် ဒေါက်တာဇော်မြင့်မောင်က အခုလို ပြောပါတယ်။

ဒေါ်အောင်ဆန်းစုကြည်နှင့်တိုင်းရင်းသားကိုယ်စားလှယ်များတွေ့ ဆုံ (Photo-NLD Chairperson)
“အဓိကတွေ့တာကတော့ တို့ တိုင်းရင်းသားတွေနဲ့ cooperative ဖြစ်ချင်တယ်။ ပူးပေါင်းဆောင်ရွက်ချင်တယ်။ National reconciliation နဲ့ နောက်ပြီးတော့ federalism ပေါ့နော် အဓိကထားပြီး ပြောတာပါပဲ။ federal state ပေါ့ တို့ထူထောင်မယ်ဆိုတာ အဲဒါကို တိုင်းရင်းသားတွေလည်း သဘောကျပါတယ်။ ကျန်တာကတော့ သူတို့ ပြည်နယ်တွေရဲ့ issue တွေပြောတာပေါ့။ ပညာရေး၊ ကျန်းမာရေး နိမ့်ကျတာတွေ တောင်ပေါ်မှာ ဖြစ်တာတွေကို မေ့မထားဖို့ပေါ့။ အဓိကတော့ ဒေါ်အောင်ဆန်းစုကြည်က ကျနော်တို့ရဲ့ မူဝါဒ ပေါ့ federal စစ်မှန်တဲ့ federal စနစ်ကို ထူထောင် မယ်ဆိုတာ သူက တရားဝင်ပေါ့နော်၊ အရင်တုန်းကတည်းက ဒါကြီးက ရှိပြီးသားပဲလေ။ နောက်ပြီး တိုင်းရင်းသားတွေဘက်ကတော့ federal နဲ့ peace ကိုလုပ်ပေးပါပေါ့ ဒေါ်အောင်ဆန်းစုကြည်က ပြောသွားတာပါ။ အဓိကတော့federalism ကိုပြောသွားပါတယ်။”

တိုင်းရင်းသားပါတီတစ်ခုဖြစ်တဲ့ တအောင်း ပလောင် အမျိုးသားပါတီကတော့ ဒီရက်ပိုင်း ရှမ်းပြည်မြှောက်ပိုင်းမှာ တိုက်ပွဲတွေ ဆက်တိုက်ဖြစ်နေတဲ့ အတွက်ကြောင့် နောက်အစိုးရသစ် လက်ထက်မှာ ငြိမ်းချမ်းရေးကို အဓိကထားလုပ်ဆောင်သွားဖို့ ဆွေးနွေးခဲ့တယ်လို့ ဒီပါတီရဲ့ ပြည်သူ့လွတ်တော် ကိုယ်စားလှယ် ဦးမိုင်းဝင်းထူးက ပြောပါတယ်။

“အဓိကတော့ ကျနော်တို့ ဒေသမှာဖြစ်နေတဲ့ ဒီလက်နက်ကိုင် ပဋိပက္ခတွေပေါ့၊ ငြိမ်းချမ်းရေးကိစ္စရယ် ၊ ကျနော်တို့တောင်ပေါ်ဒေသမှာ ရှိတဲ့ တောင်ပေါ်သားတွေ ကိုလည်း ဖွံ့ဖြိုးရေးကိစ္စတွေ လုပ်တဲ့အခါမှာ မေ့မထားဖို့ဆိုပြီးတော့ ကျနော်တို့ပြောဆို ဆွေးနွေးတာတွေရှိပါတယ်။”

NLD အစိုးရသစ်လက်ထက်မှာ တိုင်းရင်းသားတွေနဲ့ အတူလက်တွဲ လုပ်ဆောင်သွားပြီး တိုင်းရင်းသားတွေ ဘက်ကလည်း ပြည်ထောင်စုအတွက် အဓိကထားလုပ်ဆောင်သွားဖို့ ဒေါ်အောင်ဆန်းစုကြည်က တိုက်တွန်းခဲ့ပါတယ်။ ရခိုင်အမျိုးသားပါတီရဲ့ အမျိုးသား လွတ်တော် ကိုယ်စားလှယ် တစ်ဦးဖြစ်တဲ့ မထုမေကတော့ တိုင်းရင်းသားများ တန်းတူ ညီမျှရရှိဖို့ ဖယ်ဒရယ်ပြည်ထောင်စု တည်ထောင်ဖို့ လုပ်ဆောင်သွားမယ့်အကြောင်း ဆွေးနွေးခဲ့တယ်လို့ ပြောပါတယ်။

“ပြည်ထေင်စုကိုသွားတဲ့အခါမှာ တိုင်းရင်းသားအားလုံးရပိုင်ခွင့်ဖြစ်တဲ့ ကျမတို့ ဒီ တန်းတူညီမျှရေးကိုသွားတဲ့အခါမှာ ဖွဲ့စည်းပုံကိုယ်တိုင်ကနေပြီးတော့ federal ဖွဲ့စည်းပုံ ဖြစ်မှသာလျှင် တရားဥပဒေအရ ကျမတို့ တိုင်းရင်းသားများကို ကာကွယ်ပေးနိုင်မှာဖြစ်တယ်လို့ ဒါကြောင့်မို့လို့ အခုတက်လာကြတဲ့ တိုင်းရင်းသားကိုယ်စားလှယ်များအပါအ၀င် NLD လွှတ်တော်အမတ်တွေလည်း တိုင်းရင်းသားများလိုလားတဲ့ federal constitution တခုပေါ်ပေါက်လာဖို့အတွက် တိုက်တွန်းချက်ပါတယ်။”

၂၀၁၂ ကြားဖြတ်ရွေးကောက်ပွဲမှာ လွတ်တော်တွင်း ၀င်ခဲ့ပြီးတဲ့နောက် NLD ပါတီဟာ တိုင်းရင်းသားလွတ်တော်ကိုယ်စားလှယ်တွေနဲ့ အခုလိုမျိုး တွေ့ဆုံတာမျိုးတွေ ရှိပေမယ့်လို့ ဒုတိယအကြိမ်လွှတ်တော် စတဲ့အချိန်မှာတော့ ဒါဟာ ပထမဆုံးအကြိမ် တိုင်းရင်းသား ကိုယ်စားလှယ်တွေနဲ့ တွေ့ဆုံတာလည်းဖြစ်ပါတယ်။ ဒီတစ်ခေါက် လွတ်တော်သက်တမ်းမှာ ပါတီက အများစု အနိုင်ရထားတာကြောင့် အခုလိုမျိုးတွေ့ဆုံမှုဟာ အကောင်းဘက်ကို ဦးတည်တဲ့ အပြောင်းအလဲမျိုြးုဖစ်လာနိုငတယ်လို့ ဦးမိုင်းဝင်းထူးက ပြောပါတယ်။

“ကျနော်ထင်ပါတယ် ဒါက positive change ဘက်ကို များကြီး ဦးတည်သွားစေနိုင်တယ်လို့ ယုံကြည်ပါတယ်။ ဥပမာ ထားပါတော့ ကျနော်တို့က သူတို့အပေါ်မှာ ယုံကြည်မှုတွေ ပိုပိုပြီးတော့ ရှိလာမယ်။ သူတို့ဖွဲ့စည်းလာမယ့် အစိုးရအသစ်မှာ ကျနော်တို့ ဒီတိုင်းရင်းသား ပါတီတွေ အနေနဲ့ကနေပြီးတော့ ဒီငြိမ်းချမ်းရေးကိစ္စတွေကို ပူးပေါင်းလုပ်ဆောင်လာနိုင်မယ်ဆိုတဲ့ ကဏ္ဍ တွေကို ပိုပြီးတော့မှ အားပေးလာအောင်လို့ပေါ့နော်။”

ဒီကနေ့ စည်ပင်ရိပ်သာဝန်းထဲမှာ အမျိုးသား ဒီမိုကရေစီ အဖွဲ့ချုပ် ဒေါ်အောင်ဆန်းစုကြည်အပါအ၀င် ဗဟိုအလုပ်အမှုဆောင် အဖွဲ့တွေဟာ တိုင်းရင်းသား ကိုယ်စားလှယ် ၃၀၀ နီးပါးနဲ့ တစ်နာကျော်ကြာ တွေ့ဆုံဆွေးနွေး ခဲ့ပါတယ်။ လက်တလော လွတ်တော် ၂ ရပ်ကနေ တင်မြှောက်မယ့် ဒုသမ္မတ ၂ ဦးအတွက် သတင်းတွေ အမျိုးမျိုးထွက်နေပေမယ့်လို့ ဒီကနေ့မှာ ဒီကိစ္စ နဲ့ပတ်သက်လိုို့ ဆွေးနွေးခဲ့ခြင်း မရှိဘူးလို့ကိုယ်စားလှယ်တွေက ပြောဆိုကြပါတယ်။

ထက်အောင် / ဗွီအိုအေ (မြန်မာပိုင်း)
http://burmese.voanews.com
 

ဥပဒေရေးရာ ကော်မရှင်နဲ့ လွှတ်တော်ဆိုင်ရာအဖွဲ့များ အသစ်ဖွဲ့စည်း

ဥပဒေရေးရာနဲ့ အထူးကိစ္စရပ်များ လေ့လာဆန်းစစ်သုံးသပ်ရေးကော်မရှင် ဥက္ကဌ သူရ ဦးရွှေမန်း ကို တွေ့ရစဉ်။ Photo: RFA
ပြည်ထောင်စုလွှတ်တော်မှာ ဖွဲ့စည်းတဲ့ ဥပဒေရေးရာနဲ့ အထူးကိစ္စရပ်များ လေ့လာဆန်းစစ်သုံးသပ်ရေး ကော်မရှင် မှာ ပြည်သူ့လွှတ်တော် ဥက္ကဌဟောင်း သူရဦးရွှေမန်းကို ဥက္ကဌအဖြစ် ခန့်အပ်တာဝန်ပေးပြီး အဖွဲ့ဝင် ၃၅ ဦးနဲ့ ဒီနေ့ ဖွဲ့စည်းလိုက်ပါတယ်။

တည်ဆဲဥပဒေတွေကို လေ့လာဆန်းစစ်သုံးသပ်ပြီး ပြင်ဆင်၊ ပယ်ဖျက်၊ အသစ်ပြဌာန်းနိုင်ဖို့အတွက် လွှတ်တော် အသီးသီးထံ အကြံပြုတင်ပြဖို့ တာဝန်ရှိတယ်လို့ ဥပဒေရေးရာနဲ့ အထူးကိစ္စရပ်များ လေ့လာဆန်းစစ် သုံးသပ်ရေး ကော်မရှင် ဒုတိယဥက္ကဌ ၁ အဖြစ် တာဝန်ပေးအပ်ခံရတဲ့ လွှတ်တော်ကိုယ်စားလှယ် ဦးကိုကိုနိုင် က ပြောပါတယ်။

"တည်ဆဲဥပဒေများအား လေ့လာဆန်းစစ်သုံးသပ်ပြီး ပြင်ဆင်ရေး၊ ပယ်ဖျက်ရေး၊ အသစ်ပြဌာန်းနိုင်ရေးတို့ ကို ပြည်ထောင်စုလွှတ်တော် နာယက၊ ပြည်သူ့လွှတ်တော် ဥက္ကဌနှင့် အမျိုးလွှတ်တော် ဥက္ကဌတို့မှတဆင့် သက်ဆိုင်ရာလွှတ်တော်သို့ အကြံပြုတင်ပြရမှာဖြစ်ပါတယ် ဒါ့အပြင် အထူးကိစ္စရပ်များ ပေါ်ပေါက်လာပါက ၄င်းကိစ္စရပ်များအား ဥပဒေအမြင်နှင့်ယှဉ်ပြီး လေ့လာဆန်းစစ်သုံးသပ်ပြီးတော့ ပြည်ထောင်စုလွှတ်တော် နာယက၊ ပြည်သူ့လွှတ်တော် ဥက္ကဌနှင့် အမျိုးလွှတ်တော် ဥက္ကဌတို့မှတဆင့် သက်ဆိုင်ရာလွှတ်တော်သို့ အစီရင်ခံတင်ပြရပါတယ်၊ နာယကနှင့် လွှတ်တော် ဥက္ကဌများက သတ်မှတ်ပေးသည့် လုပ်ငန်းတာဝန်များကို သတ်မှတ်ကာလအတွင်း ပြီးစီးအောင် ဆောင်ရွက်ရပါမယ်၊ နာယကနှင့် လွှတ်တော်ဥက္ကဌများက ကဏ္ဍ အလိုက် သီးခြားသတ်မှတ်ပေးသည့် အထူးကိစ္စရပ်များအတွက် ကော်မရှင်အတွင်း တာဝန်ခွဲဝေ သတ်မှတ် ဆောင်ရွက် ရပါမယ်၊ နာယက၊ လွှတ်တော် ဥက္ကဌများက လုပ်ငန်းလိုအပ်ချက်အရ အကြံဥာဏ်တောင်းခံသည့်အခါ ဥပဒေနဲ့အညီ ဆွေးနွေးညှိနှိုင်းသုံးသပ်ပြီး သင့်တော်သည့်အကြံပေးရမှာဖြစ်ပါတယ်"

ကော်မရှင်ဟာ အထူးကိစ္စရပ်တွေ ပေါ်ပေါက်လာရင် ဥပဒေရေးရာရှုထောင့်ကနေ လေ့လာသုံးသပ်ပြီး လွှတ်တော် ဥက္ကဌတွေထံ တင်ပြဖို့ တာဝန်ရှိတယ်လို့လည်း သိရပါတယ်။

အဲ့ဒီကော်မရှင်ကို ပြီးခဲ့တဲ့ လွှတ်တော်သက်တမ်းမှာ ပြည်သူ့လွှတ်တော် တစ်ခုတည်းအတွက်သာ ဖွဲ့စည်းခဲ့တာဖြစ် ပြီး ဒီတစ်ကြိမ်မှာ ပြည်သူ့လွှတ်တော်၊ အမျိုးသားလွှတ်တော်နဲ့ ပြည်ထောင်စု လွှတ်တော်တို့အတွက် အားလုံးသက် ဆိုင်မှုရှိမှာဖြစ်ပါတယ်။

အဲ့ဒီကော်မရှင်မှာ သူရဦးရွှေမန်းအပြင် ဦးဇော်မြင့်ဖေ၊ ဦးမောင်တိုး၊ ဦးကြည်သာ၊ ဦးအေးမောက်၊ ဦးတင်မောင်ဦး စတဲ့ ကြံ့ခိုင်ဖံွ့ဖြိုးရေးပါတီ ကိုယ်စားလှယ်ဟောင်း တချို့ပါဝင်ပြီး အငြိမ်းစားအစိုးရ ထိပ်တန်းအရာရှိတွေ ပါဝင်ပါတယ်။

အဲ့ဒီကော်မရှင်ကို ပြီးခဲ့တဲ့ ဖေဖော်ဝါရီလ ၄ ရက်နေ့က ပြည်သူ့လွှတ်တော်မှာ အဖွဲ့ဝင် ၂၃ ဦးနဲ့ ဖွဲ့စည်းခဲ့ပြီးနောက် ဒီနေ့ ပြည်ထောင်စုလွှတ်တော်မှာ ဖွဲ့စည်းတဲ့အခါ အဲ့ဒီအဖွဲ့ဝင် ၂၃ ဦးအပြင် အန်အယ်လ်ဒီပါတီ လွှတ်တော် ကိုယ်စားလှယ် ၃ ဦးနဲ့ အငြိမ်းစားအစိုးရအရာရှိတချို့ ထပ်တိုးလာတာဖြစ်ပါတယ်။

ပြည်ထောင်စုလွှတ်တော်မှာ အဲ့ဒီကော်မရှင်ကို ဖွဲ့စည်းလိုက်တဲ့အတွက် ပြည်သူ့လွှတ်တော်မှာ အရင်ဖွဲ့စည်း ထားတဲ့ ကော်မရှင်ကို ဖျက်သိမ်းမလား၊ ဆက်လက်ထားရှိမလားဆိုတာ မသိရသေးဘူးလို့ ကော်မရှင် အဖွဲ့ဝင်တွေက ပြောပါတယ်။

အလားတူ မြန်မာနိုင်ငံလွှတ်တော်ဆိုင်ရာအဖွဲ့ MPU ကို ပြည်ထောင်စုလွှတ်တော် နာယက မန်းဝင်းခိုင်သန်းက ဥက္ကဌအဖြစ် တာဝန်ယူမှာဖြစ်ပြီး အဖွဲ့ဝင် ၁၇ ဦးနဲ့ ဖွဲ့စည်းသွားမှာဖြစ်ကြောင်း ဒီနေ့ ပြည်ထောင်စုလွှတ်တော်မှာ ကြေညာ လိုက်ပါတယ်။

ငြိမ်းချမ်းရေးအပါအဝင် လွှတ်တော်ဆိုင်ရာလုပ်ငန်းတွေကို ပူးပေါင်းဆောင်ရွက်ရာမှာ ကျယ်ပြန်လာဖို့ နဲ့ လွှတ်တော်ကိုယ်စားလှယ်တွေရဲ့ အရည်အချင်းမြှင့်တင့်နိုင်ဖို့အတွက် ဖွဲ့စည်းတာဖြစ်ကြောင်း ပြည်ထောင်စု လွှတ်တော် ဒုတိယ နာယက ဦးအေးသာအောင်က ရှင်းလင်းပြောကြားခဲ့ပါတယ်။

"မြန်မာနိုင်ငံ လွှတ်တော်ဆိုင်ရာအဖွဲ့ MPU ကို ပြည်ထောင်စုအဆင့် လွှတ်တော်များ၊ တိုင်းဒေသကြီး လွှတ်တော် နဲ့ ပြည်နယ်လွှတ်တော်များ လွှတ်တော်ကိုယ်စားလှယ်များရဲ့ အရည်အသွေးမြင့်မားရေး၊ ပြည်သူကို ကိုယ်စားပြု တဲ့ အဖွဲ့အစည်းအဖြစ် ခိုင်မာလာစေရေး၊ ငြိမ်းချမ်းရေးအပါအဝင် လွှတ်တော်ဆိုင် ရာ ပူးပေါင်းဆောင်ရွက်မှုများ တိုးတက်ကျယ်ပြန့်လာစေရေး၊ နိုင်ငံတကာလွှတ်တော်များ၊ အဖွဲ့အစည်းများနဲ့ ဆက်ဆံသော အတွေ့ အကြုံကောင်းများ၊ ပူးပေါင်းဆောင်ရွက်မှုများ၊ တိုးတက်လာစေရေး၊ မြန်မာနိုင်ငံ ရဲ့ ဖြစ်ပေါ်တိုးတက်မှုကို ကမ္ဘာက သိရှိစေရန် ဆောင်ရွက်ရေး၊ ဒီမိုကရေစီစနစ်ထွန်းကားရေးနဲ့ ပိုမိုတိုးတက်လာစေရေး"

ပြီးခဲ့တဲ့ လွှတ်တော်သက်တမ်းအတွင်းမှာ ဖွဲ့စည်းခဲ့တဲ့ MPU အဖွဲ့ဟာ ဖွဲ့စည်းပုံအခြေခံဥပဒေ ပြင်ဆင်ရာ မှာ တိုင်းနဲ့ပြည်နယ်တွေက လုပ်ပိုင်ခွင့်၊ ရပိုင်ခွင့်တွေနဲ့ပတ်သက်ပြီး ပြင်ဆင်တဲ့အပိုင်းမှာ သက်ဆိုင်ရာ လွှတ်တော်တွေနဲ့ ပူးပေါင်းဆောင်ရွက်နိုင်ခဲ့ကြောင်းလည်း ဦးအေးသာအောင် က ပြောခဲ့ပါတယ်။

အဲဒီအဖွဲ့မှာ ဒုတိယဥက္ကဌအဖြစ် ပြည်သူ့လွှတ်တော် ဥက္ကဌ ဦးဝင်းမြင့်၊ အတွင်းရေးမှူးအဖြစ် အမျိုးသားလွှတ်တော် ဒုတိယဥက္ကဌ ဦးအေးသာအောင်၊ အဖွဲ့ဝင်တွေအဖြစ် ပြည်သူ့လွှတ်တော် ဒုတိယဥက္ကဌ ဦးတီခွန်မြတ်နဲ့ တိုင်းနဲ့ပြည်နယ် ၁၄ ခုက လွှတ်တော်ဥက္ကဌတွေ ပါဝင်တာဖြစ်ပါတယ်။

RFA Burmese
http://www.rfa.org/burmese

ဒု သမ္မတလောင်း ၃ ဦး အမည်စာရင်း သတ်မှတ်ရက်ထက် တစ်ပတ်စောနိုင်

ဒုတိယအကြိမ် ပြည်သူ့လွှတ်တော် ပုံမှန်အစည်းအဝေး ကျင်းပနေစဉ်။ Photo: RFA
နိုင်ငံတော်သမ္မတကို ရွေးချယ်တင်မြှောက်ဖို့အတွက် ဒုတိယသမ္မတလောင်း ၃ ဦးအမည်စာရင်း တင်သွင်းနိုင်ရေး ဆွေးနွေးမယ့် သက်ဆိုင်ရာ လွှတ်တော်ကိုယ်စားလှယ် အစုအဖွဲ့အလိုက် အစည်းအဝေးတွေ ကျင်းပမယ့်ရက်ကို ပြင်ဆင်သတ်မှတ်မယ်လို့ သိရပါတယ်။

လာမယ့် မတ်လ ၁၇ ရက်နေ့မှာ သက်ဆိုင်ရာ လွှတ်တော်ကိုယ်စားလှယ် အစုအဖွဲ့အလိုက် အစည်းအဝေးတွေ စတင်ကျင်းပဖို့ ကြေညာထားရာကနေ ပြင်ဆင်မှာဖြစ်ပြီး ၁၇ ရက်ထက် ရှေ့တစ်ပတ် စောသွားနိုင်တယ်လို့ ရခိုင်အမျိုးသားပါတီ ပြည်သူ့လွှတ်တော်ကိုယ်စားလှယ် ဒေါ်ခင်စောဝေ က ပြောပါတယ်။

"မနက်ဖြန်ကျရင် ပြည်ထောင်စုလွှတ်တော်မှာ အစုအဖွဲ့ဖွဲ့ဖို့ ရက်ကိုသတ်မှတ်ပေးမယ် အန်တီတို့ကို ဒုသမ္မတရွေးဖို့အတွက် ဘယ်နေ့ကိုရွေးပါဆိုပြီး အန်တီတို့ကို ရက်သတ်မှတ်ပေးမှာ၊ တစ်ပတ်ထပ်တိုးမယ် လို့ကြားတယ်၊ မနက်ဖြန်မှ ကြေညာတဲ့အပေါ်မှာမူတည်ပြီး အန်တီတို့ ၇ ရက်နေ့ဆို ၇ ရက်နေ့တင် ထားမယ်၊ ၈ ရက်နေ့လောက်ရွေးမယ်ပေါ့ သဘောတစ်ခုကပေါ့နော်"

မနက်ဖြန်မှာကျင်းပမယ့် ပြည်ထောင်စုလွှတ်တော် အစည်းအဝေးမှာ ကြေညာမှာဖြစ်တယ်လို့ အစည်းအဝေး အစီအစဉ်လျာထားချက်မှာ ပါရှိတာဖြစ်ပါတယ်။

နိုင်ငံတော်သမ္မတကို ရွေးချယ်ဖို့အတွက် ပြည်သူ့လွှတ်တော် ကိုယ်စားလှယ်အစုအဖွဲ့၊ အမျိုးသားလွှတ်တော် ကိုယ်စားလှယ်အစုအဖွဲ့နဲ့ ပြည်သူ့လွှတ်တော်၊ အမျိုးသားလွှတ်တော် နှစ်ခုပေါင်းက တပ်မတော်သားကိုယ်စားလှယ် အစုအဖွဲ့ စုစုပေါင်း အဖွဲ့ ၃ ဖွဲ့က ဒုတိယသမ္မတလောင်း အမည်စာရင်းတွေကို တင်သွင်းရမှာ ဖြစ်ပါတယ်။

အဲ့ဒီထဲကမှ နိုင်ငံတော်သမ္မတ တစ်ဦးကို ရွေးချယ်တင်မြှောက်မှာဖြစ်ပြီး ကျန်တဲ့ ၂ ဦးက ဒုတိယသမ္မတတွေအဖြစ် တင်မြှောက်ခံရမှာ ဖြစ်ပါတယ်။

RFA Burmese
http://www.rfa.org/burmese
 

သမ္မတနဲ့ ဒုသမ္မတ ရွေးချယ်မည့်ရက် ပြင်ဆင်မည်


အစိုးရသစ်ကို ဦးဆောင်မယ့် သမ္မတတွေရဲ့ အမည်စာရင်းကို မတ်လ ၁၇ ရက်နေ့မှာ နောက်ဆုံးထား တင်သွင်းဖို့ သတ်မှတ်ထားတာကို လွှတ်တော်မှာ ပြင်ဆင်ဖို့ စီစဉ်နေပါတယ်။ ရွေးကောက်ပွဲမှာ တခဲနက် အနိုင်ရထားပြီး ဒုသမ္မတလောင်း ၂ ဦး တင်မြှောက်ခွင့် ရထားတဲ့ အမျိုးသား ဒီမိုကရေစီအဖွဲ့ချုပ် (NLD) ပါတီက အစိုးရသစ်ဖွဲ့စည်းရေး အရှိန်မြှင့် ဆောင်ရွက်နေချိန်မှာပဲ သမ္မတလောင်း အမည်စာရင်း တင်သွင်းမယ့် အစီအစဉ် အပြောင်းအလဲလုပ်မယ့် သတင်းတွေ ထွက်ပေါ်လာတာပါ။ အပြည့်အစုံကိုတော့ ဆက်သွယ်စုံစမ်းထားတဲ့ ဗွီအိုအေ မြန်မာပိုင်း သတင်းထောက် မေခ က သတင်းပေးပို့ ထားပါတယ်။

သမ္မတတဦးအဖြစ် ရွေးချယ်မှုတွေ မတိုင်မီ ဒုတိယသမ္မတ ၃ ဦး အမည်စာရင်း တင်သွင်းဖို့ မတ်လ ၁၇ ရက်နေ့မှာ သတ်မှတ်ထားပေမဲ့ အခုအခါ ပြင်ဆင်ဖို့ စီစဉ်နေကြတာပါ။ အင်္ဂါနေ့မှာ ကျင်းပမယ့် ပြည်ထောင်စုလွှတ်တော် အစည်းအဝေးမှာ ဒီကိစ္စကို ဆွေးနွေးမယ့် အစီစဉ်ထည့်သွင်းထားတယ်လို့လည်း NLD ပါတီရဲ့ မကွေးတိုင်း အမျိုးသား လွှတ်တော် ကိုယ်စားလှယ် ဒေါက်တာကျော်ငွေက ပြောပါတယ်။

“မနက်ဖြန်မှ ကြေညာမှာ ဟုတ်တယ် အဲလိုပါတယ်။ ကျနော်တို့တွေကိုတော့ ဘယ်သူမှတွေတော့မပြောသေးဘူး ။ ကျနော်တို့လည်း အဲဒီကိစ္စ ဒါပဲ ဆွေးနွေးနေတယ်လို့ ထင်တာပေါ့လေ။”

လွှတ်တော်မှာ ဒုသမ္မတလောင်း သုံးဦးရဲ့အမည်စာရင်းတွေကိုတော့ NLD နဲ့ တပ်မတော် ကိုယ်စားလှယ်တွေ မူလက မတ်လ (၁၇) ရက်နေ့မှာ တင်သွင်းဖို့ စီစဉ်ထားကြတာပါ။ ရွေးကောက်ပွဲ အနိုင်ရ NLD ပါတီကတော့ ပြည်သူ့လွှတ်တော် အမတ်နေရာ ၂၅၅ နေရာ၊ အမျိုးသားလွှတ်တော်မှာ ၁၃၅ နေရာ အနုိုင်ရရှိထားတဲ့အတွက် ဒုသမ္မတ ၂ ဦး ရွေးချယ်ခွင့်ရထားပြီး၊ တပ်မတော်သား ကိုယ်စားလှယ်တွေက ၁ ဦး ရွေးချယ် တင်မြှောက်ခွင့်ရမှာ ဖြစ်ပါတယ်။ NLD ပါတီ ဥက္ကဋ္ဌ ဒေါ်အောင်ဆန်းစုကြည် ကတော့ ဖွဲ့စည်းပုံအခြေခံဥပဒေပုဒ်မ ၅၉-စ အရ လက်ရှိမှာ သမ္မတတာဝန်ယူခွင့်မရပဲ ဖြစ်နေပါတယ်။

ဒါပေမဲ့လည်း တပ်မတော် ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်နဲ့ ဒေါ်အောင်ဆန်းစုကြည် တို့ မကြာသေးခင် လတွေအတွင်း တွေ့ဆုံမှုတွေကြောင့် ဒေါ်အောင်ဆန်းစုကြည် အစိုးရအဖွဲ့ကို ဦးဆောင်နိုင်မယ့် အခွင့်အလန်းတွေ ပွင့်လာတော့ မယ်လို့ မျှော်လင့် မှုတွေလည်း ထွက်ပေါ်လာပါတယ်။ဒါပေမဲ့လည်း အခုအခါ ဒုသမ္မတအမည်စာရင်း တင်သွင်းမယ့် အစီအစဉ် အပြောင်းအလဲတွေ ဖြစ်လာ တာဟာ ဒေါ်အောင်ဆန်းစုကြည် သမ္မတ တာဝန်ယူခွင့်ယူဖို့ ညှိနှိုင်းမှုတွေ ပြေလည်မှု မရတာကြောင့် ဖြစ်နိုင်တယ် လို့လည်း မြန်မာ့အရေးအကဲခတ် လေ့လာသူဦးစည်သူအောင်မြင့် က သုံးသပ်ပါတယ်။

“ဒေါ်အောင်ဆန်းစုကြည်ကို သမ္မတအနေနဲ့ တင်မြှောက်လို့ရအောင် ပုဒ်မ ၅၉ ( စ ) ကိုပေါ့နော် လွှတ်တော်ထဲမှာ ဆိုင်းငံ့တာတို့ လုပ်ဖို့အတွက်ကို တပ်မတော် ကာကွယ်ရေးဦးစီးချုပ်နဲ့ ညှိနှိုင်းမှု ဘာညာဆိုပြီးတော့မှ အချိန်ယူတာတို့ အဲဒီလိုမျိုးယူဆတယ်။ အဲဒီတော့ အခုလောလောဆယ် နောက်ဆုံးအခြေအနေမှာ အဲဒါက ညှိနှိုင်းလို့ အဆင်မပြေဘူး။ ဒီအသွင်ကူးပြောင်းရေးကာလမှာတော့ ဒေါ်အောင်ဆန်းစုကြည်အနေနဲ့ သမ္မတလုပ်ဖို့ ကြိုးစားတော့မယ့် ပုံမပေါ်ဘူး။ အဲဒါတချက်ပေါ့နော်။ ဒုတိယတချက်က ပြီးခဲ့တဲ့ရက်ပိုင်းက ဒေါ်ခင်စန်းလှိုင်တင်တဲ့ အဆို ပြဿနာပေါ့ ။ အခု NLD ဘက်က နောက်ဆုံးအဖြေက သမ္မတ တင်မြှောက်ရေးကိစ္စ အစိုးရဖွဲ့ရေးကိစ္စကို အချိန်ဆွဲထားဖို့ ဘာအကြောင်းမှ မရရှိတော့ဘူး။ စောစော စီးစီသာ သမ္မတ ၊ဒုသမ္မတတို့ရွေးထားပြီးတော့ အစိုးရ အဖွဲ့ဝင်တွေ ကိုလည်း ရွေးထား လိုက်မယ်ဆိုရင် အဲဒီ မတ်လ ၃၀ ရက်နေ့မတိုင်ခင်မှာ သူတို့ ကောင်းကောင်းမွန်မွန်လုပ်နိုင်လိမ့်မယ်လို့ ယူဆတဲ့ပုံပေါ်တယ်။ နောင်တက်လာမယ့် အစိုးရအတွက် ပိုအဆင်ပြေနိုင်တယ်လို့ ပိုအချိန်စောပြီးတော့မှ လုပ်ရတယ်လို့ထင်တယ်လေ။”

NLD ပါတီကတော့ ပြည်နယ်နဲ့ တိုင်းဒေသကြီး အစိုးရတွေ ဖွဲ့စည်းတဲ့အခါ တိုင်းရင်းသား လူနည်းစု ကိုယ်စားလှယ်တွေကို ပါဝင်ခွင့်ပေးမှာ ဖြစ်တယ်လို့လည်း ပြောဆိုထားတာပါ။ ဒါပေမဲ့လည်း ပြည်နယ်နဲ့ တိုင်းဒေသကြီး အစိုးရတွေရဲ့ အကြီးအကဲ တာဝန်တွေကိုတော့ NLD ပါတီက ကိုယ်စားလှယ်တွေကိုသာ ခန့်အပ်တာဝန်ပေးမှာ ဖြစ်တယ်လို့လည်း ပြောဆိုထားပါတယ်။

မနက်ဖြန် အင်္ဂါနေ့မှာ ကျင်းပမယ့် လွှတ်တော် အစည်းအဝေးမှာ ဒီကိစ္စကို ဆွေးနွေးမှာ ဖြစ်တယ်လို့လည်း ရခိုင်အမျိုးသားပါတီ ပြည်သူ့လွှတ်တော်ကိုယ်စားလှယ် ဦးဖေသန်း က ဗွီအိုအေကို ပြောပါတယ်။ ရွေးကောက်ပွဲမှာ တခဲနက် အနိုင်ရထားပြီး ဒုသမ္မတလောင်း ၂ ဦး တင်မြှောက်ခွင့် ရထားတဲ့ အမျိုးသား ဒီမိုကရေစီအဖွဲ့ချုပ် (NLD) ပါတီက အစိုးရသစ်ဖွဲ့စည်းရေး အရှိန်မြှင့် ဆောင်ရွက်နေချိန်မှာပဲ သမ္မတလောင်း အမည်စာရင်း တင်သွင်းမယ့် အစီအစဉ် အပြောင်းအလဲလုပ်မယ့် အခြေအနေနဲ့ ပတ်သက်လို့မသိင်္ဂီထိုက်ကမေးမြန်းရာမှာ ဦးဖေသန်းက အခုလို စပြောပါတယ်။

"ဦးဖေသန်း။ ။ မနက်ဖြန် Agenda မှာ တွေ့တာကတော့ ဒီသမ္မတ ရွေးချယ်ရေးအစီအစဉ်ကို ရက်ဆွဲဖို့ နေ့ရက်ကို ပြင်ဆင် သက်မှတ်မယ်ဆိုတဲ့ agenda တခုပါပါတယ်။ အရင်တုန်းကတော့ ကျနော်တို့ မတ်လ ၁၇ ရက်နေ့မှာ သမ္မတ ရွေးချယ်ရေးအစီအစဉ်ကို လွှတ်တော် ၂ ရပ် သီးခြားခွဲပြီးတော့ စတင်လုပ်ဆောင်မယ်ဆိုပြီးတော့ ပြောထားပါတယ်။ အခုအခါကျတော့ ပြန်ပြင်မလို့နဲ့တူပါတယ်။ ရှေ့တိုးမလား၊ နောက်ဆုတ်မလားတော့မပါပါဘူး။ ဒါပေမယ့် ကျနော့်အနေနဲ့ ထင်တာကပေါ့နော် ဒီသမ္မတရွေးချယ်ရေးအစီအစဉ်ကို ရှေ့ကို ဒီထက် နည်းနည်းတိုးပြီးတော့ ဒါမျိုးက စောစောစီးစီး လုပ်ချင်ပုံရပါတယ်။ ဘာဖြစ်လို့လဲဆိုတော့ အခြေအနေအရပေါ့နော် ဒီကိစ္စနဲ့ ပတ်သက်ပြီးတော့လည်း ဒေါ်အောင်ဆန်းစုကြည်မှာ အဖြေတခုရလောက်ပြီ၊ ၀န်ကြီးတွေရွေးဖို့ ပြည်ထောင်စု ၀န်ကြီးတွေရွေးဖို့ ကိစ္စလည်း အစီအစဉ် ရာထားချက်တွေပြီးလောက်ပြီ။ အဲဒါနဲ့ ဒီနေ့ရက်ကို ရှေ့တိုးပြီးတော့ သက်မှတ်တယ်၊ သက်မှတ်မယ်လို့ ကျနော်ထင်တာပေါ့နော်။ အဲလို သတ်မှတ် လိုက်ရင်တော့ ကျနော်တို့ သမ္မတက အမြန်ဆုံးဖြစ်လာမယ်။ ပြီးတော့မှ တဆက်တည်းပဲ ကျနော်တို့ ပြည်ထောင်စုဝန်ကြီးတွေ၊ ၀န်ကြီး ဌာနတွေ ရွေးချယ် သက်မှတ်တဲ့လုပ်ငန်းစဉ်တွေကို ဆက်လုပ်လို့ရမယ်။ ပြီးမှ ကျနော်တို့ ပြည်နယ်တွေ တိုင်းဒေသကြီး ၀န်ကြီးချုပ်တွေကို ဆက်ပြီးတော့ ရွေးဖို့အစီအစဉ်တွေ အများကြီးရှိပြီးတော့ အဲဒီလို ရက်ရွေ့ပြီးတော့ ရှေ့ကို တိုးသက်မှတ်တာ လို့ ကျနော်ယူဆပါတယ်။

မသိင်္ဂီထိုက်။ ။ ဟုတ်ကဲ့ ။ ဆရာ ဒီ သမ္မတ အမည်စာရင်းနဲ့ပတ်သက်ပြီးတော့ရော ဆရာတို့ ဘယ်လောက်ထိ သိထားပါပြီလဲရှင့်။ ဒေါ်အောင်ဆန်းစုကြည် သမ္မတ ဖြစ်ခွင့်ရရော နီးစပ်ပါသလား။

ဦးဖေသန်း။ ။ ကျနော်တို့ကတော့ မီဒီယာ သတင်းတွေ အရပေါ့ဗျာ ပြောရမယ် ဆိုရင်တော့ တပ်မတော် ကာကွယ်ရေး ဦးစီးချုပ်နဲ့ ဒေါ်အောင်ဆန်းစုကြည် တို့ အဲဒီကိစ္စမှာ ပြေလည်မှု သိပ်မရဘူးလို့ ကျနော်တို့ ကြားပါတယ်။ ပြီးတော့ ဒီ လက်ရှိအစိုးရနဲ့လည်းပဲ နည်းနည်း အဖုအထစ်လေးတွေရှိတာပေါ့နော်။ ဟိုဘယ်လိုပြောမလဲ ဖြစ်ပျက်ခဲ့တဲ့ ကိစ္စတွေဒါတွေလည်း ပါတာပေါ့။ ဒါကြောင့်မို့လို့ ကျနော်အထင်ကတော့ပေါ့နော် ၊ အထင်ပဲပြောပါမယ် သူ့အနေနဲ့ သမ္မတဖြစ်ခွင့်ကို စွန့်လွတ်လိုက်ပြီလို့ ယူဆတဲ့အတွက်နဲ့ ဒီလိုနေ့စွဲကို ရက်ရှေ့တိုးပြီးတော့ သက်မှတ်တယ်လို့ပဲ ကျနော်တို့ ယူဆပါတယ်။ အဲဒါကြောင့် ကျနော်တို့ကတော့ မပြောတက်ဘူးဗျ။ ဒါပေမယ့် ဒါက ဒေါ်အောင်ဆန်းစုကြည် တယောက်တည်းပဲ သိမယ့်ကိစ္စပဲဖြစ်ပါတယ်။”

မေခ, မသိင်္ဂီထိုက် / ဗွီအိုအေ (မြန်မာပိုင်း)
http://burmese.voanews.com

ဘူးသီးတောင်မြို့နယ် ပညာရေးဌာန၌ ဝန်ထမ်းခေါ်ယူရာတွင် လေဘာဖိုးနှင့် လျှောက်လွှာဖိုး ငွေသောင်းချီပေးခဲ့ရ


ဖေဖော်ဝါရီ ၂၉

ဘူးသီးတောင်မြို့နယ် ပညာရေးဌာန၌ ဝန်ထမ်းများခန့်ထားနိုင်ရန် လျှောက်လွှာခေါ်ယူရာတွင် ငွေသောင်းချီပေးဆောင်ရကာ လျှောက်လွှာများကို ထောင်နှင့်ချီပြီး ထုတ်ပေးခဲ့ရကြောင်း သိရသည်။

အဆိုပါဝန်ထမ်းခေါ်ယူရာတွင် ဘူးသီးတောင်မြို့နယ်အတွင်း ဝန်ထမ်း ၇ ဦးသာ ခန့်ထားရန်ဖြစ်သော်လည်း လူထောင်နှင့်ချီ၍ လျှောက်လွှာတင်ခဲ့ကြကာ လျှောက်လွှာထုတ်ယူစဉ်က ငွေမပေးရသော်လည်း လျှောက်လွှာတင်သည့် အချိန်တွင်ငွေ ၂၀၀၀ ကျပ်အား ပေးဆောင်ခဲ့ရပြီး လေဘာလုပ်ရန် အချိန်မရသည့်အတွက် လေဘာလုပ်ပေးမည်ဟုဆိုကာ ငွေ ၁၀၀၀၀ ကျပ်ကိုလည်း ပေးဆောင်ခဲ့ရကြောင်း စာမေးပွဲဝင်ရောက်ဖြေဆိုခဲ့သူများထံမှသိရသည်။

“ ကျမတို့ လျှောက်လွှာတင်တော့ လေဘာက စစ်တွေကိုသွားလုပ်ရမယ်။ အချိန်မမီတော့ဘူး။ ဒီတော့ သူတို့လုပ်ပေးမယ်ဆိုတဲ့အတွက် ငွေ ၁၀၀၀၀ ကိုပေးခဲ့ရတယ်။ နောက် လျှောက်လွှာတင်တော့မှ ၂၀၀၀ ပေးခဲ့ရတယ်။ ကျမတို့က မောင်တောမှာ ဖြေဆိုရတာဖြစ်တယ်။ အားလုံးတော့ ငွေ ၃၀၀၀၀ လောက်ကိုကုန်ကျခဲ့တယ်။ ”ဟု ဘူးသီးတောင်မြို့နယ် စေတီတောင်ကျေးရွာမှ စာရေးဝန်ထမ်းနေရာကို ဝင်ရောက်ဖြေဆိုခဲ့သူတစ်ဦးကပြောသည်။

ယခုကဲ့သို့ ပညာရေးဌာနမှတာဝန်ခံပြီး ငွေတောင်းယူကာ လေဘာပြုလုပ်ပေးမည်ဟုဆိုသည်မှာ ပွင့်လင့်မြင်သာမှုမရှိဘဲ လူထောင်နှင့်ချီလျှောက်ထားကြသည့်အလုပ်အတွက် ခန့်အပ်မည့်သူအရေအတွက်နှင့်နှိုင်းယှဉ်ပါက မလုပ်သင့်သည့်အလုပ်တစ်ခုဖြစ်ကြောင်း ဘူးသီးတောင်မြို့နယ်မှ ပြည်နယ်လွှတ်တော်ကိုယ်စားလှယ် ဦးထွန်းအောင်သိန်းကပြောသည်။

“ ကျနော်တို့ကြားရတာကတော့ လောလောဆယ်မှာ အနီးကပ်ဖြစ်နေတဲ့အတွက်ကြောင့် လေဘာကိုဘယ်သူမှ သွားမလုပ်နိုင်ကြဘူး။ အဲဒါကြောင့် လေဘာလုပ်ပေးမယ်ဆိုပြီး ငွေတစ်သောင်းစီ လက်ခံကြောင်းကြားပါတယ်။ ပြီးတော့ အခုလိုလက်ခံပြီးနောက်ပိုင်း အဲဒီအထဲက ၇၅ ရာခိုင်နှုန်းလောက်ကို ခန့်ပေးမယ်ဆိုရင်တော့ ကောင်းမယ်။ အခုက လူတစ်ထောင်လျှောက်လွှာတင်တဲ့အထဲက လူ ၇ ဦးကိုသာခန့်အပ်မယ်ဆိုတော့ ဒါဟာလျှောက်လွှာကိုလည်း အကန့်အသတ်နဲ့ပဲ ခေါ်သင့်တယ်လို့ထင်တယ်။ ” ဟု ဦးထွန်းအောင်သိန်း ကဆိုသည်။

ယင်းအကြောင်းအရာနှင့်ပတ်သက်ပြီး ရခိုင်ပြည်နယ်ပညာရေးမှူးမှ ငွေမကောက်ခံရန် ညွန်ကြားထားပြီး လေဘာဆိုသည်မှာလည်း မိမိတို့ဌာနနှင့် မသက်ဆိုင်ကြောင်းလည်း ပြည်နယ်ပညာရေးကြားရေးမှူးဦးလှစိန်ထွန်းက ဆိုသည်။
“ လူတစ်ရာလျှောက်ရင် လေဘာတစ်ရာပါရပါမယ်။ ခန့်မဲ့သူက တစ်ယောက်ပဲဖြစ်ဖြစ်ပေါ့။ ကျနော်တို့အနေနဲ့ကတော့ ဒီလိုမလုပ်နဲလို့ပြောပြီးသားဖြစ်တယ်။ ဒီတော့ ဒီကိစ္စကို တကယ်လုပ်တယ် မလုပ်ဘူးဆိုတာကို စုံစမ်းသွားမယ်။ ” ဟု ပြည်နယ်ပညာရေးမှူး ဦးလှစိန်ထွန်းက ပြောကြားသည်။

အဆိုပါစာမေးပွဲကို ဖေဖေါ်ဝါရီလ ၂၁ ရက်နေ့ကဖြေဆိုခဲ့ကြပြီး ခေါ်ယူခဲ့သည့်ဝန်ထမ်းနေရာများမှာ စာရေး၊ ယာဉ်မောင်း ၅ ၊ စာကူးစက်လှည့်အကူ၊ စက်မောင်း ၅ ၊ လုပ်သားသိပ္ပံခန်း၊ ကျောင်းရုံးအကူ၊ သန့်ရှင်းရေး အကူ၊ လုပ်သားဥယျာဉ်နှင့်အထွေထွေလုပ်သားများတို့ဖြစ်ပြီး ဘူးသီးတောင်မြို့နယ်တွင် လုပ်သားသိပ္ပံခန်းနှင့် လုပ်သားဥယျာဉ်တို့မှာ နေရာလွတ်မရှိကြောင်းလည်း သတင်းရရှိသည်။

Development Media Group
https://www.facebook.com/DevelopmentNJ

Mumtaz Qadri ကို ပါကစ္စတန် ကြိုးပေးကွပ်မျက်

 Mumtaz Qadri ကို အစ္စလာမ္မစ် အုပ်စု တချို့က သူရဲကောင်းအဖြစ် ချီးမြှောက်ခဲ့ကြ။
ပါကစ္စတန် နိုင်ငံမှာ ဘာသာရေး စော်ကားမှု ဆိုင်ရာ ဥပဒေတွေကို ကန့်ကွက်ခဲ့တဲ့ ပန်ဂျပ်ပြည်နယ် အုပ်ချုပ်ရေးမှူးကို ရဲတပ်ဖွဲ့ဝင် ကိုယ်ရံတော် တစ်ယောက်က ပစ်သတ်ခဲ့တဲ့ အမှုအတွက် အဲဒီ ရဲကို ကြိုးပေး ကွပ်မျက် လိုက်ပြီလို့ ပါကစ္စတန် အရာရှိတွေက ပြောပါတယ်။

Mumtaz Qadri ဆိုတဲ့ အဲဒီ ကိုယ်ရံတော်ဟောင်းက ပန်ဂျပ် ပြည်နယ် အုပ်ချုပ်ရေးမှူး Salman Taseer ကို ၂၀၁၁ ခုနှစ်တုန်းက အစ္စလာမ်မာဘတ် မြို့မှာ ပစ်သတ်ခဲ့တာပါ။

အဲဒီ အချိန်က Qadri ကို အစ္စလာမ္မစ် အုပ်စု တချို့က သူရဲကောင်း အဖြစ် ချီးမြှောက် ခဲ့ကြပြီး သူ့ကို ထောက်ခံသူ ထောင်နဲ့ချီ ရှိခဲ့ပါတယ်။ နောက်တစ်နှစ် အကြာမှာတော့ သူ့ကို တရားရုံးက သေဒဏ် ချမှတ် ခဲ့တာ ဖြစ်ပါတယ်။

သူ့ကို ကြိုးပေး ကွပ်မျက်ခဲ့တဲ့ ဒီကနေ့ တနင်္လာနေ့မှာလည်း ကန့်ကွက် ဆန္ဒပြသူတွေ လမ်းတွေပေါ် ထွက်ခဲ့ကြပါတယ်။ ဆန္ဒပြသူတွေက ဝန်ကြီးချုပ် နာဝက်ဇ် ရှာရစ်ဖ်ရဲ့ ပုံတွေနဲ့ ကားတာရာတွေကို မီးရှို့ ခဲ့ကြပြီး မြို့တော် အစ္စလာမ်မာဘတ် အနီးက အဝေးပြေး ကားလမ်းကို ယာယီ ပိတ်ခဲ့ရပါတယ်။

Qadri ရဲ့ အိမ်အနီး ဝန်းကျင်မှာ အဓိကရုဏ်း နှိမ်နင်းရေး တပ်ဖွဲ့ဝင်တွေ ထူထူထပ်ထပ် ချထားတယ်လို့ သတင်းတွေက ဆိုပါတယ်။

RFA Burmese
http://www.bbc.com/burmese

ဘူးသီးတောင်မှာ တိုက်ပွဲဖြစ်တယ်လို့ အေအေ ထုတ်ပြန်

Arakan Army AA ခေါ် ရက္ခိုင့်တပ်မတော် တပ်ဖွဲ့ဝင် တချို့ကို တွေ့ရစဉ်။ Photo: Arakan Army
ရခိုင်ပြည်နယ် ဘူးသီးတောင်မြို့နယ် မြန်မာ-ဘင်္ဂလားဒေ့ရ်ှနယ်စပ် နယ်ခြားမှတ်တိုင်အမှတ်- ၆၃၊ ၆၄ အနီးမှာ ရက္ခိုင့်တပ်မတော် AA နဲ့ အစိုးရတပ်မတော်တို့ ပြီးခဲ့တဲ့ ဖေဖော်ဝါရီလ ၂၇ ရက်နေ့က တိုက်ပွဲဖြစ်ပွားခဲ့ကြောင်း ရက္ခိုင့်တပ်မတော် AA က သတင်းထုတ်ပြန်လိုက်ပါတယ်။

ဒါ့အပြင် မြန်မာ-ဘင်္ဂလားဒေ့ရ်ှနယ်စပ်မှာ အစိုးရတပ်မတော်ဖက်က တပ်အင်အား တိုးချဲ့လာတာတွေ ရှိတယ်လို့လည်း ပါရှိပါတယ်။

ဒီသတင်းနဲ့ပတ်သက်ပြီး အစိုးရတပ်မတော်ဘက်က သတင်းထုတ်ပြန်ကြေညာတာမရှိသေးပါဘူး။

အစိုးရတပ်မတော်နဲ့ AA တပ်ဖွဲ့တို့ဟာ ပြီးခဲ့တဲ့နှစ် ဧပြီလက ကျောက်တော်မြို့နယ် ပီချောင်းဒေသမှာ တစ်ကြိမ်၊ ဒီဇင်ဘာလကုန်လောက်မှာ တစ်ကြိမ် တိုက်ပွဲဖြစ်ပွားခဲ့ပါတယ်။

အဲ့ဒီတိုက်ပွဲတွေကြောင့် ဒေသခံ ၂ဝဝ လောက်ဟာ နီးစပ်ရာကျေးရွာတွေကို ထွက်ပြေးတိမ်းရှောင်ခဲ့ကြတာဖြစ်ပြီး အခုချိန်ထိ နေရပ်မပြန်ရဲကြသေးဘူးလို့ သိရပါတယ်။

RFA Burmese
http://www.rfa.org/burmese

ယနေ့ နံနက် KIA တပ်မဟာ ၆ နှင့် အစိုးရတပ် မိနစ် ၃၀ ကြာ တိုက်ပွဲဖြစ်

KIA တပ်မဟာ ၆ တံဆိပ်
ရှမ်းပြည်နယ်မြောက်ပိုင်း ကချင်လွတ်လပ်ရေးတပ်မတော် KIA တပ်မဟာ ၆ နှင့် အစိုးရတပ်များ ယနေ့ နံနက် မိနစ် ၃၀ ကြာ တိုက်ပွဲဖြစ်ပွား ခဲ့ပါသည်။

KIA တပ်ရင်း ၃၆ နှင့် ၃၈ အခြေချသည့် မုန်းကိုမြို့ အရှေ့ဘက်ရှိ လွယ်ဝင်းရွာ အနီးမှာ ယနေ့မနက် အစိုးရတပ်များ စစ်ဆင် ၀င်ရောက်လာခြင်းကြောင့် တိုက်ပွဲငယ် ဖြစ်ပွါးခဲ့ကြောင်း KIA တပ်မဟာ ၆ တာဝန်ရှိသူတစ်ဦး အတည်ပြုပြောခဲ့သည်။

တိုက်ခိုက်မှုတွင် အစိုးရဘက် (၄)ဦး ဒဏ်ရာရပြီး KIA ဘက်တွင် ထိခိုက်မှု မရှိသော်လည်း လက်နက်အချို့ စွန့်လွတ်ခဲ့ရကြောင်း KIA တပ်မဟာ ၆ တာဝန်ရှိသူတစ်ဦး ကချင်သတင်းဌာန KNG ကို ပြောသည်။

တပ်ရင်း နာမည် မသိရသော အစိုးရတပ်ဖွဲ့များသည် မုန်းကိုဘက်မှ စစ်ကြောင်း တစ်ကြောင်း၊ မုန်းရာ-မန်ကောင်း ဘက်မှ တစ်ဖွဲ့တက်လာပြီး လွယ်ဝင်း ရှိ KIA တပ်ရင်း ၃၆ နှင့် ၃၈ စုပေါင်း တပ်ဖွဲ့ကို ယမန်နေ့ ညတွင် ပစ်ခတ်ခဲ့ကြောင်း သိရပါသည်။

ယခုချိန် မုန်းကိုမှ တက်လာသည့် အစိုးရတပ်မှာ မုန်းရာဘက် လွယ်ကန် သို့ရောက်နေပြီး မုန်းရာ၊ မန်ကောင်း ဘက်မှ တက်လာသည့် အစိုးရတပ်သည်လည်း မုန်းကို တွင် ရောက်နေကြောင်း သိရသည်။
KIA တပ်မဟာ (၄) အခြေချသည့် ရှမ်းပြည်နယ်မြောက်ပိုင်းတွင် KIA တပ်မဟာ ၆ ကို ယခင် ဗမာပြည် ကွန်မြူနစ်ပါတီ (CPB) ဌာနချုပ်ဖြစ်ခဲ့သည့် မုန်းကိုဒေသတွင် ဖေဖော်ဝါရီ ၂၆ ရက်နေ့ တရားဝင် ဖွဲ့စည်းခဲ့ပြီး သုံးရက် အကြာ လွယ်ဝင်းတွင် တိုက်ပွဲ ဖြစ်လာသည်။

ယမန်နှစ် အောက်တိုဘာလ အစိုးရနှင့် ညီညွတ်သောတိုင်းရင်းသားလူမျိုးများဖယ်ဒရယ်ကောင်စီ UNFC မှအဖွဲ့ဝင်အချို့ တစ်နိုင်ငံလုံးအပစ်အခတ်ရပ်စဲရေးစာချုပ် NCA လက်မှတ် ရေးထိုးပြီးနောက် KIO/KIA ၏ မဟာမိတ်များဖြစ်သည့် သျှမ်းပြည်နယ် ပြန်လည်ထူထောင်ရေး ကောင်စီ (RCSS/SSA)၊ ပလောင်ပြည်နယ် လွတ်မြောက်ရေးတပ်ဦး (PSLF/TNLA) နှင့် ကိုးကန့်တပ်ဖွဲ့ MNDAA တပ်ဖွဲ့များသည် သံလွင်မြစ် အနောက်ဘက် မုန်းကိုဒေသသို့ ၀င်ရောက်ကာ တပ်နေရာယူထားမှုများ ပြုလုပ်လာနေပြီဖြစ်သည်။

ယမန်နစ် နိုဝင်ဘာလမှ ရှမ်းပြည်မြောက်ပိုင်းတွင် NCA လက်မှတ်ရေးထိုးသော RCSS/SSA တပ်များသည် PSLF/TNLA နှင့် တိုက်ပွဲများ ပြင်းပြင်း ထန်ထန် ဖြစ်ပွားနေသော်လည်း KIA နှင့်မူ တိုက်ပွဲ ဖြစ်ပွါးခြင်း မရှိ သေးကြောင်း သိရသည်။

 Kachinnews
http://burmese.kachinnews.com

တောင်တွင်းကြီးမြို့နယ် ဖျောက်ဆိတ်ကုန်းကျေးရွာ၌ မီးလောင်မှုဖြစ်ပွား၊ လူနေအိမ်(၁၀၂)အိမ်ခန့် မီးလောင် ဆုံးရှုံး



 တောင်တွင်းကြီးမြို့နယ် ဖျောက်ဆိတ်ကုန်းကျေးရွာ၌ မီးလောင်မှုဖြစ်ပွား

တောင်တွင်းကြီး၊ ဖေဖော်ဝါရီ ၂၉

မကွေးတိုင်းဒေသကြီးတောင်တွင်းကြီးမြို့နယ်ညာဂမိုးအုပ်စု ဖျောက်ဆိတ် ကုန်းကျေးရွာ၌ဖေဖော်ဝါရီ ၂၉ ရက် ညနေ (၃)နာရီ (၁၀)မိနစ် ခန့်တွင် ဦးမင်းမင်း (၂၉)နှစ်(ဘ)ဦးကျော်လှနေအိမ်မီးကြွင်း မီးကျန်မှ စတင်ကာ မီးလောင်ကျွမ်း ခဲ့ကြောင်း အဆိုပါမီးလောင်ကျွမ်းရာသို့မြို့နယ်အုပ်ချူ ပ်ရေးမှူးဦးသိန်းဇော်၊ မြို့နယ်မီးသတ်ဦးစီးမှူးဦးဌေးလွင်နှင့် ဌာနဆိုင်ရာ တာဝန်ရှိသူများမီးသတ် တပ်ဖွဲ့ဝင်များဒေသခံပြည်သူများမှ မီးသတ်ကား(၁၀)စီးရေသယ်ယာဉ် (၂)စီး တို့ဖြင့်ဝိုင်ဝန်းငြိမ်းသတ် ခဲ့သဖြင့် ညနေ (၃)နာရီ (၄၅)မိနစ်အချိန်ခန့်တွင် မီးညွန်ကျိူးခဲ့ပြီး ညနေ (၄)နာရီ အချိန်တွင် လုံးဝမီးငြ်ိမ်းသွား ခဲ့ကြောင်း သိရသည်။

အဆိုပါ မီးလောင်ကျွမ်းမှုကြောင့်လူနေအိမ်(၁၀၂)အိမ်ခန့်မီးလောင် ဆုံးရှုံးသွားကြောင်းသိရသည်။

နိုင်ဝင်း (တောင်တွင်းကြီး ပြန်/ဆက်)
MOI Webportal Myanmar
https://www.facebook.com/MOIWebportalMyanmar

ကလေးမြို့လမ်းဆုံအနီး သုံးထပ်တိုက် အဆောက်အဦသစ်၏ အဖီ လသာဆောင်ပြိုကျမှု ဖြစ်ပွား ၂ ဦးသေဆုံး


 ကလေးမြို့လမ်းဆုံအနီး သုံးထပ်တိုက် အဆောက်အဦသစ်၏ အဖီ လသာဆောင်ပြိုကျမှု ဖြစ်ပွား

ကလေး ဖေဖ၀ါရီ ၂၉

ကလေးမြို့ လမ်းဆုံအရှေ့ဘက် ဗိုလ်ချုပ်လမ်းမဘေးရှိ ပေါ်ဦး ဘိနပ် ဆိုင်နှင့် နေခြည်ဦး အထည် ဘိနပ်နှင့် အားကစား ပစ္စည်းရောင်းဝယ်ရေး ဆိုင်ကြား ရှိဆောက် လုပ်ဆဲ သုံးထပ်တိုက် ဧကရီဘိနပ်ဆိုင်၏ Steel Structure အဖီထုတ်လသာဆောင် ခန့်မှန်း အလျား ၂၀ပေ၊ အနံ ၁၂ ပေ၊ အမြင့် ၁၂ ပေ သံကူကွန်ကရစ် လောင်း သည့် နေရာကို ဖေဖ၀ါရီ ၂၉ ရက် မွန်းလွဲ ၁၂ နာရီ ခွဲခန့်က ပြိုကျ မှု ဖြစ်ပွား ခဲ့သည်။

ယင်းသုံးထပ်တိုက်၏ အဖီ လသာဆောင် ပြိုကျမှုတွင် အိမ်ပိုင်ရှင် ဦးဌေးအောင်နှင့် တူဖြစ်သူ ဦးစည်သူ တို့ သည် အဖီ လသာဆောင်ပြိုကျ သည့် နေရာတွင်ပိကျကြပြီး ကယ်ဆယ်ရေးလုပ်ငန်းများ အမြန်ဆုံးပြုလုပ်ကာ ကလေးမြို့ ပြည့်သူ့ ဆေးရုံသို့ အချိန်မီ ပို့ခဲ့ကြသော် လည်း ပြည့်သူ့ဆေးရုံကြီး တွင် နှစ်ဦးစလုံး အသက်ဆုံးရှုံး ခဲ့ကြကြောင်း သိရသည်။

အဆိုပါ အဖီ လသာဆောင်ပြိုကျမှု ဖြစ်ပွားခြင်း စက်မှု လယ်ယာဦးစီး ဌာန ၏ မြေကော်စက်နှစ်စီး၊ မီးသတ်ကား နှစ်စီးနှင့် မီးသတ် တပ်ဖွဲ့ဝင် များ၊ ပြည့်သူ့ ရဲတပ်ဖွဲ့ဝင်များ၊ ရပ်ကွက်အုပ်ချုပ်ရေးမှူး နှင့် ရပ်ကွက် နေပြည် သူများ က ကလေး ခရိုင် စီမံခန့်ခွဲမှု ကော်မတီ ဥက္ကဌနှင့်မြို့နယ် ဖွံ့ဖြိုး တိုးတက် မှုအထောက်အကူပြု ကော်မတီ ၀င်များ၏စီမံ ကွပ်ကဲမှုဖြင့် ကယ်ဆယ်ရေး လုပ်ငန်းများကို အချိန် နှင့်တပြေးညီဆောင်ရွက် လျက် ရှိကြ သည်။

ကလေးမြို့လမ်းဆုံတွင် ပြည်သူများ သွားလာရေး ပြန်လည် အစဉ်ပြေချောမွေ့ စေရေး အတွက် လည်း မြို့နယ်စည် ပင် သာယာရေး ကော်မတီနှင့်ပြည့် သူ့ ဆောက်လုပ်ရေး လုပ်ငန်းမှ လမ်းဦးစီး ဌာန တို့၏ မြေသယ် မော်တော် ယာဉ် များ ကို အသုံးပြုလျက် အဖီလ သာဆောင်ပြိုကျ မှု ရှင်းလင်းခြင်း လုပ်ငန်းများ ကိုဆောင်ရွက် ကြကြောင်း သိရ သည်။

(ကလေးမြို့-ခရိုင်ပြန်/ဆက်)
MOI Webportal Myanmar
https://www.facebook.com/MOIWebportalMyanmar

မြောက်ဦးတွင် သစ်ပင်အကိုင်းခုတ်ရာမှ ဓာတ်မီးတိုင်ကြိုးရိုက်မိ၍ သီလရှင် တစ်ပါး သေဆုံး


ရခိုင်ပြည်နယ် မြောက်ဦးတွင် သစ်ပင်ခုတ်ရာမှ ဓာတ်မီးတိုင်ကျိုးပြီး ပြတ်ကျသွားသော ကြိုးရိုက်မိ၍ သီလရှင် တစ်ပါး ကွယ်လွန်သွားကြောင်း သတင်း ရရှိသည်။

“ ဖြစ်တာက ဒီကနေ့ မွန်းလွဲ ၂ နာရီခွဲက ဖြစ်ပွားတာပါ။ ကားလမ်းပေါ်မှ မလွတ်ဘဲ ဖြစ်နေတဲ့ သစ်ကိုင်းကို ခုတ်ရာမှာ သစ်ကိုင်းက ဓာတ်တိုင်ပေါ် ပိကျပြီး ဓာတ်တိုင်ကျိုးတယ်။ မီးကြိုးက သီလရှင်ရဲ့ ခေါင်းကို လာရိုက်မိပြီး သေဆုံး သွားတာ ဖြစ်ပါတယ်” ဟု မြောက်ဦးမြို့နယ် နယ်ထိန်းရဲ တာဝန်ရှိသူ တစ်ဦးက နိရဉ္စရာသို့ ပြောသည်။

သီလရှင်၏ မြောက်ဦး ဗန္ဓုလ ကျောင်းမှ ဖြစ်ပြီး လူအမည်မှာ မလှအေးဖြစ်ကြောင်း၊ လက်ထောက် မြို့နယ် ပညာရေးမှူး (ငြိမ်း) ဦးကျော်လှဦး၏ ညီမဖြစ်ကြောင်း သိရသည်။

အခင်းဖြစ်ပွားမှုမှာ မြောက်ဦး ကျောက်ရစ်ကေ ရပ်ကွက်တွင် ဖြစ်ပွားခဲ့ခြင်း ဖြစ်ပြီး သီလရှင်မှာ ဓာတ်တိုင်ကျိုးပြီး မီးကြိုးပြတ်ကျစဉ် လမ်းသွားနေရာမှ ယခုကဲ့သို့ ၀မ်းနည်းကြေကွဲဖွယ်ရာ ဖြစ်ရပ်နှင့် ကြုံခဲ့ရကြောင်း မြောက်ဦး ဒေသခံ ဦးဘညွှန့်က ပြောသည်။

သစ်ပင်ခုတ်သူမှာ ဦးမုန်တိုင်း ဖြစ်သည်။ သီလရှင်၏ ဦးခေါင်းမှာ ဓာတ်ကြိုးထိမှန်သဖြင့် နှစ်ခြမ်းကွဲအက်သွားသည်ဟု သိရသည်။

သူငါ (မြောက်ဦး)
Arakan State
https://www.facebook.com/NarinjaraNews

မွေးစကလေးကို သတ်ပြီး အမှိုက်ပုံးထဲ ပစ်ခဲ့တဲ့ မိခင် ချင်းမိုင်တွင် ဖမ်းမိ


ထိုင်းနိုင်ငံ ချင်းမိုင်မြို့က အသက်(၂၀)အရွယ် ဟိုတယ်ဝန်ထမ်းအမျိုးသမီးတစ်ဦးကို မွေးစကလေး သတ်ပြီးအမှိုက်ပုံးထဲ ပစ်ထားသူလို့ယူဆတဲ့အတွက် ဖေဖော်ဝါရီလ (၂၄)ရက်က ဖမ်းဆီးလိုက်ပါတယ်။

ချင်းမိုင်မြို့က နာမည်ကြီးဟိုတယ်တစ်ခုရဲ့ အိမ်ဖော်အလုပ်သမားအိပ်တဲ့ တိုက်နံပါတ်(၂)မှာ ၂၀၁၅ ခုနှစ် ဒီဇင်ဘာလ ၂၉ ရက်က တွေ့ခဲ့ရတဲ့ ကလေးငယ်အလောင်းနဲ့ ပတ်သက်လို့ ဖမ်းဆီးခံလိုက်ရတာ ဖြစ်ပါတယ်။

ဒီကလေးငယ်ဟာ (၉)လကိုယ်ဝန်နဲ့ မွေးထားခြင်းဖြစ်ပြီး အသက်မရှူနိုင်အောင် အဝတ်စတွေနဲ့ ရစ်ပတ်ထားတာကို တွေ့ခဲ့ရတာပါ။

ဒီအမှုကိုစစ်ဆေးရာကနေ ဟိုတယ်မှာ အလုပ်လုပ်နေတဲ့ ရှမ်းအမျိုးသမီးတစ်ယောက် ကိုယ်ဝန်နဲ့ ရှိခဲ့ဖူးတာကြောင့် သူ့ကို ရဲတပ်ဖွဲ့က DNA စစ်ဆေးရာကနေ ကလေးနဲ့ DNA တူနေတာကို တွေ့လိုက်ရတာပါ။

ဟိုတယ်က CCTVကိုပြန်စစ်ဆေးတဲ့အခါမှာလည်း ဒီအမျိုးသမီးက အမှိုက်အိတ်နဲ့ ထုတ်ထားတဲ့ကလေးကို အမှိုက်ပုံးထဲပစ်နေတာ တွေ့ရပါတယ်။

ထိုင်းနိုင်ငံသားတစ်ယောက်နဲ့ ချစ်သူဖြစ်ခဲ့ပြီး ကိုယ်ဝန်ရတဲ့အခါ ချစ်သူက လမ်းခွဲသွားတာကြောင့် ကလေးကို ကိုယ်တိုင်မွေးပြီး ကလေးပါးစပ်ကို အဝတ်နဲ့ပိတ်ပြီး အမှိုက်ပုံးထဲသွားပစ်ခဲ့တာလို့ ဒီအမျိုးသမီးက ဝန်ခံလိုက်တဲ့အတွက် ရဲတပ်ဖွဲ့က အမှုဖွင့်ပြီး ဥပဒေအရ အရေးယူထားတယ်လို့ သိရတယ်။

ဘာသာပြန် ။ ။ ‪‎နန်းမောက်ကွမ်‬
Ref; dailynews
Tachileik News Agency
http://www.tachileik.net

အမေရိကန်နိုင်ငံ တက္ကဆက်ပြည်နယ်တွင် လေယာဉ်ပျက်ကျမှုကြောင့် လေးဦး သေဆုံး

အမေရိကန်နိုင်ငံ တက္ကဆက်ပြည်နယ်တွင် ပျက်ကျခဲ့သည့် လေယာဉ်အားတွေ့ရစဉ် (ဓာတ်ပုံ-အင်တာနက်)
    ဟူစတန်၊ ဖေဖော်ဝါရီ ၂၉ ရက် (ဆင်ဟွာ)

    အမေရိကန်နိုင်ငံ တက္ကဆက်ပြည်နယ် College Station မြို့၏ အရှေ့တောင်ဘက်ရှိ နာရီဝက်ခန့် ခရီးသွား ရသည့် Navasota မြို့တွင် ဖေဖော်ဝါရီလ ၂၈ ရက်က လေယာဉ်တစ်စီး ပျက်ကျခဲ့မှုကြောင့် ကလေးငယ် နှစ်ဦး အပါအဝင် လူလေးဦး သေဆုံးခဲ့ကြောင်း သိရသည်။

ယင်းလေယာဉ်သည် ထိုင်ခုံလေးခုံပါ အင်ဂျင်တစ်လုံးတပ် Cirrus SR-20 လေယာဉ်ငယ် ဖြစ်ပြီး လေဆ်ိပ်သို့ ဆင်းသက်ရန် ပြင်ဆင်နေစဉ် ဒေသစံတော်ချိန် ၁၀ နာရီ၌ ပျက်ကျခဲ့ခြင်း ဖြစ်ကြောင်း ပြည်တွင်း ရုပ်သံ ထုတ်လွှင့်ရေး ABC13 ကဖော်ပြခဲ့သည်။

အဆိုပါ လေယာဉ်ငယ်အား Air Akhtar ကုမ္ပဏီက ပိုင်ဆိုင်ပြီး ဟူစတန်မြို့ ရှိ David Wayne Hooks လေဆိပ်မှ ဒေသစံတော်ချိန် ၈း၁၇ နာရီတွင် ထွက်ခွာလာခဲ့ရာ Navasota လေဆိပ်နားတွင် ၉း၂၀ နာရီ၌ ပျက်ကျခဲ့ခြင်း ဖြစ်ပြီး လေယာဉ်ပေါ်တွင် လိုက်ပါလာသည့် ခရီးသည် လေးဦးစလုံး သေဆုံးခဲ့ကြောင်း သိရသည်။
ရဲတပ်ဖွဲ့က အဆိုပါ လေယာဉ် ပျက်ကျမှုသည် ကြုံတောင့်ကြုံခဲ ပျက်ကျမှု တစ်ခုဖြစ်ပြီး ဖယ်ဒရယ် လေကြောင်း အုပ်ချုပ်ရေး (FAA) က လေယာဉ် ပျက်ကျရခြင်း အကြောင်းရင်းကို စတင် စုံစမ်းနေကြောင်း ပြောကြားခဲ့သည်။

(Xinhua)
http://www.xinhuamyanmar.com

KIA တပ်မဟာ (၆) ကို ရှမ်းမြောက်ဒေသတွင် တိုးချဲ့ဖွဲ့စည်းမှု ပြည်ထောင်စု ငြိမ်းချမ်းရေးဖော်ဆောင်မှု ကော်မတီ (UPWC) အပြင်းထန် ရှုံ့ချ


ကေအိုင်အေ ကချင်လွတ်မြောက်ရေးတပ်မတော်မှ ရှမ်းပြည်နယ်မြောက်ပိုင်းဒေသတွင် တပ်မဟာ ( ၆) အမည်ဖြင့် တပ်ရင်းတိုးချဲ့ ဖွဲ့စည်းခဲ့မှုအပေါ် အစိုးရ၏ ပြည်ထောင်စု ငြိမ်းချမ်းရေး ဖော်ဆောင်မှု လုပ်ငန်းကော်မတီမှ အပြင်းထန် ရှုံ့ချလိုက်ပါသည်။

ဖေဖော်ဝါရီလ ၂၉ ရက်နေ့ နေ့စွဲဖြင့် ထုတ်ပြန်လိုက်သော အဆိုပါ ထုတ်ပြန်ချက်တွင် တပ်မဟာ (၆) တိုးချဲ့ဖွဲ့စည်းမှုမှာ ငြိမ်းချမ်းရေး အတွက် ကောင်းကျိုးထက် ဆိုးကျိုး ပိုမိုသက်ရောက်စေ မည်ဖြစ်ကြောင်း ဖော်ပြထားပြီး အစိုးရမှ ဖော်ဆောင်နေသည့် ပြည်တွင်းငြိမ်းချမ်းရေးကို ဆန့်ကျင်ရာရောက်ကြောင်းလည်း ရေးသားထားပါသည်။

တပ်မဟာ (၆) အခြေချသည့် ဒေသမှာ ယခင် ဗမာပြည်ကွန်မြူနစ်ပါတီ ဗကပ ထိန်းချုပ်နယ်မြေဖြစ်သည့် မုန်းကိုး ၊ ဖောင်းဆိုင်နှင့် မုန်းဘော် တို့တွင်ဖြစ်ပြီး ဖေဖော်ဝါရီလ ၂၆ ရက်နေ့တွင် တရားဝင်ဖွဲ့စည်း ထားကြောင်း အစိုးရ၏ ထုတ်ပြန်ချက်တွင် ဖော်ပြ ထားသည်။

‘အဲဒီနယ်မြေတွေမှာ ကေအိုင်အေ တပ်မဟာ (၆) ဆိုပြီးဖွဲ့တာ ကြာနေပြီ။ အခုမှ တရားဝင်ကြေငြာတာ။တကယ်တော့ CPB ဗကပ အခြေချခဲ့တဲ့ အဲဒီဒေသတွေက တကယ်တော့ ဗကပ မ၀င်ခင်ခေတ် ကတည်းက ကေအိုင်အေ နယ်မြေတွေပါပဲ’ ဟု ယခင်က ဗမာပြည်ကွန်မြူနစ်ပါတီ၏ အဖွဲ့ဝင်ဟောင်းတစ်ဦးက The Ladies News သို့ပြောသည်။

လတ်တလောကာလအတွင်းမှာပင် တအာင်းပလောင် TNLA/PSLF ၊ ကေအိုင်အေ ၊ ကိုးကန့် နှင့် ရှမ်းတပ်မတော် တို့အခြေချရာ ရှမ်းပြည်နယ်မြောက်ပိုင်းဒေသတို့ အင်အား ထောင်နှင့်ချီသည့် အစိုးရတပ်ဖွဲ့မှ တပ်ရင်းများ တိုးချဲ့နေရာချထားလာကြောင်း တိုင်းရင်းသားလက်နက်ကိုင်အဖွဲ့များမှ သတင်းထုတ်ပြန်ထားသည်.။

The Ladies News
https://www.facebook.com/News.TheLadies

အထင်အမြင်လွဲမှား သံသယတွေ လျော့ချဖို့ သူရဦးရွှေမန်း ပြော


 ဉာဏ်ပညာအမြော်အမြင်ဖြင့် ဆင်ဆင်ခြင်ခြင် ပြောဆိုလုပ်ဆောင် ကြမှသာလျှင် နိုင်ငံတော်နှင့်နိုင်ငံသားအကျိုးစီးပွားကို မှန်ကန်စွာဖော်ဆောင်နိုင်ကြမှာဖြစ်သည်

✔ အထင်အမြင်လွဲမှား သံသယတွေများကြလျှင် ယုံကြည်မှုလျော့နည်းလာလိမ့်မယ်။

✔ ယုံကြည်မှုလျော့နည်းလာလျှင်၊ စိုးရိမ်မှုပိုကဲလာကြလိမ့်မယ်။ စိုးရိမ်မှုပိုလာကြလျှင်၊ နေထိုင်ရတာ မလုံမခြုံ ဖြစ်လာလိမ့်မယ်။

✔ ထို့အတူ ပကတိအခြေအနေနှင့် အမှန်တရားအပေါ် အခြေခံပြီး နိုင်ငံတော်အပေါ်၊ ပြည်သူများအပေါ် သစ္စာတရားဖြင့် နိုင်ငံကာကွယ်ရေး၊ နိုင်ငံတည်ဆောက်ရေးတို့အတွက် သက်ဆိုင်ကြသူများ အားလုံးမှ ပါဝင်စဉ်းစားသုံးသပ် ဆောင်ရွက်ကြရန် အမှန်ပင်အရေးကြီးလှပါတယ်။

✔ ဒါကြောင့် နိုင်ငံသားအားလုံး၊ တိုင်းရင်းသား ညီအစ်ကိုမောင်နှမအားလုံးနှင့် တစ်ဦးချင်း၊ တစ်ယောက်ချင်း ပြောဆို လုပ်ဆောင်မှုများသည်လည်း သံသယပွားစေသော၊ အထင်အမြင်လွဲမှားစေသော အကြောင်း အရာနှင့် အချက်အလက်များကို ဉာဏ်ပညာအမြော်အမြင်ဖြင့် သတိပြုဆင်ခြင်၍ ပြောဆိုလုပ်ဆောင်မှုများဖြင့်သာလျှင် နိုင်ငံနှင့်နိုင်ငံသား အကျိုးစီးပွားကို မှန်ကန်စွာ ဖော်ဆောင်ကြရမည့် အချိန်ဖြစ်ပါတယ်။

✔ ဉာဏ်ပညာအမြော်အမြင်ဖြင့် နိုင်ငံတော်နှင့်နိုင်ငံသားများအတွက် ကောင်းကျိုးလိုရာဆန္ဒများပြည့်ဝအောင် ဆောင်ရွက်နိုင်ကြပါစေ…။

(သူရဦးရွှေမန်း၏ ၂၀၁၆ ခုနှစ်၊ ဖေဖော်ဝါရီလ ၂၉ ရက်နေ့၊ ၀၉၀၀ နာရီအချိန်၊ ကော်မရှင်အဆောက်အဦ(I-1)၌ ပြုလုပ်သောအစည်းအဝေးတွင် ပြောကြားမှုမှ ကောက်နှုတ်ဖော်ပြချက်)

Thura U Shwe Mann
https://www.facebook.com/HEThuraUShweMann

မြန်မာနိုင်ငံ လွှတ်တော် ဆိုင်ရာ အဖွဲ့ (MPU) အား မတ်လ ၁ ရက် အစည်းအဝေးတွင် လွှတ်တော်၏ သဘောတူညီချက် ရယူပြီး ဖွဲ့ စည်း ဆောင်ရွက်သွားမည်


    ရန်ကုန် ၊ ဖေဖော်ဝါရီ ၂၉ ရက် (ဆင်ဟွာ)

    မြန်မာနိုင်ငံ လွှတ်တော် ဆိုင်ရာအဖွဲ့ (MPU) ၏ ဥက္ကဋ္ဌအဖြစ် ပြည်ထောင်စု လွှတ်တော် နာယက ဦးမန်းဝင်းခိုင်သန်း၊ ဒုတိယ ဥက္ကဋ္ဌ အဖြစ် ပြည်သူ့လွှတ်တော် ဥက္ကဋ္ဌ ဦးဝင်းမြင့် အပါအဝင် အဖွဲ့ဝင် ၁၈ ဦးဖြင့် ဖွဲ့ စည်းခြင်းကို မတ်လ ၁ ရက်တွင် ကျင်းပ ပြုလုပ်မည့် ပြည်ထောင်စု လွှတ်တော် အစည်းအဝေးတွင် လွှတ်တော်၏ သဘောတူညီချက် ရယူပြီး ဆက်လက် ဆောင်ရွက်သွားမည် ဖြစ်ကြောင်း သိရသည်။

မြန်မာနိုင်ငံ လွှတ်တော် ဆိုင်ရာအဖွဲ့တွင် အတွင်းရေးမှူး အဖြစ် ပြည်ထောင်စု လွှတ်တော်၊ ဒုတိယ နာယက ဦးအေးသာအောင် အပါအဝင် အဖွဲ့ ဝင်များ အဖြစ် ပြည်သူ့လွှတ်တော် ဒုတိယ ဥက္ကဋ္ဌ ဦးတီခွန်မြတ် နှင့် တိုင်းဒေသကြီးနှင့် ပြည်နယ် ၁၄ ခုမှ လွှတ်တော် ဥက္ကဋ္ဌများ ပါဝင်၍ ဖွဲ့ စည်း ဆောင်ရွက်သွားမည် ဖြစ်ကြောင်း ပြည်ထောင်စု လွှတ်တော် နာယက မန်းဝင်းခိုင်သန်းက ယနေ့ ဖေဖော်ဝါရီလ ၂၉ ရက် ပြည်ထောင်စု လွှတ်တော် အစည်းအဝေးတွင် ကြေညာခဲ့သည်။

ပြည်ထောင်စု လွှတ်တော် ဆိုင်ရာ ဥပဒေ ပြဌာန်းချက်နှင့် အညီ မြန်မာနိုင်ငံ လွှတ်တော် ဆိုင်ရာအဖွဲ့ (MPU) အား ပြန်လည် ဖွဲ့ စည်းနိုင်ရေး အတွက် ပြည်ထောင်စု လွှတ်တော်မှ အတည်ပြုပေးရန် လိုအပ်ကြောင်း ပြည်ထောင်စု လွှတ်တော် ဒုတိယ နာယက ဦးအေးသာအောင်က ယနေ့ လွှတ်တော် အစည်းအဝေးတွင် ရှင်းလင်း ပြောကြားခဲ့သည်။

ပြီးခဲ့သည့် ပထမအကြိမ် လွှတ်တော် သက်တမ်းအတွင်း မြန်မာနိုင်ငံ လွှတ်တော် ဆိုင်ရာအဖွဲ့ (MPU) အား ဖွဲ့ စည်းနိုင်ခဲ့သည့် အတွက် ပြည်ထောင်စု လွှတ်တော် ၊ တိုင်းဒေသကြီး/ပြည်နယ် လွှတ်တော်များ ရှေ့ ဆက် ဆောင်ရွက်ရသည့် ဥပဒေပြု လုပ်ငန်းများ ၊ တိုင်းဒေသကြီး/ပြည်နယ် လွှတ်တော် အချင်းချင်း ဆက်သွယ် ဆောင်ရွက်မှု ပိုမို အားကောင်းလာခဲ့ပြီး အချင်းချင်း ဆောင်ရွက်သည့် အခါတွင် အရည်အသွေးများ ၊ စွမ်းရည်များကို မြှင့်တင် ဆောင်ရွက်ပေးနိုင်ခဲ့ကြောင်း ပြည်ထောင်စု လွှတ်တော် ဒုတိယ နာယက ဦးအေးသာအောင်က ပြောကြားခဲ့သည်။

(Xinhua)
http://www.xinhuamyanmar.com

ပြည်ထောင်စု လွှတ်တော် ဥပဒေရေးရာနှင့် အထူးကိစ္စရပ်များ လေ့လာဆန်းစစ် သုံးသပ်ရေးကော်မရှင် အား သူရဦးရွှေမန်း ဦးဆောင်မည်


ပြည်ထောင်စု လွှတ်တော် ဥပဒေရေးရာနှင့် အထူးကိစ္စရပ်များ လေ့လာဆန်းစစ် သုံးသပ်ရေးကော်မရှင်အား အဖွဲ့ ဝင် ၃၄ ဦးဖြင့် ဖွဲ့စည်းထားကြောင်း ပြည်ထောင်စု လွှတ်တော် နာယက ဦးမန်းဝင်းခိုင်သန်းက ပြောသည်။

“ပြည်ထောင်စုလွှတ်တော် နာယကသည် ပြည်ထောင်စု လွှတ်တော်၊ ပြည်သူ့လွှတ်တော်နှင့် အမျိုးသားလွှတ်တော် ကော်မတီများက လေ့လာသော ကိစ္စရပ်များမှအပ ကျန်ကိစ္စရပ်များကို လေ့လာရန်နှင့် လွှတ်တော်အသီးသီး၏ ကော်မတီဆိုင်ရာ လုပ်ငန်းများတွင် ပူးပေါင်း ဆောင်ရွက်နိုင်ရန် လိုအပ်ချက်အရ ဥပဒေရေးရာနှင့် အထူးကိစ္စရပ်များ လေ့လာဆန်းစစ် သုံးသပ်ရေးကော်မရှင်ကို ပြည်ထောင်စု လွှတ်တော် ဥပဒေနှင့်အညီ ဖွဲ့စည်းလိုက်သည်” ဟု ပြည်ထောင်စု လွှတ်တော် နာယက က ပြောသည်။

ကော်မရှင်၏ တာဝန်နှင့် လုပ်ပိုင်ခွင့်များတွင် တည်ဆဲဥပဒေများအား လေ့လာဆန်းစစ် သုံးသပ်ပြီး ပြင်ဆင်ရေး၊ ပယ်ဖျက်ရေး၊ အသစ်ပြန်လည် ပြဋ္ဌာန်းရေးတို့ကို ပြည်ထောင်စု လွှတ်တော်နာယက၊ ပြည်သူ့လွှတ်တော်၊ အမျိုးသား လွှတ်တော် ဥက္ကဋ္ဌတို့မှ တစ်ဆင့် သက်ဆိုင်ရာ လွှတ်တော်သို့ တင်ပြခွင့်ရှိသည်။

ယင်းအပြင် အထူးကိစ္စရပ်များ၊ နာယကနှင့် လွှတ်တော် ဥက္ကဋ္ဌတို့ သတ်မှတ်ပေးသော လုပ်ငန်းများ၊ နာယကနှင့် ဥက္ကဋ္ဌများက ကဏ္ဍအလိုက် သီးခြားသတ်မှတ်ပေးသော အထူးကိစ္စရပ်များအတွက် ကော်မရှင်အတွင်း တာဝန်ခွဲ ဝေ ဆောင်ရွက်ရမည် ဖြစ်သည်။

“ကော်မရှင် ဥက္ကဋ္ဌ အဖြစ် သူရဦးရွှေမန်း၊ ဒုတိယဥက္ကဋ္ဌ(၁) အဖြစ် ရမည်းသင်း မဲဆန္ဒနယ် ပြည်သူ့လွှတ်တော် ကိုယ်စားလှယ် ဦးကိုကိုနိုင်၊ ဒုတိယဥက္ကဋ္ဌ(၂) အဖြစ် ပဲခူးတိုင်းဒေသကြီး မဲဆန္ဒနယ် အမှတ်(၂) အမျိုးသား လွှတ်တော် ကိုယ်စားလှယ် ဒေါက်တာဝင်းမြတ်အေးနှင့် အတွင်းရေးမှူးအဖြစ် ဦးခင်မောင်ထွန်း တွဲဖက်စစ်ထောက်ချုပ်(ငြိမ်း) တို့ တာဝန်ယူ ဆောင်ရွက်မှာ ဖြစ်ပါတယ်” ဟု ပြည်ထောင်စု လွှတ်တော် နာယက ဦးမန်းဝင်းခိုင်သန်းက ပြောသည်။

ကော်မရှင်၏ သက်တမ်းသည် စတင်ဖွဲ့စည်းသည့် နေ့မှစ၍ တစ်နှစ်ဖြစ်ပြီး ယနေ့ဖွဲ့စည်းပေးလိုက်သည့် ကော်မရှင်တွင် လွှတ်တော် ကိုယ်စားလှယ် သုံးဦးနှင့် နိုင်ငံသား ၃၁ ဦး စုစုပေါင်း ၃၄ ဖြင့် ဖွဲ့စည်းလိုက်ကြောင်း ၄င်းက ဆိုသည်။

သတင်း - ကိုပေါက်
The Ladies News
https://www.facebook.com/News.TheLadies

နိုင်ငံတော်သမ္မတနှင့် ဒုတိယသမ္မတများ ရွေးချယ်တင်မြှောက်ရေး အစည်းအဝေး ရက် ရွေ့ပြောင်းရန် မတ်လ ၁ ရက်နေ့ အစည်းအဝေး တွင် ကြေညာမည်


လွှတ်တော်ကိုယ်စားလှယ် အစုအဖွဲ့များမှ နိုင်ငံတော်သမ္မတနှင့် ဒုတိယသမ္မတများ အမည်စာရင်း တင်သွင်းနိုင်ရေး အစည်းအဝေး သတ်မှတ်ရက် ရွှေ့ရန် ပြည်ထောင်စု လွှတ်တော် နာယက က ကြေညာမည်ဟု မတ်လ ၁ ရက်နေ့ အစည်းအဝေး အစီအစဉ်တွင် ထည့်သွင်း ဖော်ပြထားသည်။

ပြည်ထောင်စု လွှတ်တော်နာယက က နိုင်ငံတော်သမ္မတနှင့် ဒုတိယသမ္မတများ ရွေးချယ် တင်မြှောက်နိုင်ရန်အတွက် သက်ဆိုင်ရာ လွှတ်တော် ကိုယ်စားလှယ်များ အစုအဖွဲ့အလိုက် အစည်းအဝေးများ စတင်ကျင်းပမည့် နေ့ရက် ပြင်ဆင်သတ်မှတ်ချက်ကို ကြေညာခြင်းဟု အစီအစဉ် ၁၁ တွင် ထည့်သွင်းဖော်ပြထားသည်။

မူလက နိုင်ငံတော်သမ္မတနှင့် ဒုတိယသမ္မတများ အမည်စာရင်း တင်သွင်းနိုင်ရန် လွှတ်တော် ကိုယ်စားလှယ်များ အစုအဖွဲ့အလိုက် အစည်းအဝေး ကျင်းပရန် မတ်လ ၁၇ ရက်ဟု သတ်မှတ်ထားသည်။

ပြည်သူ့လွှတ်တော် ကိုယ်စားလှယ်များ အစုအဖွဲ့၊ အမျိုးသား လွှတ်တော် ကိုယ်စားလှယ်များ အစုအဖွဲ့နှင့် တပ်မတော်သား ကိုယ်စားလှယ်များ အစုအဖွဲ့ဟု အစုအဖွဲ့သုံးခုမှ အစုအဖွဲ့ တစ်ခုလျှင် ဒုတိယသမ္မတလောင်း အမည် တစ်ဦးစီ အမည်စာရင်း တင်သွင်းရမည် ဖြစ်သည်။

သမ္မတလောင်းများ ရွေးချယ် တင်မြှောက်ရန်အတွက် ရွေးချယ်ရေး အဖွဲ့သုံးဖွဲကို ပြည်သူ့ လွှတ်တော် ၊ အမျိုးသားလွှတ်တော် ၊ တပ်မတော်သား လွှတ်တော် ကိုယ်စားလှယ်များမှ အစုအဖွဲ့တစ်ဖွဲ့စီအလိုက် ရွေးချယ် တင်မြှောက်ရေး အဖွဲ့ ဖွဲ့စည်းကာ တင်မြှောက် ရမည် ဖြစ်သည်။

ယခုအခြေအနေအရ သမ္မတလောင်း တင်သွင်းရွေးချယ်မည့် ရက်များမှာ ရှေ့သို့ တိုးလာမည် ဖြစ်သည်။

“ကျွန်တော် ထင်တာကတော့ အခုအချိန်မှာ လွှတ်တော်နဲ့ အစိုးရအဖွဲ့အကြားမှာ ပွတ်တိုက် မှုတွေ များနေတေယ်။ အစိုးရက လွှတ်တော်မှာ လာမဖြေတဲ့ ကိစ္စတွေလည်း ရှိနေတော့ လွှတ်တော်ရဲ့ တရားဝင်မှု အနေအထားကိုလည်း ထိခိုက်နိုင်တယ်။ ရေရှည်ဆိုရင် အဲဒီလို ကိစ္စတွေက ပြသ၁နာရှိနိုင်တဲ့အတွက် သမ္မတလောင်း ရွေးချယ်မှုကို အမြန်ဆုံး ဆောင်ရွက်ခြင်းနဲ့ အနိုင်ရပါတီရဲ့ တရားဝင်မှု အခြေအနေကို ပိုမို မြင့်တင် ဆောင်ရွက်နိုင်အောင် တစ်ဖက်မှာလည်း ပွတ်တိုက်မှုတွေ လျော့သွားအောင် ကြိုးစားတဲ့ ဆောင်ရွက်ချက်လို့ မြင်တယ်” ဟု တကောင်း မြန်မာ့အရေး လေ့လာသူများ အင်စတီကျုမှ ကိုရဲမျိုးဟိန်းက သုံးသပ်သည်။

မြန်မာ့အရေး လေ့လာသူ ဦးအောင်သူငြိမ်းက မူ “အခုအခြေနေက ဘာပဲဖြစ်ဖြစ် တစ်ခုခုတော့ လုပ်ရမှာပါ။ အီးစီ အစည်းအဝေး က ကျေလည် ဆုံးဖြတ်ပြီးလို့ ထင်ပါတယ်။ သို့လောသို့လော ဖြစ်နေတာတွေ လျော့ကျစေတယ်။ Business confidence တက်စေမယ် ထင်ပါတယ်” ဟု မှတ်ချက်ပြု ပြောဆိုသည်။

သတင်း - ကိုပေါက်
The Ladies News
https://www.facebook.com/News.TheLadies

အကောင်းဆုံး အော်စကာ ဇာတ်ကားဆု Spotlight ရရှိ


အမေရိကန်ပြည်ထောင်စု အနောက်ခြမ်း California ပြည်နယ် Los Angelese မြို့ Hollywood က Dolby ခမ်းမမှာ မနေ့ညက ကျင်းပတဲ့ အကယ်ဒမီ ဆုပေးပွဲမှာ ကသလစ်ခရိယာန်ဘုရားကျောင်းက ကလေးငယ်တွေအပေါ်လိမ်မတရားပြုကျင့်မှုနဲ့ ပတ်သတ်လို့ Boston Globe သတင်းစာက စုံစမ်းဖော်ထုတ်တဲ့ အကြောင်းရိုက်ကူးထားတဲ့ Spotlight ရုပ်ရှင်ကားက သူနဲ့အတူ တစ်ကြိုစာရင်းမှာပါတဲ့ The Revenant, Mad Max, Room နဲ့ Bridge of Spies ဇာတ်ကားတွေကို ကျော်ဖြတ်ပြီး အကောင်းဆုံး ဇာတ်ကားဆု ရရှိသွားပါတယ်။

မင်းသား Leonardo DiCaprio က ပထမဆုံးအကြိမ် Oscar ဆုရရှိတော့ အခမ်းအနားပိရိသတ်က သူ့ကို မတ်တပ်ရပ်ဂုဏ်ပြုခဲ့ပါတယ်။

လူသူကင်းဝေးတဲ့တောထဲမှာနေပြီး အရမ်းဇွဲရှိတဲ့ အမျိုးသား တဦး နှင်းတောင်တွေကြားမှာ လူဆိုးကို လက်တုံ့ပြန်ဖို့ လိုက်ရှာတဲ့ အကြောင်း ရိုက်ထားတဲ့ ဇာတ်ကားမှာ သရုပ်ဆောင်ပြီး မင်းသား Leonardo DiCaprio ဆုရတာဖြစ်ပါတယ်။ ထူးကဲတဲ့ ရုပ်ရှင် ရသ ကို ပေးစွမ်းတဲ့အတွက် သူဆုရတဲ့ The Revenant ကို ရိုက်ကူးဖန်တီးတဲ့ အဖွဲ့သားတွေအားလုံးကို ကျေးဇူးတင်ပါကြောင်း Leonardo က ပြောသွားပါတယ်။

ဆုလက်ခံယူတုန်း ကျေးဇူးတင်စကားပြောတဲ့ထဲမှာ မင်းသား Leonardo က ကမ္ဘာမှာ ဥတုရာသီပြောင်းလဲမှုက တကယ်ဖြစ်နေပြီး The Revenant ရုပ်ရှင်အဖွဲ့သားတွေဟာ ရေခဲတောထဲမှာ ရုပ်ရှင်ရိုက်ဖို့ ကမ္ဘာ့တောင်ဘက် စွန်းနေရာ အထိ သွားခဲ့ရတယ်လို့ ပြောသွား ပါတယ်။ ဒီဇာတ်ကားရိုက်ကူးတဲ့ ဒါရိုက်တာ Alejandro Inarritu က နှစ်နှစ်မြောက်ဆက်တိုက်အဖြစ် အကောင်းဆုံးဒါရိုက်တာဆု ရရှိခဲ့ပါတယ်။ Emmanuel Lubezki ကလည်း ရုပ်ရှင်ဓာတ်ပုံဆုကို ၃ နှစ်ဆက်တိုက်အဖြစ် ရယူပြီး သမိုင်းတွင်သွားခဲ့ပါတယ်။ အကောင်းဆုံးအမျိုးအမီးသရုပ်ဆောင်ဆုကို အများကခန့်မှန်းထားတဲ့အတိုင်း Brie Larson က Room ဇာတ်ကားနဲ့ ရရှိသွားပါတယ်။

ဗွီအိုအေ (မြန်မာပိုင်း)
http://burmese.voanews.com

လူတစ်ဦးသေဆုံးခဲ့သော မြောက်ဦး ကားတိုက်မှုတွင် ယာဉ်မောင်းကို ဖမ်းဆီး အရေးယူ

(မြောက်ဦး-ကျောက်တော် ကားလမ်းပေါ်ရှိ မဟာမုနိအနီးကားလမ်းကို ပြုပြင်နေစဉ်/ 17/2/2016)
နိရဉ္စရာ၊ ဖေဖော်ဝါရီ ၂၉

ရခိုင်ပြည်နယ် မြောက်ဦးမြို့နယ်တွင် ဖြစ်ပွားသော ကားတိုက်မှု တစ်ခုအတွင်း လူတစ်ဦး သေဆုံးခဲ့သဖြင့် ကားဒရိုင်ဘာကို ကားတိုက်၍ လူသေမှု ပုဒ်မ ၃၀၄-က ဖြင့် အရေးယူထားကြောင်း သိရသည်။

အရေးယူခံရသူမှာ အကယ်ဒမီဘတ်စ်ကားမှ ဒရိုင်ဘာ လင်းစိုးဖြစ်ကြောင်း၊ ၎င်းကားမှာ စစ်တွေမှ ရန်ကုန်သို့ မောင်းနှင်လာစဉ် ကားတိုက်မှု ဖြစ်ပွားခြင်း ဖြစ်ကြောင်း မြောက်ဦးမြို့နယ် ရဲတပ်ဖွဲ့မှူး ဦးမြင့်သောင်းက ပြောသည် ။

“ ကားတိုက်တာက ဖေဖော်ဝါရီလ ၂၆ ရက်နေ့ နံနက် ၉ နာရီ ၄၅ မိနစ်ခန့်မှာ မြောက်ဦးမြို့နယ် အိုးထိမ်းရွာ ဖြစ်ပွားတာပါ။ ရှင်ပြုပွဲသွားမလို့ ကားကြုံကို ကားလမ်းဘေးကနေ မတ်တပ်ရပ် စောင့်နေချိန်မှာ ခရီးသည်တင် လေအိတ်အမျိုးအစား အကယ်ဒမီကားက ၀င်တိုက်သွားတာပါ” ဟု ရဲတပ်ဖွဲ့မှူးက ဆိုသည်။

သေဆုံးသူမှာ အိုးထိမ်းကျေးရွာမှ ဦးမောင်နီထွန်း (၆၉) နှစ် ဖြစ်သည်။

“ သေဆုံးမှုနဲ့ ပတ်သက်ပြီး တိန်ညို ရဲစခန်းကနေပြီး အမှုအမှတ် ၃/ ၂၀၁၆၊ ပုဒ်မ ၃၀၄-က နဲ့ အရေးယူထားပါတယ်။ ဒရိုင်ဘာကို ဖမ်းဆီးထားပါတယ် ခင်ဗျား” ဟု သူက ဆက်လက် ပြောဆိုသည်။

Arakan State
https://www.facebook.com/NarinjaraNews/

ထိုင်းနိုင်ငံ မုံးတိုင်းရင်းသူတစ်ဦး လည်လှီးသတ်ဖြတ်ခံရ

တက် (ตาก) တက်ခရိုင်၊ ဖုတ်ဖရ (พบพระ) မြို့မှ ရဲအဖွဲ့များ ရက်စက်တဲ့လူသတ်မှုတစ်ခုသတင်းရရှိခဲ့ပါတယ်။ သေဆုံးသူမှာ ထိုင်းနိုင်ငံ"မုံး"တိုင်းရင်းသူတစ်ဦးဖြစ်ပါတယ်။

 သေဆုံးသူမှာ လည်လှီးခံရပြီး သေဆုံးခဲ့ရပါတယ်။ ဒီနေ့ ဖေဖေါ်ဝါရီလ ၂၉ ရက်နေ့မှာ တက် (ตาก) တက်ခရိုင်၊ ဖုတ်ဖရ (พบพระ) မြို့မှရဲအဖွဲ့များနှင့် ဆေးရုံးမှ ဆရာဝန်များတို့ လူသတ်မှုဖြစ်ခဲ့တဲ့ (ตาก) တက်ခရိုင်၊ ဖုတ်ဖရာ (พบพระ) မြို့၊ လွန်ထိုင်းဖတ်ထနာ (รวมไทยพัฒนา)၊ ရပ်ကွက် ၈သို့ သွားရောက်စစ်ဆေးခဲ့ပါတယ်။

 သေဆုံးသူမှာ အသက် ၅၀နှစ်ခန့်အရွယ် Ms.မီ ဖြစ်ပါတယ်။ အလောင်းကိုအိမ်ဘေးမျက်ခင်းပြင်မှာတွေ့ရပါတယ်။ အလောင်းသည် လည်ပင်းလှီးခံရပြီး အင်္ကျီအပေါ်ပိုင်း ကြယ်သီးဖြုတ်ထားပြီး ဘောင်းဘီလည်းချွတ်ထားခံရကြောင်းဆိုပါတယ်။

 ဒါပေမဲ့ မုဒိန်းကျင့်ခြင်းခံရတဲ့ဒဏ်ရာကိုတော့ မတွေ့ရှိကြောင်း ဆိုပါတယ်။ ရဲအဖွဲ့များမှ သေဆုံးသူရဲ့ ခင်ပွန်းဖြစ်သူ အသက်၅၄နှစ် Mrယွတ်တဖုန်းကို မသင်္ကာသောကြောင့် စစ်ဆေးမေးမြန်းရန် ရဲစခန်းသို့ခေါ်ဆောင်သွားခဲ့ပါတယ်။

 သို့သော် Mrယွတ်တဖုန်မှမိမိသည် Ms.မီ ကိုမသတ်ကြောင်းငြင်းပါတယ်။ အလောင်းမှာတွေ့ရှိတဲ့လက်ပွေကို DNA စစ်ဆေးပြီးမှ လူသတ်သမားကိုအမိဖမ်းဆီးမယ်လို့ ရဲအဖွဲ့မှဆိုပါတယ်။

MTF Channel
https://www.facebook.com/mtftv/

အော်စကာ ဆုပေးပွဲ၌ အကောင်းဆုံး ဇာတ်ကားဆုအား “Spotlight” ဇာတ်ကားမှ ရရှိ

“Spotlight” ဇာတ်ကားနှင့် ဇာတ်ဝင်ခန်း တစ်ခန်းအား တွေ့ရစဉ် (ဓာတ်ပုံ-အင်တာနက်)
    လော့စ်အန်ဂျလိစ်၊ ဖေဖော်ဝါရီ ၂၉ ရက် (ဆင်ဟွာ)

    Boston Globe သတင်းစာက ဖော်ထုတ်ခဲ့သည့် ကက်သလစ် ဘုရားကျောင်း အတွင်း ကလေးငယ်များ လိင် ပိုင်းဆိုင်ရာ အနိုင်ကျင့် ခံနေရမှု အကြောင်းကို အခြေခံပြီး ရိုက်ကူးထားသည့် “Spotlight” ဇာတ်ကားသည် ဖေဖော်ဝါရီလ ၂၈ ရက်ညက Dolby ပြဇာတ်ရုံတွင် ပြုလုပ်ခဲ့သော ၈၈ ကြိမ်မြောက် အော်စကာ ဆုပေးပွဲ၌ အကောင်းဆုံး ဇာတ်ကားဆုကို ဆွတ်ခူး နိုင်ခဲ့သည်။

ဒါရိုက်တာ Tom McCarthy ရိုက်ကူးခဲ့သည့် ယင်းဇာတ်ကားသည် The Big Short၊ Bridge of Spies၊ Brooklyn၊ Mad Max: Fury Road၊ The Martian၊ The Revenant နှင့် Room ဇာတ်ကားများကို ကျော်လွန်ပြီး အကောင်းဆုံး ဇာတ်ကားဆုကို ရရှိခဲ့ခြင်း ဖြစ်သည်။

ထို့ပြင် အော်စကာ ဆုပေးပွဲ အခမ်းအနား၌ အကောင်းဆုံး ဇာတ်ညွှန်းဆုကိုလည်း ထပ်မံ ရရှိခဲ့သည်။

အဆိုပါ ဇာတ်ကားဖြင့် Screen Actors Guild မှ ပေးသည့် အကောင်းဆုံး တည်းဖြတ်ဆု အပါအဝင် အခြားဆု များစွာကိုလည်း ရရှိခဲ့ကြောင်း သိရသည်။

(Xinhua)
http://www.xinhuamyanmar.com

အကောင်းဆုံး ဇာတ်ဆောင် မင်းသမီး အော်စကာဆုအား ဘရီ လာဆန် က ရရှိ

“Room” ဇာတ်ကား နှင့် ဇာတ်ဝင်ခန်း တစ်ခန်းအား တွေ့ရစဉ် (ဓာတ်ပုံ-အင်တာနက်)
    လော့စ်အန်ဂျလိစ်၊ ဖေဖော်ဝါရီ ၂၉ ရက် (ဆင်ဟွာ)

    ဖေဖော်ဝါရီလ ၂၈ ရက် ညက Dolby ပြဇာတ်ရုံတွင် ပြုလုပ်ခဲ့သည့် ၈၈ ကြိမ်မြောက် အော်စကာ ဆုပေးပွဲ၌ အကောင်းဆုံး ဇာတ်ဆောင် မင်းသမီး အော်စကာဆုအား အမေရိကန် မင်းသမီး ဘရီ လာဆန် က “Room” ဇာတ်ကားဖြင့် ဆွတ်ခူး ရရှိခဲ့ကြောင်း သိရသည်။

လာဆန်သည် “Room” ဇာတ်ကားတွင် ပြန်ပေးဆွဲ ခံထားရသည့် အမျိုးသမီး တစ်ယောက်၏ ဇာတ်ရုပ်ကို ပိုင်ပိုင်နိုင်နိုင် သရုပ်ဆောင်နိုင်ခဲ့သောကြောင့် ထိုသို့အော်စကာဆုကို ဆွတ်ခူးခဲ့ခြင်း ဖြစ်သည်။

အသက် ၂၆ နှစ်အရွယ် ဘရီလာဆန်သည် Brooklyn ဇာတ်ကား မှ မင်းသမီး Saiorse Ronan ၊ 45 Years ဇာတ်ကား မှ မင်းသမီး Charlotte Ramping တို့ကို ကျော်လွန်ပြီး ယခုနှစ်တွင် အော်စကာဆု ရရှိခဲ့ခြင်း ဖြစ်သည်။

(Xinhua)
http://www.xinhuamyanmar.com

ဟောလီးဝုဒ်မင်းသား လီယိုနာဒို ဒီကာပရီယို “The Revenant” ဇာတ်ကားဖြင့် အော်စကာဆုရရှိ


လော့စ်အန်ဂျလိစ်၊ ဖေဖော်ဝါရီ ၂၉ ရက် (ဆင်ဟွာ)

    အော်စကာ ဆန်ကာတင် စာရင်းတွင် ခြောက်ကြိမ် ပါဝင်ခဲ့ပြီးနောက် အသက် ၄၁ အရွယ် ဟောလီးဝုဒ်မင်းသား လီယိုနာဒို ဒီကာပရီယိုသည် “The Revenant” ဇာတ်ကားဖြင့် ၄င်း၏ ပထမဆုံး အော်စကာဆုကို ဖေဖော်ဝါရီလ ၂၈ ရက်ညတွင် ပြုလုပ်ခဲ့သည့် ၈၈ ကြိမ်မြောက် အော်စကာ ဆုပေးပွဲ၌ သိမ်းပိုက် ရရှိခဲ့ကြောင်း သိရသည်။

လီယိုနာဒိုသည် အသက် ၂၂ နှစ် ကတည်းက “What’s Eating Gilbert Grape” ဇာတ်ကားဖြင့် အော်စကာ ဆန်ကာတင် စာရင်းတွင် ပထမဆုံး ပါဝင်ခဲ့သည်။

၎င်းသည် အကောင်းဆုံး ဇာတ်ဆောင်မင်းသား အော်စကာဆု စာရင်းတွင် ယခုနှစ် အပါအဝင် စုစုပေါင်း ၅ ကြိမ် ပါဝင်ခဲ့ကြောင်း သိရသည်။ထို့အပြင် ၈၆ ကြိမ်မြောက် အော်စကာ ဆုပေးပွဲ၌လည်း “The Wolf of Wall Street” ဇာတ်ကား ၏ ထုတ်လုပ်သူအဖြစ် ဆန်ကာတင် စာရင်းတွင် ပါဝင်ခဲ့သေးကြောင်း သိရသည်။

ABC သတင်းဌာနက လီယိုနာဒိုသည် “The Revenant” ဇာတ်ကားတွင် သရုပ်ဆောင်ရန် အတွက် အပူချိန် သုညအောက်တွင် နေထိုင်နိုင်ရန် လေ့ကျင့်ခြင်း၊ အမျိုးမျိုးသော ဇာတ်ရုပ်များ ရရှိစေရန် ၅ နာရီကြာ မိတ်ကပ် ပြင်ဆင်ခဲ့ရခြင်း၊ ကြောက်မက်ဖွယ် မိုးမုန်တိုင်းများ ကြားတွင် ဝက်ဝံ တစ်ကောင်နှင့် တိုက်ခိုက်ရခြင်း စသည့် အန္တရာယ်များသော စတန့် ပြကွက်များ ပြုလုပ်ခဲ့ခြင်း၊ ကျွဲရိုင်း၏ အသည်းကို အစိမ်းလိုက် စားပြရခြင်း၊ မုတ်ဆိတ်ရှည်ကြီးများ တစ်နှစ်ခွဲ ထားရှိခဲ့ခြင်း စသည့် ခက်ခဲကြမ်းတမ်းသည့် လုပ်ဆောင်ချက်များအား ဇာတ်လမ်း အသက်ဝင် ကောင်းမွန်လာရန်အတွက် ကြိုးစား လုပ်ဆောင်ခဲ့ကြောင်း ဖော်ပြခဲ့သည်။

လီယိုနာဒိုသည် ၂၀၁၆ ခုနှစ်တွင် ရွှေကမ္ဘာလုံးဆု၊ Screen Actors Guild နှင့် BAFTA ဆုများကိုလည်း ရရှိခဲ့ကြောင်း သိရသည်။

(Xinhua)
http://www.xinhuamyanmar.com

မြစ်အတွင်းက ကောင်မလေး


၂၉-၂-၂၀၁၆

2016 အော်စကာဆုပေးပွဲမှာ အကောင်းဆုံး ဖြစ်ရပ်မှန် မှတ်တမ်း ရုပ်ရှင် ရိုက်ကူးခဲ့သူ ဒါရိုက်တာဆု ရရှိသွားခဲ့တဲ့ အမျိုးသမီး Sharmeen Obaid-Chinoy ရှာမင် အိုဘစ် ရဲ့  A Girl in the River မြစ်အတွင်းက ကောင်မလေး ဖြစ်ရပ်မှန် မှတ်တမ်းကို CNN သတင်းဌာနကြီး မှာဖေါ်ပြရေးသားထားပါတယ်။

မိမိဆွေမျိုးအရင်းကို သွေးအေးအေးနဲ့  သတ်နေကြတဲ့ လူ့ အသိုင်းဝန်း တခုရဲ့  ကြောက်မက်ဖွယ်ရာ လုပ်ရပ်ကို ခံခဲ့ရတဲ့ ပါကစ္စတန် နိုင်ငံက ကျေးတောသူ Qaisar ကေဆာ ရဲ့  ဖြစ်ရပ်မှန်ကို ရိုက်ကူးထားတာပါ။

ကေဆာရဲ့  မိသားစုက ဦးလေးအရင်းဖြစ်သူနဲ့ ပေးစားတာကို လုံးဝလက်မခံခဲ့လို့  သူမကို အဖေနဲ့  ဦးလေးဖြစ်သူက သေနတ်နဲ့ ပစ်သတ်ပြီး အိပ်တလုံး တွင်း ထည့် ကာ အလောင်းကိုမြစ်ထဲ ပြစ်ချ လိုက်ပါတယ်။

ကံကောင်းလှစွာနဲ့  သူမ မသေခဲ့ပဲ ဒဏ်ရာတွေကို ပျောက်အောင်ကုသပြီး အမျိုးသမီးအဖွဲ့  တွေနဲ့ အတူ တရားရုံမှာအဖေနဲ့  ဦးလေးကို အမှုဖွင့်ခဲ့တဲ့ သူမရဲ့ သတ္တိဟာတနှစ်ကိုအမျိုးသမီးဦးရေ၁၀၀၀ခန့် ကိုသတ်ပြီး မြစ်ထဲမှာ
ဖြောက်ဖျက်နေကြတဲ့ လူ့ အသိုင်းဝန်းရဲ့  လုပ်ရပ်တွေကို ရပ်တန့် သွားအောင် ဟန့် တားနိုင်ခဲ့ပါတယ်။

CNN
Social Action for Women - SAW

NLD စိတ်မပူပါနဲ့

NLD ပုလဲမြို့နယ်မဲဆန္ဒ နယ် ပြည်သူ့လွှတ်တော်ကိုယ်စားလှယ် ဒေါ်ခင်စန်းလှိုင်မှ အရေးကြီးအဆိုတင်သွင်းနေစဉ်
ပြီးခဲ့တဲ့ ဖေဖေါ်ဝါရီ ၂၅ ရက်နေ့က ကျင်းပတဲ့ ပြည်သူ့လွှတ်တော် အစည်းအဝေးမှာ ပုလဲအမတ် ဒေါ်ခင်စန်းလှိုင်က မကြာခင် အာဏာလွှဲပြောင်းပေးရတော့မယ့် ဦးသိန်းစိန် အစိုးရ အဖွဲ့ရဲ့ လုပ်ရပ်တွေနဲ့ ပတ်သက်ပြီး ပြင်းပြင်းထန်ထန် ဝေဖန်ထောက်ပြထားတဲ့ အရေးကြီး အဆို တစ်ရပ် တင်ပါတယ်။ ဒီ အဆိုနဲ့ ပတ်သက်ပြီး အစိုးရဘက်က တာဝန်ရှိသူတွေ လွှတ်တော်တွင်း လာရောက် ဖြေရှင်း ပြောဆိုတာမျိုး မလုပ်ကြပါဘူး။ အချိန် မလုံလောက် လို့ဆိုတဲ့ အကြောင်းပြချက်နဲ့ လွှတ်တော်ကို စာရေးသားပေးပို့ အကြောင်းပြန်ခဲ့တာ ဖြစ်ပါတယ်။ အဆိုနဲ့ ပတ်သက်ပြီး အမတ်တွေ ဆွေးနွေးစဉ် တစ်ချိန်မှာတော့ တပ်မတော်သား အမတ်တွေ အားလုံး မတ်တပ်ထ ကန့်ကွက်တာမျိုးလည်း ကြုံကြရပါတယ်။ ဘယ်လိုပဲဖြစ်ဖြစ် လွှတ်တော်ဘက်ကတော့ ဒေါ်ခင်စန်းလှိုင်ရဲ့ အဆိုနဲ့ ပတ်သက်ပြီး မဲခွဲဆုံးဖြတ် အတည်ပြုပေးလိုက်ပါတယ်။ ဒီ ပြသနာတွေဟာ သက်တန်းကုန်ဆုံးတော့မယ့် သမ္မတ ဦးသိန်းစိန် အစိုးရအဖွဲ့နဲ့ အာဏာလွှဲပြောင်းရယူတော့မယ့် ဒေါ်အောင်ဆန်းစုကြည် ရဲ့ အင်န်အယ်လ်ဒီ ပါတီ အကြား ပွတ်တိုက်မှုလား၊ ပဋိပက္ခ ဖြစ်မှုလား၊ လက်ရှိ နောက်ဆုံး အချိန် အစိုးရအဖွဲ့ရဲ့ လုပ်ရပ်တွေနဲ့ ပတ်သက်ပြီး အင်န်အယ်လ်ဒီ ဘက်က စိတ်ပူပန်သင့်သလား ဆိုတာ ဒီတစ်ပတ် ဆွေးနွေးတင်ပြသွားပါ့မယ်။

လွှတ်တော်ထဲမှာ ဒေါ်ခင်စန်းလှိုင် တင်သွားတဲ့ အရေးကြီးအဆို အပြည့်အစုံကတော့ ခုလို ဖြစ်ပါတယ်။ “နိုင်ငံတော် အစိုးရက ရွေးကောက်ပွဲ အပြီးနောက် ဆောင်ရွက်နေသော နိုင်ငံပိုင်မြေ၊ နိုင်ငံပိုင် စက်ရုံများ၊ နိုင်ငံပိုင် စီးပွားရေး လုပ်ငန်းများ၊ အလျင်စလို ငှားရမ်း လွှဲပြောင်း ရောင်းချမှု၊ ပုဂ္ဂလိကပိုင် ပြုလုပ်မှု၊ စီမံကိန်းများကို နေရာတကျ မစီမံပဲ အဆောတလျင် ခွင့်ပြုနေမှု၊ ကျူးကျော်များကို အားဓမ္မ ဖယ်ရှားမှု၊ နိုင်ငံပိုင် သယံဇာတ များကို လိုအပ်သော ဆောင်ရွက်မှုများ သဘောတူညီမှုများ မပြုလုပ်ပဲ အစိုးရတာဝန် မလွှဲပြောင်းမီ အလျင်အမြန် စီမံခန့်ခွဲနေမှု၊ စသည်တို့ကို နိုင်ငံတော်နှင့် နိုင်ငံသား တို့ အကျိုးစီးပွားအတွက် အသေးစိတ် စီစစ်ဟန့်တား၍ ထိန်းကျောင်း တည့်မတ် ပေးပါရန် ပြည်ထောင်စု အစိုးရအား တိုက်တွန်းကြောင်း” ဆိုပြီးဖြစ်ပါတယ်။
အဆိုနဲ့ ပတ်သက်ပြီး ဒေါ်ခင်စန်းလှိုင်က ဥပမာ တစ်ချို့ပေးပြီး ရှင်းလင်း ပြောဆိုခဲ့ပါသေးတယ်။ သူပြောတဲ့အထဲမှာ ရန်ကုန် ဆေးရုံအနားက မြေဧက ၄၀ ကျော်မှာ မြန်မာ-စင်ကာပူ ဖက်စပ် ပုဂ္ဂလိက ဆေးရုံ ဆောက်ခွင့်ပေးလိုက်တဲ့ ကိစ္စ၊ စက်မှုဝန်ကြီးဌာနပိုင် စက်ရုံတွေကို ပုဂ္ဂလိက လက် လွှဲပြောင်းပေးနေတဲ့ ကိစ္စ၊ ရွှေတိဂုံ စေတီအနားမှာ တည်ဆောက်လို့ ရပ်ဆိုင်းလိုက်ရတဲ့ ဒဂုံစီးတီး စီမံကိန်း အတွက် သိပ္ပံနဲ့ နည်းပညာ ၀န်ကြီးဌာန ပိုင် မြေကို အစားထိုး ပြန်ပေးလိုက်တဲ့ ကိစ္စ၊ နိုင်ငံရဲ့ ရှားပါး သယံဇာတ ဖြစ်တဲ့ ၂၆၀၀ မဂ္ဂါဟပ်စ် Spectrum သုံးစွဲခွင့် အတွက် တင်ဒါ ခေါ်ယူနေတဲ့ ကိစ္စ၊ သံလွင်မြစ်မှာ ရေကာတာတွေဆောက်ပြီး ရေအားလျှပ်စစ် ထုတ်ယူရေး ဆိုင်ရာ သဘောတူ စာချုပ်ချုပ်ဆိုနေတယ် လို့ သတင်းဖြစ်ပေါ်နေတဲ့ ကိစ္စ၊ အစိုးရပိုင် လောင်စာဆီ ဆိုင် ၇၀ ပုဂ္ဂလိကကို လွှဲပြောင်းပေးမယ် ဆိုတဲ့ ကိစ္စ၊ ပြင်ဦးလွင်က ရာနဲ့ချီတဲ့ မြေကို စက်မှုဇုံ မြေကွက်တွေ အဖြစ် ချထားပေးမယ် ဆိုတဲ့ ကိစ္စ၊ ရန်ကုန်မြို့သစ် စီမံကိန်းကို စတင်တော့မယ် ဆိုတဲ့ ကိစ္စ၊ ကျူးကျော်တွေကို အလျင်စလို ဖယ်ရှားနေတဲ့ ကိစ္စ၊ လက်ပန်းတောင်းတောင် ကြေးနီ စီမံကိန်းကနေ ကြေးနီတွေ ထုတ်ယူနိုင်တော့မယ် ဆိုတဲ့ ကိစ္စ၊ ကျောက်မီးသွေးကနေ လျှပ်စစ်ဓာတ်အား ထုတ်ယူမယ့် စက်ရုံ တည်ဆောက်ဖို့ ခွင့်ပြုလိုက်တယ် ဆိုပြီး သတင်းထွက်ပေါ်နေတဲ့ ကိစ္စ စတာတွေ ပါဝင်ပါတယ်။

တကယ်တော့ ဒေါ်ခင်စန်းလှိုင် တင်ပြတဲ့ ကိစ္စတွေဟာ သေခြာပေါက် အလောသုံးဆယ် လုပ်ကိုင်နေတဲ့ ကိစ္စတွေ ပါသလို၊ တကယ်လုပ်ကိုင်ခြင်း မရှိတာတွေနဲ့ သတင်း ခပ်သဲ့သဲ့ ထွက်တာတွေလည်း ပါဝင်ပါတယ်။ အားလုံး ကံသေကံမ လုပ်ကိုင်နေတယ်လို့တော့ မဆိုနိုင်ပါဘူး။ ဒီအတွက် အဆို တင်သွင်းတဲ့ဆီမှာ “နိုင်ငံတော်နှင့် နိုင်ငံသား တို့ အကျိုးစီးပွားအတွက် အသေးစိတ် စီစစ်ဟန့်တား၍ ထိန်းကျောင်း တည့်မတ် ပေးပါရန်” လို့ တင်မယ့် အစား အခြား သင့်တော်ရာ အသုံးအနှုန်းမျိုးနဲ့ မေးခွန်းထုတ်တာမျိုး မျိုးဆို ပို သင့်တော်နိုင်ပါတယ်။ တစ်ဖက် အစိုးရဘက်ကလည်း လွှတ်တော်က အရေးကြီး အဆို တင်တာဖြစ်လို့ မှန်သည် မှားသည် အသာထား၊ တကယ် လုပ်ကိုင်နေတဲ့ ကိစ္စတွေ လွှတ်တော်ထဲ သွားပြီး ရှင်းပြဖို့ တာဝန်ရှိတာကလည်း အမှန်ပဲ ဖြစ်ပါတယ်။

လက်တွေ့ကတော့ အဲလို မဖြစ်ခဲ့ပါဘူး။ အစိုးရဘက်က အခု တင်ပြတဲ့ အချက်တွေ များလွန်းလို့ လွှတ်တော်ထဲ လာဖြေဖို့ အချိန်ယူရမယ်၊ ဒါကြောင့် အချိန်ပေးပါ ဆိုပြီး မေးခွန်းတွေကို မဖြေပဲ ရှောင်ရှားခဲ့ပါတယ်။ လွှတ်တော် ဘက်ကလည်း ဥပဒေ နည်းဥပဒေ အရ ဆိုပြီး လွှတ်တော်တွင်း ဆွေးနွေး၊ မဲခွဲ ပြီးနောက် အဆိုကို အတည်ပြုကြောင်း ဆုံးဖြတ်ချက် ချခဲ့ပါတယ်။ ဒီ ပြသနာနဲ့ ပတ်သက်ပြီး အစိုးရ အဖွဲ့ဘက်က လွှတ်တော်တွင်း သွားမရှင်းပြပေမယ့် ရုပ်သံနဲ့ အစိုးရပိုင် သတင်းစာတွေကနေ အကြောင်းအရာ တစ်ခုခြင်း ပြန် ရှင်းလင်း တင်ပြတာ၊ နောင် အစိုးရ အဖွဲ့သစ် တက်လာမှ ဖြေရှင်းဖို့ ချန်ရစ်ထားခဲ့တဲ့ ကိစ္စရပ်တွေကို ဖော်ပြတာမျိုး လုပ်ခဲ့ပါတယ်။

ဒီ ပြသနာကို ခြုံငုံသုံးသပ်ကြည့်လိုက်ရင် အာဏာလက်လွှတ်ရတော့မယ့် အစိုးရအဖွဲ့နဲ့ အာဏာကို ဆက်ခံမယ့် ပါတီ အကြား ပြေလည်မှု မရှိဘူး ဆိုတဲ့ အဖြေ ထွက်ပါတယ်။ တကယ်တော့ မြန်မာနိုင်ငံမှာ အသွင်သဏ္ဍာန် မတူတဲ့ အစိုးရတစ်ဖွဲ့ဆီကနေ အခြား တစ်ဖွဲ့ဆီ အာဏာလွှဲပြောင်းပေးတယ်ဆိုတာမျိုး မရှိခဲ့တာ ရာစုနှစ် တစ်ဝက်ကျော်ခဲ့ပါပြီ။ အခုလို သမိုင်းဝင် အာဏာလွှဲပြောင်းပေးမှုကို ရှောရှောရှူရှူ ဖြစ်အောင် လုပ်နေကြတယ်လို့ ဘယ်လောက်ပဲ ပြောပြော အဖုအထစ်တွေ တွေ့ကြရတာ ဖြစ်ပါတယ်။

ပြောရရင် စစ်အာဏာရှင်တွေ၊ စစ်တပ်ကို ကျောထောက်နောက်ခံ ပြုပြီး အုပ်ချုပ်သူတွေအနေနဲ့ တိုင်းပြည်ကို ထင်သလို စီမံခန့်ခွဲလာတာ ခုမှ မဟုတ်ပါဘူး။ နှစ်ပေါင်းများစွာ ကြာခဲ့ပါပြီ။ အခု အာဏာ လွှဲပြောင်းကာနီး လုပ်ပိုင်ခွင့်တွေကို ကမန်းကတန်း အသုံးပြုနေတာမျိုးကလည်း သိပ်ပြီး ထူးဆန်းတဲ့ လုပ်ရပ်မျိုးတော့ မဟုတ်ပါဘူး။ တကယ့်တကယ် ဖြစ်သင့်တာကတော့ အင်န်အယ်လ်ဒီ ပါတီ အနေနဲ့ အာဏာလက်လွှတ်ရတော့မယ့် အစိုးရအဖွဲ့ သိက္ခာ ထပ်ကျအောင် ပြောဆိုနေမယ့်အစား၊ အခြားသော စကားလုံး အခြားသော နည်းနာတွေနဲ့ သတိပေးတာမျိုးက ပိုပြီး သင့်တော်နိုင်ပါတယ်။

အရေးကြီးတာကတော့ သိပ်မကြာခင် ကာလ အတွင်း တပ်မတော်က ကိုင်တွယ်တဲ့ ကိစ္စတွေလောက်ကလွဲရင် တိုင်းပြည်ရဲ့ အရေးအရာ အားလုံးနီးပါးလောက် အင်န်အယ်လ်ဒီ က စီမံခန့်ခွဲခွင့် ရလာပါတော့မယ်။ အဲဒီ အခါ အရင် အစိုးရ လုပ်ကိုင်သွားခဲ့သမျှ ဥပဒေနဲ့ အညီ ဟုတ်မဟုတ်၊ ပြန် ဆန်းစစ်နိုင်ပါတယ်။ ဥပဒေနဲ့ မညီတာတွေကို ကိုင်တွယ် အရေးယူနိုင်သလို၊ တစ်ချို့ သဘောတူညီချက်တွေ စီမံကိန်းတွေကို ဖျက်သိမ်းနိုင်ပါတယ်။ ဒီထက် ပိုအရေးကြီးတာက အရင် အစိုးရ အဆက်ဆက်နဲ့ မတူညီတဲ့၊ ပြည်သူတွေနဲ့ တိုင်းပြည်အကျိုးစီးပွားကို လုပ်ကိုင်ဆောင်ရွက်နည်းမျိုး လုပ်ပြကြဖို့ လိုပါတယ်။ ဒါကြောင့် လက်ရှိ တာဝန်ကနေ အနားယူရတော့မယ့် အစိုးရအဖွဲ့ရဲ့ လုပ်ရပ်တွေနဲ့ ပတ်သက်ပြီး သိပ် စိတ်မပူသင့်ပါကြောင်း သုံးသပ်တင်ပြလိုက်ရပါတယ်။

ဦးစည်သူအောင်မြင့် / ဗွီအိုအေ (မြန်မာပိုင်း)
http://burmese.voanews.com

ဥပဒေမဲ့ လယ်မြေသိမ်းဆည်းသည်ဟု ဆိုကာ မြို့နယ် အုပ်ချုပ်ရေးမှူးအား အရေးယူပေးရန် ဆန္ဒဖော်ထုတ်


ပဲခူးတိုင်း အနောက်ပိုင်း ပြည်မြို့နယ် ပေါင်းတလည်မြို့တွင် တောင်သူများ ဓားမဦးချ လုပ်ကိုင်စားသောက်ခဲ့သော လယ်ယာမြေအား ပြည်မြို့နယ် အုပ်ချုပ်ရေးမှူးက ဥပဒေနှင့်မညီဘဲ လယ်ယာမြေ လုပ်ပိုင်ခွင့်လက်မှတ် ပုံစံ(၇) ထုတ်ယူသည်ဟုဆိုကာ ဖေဖော်ဝါရီလ ၂၈ ရက်နေ့က ဆန္ဒဖော်ထုတ်မှု ပြုလုပ်ခဲ့ကြောင်း သိရှိရသည်။

“လျော်ကြေးလည်း မပေး၊ ဘာတစ်ခုမှလည်း မပေးလို့ ဒီကနေ့ ဆန္ဒပြတာပါ။ ကျွန်တော်တို့ကို အချုပ်ထဲထည့်၊ ဘိုးဘွားစဉ်ဆက်က ပိုင်ခဲ့တဲ့မြေပေါ်မှာ အတင်း အဆောက်အအုံတွေ ၀င်ဆောက်၊ မတရားလုပ်လို့ မြို့နယ် အုပ်ချုပ်ရေးမှူးကို ဆန္ဒပြတာပါ” ဟု ဆန္ဒထုတ်ဖော်မှုတွင် ပါဝင်သူ ကိုဇော်ဝင်းက ပြောသည်။

အဆိုပါ ဆန္ဒဖော်ထုတ်ပွဲ ပြုလုပ်ရန်အတွက် ပြည်မြို့နယ် အုပ်ချုပ်ရေးမှုး၏ သဘောတူညီချက်နှင့်အတူ ပြည်မြို့နယ် ရဲတပ်ဖွဲ့မှူးရုံးမှ တရားခွင့်ပြုမိန့် ချထားပေးခဲ့ကြောင်း သိရသည်။

ဆန္ဒဖော်ထုတ်သူများသည် “အချောင်မယူပါနဲ့ ဥပဒေကို လေးစားပါ”၊ “ဓားမဦးချ မြေခွန်ပြေစာရှိတဲ့ လယ်မြေကို ဥပဒေမဲ့ မသိမ်းဆည်းပါနဲ့”၊ “မြေသိမ်းဥပဒေကို တာဝန်သိပါ တာဝန်ယူပေးပါ” စသည့် စာသားပါ ဗီနိုင်းပိုစတာများအား ကိုင်ဆောင်ခဲ့ကပြီး လယ်ယာမြေများအား တရားဥပဒေမဲ့ မသိမ်းဆည်းရေး ကြွေးကြော်သံများကိုလည်း ကြွေးကြော်ခဲ့ကြသည်။

“ကျွန်တေ်ာတို့ မိသားစုတွေရော ဘာတွေရော မတရား ဒုက္ခရောက်တာပေါ့။ ဘာမှ လျော်ကြေးလည်း ရတာမဟုတ်ဘူး။ ဘိုးဘွားစဉ်ဆက် ကျွန်တော်တို့ လုပ်လာတဲ့ သူတွေကြတော့ ပုံစံ ၇ မရဘူး။ နောက်မှ ရောက်လာတဲ့ သူကြတော့ လယ်ကွက်ထဲတောင် မဆင်းဘဲနဲ့ ပုံစံ ၇ ရတယ်။ အဲဒါကို မကျေနပ်လို့ ဆန္ဒပြတာ” ဟု ဆန္ဒဖော်ထုတ်သူများတွင် ပါဝင်သော တောင်သူတစ်ဦးက ပြောသည်။

ယခု ဆန္ဒဖော်ထုတ်မှုများ ဖြစ်ပွားနေသည့် ပိုင်ဆိုင်မှု အငြင်းပွားသော မြေနေရာမှာ ပေါင်းတလည်မြို့ အနောက်ရပ်ကွက် ပြည်- ပေါက်ခေါင်း ကားလမ်းမနံဘေး ပြည်သူ့ဆေးရုံရှေ့ မြေကွက်ဖြစ်ပြီး လက်ရှိတွင် မြို့အုပ်ချုပ်ရေးအဖွဲ့နှင့် မူလတောင်သူများ မှာလည်း တရားရုံးတွင် တရားရင်ဆိုင် နေရဆဲ မြေကွက်လည်း ဖြစ်ကြောင်း သိရသည်။

အဆိုပါ မြေနေရာအား ၂၀၁၂ ခုနှစ်တွင် ပဲခူးတိုင်းဒေသကြီး အစိုးရအဖွဲ့က အများပြည်သူ အကျိုးငှာ အသုံးပြုရန်အတွက် စာထုတ်ထားပြီး ဖြစ်ကြောင်း၊ ပြည်မြို့နယ် အုပ်ချုပ်ရေးမှူး ဦးအောင်အောင် အမည်ဖြင့် ပုံစံ ၇ ကျထားပြီး ဖြစ်သလို လန(၃၉) ကျရန် လျှောက်ထားဆဲ ဖြစ်ကြောင်းနှင့် မြေယာ သိမ်းဆည်းစဉ်ကာလ ကလည်း တောင်သူများကို လျော်ကြေးငွေများ ပေးဆောင်ခဲ့ကြောင်း အနောက်ရပ်ကွက် အုပ်ချုပ်ရေးမှူး ဦးသိန်းဇော်က ဇန်န၀ါရီ ၁၂ ရက်နေ့က မီဒီယာများနှင့် တွေ့ဆုံစဉ် ပြောဆိုထားသည်။

သတင်း - MMK
The Ladies News
https://www.facebook.com/News.TheLadies/

မူးယစ်ရမ်းကား လူငယ်များ၏ ရိုက်နှက်မှုကြောင့် လူငယ်အချို့ ဒဏ်ရာရသဖြင့် သက်ဆိုင်ရာက အမှုဖွင့်အရေးယူထား


သထုံ ဖေဖော်ဝါရီ ၂၈

မွန်ပြည်နယ် သထုံမြို့ ရွှေစာရံဘုရားလမ်းပေါ်၌ ဖေဖော်ဝါရီ ၂၈ ရက်က စာမေးပွဲနီး၍ စာစုကျက်ပြီး ပြန်လာ သော တက္ကသိုလ်ဝင်တန်းကျောင်းသားများအား လူငယ်တစ်စုက အုပ်စုဖွဲ့ရိုက်နှက်မှု ဖြစ်ပွားခဲ့ကြောင်း သိရသည်။တက္ကသိုလ်ဝင် စာမေးပွဲတွင် ဖြေဆိုကြမည့် အလင်းရောင် နေ့သစ် ပညာဒါန အခမဲ့သင်တန်း ကျောင်းမှ ကျောင်းသားလေးဦး စာကျက်ရာမှအပြန် မူးယစ်သောက် စားထားသည့် လူငယ်တစ်စုက ရိုက်နှက်ခြင်းဖြစ်ကြောင်း ဖြစ်စဉ်တွင် ပါဝင်ခဲ့သည့် ကျောင်းသားတစ်ဦး ဖြစ်သူ မောင်မင်းခန့်အောင်က
ပြောသည်။
''ကျွန်တော်တို့က စာကျက်ပြီးပြန် လာတာ။ အဝိုင်းလောက်ရောက် တော့ သူတို့တွေမူးပြီး သောင်းကျန်း နေကြတယ်။ လမ်းပေါ်မှာ အရက် ပုလင်းတွေ ရိုက်ခွဲထားပြီး ဆိုင်တစ် ဆိုင်က အအေးပုလင်းတွေရိုက်ခွဲ နေကြတယ်။ ဒါနဲ့ကျွန်တော်တို့အဖွဲ့ တွေ ရှောင်ပြီးသွားတာကို နောက် ကနေ လိုက်ပြီးရိုက်တာပါ။ သူတို့နဲ့ လည်းရန်ငြိုးမရှိပါဘူး။ သုံးယောက် ဒဏ်ရာရတယ်။ တစ်ယောက်ဆို ဒဏ်ရာကပြင်းလို့ ညချင်းရန်ကုန်မှာ ကုသဖို့ပို့လိုက်ရတယ်။ ကျွန်တော်ပဲ လွတ်တယ်'' ဟု ၄င်းက ပြောသည်။

ယခုကဲ့သို့ အချိန်မတော် မူးယစ် ရမ်းကားပြီး အုပ်စုလိုက်နှောင့်ယှက်နေခြင်းသည် အများပြည်သူလုံခြုံ ရေးအတွက် စိုးရိမ်စရာဖြစ်ပြီး သက် ဆိုင်ရာက ထိရောက်စွာအရေးယူရန် လိုကြောင်း တက္ကသိုလ်ဝင်စာမေးပွဲ ဖြေဆိုရန် နီးကပ်ပြီဖြစ်၍ အချိန် မတော် အရက်ရောင်းချနေခြင်းနှင့် အရက်ပုန်းဆိုင်များကို လျှော့ချရန် လိုအပ်ကြောင်း ဒေသခံတစ်ဦးဖြစ်သူ ကိုအောင်ကျော်မြင့်က ပြောသည်။

ဖြစ်စဉ်တွင် မောင်မိုးပြည့်စုံပါ သူငယ်ချင်း လေးဦး စာကျက်အပြီး အိမ်ပြန်လာစဉ် အအေးသောက် လိုသောကြောင့် သိမ်ကုန်းရပ်ကွက် ရွှေစာရံဘုရားလမ်းအတိုင်း ဆိုင် ကယ်ဖြင့် အအေးဆိုင်ဘက်သို့ ထွက် လာရာ ညီညီငြိမ်းမောင်(ခ)ဖိုးသား (၁၇နှစ်)ပါ လူငယ်ရှစ်ဦးခန့်က အရက်သေစာ သောက်စားမူးယစ်ပြီး ရမ်းကားနေသည်ကို တွေ့သဖြင့် ရှောင်တိမ်းစဉ် ၄င်းလူငယ်များက တုတ်၊ ဓားများကိုင်ဆောင်ကာ ရိုက် နှက်သဖြင့် မောင်မိုးပြည့်စုံ၊ မောင်နိုင် သက်အောင်နှင့် မောင်ဆက်နိုင် လင်း တို့တွင် ဒဏ်ရာများရရှိခဲ့သည်။မောင်မိုးပြည့်စုံမှာစိုးရိမ်ရသဖြင့် ရန်ကုန်ပြည်သူ့ဆေးရုံသို့ အတွင်း လူနာအဖြစ် တင်ပို့ထားရကြောင်း ရဲမှတ်တမ်းများအရ သိရသည်။
''ညဆိုရင် အများပြည်သူလုံခြုံ ရေးအတွက် နယ်ထိန်းအဖွဲ့က လှည့်ကင်းလှည့်တယ်။ လိုင်စင်နဲ့ ရောင်းချတဲ့ ဆိုင်တွေကလွဲပြီး ကျန် အရက်ပုန်းဆိုင်တွေကို ရှာဖွေအရေး ယူဖို့ တပ်ဖွဲ့ဝင်အားလုံးကို ညွှန် ကြားထားပါတယ်။ အချိန်မတော် ရောင်းနေတဲ့ အရက်ဆိုင်တွေ့ရင် ပိုပြီး ထိထိရောက်ရောက် ဆောင် ရွက်နိုင်ဖို့ ပြည်သူကလည်း သတင်း ပေးဖို့ လိုပါတယ်။ အခုဖြစ်စဉ်မှာ ပြည်သူပိုင် ပစ္စည်းအချို့ကိုလည်း ဖျက်ဆီးမှုရှိတယ်လို့ပြောကြတယ်။ စစ်ဆေးတွေ့ရှိရင်တော့ မြို့နယ် စည်ပင်က အမှုမဖွင့်ဘူးဆိုရင်တောင် ကျွန်တော်တို့က ပြည်သူပိုင်ပစ္စည်း ဖျက်ဆီးမှုနဲ့ တရားစွဲမှာပါ'' ဟု မြို့ နယ်ရဲတပ်ဖွဲ့မှူး ရဲမှူးကျော်မင်းက ပြောသည်။

အဆိုပါဖြစ်စဉ်နှင့်ပတ်သက်၍ အမှုတွင်ပါဝင်သော သထုံမြို့ နန်းခဲ ရပ်ကွက် ဆေးရုံဝင်း၌ နေထိုင်သည့် မောင်ညီညီငြိမ်းမောင် (၁၇ နှစ်)၊ မောင်ဇော်မျိုးခိုင် (၁၈နှစ်)၊ မောင်ဝေ ယံအောင် (၂၃နှစ်)၊ ဆေးရုံအထွေ ထွေလုပ်သား စောပြည့်ဖြိုးပိုင် (၂ဝ နှစ်)၊ ဘင်လှိုင်ရပ်ကွက်နေ မောင်စည် သူစိုး (၁၈ နှစ်)နှင့် အောက်ကျင်းရပ် ကွက်နေ မောင်သူရိန်မင်း (၂ဝနှစ်) တို့ ခြောက်ဦးကို သထုံမြို့မရဲစခန်းက အမှုဖွင့် အရေးယူထားကြောင်း သိရသည်။

သက်ဦး(သထုံ)
Myanmaalinn
https://www.facebook.com/MYANMAALINNNEWS

ဒုသမ္မတ ဘယ်သူဖြစ်မလဲ

NLD ဥက္ကဌ ဒေါ်အောင်ဆန်းစုကြည်၊ NLD ခေါင်းဆောင်တချို့နဲ့ သူရဦးရွှေမန်း အမျိုးသားလွှတ်တော်ကိုသွားရောက်လေ့လာစဉ် -၃ ဖေဖ၀ါရီ ၂၀၁၆ (Photo-NLD Chairperson)
လွှတ်တော်မှာ အမတ်နေရာ အများစုနဲ့ အင်အားအကြီးဆုံးပါတီကြီးဖြစ်တဲ့ NLD နဲ့ ဒုတိယအများဆုံးဖြစ်နေတဲ့ စစ်တပ် နှစ်ဘက်စလုံးဟာ ဒုသမ္မတလောင်းအမည်စာရင်းတွေကို မတ်လ (၁၇) ရက်မှာတင်သွင်းဖို့ ပြင်ဆင်နေကြပါပြီ။

သမ္မတအဖြစ် ရွေးကောက်တင်မြှောက်ခံရမယ့် ဒုသမ္မတလောင်း ဘယ်သူဖြစ်နိုင်တယ်ဆိုတာကိုလည်း ပြည်သူအများက စိတ်ဝင်တစားစောင့်ကြည့်နေကြတာပါ။ မအင်ကြင်းနိုင် က အပြည့်အစုံကို ပြောပြမှာပါ။

ဒေါ်အောင်ဆန်းစုကြည် ဦးဆောင်တဲ့ အမျိုးသားဒီမိုကရေစီအဖွဲ့ချုပ် NLD ဘက်က လွှတ်တော်မှာ တင်သွင်းမယ့် ဒုသမ္မတလောင်း နှစ်ဦးရဲ့အမည်တွေနဲ့ တပ်မတော်ဘက်ကအဆိုပြုမယ့် ဒုသမ္မတလောင်းတဦးရဲ့အမည် ကို နှစ်ဘက်လုံးက ပြင်ဆင်ထားပြီးပြီလို့ သတင်းတွေထွက်လာချိန်မှာ မနေ့က တနင်္ဂနွေနေ့မှာ NLD ထိပ်ပိုင်းခေါင်းဆောင်တွေကို ဒေါ်အောင်ဆန်းစုကြည်က သူရဲ့နေပြည်တော်နှင်းဆီစံအိမ်မှာ ခေါ်ယူတွေ့ဆုံခဲ့တာပါ။

ထူးခြားချက်ကတော့ ဒီတွေ့ဆုံပွဲမှာ NLD ရဲ့ ဥပဒေအကြံပေး ပုဂ္ဂိုလ် တချို့ပါဝင်တာဖြစ်ပါတယ်။ ဒါပေမဲ့ NLD ပြောခွင့်ရပုဂ္ဂိုလ် ဦးဝင်းထိန်ကတော့ ဒီဆွေးနွေးပွဲဟာ ပါတီဗဟိုအလုပ်အမှုဆောင် ကော်မတီအစည်းအဝေးသာဖြစ်ပြီး ပါတီတွင်း စည်းမျဉ်းစည်းကမ်းကိစ္စတွေသာ အဓိကဆွေးနွေးခဲ့တယ်လို့ သတင်းထောက်တွေနဲ့ ဆွေးနွေးပွဲအပြီးတွေ့ဆုံရာမှာ အခုလိုပြောသွားပါတယ်။

“အရေးကြီးတဲ့ ဆုံးဖြတ်ချက်က နောက်ကျမှ ဆုံးဖြတ်မယ်။ အခုကတော့ ပါတီအတွင်းကိစ္စတွေ၊ နောက် စည်းရုံးရေးကိစ္စတွေ၊ နောက် တိုင်ကြားစာ ကိစ္စတွေ တခြားကတော့ ထွေထွေထူးထူး မရှိပါဘူး။”

ဒီအတောအတွင်းမှာပဲ ပြည်သူ့လွှတ်တော်က တပ်မတော်သားကိုယ်စားလှယ်တွေရဲ့ပြောခွင့်ရ ပုဂ္ဂိုလ် ဗိုလ်မှူးချုပ် တင့်ဆန်းနိုင်ကလည်း တပ်မတော်ဘက်ကတင်သွင်းမယ့် ဒုသမ္မတလောင်းဟာ ကာကွယ်ရေး၊ နိုင်ငံရေး၊ စီးပွားရေး၊ အုပ်ချုပ်ရေးစတဲ့ အမြင်တွေရှိသူဖြစ်တယ်လို့ ပြောဆိုခဲ့ပါတယ်။ ဒါပေမဲ့လည်း လက်တွေ့အခြေအနေမှာတော့ စစ်တပ်တွင်း ရာထူးနေရာပေးတဲ့ပုံစံဟာ အရည်အချင်းထက် ဆရာတပည့်ဖြစ်တဲ့အပေါ်မှာ ဦးစားပေးရွေးချယ်လေ့ရှိတယ်လို့ စစ်သံမှူးဟောင်း ဦးအောင်လင်းထွဋ်ကပြောပါတယ်။

“လက်ရှိ တပ်မတော်မှာ ကျနော်တို့ အရည်အချင်းတို့ စွမ်းရည်တွေထက်ပေါ့လေ၊ ကျနော်တို့ ဆရာတပည့်ပါပဲ၊ ဆရာ တပည့်ဖြစ်တဲ့သူတွေကို ရွေးချယ်ပြီးတော့မှ တင်မြောက် တာတွေရှိခဲ့ပါတယ်။ ဗိုလ်ချုပ်မှူးကြီးမင်းအောင်လှိုင်ကိုယ်တိုင်လည်း ဗိုလ်ချုပ်မှူးကြီး သန်းရွှေရဲ့ စိတ်ချ ယုံကြည်တဲ့အတွက်ကြောင့်မို့လို့ သူကိုယ်တိုင်ရွေးခဲ့တာပါ။ ဗိုလ်ချုပ်မှူးကြီးသန်းရွှေ တပ်မမှူး စစ်စစ် ဘ၀မှာ ဗိုလ်ချုပ်မှူးကြီး မင်းအောင်လှိုင်က သူ့တပ်မအောက်က ဒီတိုက်စစ်မှူးတယောက်ဖြစ်ပါတယ်။ သူကိုယ်တိုင် စိတ်ကြိုက်ရွေးခဲ့တာပါ။ ဘာဖြစ်လို့လဲဆိုတော့ အဲဒီအချိန်တုန်းက ဗိုလ်ချုပ် သူရမြင့်အောင်တို့ ဗိုလ်ချုပ် ကိုကိုတို့ကို ကျော်ပြီးတော့မှ ဗိုလ်ချုပ်မှူးကြီး မင်းအောင်လှိုင်ကို ရွေးခဲ့တာပါ။”

စစ်တပ်ကအဆိုပြုမယ့် ဒုသမ္မတလောင်းအမည်စာရင်းအတွက် ခန့်မှန်းခံထားရသူတွေထဲမှာ လက်ရှိကြံခိုင်ဖွံဖြိုးရေးပါတီ လွှတ်တော်ကိုယ်စားလှယ် အငြိမ်းစားဗိုလ်ချုပ်ကြီး လှဌေးဝင်း ဟာ အလားအလာအကောင်းဆုံးဖြစ်တယ်လို့ မြင်ကြောင်း ဦးအောင်လင်းထွဋ်ကဆိုပါတယ်။

“ဗိုလ်ချုပ်ကြီးဟောင်း လှဌေးဝင်းပါပဲ။ အငြိမ်းစားယူသွားတယ်လေ။ သူကတော့ ဖြစ်နိုင်ခြေအများဆုံးလို့တော့ မြင်ပါတယ်။ ဘာဖြစ်လို့လဲဆိုတော့ ဗိုလ်ချုပ်ကြီး လှဌေးဝင်းက ဘဘကြီးလို့ခေါ်တဲ့ ဗိုလ်ချုပ်မှူးကြီးသန်းရွှေ ရဲ့ ဦးစီးတဲ့ လက်အောက်မှာ သူ G 2 အနေနဲ့ နေသွားတယ်။ G1 ဆိုတာက စစ်ဦးစီး အရာရှိ ပထမတန်း အနေနဲ့နေသွားတယ်။ နောက် စစ်ဦးစီးအရာရှိချုပ် ၊ ဗိုလ်မှူးချုပ်အနေနဲ့လည်း နေသွားတယ်။ တောက်လျှောက်သူနဲ့ ဗိုလ်ချုပ်မှူးကြီးသန်းရွှေ ရဲ့ link ဟာ ကျနော် သံရုံးမှာရှိနေတုန်းက ဒီအမေရိကန်နိုင်ငံရဲ့ ပစ္စည်းလိုအပ်ချက်၊ ဗိုလ်ချုပ်မှူးကြီးသန်းရွှေ ရဲ့လိုအပ်ချက် ကို ဗိုလ်ချုပ်ကြီး လှဌေးဝင်းက လိုက်လုပ်ပေးရတဲ့အနေအထားရှိပါတယ်။

တကယ်လို့ ဗိုလ်ချုပ်ကြီးဟောင်း လှဌေးဝင်းကို ဒုသမ္မတအဖြစ်ရွေးကောက်တင်မြှောက်ခဲ့ မယ်ဆိုရင်လည်း လွှတ်တော်ထဲ ရာခိုင်နှုန်းအနည်းငယ်ပဲရှိတဲ့ ကြံခိုင်ဖွံဖြိုးရေးပါတီအတွက် ဘာမှထူးခြားသွားမှာမဟုတ်ဘူးလို့ ဦးအောင်လင်းထွဋ်ကမြင်ပါတယ်။

စစ်တပ်ကတင်သွင်းမယ့်အမည်စာရင်းမှာ နောက်ထပ်နာမည်ထွက်နေတဲ့ သူတွေနဲ့ ပတ်သက်လို့ ဦးအောင်လင်းထွဋ်ရဲ့အမြင်ကတော့

“အခုသူတို့ ရာထားတဲ့ ဒု သမ္မတ ဆိုတော့ ဗိုလ်ချုပ်ကြီးစိုးဝင်းကတော့ လက်ရှိလည်း သက်တမ်း အသက်ကို ၆၅ နှစ်အထိကို တိုးပေးတဲ့အတွက်ကြောင့်မို့လို့ သိပ်မဖြစ်နိုင်ပါဘူး။ နောက် ကာကွယ်ရေးဦးစီးချုပ် (လေ)နဲ့ ကြည်း၊ရေ၊ လေ ညှိုနှိုင်းကွပ်ကဲရေးမှူး ဗိုလ်ချုပ်ကြီး ခင်အောင်မြင့် ကျနော်တို့တပ်မတော် ထိပ်ပိုင်းပေါ့လေ ဗိုလ်ချုပ်မှူးကြီးသန်းရွှေ ရဲ့အသိုင်းအ၀ိုင်းနဲ့ ဝေးပါတယ်။ ကျနော်တို့ မျက်မြင်ပါပဲ။”

ဒုသမ္မတလောင်း သုံးဦးရဲ့အမည်စာရင်းတွေကို မတ်လ (၁၇)ရက်နေ့ လွှတ်တော်မှာ NLD နဲ့ တပ်မတော် ကိုယ်စားလှယ်တွေ အသီးသီးတင်သွင်းကြမှာဖြစ်ပါတယ်။ အဲဒီထဲကမှာ မဲအများဆုံးရရှိတဲ့ သူဟာ သမ္မတအဖြစ်ရွေးချယ်တင်မြှောက်ခံရမှာဖြစ်ပြီး အရပ်သားအစိုးရသစ်ဖြစ်တဲ့ NLD အစိုးရလက်ထက်မှာ သမ္မတဘယ်သူဖြစ်လာမလဲဆိုတာ ပြည်သူအများစိတ်ဝင်စားနေကြပါတယ်။

အင်ကြင်းနုိုင် / ဗွီအိုအေ (မြန်မာပိုင်း)
http://burmese.voanews.com

ကျားကြီးအားသင်္ဂြိုဟ်မည့် အစီအစဉ်ပြောင်းလဲကာ ရုပ်လုံးသွင်းထားရှိရေး ဆောင်ရွက်


ကော့ကရိတ် ဖေဖော်ဝါရီ ၂၈

ဖေဖော်ဝါရီ ၂၆ ရက်တွင် ကော့ကရိတ်မြို့ ရေလည်ကုန်းကျေးရွာ၌ ဖမ်းဆီးရမိသော ကျားအား မီးသင်္ဂြိုဟ်မည့်ကိစ္စနှင့်ပတ်သက်၍ ဒေသခံ ဆရာတော်များ၊ ဒေသခံအာဏာပိုင်များ၊ ကျေးရွာနေပြည်သူများနှင့် ပြည်တွင်း ပြည်ပမီဒီယာသမားများ တွေ့ဆုံဆွေးနွေးခဲ့ကြောင်း သိရသည်။

ဆွေးနွေးပွဲတွင် မီးသင်္ဂြိုဟ်မည့်ကျားမှာ ရှားပါးမျိုးစိတ်ဖြစ်သည့်အပြင် မိမိတို့ဒေသတွင်းဗဟုသုတရစေရန်၊ အများကြည့်ရှုနိုင်စေရန်အတွက် ရုပ်လုံး သွင်းထားရှိသင့်ကြောင်းနှင့် ယခုလက်ရှိ စေတီတည်သည့်နေရာတွင်ထားရှိပြီး ပြသထားရန်အတွက် လိုအပ်သည့်ပံ့ပိုးကူညီမှုများလည်း ၄င်းတို့မှကူညီ ဆောင်ရွက်ပေးမည့်အကြောင်း ဆွေးနွေးလျှောက်ထားခဲ့သည်။

ဆရာတော် ကြီးများကလည်း ယင်းအကြံအစည်အား ဝမ်းမြောက်ဝမ်းသာလက်ခံကာ ရန်ကုန်မြို့ရှိ ရုပ်လုံးသွင်းပညာရှင်နှင့် ဆက်သွယ်ပြီး အမြန်ဆုံးရုပ်လုံးသွင်းထားရှိနိုင်ရန် စီစဉ်ဆောင်ရွက်လျက်ရှိကြောင်း သိရသည်။

တင်ဝင်းလှိုင်(ကော့ကရိတ်)
The Mirror Daily
https://www.facebook.com/TheMirrorDaily

ဒက်ကာမှာ ဖောက်ခွဲရေးပစ္စည်းတွေ ဖမ်းမိ

Dhaka မှာ ဖောက်ခွဲရေးပစ္စည်းများရဲများ ရှာဖွေတွေ့ရှိခဲ့စဉ်
ဘင်္ဂလားဒက်ရှ် နိုင်ငံ မှာ မကြာခင်ကာလတွေအတွင်း ဖြစ်ပွားခဲ့တဲ့ တိုက်ခိုက်မှုတွေနဲ့ ပတ်သက်ပြီးဆက်နွယ်မှု ရှိမယ်လို့ သံသယရှိတဲ့ ဂျမားတူလ် မူဂျာဟေဒင် JMB အဖွဲ့က စစ်သွေးကြွတွေရဲ့ ပုန်းခိုရာနေရာမှာ တနင်္ဂနွေနေ့က ဖောက်ခွဲရေးပစ္စည်းတွေနဲ့ ဗုံးလုပ်တဲ့ပစ္စည်းတွေကို ဖမ်းဆီးရမိကြောင်း ဘင်္ဂလားဒက်ရှ် ရဲအဖွဲ့ ပြောခွင့်ရက ပြောပါတယ်။

မူစလင် အများစုနေထိုင်ရာ ဘင်္ဂလားဒက်ရှ် နိုင်ငံမှာ ပြီးခဲ့တဲ့ နှစ်တုန်းက အစွန်းမရောက်တဲ့ တက်ကြွလှုပ်ရှားသူ အများအပြား အသတ်ခံရတာ၊ လူနည်းစု ရှီယာမူစလင်တွေ၊ ခရစ်ယန်ဘုန်းတော်ကြီးတွေနဲ့ ဟိန္ဒူဘုရားကျောင်းတွေ အတိုက်ခိုက်ခံရတာလို အစ္စလာမ် အကြမ်းဖက် မှုတွေ တိုးလာတာပါ။

အစောပိုင်းက ဒက်ကာမြို့တော်မှာ ဖမ်းဆီးရမိတဲ့ JMB အဖွဲ့က အဖွဲ့ဝင်တွေဆီက ရတဲ့ အချက်အလက်တွေပေါ် အခြေခံပြီး ဒက်ကာမြို့ပြင်က အိမ်တအိမ်မှာ ဝင်ရောက်ရှာဖွေခဲ့တာလို့ ရဲတပ်ဖွဲ့ ဒုတိယ ကော်မရှင်နာမင်းကြီးက ပြောပါတယ်။ ဝင်ရာက်စီးနင်းမှုကနေ အဲဒီမှာ ဗုံးပြုလုပ်တဲ့ ကရိယာ အများအပြားနဲ့ ဖောက်ခွဲရေး ပစ္စည်းတွေကို တွေ့ခဲ့တယ်လို့လည်း ပြောပါတယ်။

ဒီအဖွဲ့ဟာ ရှီယာဘုရားကျောင်းတခုနဲ့ နိုင်ငံခြားသား ၂ ဦးကို သတ်ဖြတ်တာလိုမျိုး တိုက်ခိုက်မှုတွေနဲ့ ပတ်သက်မှုတွေရှိနေမယ်လို့ ယုံကြည်ကြပါတယ်။

IS စစ်သွေးကြွ အဖွဲ့ကတော့ ပြီးခဲ့တဲ့ သီတင်းပတ်ထဲ ဟိန္ဒူဘုန်းတော်ကြီးတပါးကို သတ်ဖြတ်တာနဲ့ နိုဝင်ဘာလတုန်းက ရှီယာဗလီတခုကို တိုက်ခိုက်တာ အပါအဝင် မကြာသေးခင်က ဖြစ်ပွားခဲ့တဲ့ တိုက်ခိုက်မှုတွေကို သူတို့ လုပ်ဆောင်တာလို့        ကြေညာ ပါတယ်။

ဘင်္ဂလားဒက်ရှ် အစိုးရကတော့ သူတို့နိုင်ငံထဲမှာ IS အစွန်းရောက်တွေ မရှိဘူးလို့ ငြင်းဆိုနေတာပါ။

ဗွီအိုအေ (မြန်မာပိုင်း)
http://burmese.voanews.com

တအောင်းပလောင်ဒေသထဲ TNLA နဲ့ အစိုးရတပ် တိုက်ပွဲ ဖြစ်ပြန်

အစိုးရ သစ် ပေါ်ပေါက် လာမှပဲ ငြိမ်းချမ်းရေး ကိစ္စ ပြန်လည် စတင် နိုင်ဖို့ မျှော်လင့် ထား။
ရှမ်းပြည်နယ် တအောင်း ပလောင်ဒေသ မှာ ဒေသခံ တအောင်း ပလောင် လက်နက်ကိုင် တပ် TNLA နဲ့ တပ်မ ၇၇ လက်အောက်ခံ အစိုးရ စစ်တပ် အကြား ဖေဖေါ်ဝါရီလ ၂၈ ရက် တနင်္ဂနွေ နေ့ က တိုက်ပွဲ နှစ်ကြိမ် ဖြစ်ခဲ့တယ် ဆိုပြီး TNLA ဘက်က ပြောပါတယ်။

အစိုးရ စစ်တပ်ဘက် က အကျအဆုံး ရှိတယ် လို့ TNLA က ပြောပေမယ့် သီးခြား အတည်ပြုချက်တော့ မရရှိ နိုင် သေးပါဘူး။

နမ့်ဆန် ဒေသ ကို အခု ရက်ပိုင်း တွေ အတွက် အစိုးရ စစ်တပ် ဘက်က အင်းအား အလုံးအရင်း ဖြည့်တင်း လာနေတဲ့ အတွက် ထိတွေ့မှု တွေ ထပ်ပြီး ဖြစ်လာ နိုင်တယ် လို့ လို့ TNLA ပြောခွင့်ရ ဗိုလ်မှူး မိုင်အိုက်ကျော် က ဘီဘီစီ ကို ပြောပါတယ်။

နမ့်ခမ်း ဘက် မှာလည်း TNLA နဲ့ ရှမ်းပြည်တောင်ပိုင်းတပ်မတော် RCSS/SSA တို့ကြား ပြီးခဲ့တဲ့ တနင်္လာ နေ့က တိုက်ပွဲ ဖြစ် ခဲ့ပြီးတဲ့ နောက် ပိုင်း ထိတွေ့မှု ထပ်မံ မဖြစ် တော့ပေမယ့် အခြေအနေဟာ တင်းမာ နေဆဲ ဖြစ်တယ် လို့လည်း ဆိုပါတယ်။

လက်ရှိ မှာတော့ အစိုးရနဲ့ TNLA အကြား ငြိမ်းချမ်းရေး အတွက် ပြောဆို ဆွေးနွေးမှု တွေ အားလုံး ရပ်တန့် နေပြီး အစိုးရ သစ် ပေါ်ပေါက် လာမှပဲ ငြိမ်းချမ်းရေး ကိစ္စ ပြန်လည် စတင် နိုင်ဖို့ မျှော်လင့် ထားတယ် ဆိုပြီး ဗိုလ်မှူး မိုင်အိုက်ကျော် က ပြောပါတယ်။

BBC Burmese
http://www.bbc.com/burmese

အလှူခံအဖွဲ့စီးနင်းလိုက်ပါလာသည့် ထော်လာဂျီယာဉ် စစ်တောင်းမြစ်အတွင်းထိုးကျ


ထန်းတပင် ဖေဖော်ဝါရီ ၂၈

ပဲခူးတိုင်းဒေသကြီး တောင်ငူခရိုင် ထန်းတပင်မြို့နယ် ဇရပ်ကြီးနယ်မြေရဲစခန်းအပိုင် အနောက်ဘက် ခုနစ်မိုင်ခန့်အကွာရှိ မြို့စိုးကျေးရွာအုပ်စု စစ်တောင်းမြစ်ယာယီမြစ်ကူးတံတားပေါ်မှ အလှူခံအဖွဲ့ စီးနင်းလာသည့် ထော်လာဂျီယာဉ်မှာ စစ်တောင်းမြစ်အတွင်း ထိုးကျတိမ်းမှောက်သွားခဲ့ရာ အမျိုးသမီးတစ်ဦး ပျောက်ဆုံးကြောင်း သိရသည်။

ဖြစ်စဉ်မှာ အုတ်တွင်းမြို့နယ် မြေစေး အုပ်စု ရွာသစ်ကျေးရွာ ဘုန်းတော်ကြီး ကျောင်း တရားစခန်းပွဲအတွက် အလှူ ခံရန် စစ်တောင်းမြစ်ကူးယာယီတံတား ပေါ်မှ ဖြတ်သန်းမောင်းနှင်စဉ် မြို့စိုး ကျေးရွာဘက်ခြမ်း ၁၅ ပေခန့်အရောက် တံတားပေါ်မှ မြစ်အတွင်းသို့ ထိုးကျ တိမ်းမှောက်သွားခဲ့သည်။

 ယာဉ်တိမ်း မှောက်သွားကြောင်းသိသိချင်း မြို့စိုး ကျေးရွာဒေသခံများက မြစ်အတွင်းသို့ ဆင်း၍ ယာဉ်မောင်းအပါအဝင် အမျိုးသား ငါးဦး၊ အမျိုးသမီးရှစ်ဦးတို့ အား ဆယ်ယူခဲ့ရာ ဒေါ်ချို(၄ဝ)နှစ် ရွာသစ်ကျေးရွာနေသူမှာ ပျောက်ဆုံး လျက်ရှိပြီး ယင်းနေ့ ည ၈ နာရီ ၄၅ မိနစ်တွင် အုတ်တွင်းမြို့နယ် ညောင်ခြေ ထောက်နယ်မြေရဲစခန်းအပိုင် လှေဆွဲ မြောင်းကျေးရွာအနီး စစ်တောင်းမြစ် အတွင်းမှအလောင်းအား ပြန်လည် တွေ့ရှိရ၍ ဇရပ်ကြီးနယ်မြေရဲစခန်းမှ အမှုဖွင့်ဆောင်ရွက်လျက်ရှိကြောင်း သိရ သည်။

ကိုလွင်(ဆွာ)
The Mirror Daily
https://www.facebook.com/TheMirrorDaily

ရန်ကုန်-ဒလ တံတားစီမံကိန်းရှိသော်လည်း ဒလမြေဈေး အရောင်းအဝယ်အေး


ဒလ ဖေဖော်ဝါရီ ၂၈

ရန်ကုန်မြို့နှင့် အနီးဆုံးဖြစ်ပြီး စီးပွားရေး လုပ်ငန်းရှင်များ စိတ်ဝင်စား လျက်ရှိသည့် လှိုင်မြစ်တစ်ဖက်ကမ်းမှ ဒလမြို့နယ်မှာ လက်ရှိအနေ အထားအရ ရန်ကုန်မြို့သို့ တံတား ထိုးတော့မည်ဖြစ်သော်လည်း အိမ်၊ ခြံ၊ မြေ ဈေးကွက်မှာ လှုပ်ခတ်မှု မရှိဘဲ အရောင်းအဝယ်အေးလျက်ရှိ နေကြောင်း ဒလမြို့ပေါ်ရှိ အိမ်၊ ခြံ၊ မြေ အကျိုးဆောင်အသိုင်းအဝိုင်းမှ သိရသည်။

ဒလမြို့နယ်ရှိ ရာဇသင်္ကြန်လမ်း ပေါ်မှ အိမ်၊ ခြံ၊ မြေ အကျိုးဆောင် လုပ်ငန်း လုပ်ကိုင်နေသော ဦးသန်း ဌေးက ''ဒလမြို့နယ်ကနေ ရန်ကုန်မြို့ ထဲ ဘုန်းကြီးလမ်းကို သုံးမိနစ်အတွင်း တိုက်ရိုက် သွားလာနိုင်တော့မယ့် ကိုရီးယားချစ်ကြည်ရေးတံတားကြီး တည်ဆောက်တော့မှာဖြစ်တဲ့အတွက်ကြောင့် ဒလဘက်ကမ်းဗိုလ်မင်းရောင် လမ်းမကြီးတစ်လျှောက်မှာ စီမံကိန်းနဲ့ ငြိစွန်းနေတဲ့ နေအိမ်တွေကို နိုင်ငံတော်က မြေယာလျော်ကြေး ထောက်ပံ့ကြေးတွေ ပေးခဲ့ပြီးပါပြီ။ ဒါဟာ ဒလမြို့နယ်အတွက် အိပ်မက် တံတားကြီး တကယ်ထိုးဖြစ်တော့မယ့် လက္ခဏာကောင်းပါ။ ဒီအပေါ်မှာ အိမ်ခြံမြေဈေးတွေ တစ်ဟုန် ထိုးတက်လာပြီး ရင်းနှီးမြှုပ်နှံမယ့် လုပ်ငန်းရှင်တွေကလည်း အလု အယက်ဝယ်ကြမယ်လို့ ယူဆခဲ့မိပါ တယ်။ ဒါပေမယ့် အရောင်းအဝယ်က ထင်သလို မဖြစ်ဘဲ အဝယ်အေး နေပါတယ်''ဟု ပြောသည်။

တံတားတည်ဆောက်မည့် စီမံကိန်း နယ်မြေနှင့် အနီးဝန်းကျင်၌ ရှိသော လုပ်ငန်းရှင်များ စိတ်ဝင်စား နေကြသည့် ကျန်စစ်သားရပ်ကွက် အထက်ပိုင်း၌ ခြံအကွက်အသေး (ပေ ၂ဝ x ပေ ၆ဝ)တစ်ကွက်မှာ ယခင် ငွေကျပ် သိန်း ၄၅ဝ ခန့် ရှိခဲ့သော်လည်း ယခုအခါ ဈေးကွက်ခြံပေါက် ဈေးနှုန်းအရ ငွေကျပ်သိန်း ၅ဝဝ ဝန်းကျင်ခန့်သာရှိနေပြီး ဆယ်ဂဏန်း မျှသာတက်လျက်ရှိကြောင်း သိရသည်။

ဈေးကွက်ခြံပေါက်ဈေးနှုန်းအရ ခြံ အကွက်ကြီး (ပေ ၄ဝ x ပေ ၆ဝ)တစ်ကွက်မှာ ယခုအခါ ငွေကျပ်သိန်း တစ်ထောင်ဝန်းကျင်သာရှိပြီး ယခင် ဈေးနှုန်းနှင့် ကွာခြားမှု အနည်းငယ် သာရှိကြောင်း သိရသည်။

ယခုအခါတွင် ဒလမြို့နယ်ပေါ်ရှိ အိမ်၊ ခြံ၊ မြေ ဈေးကွက်မှာ နေ့စဉ် အရောင်းအဝယ်အေးလျက်ရှိနေပြီး ဝယ်သူမရှိဘဲ စုံစမ်းကြသူများသာရှိ ကြောင်း ဒလမြို့နယ်ပေါ်ရှိ အိမ်၊ ခြံ၊ မြေ အသိုင်းအဝိုင်းမှ သိရသည်။

''ဒလမြေဈေး အဝယ်အေးနေ တာကို သိသလောက်ပြောရရင်တော့ တံတားစီမံကိန်းက တကယ်သေချာ ပေမယ့် စီမံကိန်းကာလက ငါးနှစ် ကြာမြင့်မှာဆိုတော့ မြေကွက်၊ ခြံကွက်ဝယ်မယ့် လုပ်ငန်းရှင်တွေက အချိန်အကြာကြီး ရင်းနှီးမြှုပ်နှံရမှာ ဖြစ်တဲ့အတွက် စဉ်းစားနေကြပါတယ်။ ဒါ့အပြင် ဒလမြို့နယ် ၁၁၊ ၁၄၊ ၆ နံပါတ်အပါအဝင် အံကြီးအရှေ့၊ အံကြီး အနောက်ရပ်ကွက်နဲ့ သတ်မှတ်နေရာတွေမှာ နိုင်ငံတော်က မြို့ကွက်သစ်တွေ ဖော်သွားဖို့ရှိတယ် လို့သိရပါတယ်။ ဒါက တရားဝင် သတ်မှတ်ကာလအလိုက် လုပ်ဆောင် သွားမှာပါ။ ဒါကြောင့် ခုကတည်းက အချို့လုပ်ငန်းရှင်တွေက အိမ်၊ ခြံ၊ မြေတွေဝယ်ယူပြီး ရင်းနှီးမြှုပ်နှံ ထားကြမယ်ဆိုရင် နောက်ဖြစ်ပေါ် လာမယ့် မြို့ကွက်သစ်တွေရဲ့ ဈေး နှုန်းတွေနဲ့ တံတားစီမံကိန်းအပြီး ကာလတွေထိ သူတို့ရင်းနှီးမြှုပ်နှံ ရမယ့် ငွေပမာဏဟာ အခုပေါက်ဈေး ထက်ပိုပြီး ဈေးနှုန်းတက် မလာနိုင် ဘူးလို့ ယူဆနေတာတွေလည်းရှိနေ ပါတယ်။တံတားစီမံကိန်းကြီး စပြီဆိုရင်တော့ ဒလမြို့နယ်ပေါ်မှာ ရှိတဲ့ အိမ်၊ ခြံ၊ မြေဈေးကွက် အရောင်းအဝယ် ပြန်သွက်လာနိုင် တယ်လို့ယူဆရပါတယ်''ဟု ဒလမြို့ နယ်ရှိ အိမ်၊ ခြံ၊ မြေလုပ်ငန်းရှင် တစ်ဦးက သုံးသပ်ပြောကြားသည်။

ပြီးခဲ့သည့် ၂ဝ၁၄ ခုနှစ်က ဒလမြို့နယ်နှင့် ရန်ကုန်မြို့ တိုက်ရိုက် တံတားထိုးခွင့်အား လွှတ်တော်မှ အတည်ပြုလိုက်သည့်အခါ ရန်ကုန် မြို့ပေါ်ရှိ စီးပွားရေးလုပ်ငန်းရှင်များက ဒလမြို့နယ်သို့ လာရောက်ကာ အိမ်၊ ခြံ၊ မြေများအား အလုအယက်လိုက် လံစုံစမ်းဝယ်ယူခဲ့ကြောင်း သိရပြီး မြို့နယ်အတွင်းရှိ (ပေ ၂ဝx ပေ ၆ဝ)မြေကွက်သေး တစ်ကွက်လျှင် ငွေကျပ်သိန်း ၁၉ဝ ဝန်းကျင် ပေါက် ခဲ့သော်လည်း ငွေကျပ် သိန်း ၃၇ဝ ထိ အရောင်းအဝယ်ရှိ ခဲ့ကြောင်း၊ အဆိုပါကာလက မြို့နယ် အတွင်းရှိ (ပေ ၄ဝ x ပေ ၆ဝ) မြေ ကွက်ကြီး တစ်ကွက်လျှင် ငွေကျပ် သိန်း ၃ဝဝ ဝန်းကျင်မှ သိန်း ၅ဝဝ ကျော်ထိ ဈေးပေါက်ခဲ့ကြောင်း၊ ထို့ပြင် ဒလမြို့နယ်ရှိ လမ်းမကြီး ဘေး ဝဲ၊ ယာ၌ (ပေ ၄ဝ x ပေ ၆ဝ) မြေကွက်ကြီး တစ်ကွက်လျှင် ငွေကျပ် သိန်း ၃၅ဝဝ မှ သိန်း ၄ဝဝဝ ထိ အရောင်းအဝယ် ဖြစ်ခဲ့ကြောင်းနှင့် လက်ရှိအနေအထားအရ ဒလမြို့နယ် ပေါ်ရှိ အိမ်၊ ခြံ၊ မြေ ပိုင်ဆိုင်သူများက ၄င်းတို့ပိုင် မြေကွက်များအား မရောင်းချကြတော့ဘဲ စီးပွားရေး လုပ်ငန်းရှင်များကလည်း ဈေးကွက် အနေအထားအား စောင့်ကြည့်လျက်ရှိ ကြောင်း ဒလမြို့နယ်ပေါ်ရှိ အိမ်၊ ခြံ၊ မြေ အကျိုးဆောင်အသိုင်းအဝိုင်း မှ သိရသည်။

စိုးဝင်း(MLA)
The Mirror Daily
https://www.facebook.com/TheMirrorDaily

အီရန်ပါလီမန်မှာ ရှေးရိုးစွဲတွေ နေရာအသာစီးရမှု လက်လွှတ်ရ

 ပြုပြင် ပြောင်းလဲရေး ကို လိုလားသူ တွေ အနေနဲ့ အနောက် အုပ်စု နဲ့ ကြား ဆွေးနွေးတာ တွေ ကို ပို နက်နက်ရှိုင်းရှိုင်း ပြုလုပ် လာစေနိုင်တယ်။
အီရန် နိုင်ငံမှာ ကျင်းပခဲ့တဲ့ ပါလီမန် ရွေးကောက်ပွဲ ရဲ့ မဲတွေ ကို ဆက်လက် ရေတွက် နေကြဆဲ ဖြစ်ပေမယ့် ထွက်ပေါ် လာပြီးသမျှ ရလာဒ် တွေ အရ သဘောထား တင်းမာ တဲ့ ရှေးရိုးစွဲ တွေ ဟာ ပါလီမန် ထဲ နေရာ အသာစီး ရထားမှု ကို လက်လွှတ် ရနိုင်ဖွယ် ရှိ နေပါတယ်။

သမ္မတ ဟာဆန်း ရူဟာနီ ကို ထောက်ခံကြတဲ့ ပြုပြင်ရေး ဝါဒီတွေ၊ အလယ်အလတ် သမား တွေ ဟာ တဟီရန် မြို့တော် ပေါ် က မဲဆန္ဒနယ် အားလုံးမှာ အနိုင်ရခဲ့ ပါတယ်။

မြို့တော် အပြင်ဘက် က မဲဆန္ဒနယ် တွေ မှာတော့ ရှေးရိုးစွဲ တွေ နဲ့ ပြုပြင်ရေး သမားတွေ အကြား အနိုင်အရှုံးဟာ ပိုပြီး ရောရော ထွေးထွေး ရှိနေပါတယ်။

သမ္မတ ရူဟာနီ အပေါ် လိုလား ထောက်ခံ ကြတဲ့ အမတ် ကိုယ်စားလှယ် တွေ ကို စုစည်း ပေးခဲ့တဲ့ အကြံပေး တစ်ဦး ကတော့ အီရန် နိုင်ငံရေးဟာ ပို အလယ်အလတ်ကျ ပျော့ပြောင်း လာတော့မယ့် ကြီးကျယ် တဲ့ အရွေ့ကို တွေ့ နေရပြီး ဒါဟာ ခေတ်သစ် ရဲ့ နိဒါန်း ဖြစ်တယ် လို့လည်း ဆိုပါတယ်။

အခု ပါလီမန် ရွေးကောက်ပွဲ ရလာဒ်ဟာ သမ္မတ ရူဟာနီ အတွက် ပို အားကောင်း လာစေပြီး၊ ပြုပြင် ပြောင်းလဲရေး ကို လိုလားသူ တွေ အနေနဲ့ အနောက် အုပ်စု နဲ့ ကြား ဆွေးနွေးတာ တွေ ကို ပို နက်နက်ရှိုင်းရှိုင်း ပြုလုပ် လာစေနိုင်တယ် လို့ လေ့လာသူတွေ က သုံးသပ် နေကြပါတယ်။

BBC Burmese
http://www.bbc.com/burmese

အီရန်ရွေးကောက်ပွဲ ပြု ပြင်ပြောင်းလဲရေးသမားတွေ အသာစီးရ

အီရန်ရွေးကောက်ပွဲ
အီရန်ရွေးကောက်ပွဲမှာ ပြုပြင်ပြောင်းလဲရေး လိုလားတဲ့အုပ်စုတွေက အသာစီးရနေပါတယ်။

တနင်္ဂနွေနေ့မှာ ထွက်လာတဲ့ အစောပိုင်း မဲစာရင်း ရလဒ်တွေအရ အနောက်အုပ်စုနဲ့ ထိတွေ့ဆက်ဆံရေးကို လိုလားတဲ့ ပြုပြင်ပြောင်းလဲရေးအုပ်စုတွေက မြို့တော် တီဟီရန်က လွှတ်တော်အမတ်နေရာ ၃၀ စလုံးမှာ အနိုင်ရမယ့် အလားအလာ ရှိနေပါတယ်။

သောကြာနေ့က ပြုလုပ်ခဲ့တဲ့ ရွေးကောက်ပွဲ နောက်ဆုံး ရလဒ်တွေကတော့ ဒေသစံတော်ချိန် တနင်္လာနေ့မှာ ထွက်လာမှာ ဖြစ်ပါတယ်။

Assembly of Experts လို့ခေါ်တဲ့ နိုင်ငံရေး ဥသျှောင်အဖွဲ့ဝင်ဖြစ်ရေး ပြုလုပ်တဲ့ ရွေးကောက်ပွဲအတွက် လက်ရှိသမ္မတ Hassan Rouhani နဲ့ သမ္မတဟောင်း Akbar Hashemi Rafsanjani တို့လည်း ရှေ့ကနေ ဦးဆောင်နေတယ်လို့ ဆိုပါတယ်။ သြဇာကြီးတဲ့ ဒီအဖွဲ့ဟာ အီရန်ရဲ့ နိုင်ငံခြားရေးမူဝါဒတွေကို နောက်ဆုံး ဆုံးဖြတ်ချက်ပေးရသူဖြစ်တဲ့ ဘာသာရေးခေါင်းဆောင် Ayatollah Ali Khamenei ရဲ့ လုပ်ဆောင်မှုတွေကို စောင့်ကြည့်ရတဲ့အဖွဲ့ဖြစ်ပြီး နောင်တက်လာမယ့် ဘာသာရေးခေါင်းဆောင်ကိုလည်း ရွေးချယ်ပေးရမှာ ဖြစ်ပါတယ်။

တစိတ်တပိုင်း ထွက်လာတဲ့ မဲရလဒ်တွေအရ အမတ်နေရာ ၂၉၀ ရှိတဲ့ လွှတ်တော်ထဲက နေရာအတော်များများကို အယူအစွဲ ပြင်းထန်သူတွေဘက်က လက်လွတ် ဆုံးရှုံးမယ့်ဘက်ကို ဦးတည်နေတယ်လို့ ဆိုပါတယ်။

ရွေးကောက်ပွဲက အစိုးရအပေါ် ယုံကြည်လက်ခံနိုင်စွမ်း ပိုတိုးလာစေသလို လုပ်ပိုင်ခွင့် ပိုရှိသွားစေတယ်လို့ သမ္မတ Rouhani က ပြောကြောင်း အစိုးရပိုင် သတင်းမီဒီယာတွေမှာ စနေနေ့က ကိုးကား ဖော်ပြကြပါတယ်။

ဗွီအိုအေ (မြန်မာပိုင်း)
http://burmese.voanews.com

မြောက်ကိုရီးယားကို အရေးယူဖို့ တရုတ်ထောက်ခံ

ကိုရီးယားကျွန်းဆွယ်ဆိုင်ရာ တရုတ်ကိုယ်စားလှယ် Wu Dawei
မြောက်ကိုရီးယားရဲ့ နျူကလီးယားမူဝါဒတွေကြောင့် ကုလသမဂ္ဂလုံခြုံရေးကောင်စီက မြောက်ကိုရီးယားအပေါ် ချမှတ်ဖို့ရှိတဲ့ ပိုမို ပြင်းထန်တဲ့ ပိတ်ဆို့အရေးယူမှုတွေကို တရုတ်အစိုးရအနေနဲ့ ထောက်ခံသွားမယ်လို့ ကိုရီးယားကျွန်းဆွယ်ဆိုင်ရာ တရုတ်ကိုယ်စားလှယ် Wu Dawei က ပြောပါတယ်။

ကိုရီးယား ကျွန်းဆွယ်ဆိုင်ရာ တောင်ကိုရီးယားကိုယ်စားလှယ် Hwang Joon-kook နဲ့ တောင်ကိုရီးယားနိုင်ငံ ဆိုးလ်မြို့မှာ တနင်္ဂနွေနေ့က တွေ့ဆုံအပြီး ကိုရီးယားကျွန်းဆွယ်မှာ ငြိမ်းချမ်းရေးနဲ့ တည်ငြိမ်မှုရှိစေရေးအတွက် နှစ်နိုင်ငံစလုံးက အတူတကွ ပူးပေါင်း ဆောင်ရွက်သွားကြမယ်လို့ Wu Dawei ပြောကြားလိုက်ပါတယ်။

တောင်ကိုရီးယားကိုယ်စားလှယ် Hwang က တွေ့ဆုံမှုအပြီး ခမ်းမအပြင်မှာ ပြောကြားရာမှာတော့ - တရုတ်နိုင်ငံရဲ့ ထောက်ခံမှုကို ကြိုဆိုကြောင်းနဲ့ ဒါဟာ အဓိပ္ပါယ်ပြည့်ဝတဲ့ အပြောင်းအလဲ စတင်ချန်ပဲလို့ ပြောပါတယ်။

မြောက်ကိုရီးယားအနေနဲ့ သူတို့ရဲ့ တွေးခေါ်မှုကို ပြောင်းလဲပစ်ဖို့ လိုအပ်ကြောင်းနဲ့ အဆင့်အတန်းရှိရှိ ကျင့်ကြံနေထိုင်ဖို့ လိုအပ်တယ်ဆိုတာကို နှစ်နိုင်ငံစလုံးက တသဘောထားထဲ ရှိခဲ့ကြောင်း Hwang က ပြောပါတယ်။

တရုတ်နဲ့ အမေရိကန်အကြား မြောက်ကိုရီးယားအပေါ် အပြင်းထန်ဆုံး ပိတ်ဆို့အရေးယူမှု ချမှတ်ရေး သဘောတူညီမှု ရရှိအပြီးမှာ သွားရောက်တာဖြစ်တဲ့အတွက် Wu Dawei ရဲ့ ခရီးစဉ်အပေါ် အများစုက စိတ်ဝင်တစားနဲ့ စောင့်ကြည့်နေကြတာပါ။

မြောက်ကိုရီးယားက နောက်ဆုံး ပြုလုပ်ခဲ့တဲ့ နျူကလီးယားစမ်းသပ် ဖောက်ခွဲမှုနဲ့ ဒုံးကျည် ပစ်လွှတ်ခဲ့မှုတွေကို တုန့်ပြန်တဲ့အနေနဲ့ မြောက်ကိုရီးယားအပေါ် ဖိအားသိသိသာသာတိုးပေးမယ့် အဆိုပြချက်မူကြမ်းကို အမေရိကန်ပြည်ထောင်စုက သောကြာနေ့က ကုလသမဂ္ဂလုံခြုံရေးကောင်စီကို တင်သွင်းခဲ့ပါတယ်။

ဗွီအိုအေ (မြန်မာပိုင်း)
http://burmese.voanews.com
အချိန်နဲ့ တပြေးညီ သတင်းများ ဖတ်ရှုနိုင်ဖို့  facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့ နိုင်ပါသည်။
နောက်ဆုံးရ သတင်းများကို အောက်ပါ Tweets မှာ ဖော်ပြထားပါတယ်။ Tweets ရဲ့ ဘေးဘောင်တန်းကို ဆွဲချပြီ မိမိတို့ စိတ်ဝင်စားတဲ့ သတင်းခေါင်းစဉ် အောက်က Link ကို နှိပ်ပြီ အပြည့်အစုံဖတ်ရှုနိုင်ပါတယ်။
 

Advertisement

 

သင်ရဲ့မိတ်ဆွေတွေ ဘာတွေဖတ်သလဲ စိတ်ဝင်စားသလဲ

အသစ် တင်သမျှ သတင်းများ အလို အလျှောက်ပို့  ပေးပါမည်

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ

သတင်းစာနှင့် ဂျာနယ်များ