တရုတ်မှာ တိဘက်ဘုန်းကြီးတစ်ပါး ကိုယ့်ကိုယ်ကိုမီးရှို့


တရုတ်နိုင်ငံအနောက်ပိုင်း စီချွမ်ပြည်နယ်မှာ တိဘက်ဘုန်းတော်ကြီးတစ်ပါး ကိုယ့်ကိုယ်ကို မီးရှို့မှုဖြစ်ပွားခဲ့တယ်လို့ လန်ဒန်မြို့အခြေစိုက် တိဘက်လွတ်မြောက်ရေးအဖွဲ့က ပြောပါတယ်။

အသက် ၆၃ နှစ်အရွယ် တန်ဂါ Tenga ဘွဲ့အမည်ရှိ တိဘက်ဘုန်းတော်ကြီးဟာ “တိဘက်လွတ်မြောက်ရေး လိုချင်တယ်” လို့ ဟစ်အော်ပြီး ပြီးခဲ့တဲ့ တနင်္ဂနွေနေ့က ကိုယ့်ကိုယ်ကို မီးရှို့ခဲ့တာလို့ ဆိုပါတယ်။

မီးစွဲလောင်နေတဲ့ ဘုန်းတော်ကြီး တန်ဂါကို လုံခြုံရေးတပ်ဖွဲ့ဝင်တွေက သယ်ဆောင်သွားပြီး၊ သေသလား၊ ရှင်သလား မသိရသေးဘူးလို့ တိဘက်လွတ်မြောက်ရေးအဖွဲ့က ပြောပါတယ်။

တရုတ်အစိုးရရဲ့ အုပ်ချုပ်မှု မူဝါဒတွေကို မကျေနပ်တဲ့အတွက် တိဘက်ဒေသမှာ ၂၀၀၉ ခုနှစ်ကစလို့ ကိုယ့်ကိုယ်ကို မီးရှို့သူ ရဟန်းရှင်လူ ၁၅၀ နီးပါးရှိသွားပြီ ဖြစ်ပါတယ်။

တရုတ်အစိုးရ၊ ရဲတပ်ဖွဲ့နဲ့ ဘာသာရေးဌာန အရာရှိတွေကတော့ အဲဒီဒေသမှာပေါ်ပေါက်နေတဲ့ မီးရှို့မှုဖြစ်စဉ်တွေကို မသိကြောင်း ပြောကြသလို၊ တချို့လည်း ဖုန်းလက်ခံဖြေဆိုမှု မပြုကြပါဘူး။

Photo sent by an RFA listener
RFA Burmese
https://www.facebook.com/rfaburmese

ရွှေလုပ်ကွက်ဆိုင်းငံ့လို့ အမျိုးသား ကြီးပွားတိုးတက်ရေး ကုမ္ပဏီ ဆန္ဒပြ

အမျိုးသားကြီးပွားတိုးတက်ရေးကုမ္ပဏီဥက္ကဌ ဦးစိုးထွန်းရှိန်နဲ့ ၀န်ထမ်းတွေ နိုဝင်ဘာလ ၃ဝ ရက်နေ့က ရမည်းသင်းမြို့မှာ ဆန္ဒပြစဉ် / Photo: Win Ko Ko Latt/RFA
မန္တလေးတိုင်းဒေသကြီး၊ ရမည်းသင်းမြို့နယ်၊ မိုးထိမိုးမိတောင်က အမျိုးသားကြီးပွားတိုးတက်ရေး ကုမ္ပဏီရဲ့ ရွှေတူးဖော်ထုတ်လုပ်မှုကို အစိုးရက ဆိုင်းငံ့လိုက်တဲ့အတွက် ကုမ္ပဏီဥက္ကဌ  ဦးစိုးထွန်းရှိန် အပါအ၀င် ၀န်ထမ်း ၅၀၀ လောက်က ရမည်းသင်းမြို့ပေါ်မှာ ဒီကနေ့ ဆန္ဒဖော်ထုတ်ခဲ့ပါတယ်။

အမှတ် ၂ သတ္တုတွင်းလုပ်ငန်းနဲ့ အကျိုးတူပုတ်ပြတ်စနစ်နဲ့ ဆောင်ရွက်နေတဲ့ အမျိုးသားကြီးပွားတိုးတက်ရေး ရွှေတူးဖော်ထုတ်လုပ်မှုအုပ်စု လိမိတက်ကို နိုဝင်ဘာလ ၈ ရက်ကစပြီး လုပ်ငန်းတွေ ဆိုင်းငံ့ထားဖို့ အစိုးရက ညွှန်ကြားခဲ့တာဖြစ်ပါတယ်။

၂၀၁၁ ခုနှစ်ကနေ စတင်ဆောင်ရွက်နေတဲ့ အဲဒီလုပ်ငန်းကို စာချုပ်ထပ်မံပြင်ဆင် သက်တမ်းမတိုးသင့်တဲ့အကြောင်း၊ မြန်မာ့သတ္တုတွင်းဥပဒေ၊ နည်းဥပဒေပါ စီမံခန့်ခွဲရေးနည်းလမ်းနဲ့ အရေးယူဆောင်ရွက်မယ့် အစီအမံတွေကို အချိန်မဆွဲဘဲ ဆောင်ရွက်ရန်ဆိုပြီး ညွှန်ကြားချက်မှာ ပါရှိပါတယ်။

ကုမ္ပဏီဘက်ကတော့ လုပ်ငန်းစာချုပ်ကို ပြင်ဆင်ဖို့လိုတယ်လို့ ပြောပါတယ်။

အမျိုးသားကြီးပွားတိုးတက်ရေး ရွှေတူးဖော်ထုတ်လုပ်မှုအုပ်စုလိမိတက်ဟာ ရှစ်နှစ်အတွင်း ရွှေ ၅ တန်ခွဲကို နိုင်ငံတော်ကိုပေးသွင်းရမှာဖြစ်ပေမယ့် ကီလို ၅၀၀ကျော်သာ ပေးသွင်းရသေးတာလည်း ဖြစ်ပါတယ်။

ကုမ္ပဏီအနေနဲ့ ၂၀၁၆ ခုနှစ်၊ စက်တင်ဘာလ အထိပေးသွင်းရမယ့် ရွှေပမာဏကိုတော့ ပေးသွင်းပြီးဖြစ်တယ်လို့ သိရပါတယ်။

အဲဒီဆန္ဒပြပွဲမှာပါဝင်သူတွေဟာ လုပ်ငန်းအားလုံး ဆိုင်းငံ့ထားမှု အမြန်ပြန်လည်လုပ်ကိုင်ခွင့်ရရှိရေး၊ တရားမျှတတဲ့ စာချုပ်အဖြစ် ပြင်ဆင်ချုပ်ဆိုပေးနိုင်ရေး အပါအ၀င် အချက် ၁၀ ချက်ကို တောင်းဆိုခဲ့ကြပါတယ်။

အမျိုးသားကြီးပွားတိုးတက်ရေး ရွှေတူးဖော်ထုတ်လုပ်မှုအုပ်စု လိမိတက်ဟာ မိုးထိမိုးမိဒေသမှာ ဧက ခြောက်ထောင်ကျော် အကျယ်အ၀န်းမှာ လုပ်ပိုင်ခွင့်ရရှိထားတာဖြစ်ပါတယ်။

RFA Burmese
http://www.rfa.org/burmese
 

ဖားကန့်အစိုးရရုံးတွေကို ဒေသခံတောင်သူတွေ ဆန္ဒပြ

ကချင်ပြည်နယ် ဖားကန့်မြို့က ကျောက်စိမ်း တူးဖော်ရေးလုပ်ငန်းခွင်။
ကျောက်စိမ်းထွက်ရာ ကချင်ပြည်နယ်ဖားကန့်မြို့အတွင်း ကျောက်စိမ်းတူးဖော်တဲ့ ကုမ္ပဏီတွေရဲ့ လုပ်ဆောင် ချက် ကြောင့် ဒေသခံတွေ နစ်နာမှုရှိနေတာတွေကို အရေးမယူပေးတဲ့အတွက်ဆိုပြီး အစိုးရဌာနဆိုင်ရာ ရုံး(၃)ရုံး ကို ဒေသခံတောင်သူတွေ စုပြီးဒီနေ့ဆန္ဒပြကန့်ကွက်ခဲ့ကြပါတယ်။ ကျောက်စိမ်းတွင်းမိုင်းဖောက်ခွဲမှုနဲ့ မြေကျစ်စာသွန်ချမှုတွေကြောင့် ဒေသခံတွေ နစ်နာထိခိုက်မှုတွေရှိခဲ့ပြီး၊ ဒီကိစ္စတွေနဲ့ပတ်သက်လို့ သက်ဆိုင်ရာကို တိုင်ကြား မှုတွေလုပ်ခဲ့ပေမယ့် အာဏာပိုင်တွေဖက်က အရေးယူကိုင်တွယ်ဖို့ ပျက်ကွက်ခဲ့တယ်လို့ ဆန္ဒပြသူတွေက ပြောပါတယ်။ ဗွီအိုအေ သတင်းထောက် နိုင်ကွမ်းအိမ်က စုံစမ်းမေးမြန်းပြီး သတင်းပေးပို့ထားပါတယ်။

ကချင်ပြည်နယ်ဖါးကန့်မြို့ထဲမှာ ကျောက်စိမ်းတူးဖေါ်နေတဲ့ကုမ္ပဏီတွေရဲ့ လုပ်ဆောင်ချက်တွေနဲ့စပ်လျှင်းပြီး ဒေသခံ တွေရဲ့ကျေနပ်မှုတိုင်ကြားချက်တွေကို လစ်လျှူပြုထားတယ်ဆိုပြီး သက်ဆိုင်ရာဌာနဆိုင်ရာတွေကို ဒီကနေ့မှာ ဆန္ဒပြခဲ့ကြတာပါ။

အထူးသဖြင့် ဖါးကန့်မြို့အထွေထွေအုပ်ချုပ်ရေးမှူးရုံး တရားရုံးနဲ့ မြေစာရင်းရုံးရှေ့မှာ ဆန္ဒပြခဲ့တယ်လို့ ဒေသခံတဦး က ပြောပါတယ်။

"မိုင်းတွေအားကြီးခွဲလွန်းတော့ ပြည်သူတွေအားလုံး (နေအိမ်တွေ) တုန်ခါကုန်ပြီလေ။ ပြောရင်လဲ အရေးမယူပေးဘူး။ ဆိုတဲ့သဘောပေါ့။ ကုမ္ပဏီဘက်မှာဘဲပါတယ်။ လူထုဘက်မှာမပါဘူးဆိုတဲ့ပုံစံနဲ့ဆန္ဒပြတယ်။ အထွေထွေ အုပ်ချုပ်ရေးရုံးရယ် (၃)နေရာပေါ့။ အဲဒီမှာဆန္ဒဖေါ်ထုတ်တယ်လို့။"

ဒီကနေ့ မနက်(၁၁)နာရီကနေ မွန်းလွှဲ(၂)နာရီအထိ ဒေသခံပြည်သူတွေနဲ့တောင်သူ တရာနီးပါးကနေ ဆန္ဒပြခဲ့ကြ တာပါ။

ဖါးကန့်မြို့နယ်အတွင်းမှာရှိတဲ့ကျောက်စိမ်းတူးကုမ္ပဏီတွေရဲ့လုပ်ဆောင်ချက်အပေါ် ဒေသခံတွေကနေ ကျေနပ်မှု မရှိလို့ သက်ဆိုင်ရာဌာနတွေကို တိုင်တန်းခဲ့ပေမဲ့ အရေးယူမှုအပိုင်းမရှိခဲ့တာကြောင့် အခုလို ဆန္ဒြုပခဲ့ကြတာ ဖြစ်တယ်လို့လဲ ဖါးကန့်မြို့ကလူထုအခြေပြုအဖွဲ့ဝင် ကိုနောင်လတ်ကအခုလိုပြောပါတယ်။

"ဆန္ဒပြတဲ့အရေးကဒီလိုပါ။ ကုမ္ပဏီတွေရဲ့မဆင်မခြင်ကားမောင်းမှုရယ်။ မနေ့ကဆိုလဲတယောက်ပွဲခြင်းပြီးသေတယ်။ ဦးနှောက်ပွင့်ထွက်ပြီးတော့ပေါ့နော်။ ပြီးရင်ဒီဒိုင်းနမိုက်ခွဲတဲ့ကိစ္စတွေပေါ့နော်။ တချို့ဆိုဘာသာရေးအဆောက်အဦတွေ ကွဲကုန်တယ်။ တချို့နေအိမ်ကွဲကုန်တယ်။ ဆိုင်ကယ်တွေဘာတွေထောင် ထားတဲ့ဟာတောင်မှ တခါထဲလဲကုန်တယ်။ အဲတာတေံကို ဒေသခံပြည်သူလူထုက စာရေးပြီးတော့ ဖါးကန့်မှာရှိတဲ့ လုံးခင်းမှာကျောက်စိမ်းညွှန်မှူးတို့ ကျွန်တော် တို့ ဒီအုပ်ချုပ်ရေးအပိုင်းကိုသွားပြီးတော့ ပြောတယ်။ ဒါပေမဲ့တစုံတရာဖြေရှင်းပေးခြင်း မရှိတဲ့အခါကျတော့ ဒေသခံပြည် သူ လူထုက ဆန္ဒထုတ်ဖေါ်တဲ့အနေအထားပေါ့နော်။"

ဒါ့အပြင် ကျောက်စိမ်းတူး ကုမ္ပဏီတွေကနေ ဒေသခံတွေရဲ့စိုက်ခင်းမြေတွေမှာ မြေကျစ်စာတွေက သွန်ချနေတဲ့လုပ် ဆောင်ချက်တွေကို သက်ဆိုင်ရာကိုတင်ပြခဲ့ပေမဲ့ အရေးယူမှုမရှိဘူးလို့ ဖါးကန့်မြို့ကလူထုအခြေပြု လူမှုအဖွဲ့ အစည်း ခေါင်းဆောင်ဦးမုန်ဒန်ကဆိုပါတယ်။

"ကုမ္ပဏီတွေ တောင်သူတွေရဲ့စိုက်ခင်းကို တောင်ယာတွေအားလုံး မြေစာတွေအများကြီး ဖို့လိုက်တယ်ပေါ့။ လျော်ကြေး နစ်နာကြေးတွေမပေးဘူး။ ဘာမှမပေးဘူး အဲဒီလိုမျိုးမြေစာစုသွားတော့ အစိုးရဆီမှာတင်ပြလဲဘဲ တရားရုံးတင်ပြလဲဘဲ ဘာမှမလုပ်ပေး မြေစာရင်းရုံးကဌာန ဘာမှမလုပ်ပေးဆိုတော့။ အဲတာကြောင့်အစိုးရကို တောင်သူတွေကသပိတ် မှောက်တာ။"

ကျောက်စိမ်းတူး ကုမ္ပဏီတွေကနေ ဒေသခံတွေရဲ့စိုက်ခင်းမြေဧကရာနဲ့ချီ သိမ်းယူထားတဲ့အခြေအနေမှာ ရှိနေတယ် လို့ ဦးမုန်ဒန်ကပြောပါတယ်။

ဒေသခံတွေရဲ့ဆန္ဒဖေါ်ထုတ်မှုအပေါ် ဖါးကန့်မြို့ အထွေထွေအုပ်ချုပ်ရေးမှူးရုံးကို ဆက်သွယ်မေးမြန်းခဲ့ပေမဲ့လဲ တာဝန် ယူ ဖြေကြားမဲ့သူမရှိခဲ့ပါဘူး။

ဖားကန့်ဒေသခံ ပြည်နယ်လွှတ်တော်ကိုယ်စားလှယ် ဦးဒါရှီလဆိုင်းကတော့ ဖါးကန့်ဒေသရဲ့ထူးခြားတဲ့အသွင် လက္ခဏာကြောင့် ပြဿနာအရပ်ရပ်တွေကို ဒေသခံအာဏာပိုင်တွေဖြေရှင်းဖို့အားနည်းနေတဲ့အခြေအနေရှိတယ်လို့ ဆိုပါတယ်။

"ဌာနပိုင်းဆိုင်ရာကလည်း ကျွန်တော်တို့ဒီဖါးကန့်ကတော့ ၀ိဒေသထူးတဲ့ဒေသဖြစ်တဲ့ အတွက်ကြောင့်မို့လို့ ပြည်ထောင်စုကဘဲတိုက်ရိုက်ကိုင်သလိုလို ဖြစ်နေတဲ့ အနေအထားဖြစ်တဲ့ အခြေကျတော့ အောက်ခြေမှာရှိတဲ့ ဌာဆိုင်ရာအနေနဲ့ကလဲ သူတို့အပေါ်ယံညှိနှိုင်းဆောင်ရွက်မှုလောက်ဘဲ လုပ်နိုင်တဲ့အနေထားမျိုးတွေ့ ရတာပေါ့နော်။ တကယ့်ပြည်သူတွေလိုလားတဲ့အဆင့်အထိကိုတော့ အဲဒီမှာရှိတဲ့လူတွေက လုပ်ဆောင်မှုပိုင်းဆိုင်ရာက အရမ်း အားနဲတယ်။ ပြည်ထောင်စုကနေတိုက်ရိုက်ကိုင်တဲ့ အခြေကျတော့ သူတို့အနေနဲ့အဲဒီလုပ်ငန်းတွေက ထိလွယ် ရှလွယ်တဲ့အနေထားမျိုးပုံစံ မလုပ်ရဲမကိုင်ရဲတဲ့အနေအထား ဘေးကြပ်နံကြပ်မျိုးပုံစံဖြစ်နေတာနဲ့တူပါတယ်။"

ကချင်ပြည်နယ် ဖားကန့်မြို့နယ်မှာ ကျောက်စိမ်းတူးဖော်လုပ်ကိုင်ကြသူတွေထဲက နည်းဥပဒေတွေအတိုင်း လိုက်နာ မှုမရှိတဲ့ ကျောက်မျက်တူးဖော်ရေးကုမ္ပဏီတွေကို အခုနှစ်ကစလို့ ဥပဒေအတိုင်းစိစစ်ဆောင်ရွက်ဖို့ရှိမရှိနဲ့ ပတ်သက်ပြီး ကချင် ပြည်နယ် လွှတ်တော်မှာ ဒီကနေ့ မေးမြန်းရာမှာ ဥပဒေ၊ နည်းဥပဒေတွေကို လိုက်နာမှုမရှိတဲ့ ကုမဏီတွေကို စိစစ်အရေးယူ ဆောင်ရွက်မှာဖြစ်တယ်လို့ ကချင်ပြည်နယ် သဘာဝပတ်ဝန်းကျင်ထိန်းသိမ်းရေးနဲ့ သယံဇာတဝန်ကြီး ဦးHလအောင်ကဖြေကြားခဲ့ပါတယ်။

ကချင်ပြည်နယ်ဖါးကန့်ဒေသဟာ ကျောက်စိမ်းတူးဖေါ်တဲ့ လုပ်ငန်း တွင်တွင်ကျယ်ကျယ် လုပ်ကိုင်နေတဲ့ဒေသတခုလဲ ဖြစ်ပါတယ်။ ကချင်ပြည်နယ် ဖါးကန့်ဒေသမှာ အဖိုးတန်ကျောက်စိမ်းတွေ ထွက်ရှိနေပေမဲ့ ဒေသခံတွေအတွက် ထိရောက် တဲ့ အကျိုးခံစားမှုမရရှိခဲ့သလို ကျောက်စိမ်းအရိုင်းတုံးတွေကို အလွန်အကျွံတူးဖော်မှုကြောင့် သဘာဝပတ်ဝန်းကျင် ပျက် စီးမှု၊ မြေကျစ်စာပြိုကျမှုကြောင့် ရေမဆေးကျောက်သမားတွေ အသက်ဆုံးရှုံးရမှု လုံခြုံရေးရဲတပ်ဖွဲ့တွေနဲ့ အလုပ် သမားတွေအကြားပဋိပက္ခတွေအစဉ်လိုလိုဖြစ်ပွါးနေတဲ့ဒေသလည်း ဖြစ်ပါတယ်။

ကိုနိုင်ကွန်းအိန်  / ဗွီအိုအေ (မြန်မာပိုင်း)
https://burmese.voanews.com

နိုင်ငံတော်၏အတိုင်ပင်ခံပုဂ္ဂိုလ်ဒေါ်အောင်ဆန်းစုကြည် တရုတ်ပြည်သူ့သမ္မတနိုင်ငံ ပေကျင်း မြို့သို့ ရောက်ရှိ


ပေကျင်း နိုဝင်ဘာ ၃၀

နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် အဖွဲ့ဝင်များနှင့်အတူ ယနေ့ နံနက်ပိုင်းတွင် နေပြည်တော်မှ အထူးလေယာဉ်ဖြင့် ထွက်ခွာရာ ဒေသစံတော်ချိန် နံနက် ၁၁ နာရီတွင် တရုတ်ပြည်သူ့သမ္မတနိုင်ငံ ယူနန်ပြည်နယ် ကူမင်းမြို့သို့ ရောက်ရှိ သည်။

နိုင်ငံတော်၏ အတိုင်ပင်ခံပုဂ္ဂိုလ်နှင့်အဖွဲ့အား ယူနန်ပြည်နယ် ကွန်မြူနစ်ပါတီ အမြဲတမ်းကော်မတီအဖွဲ့ဝင် နှင့် အထွေထွေအတွင်းရေးမှူး Mr. Liu Huiyan ၊ တရုတ် ပြည်သူ့သမ္မတနိုင်ငံဆိုင်ရာ မြန်မာသံအမတ်ကြီး ဦးသစ်လင်းအုန်း ၊ မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံ သံအမတ်ကြီး မစ္စတာဟုန်လျန်၊ မြန်မာကောင်စစ်ဝန်ချုပ် ဦးစိုးပိုင်၊ မြန်မာသံရုံးဝန်ထမ်းများနှင့် တာဝန်ရှိသူများက ကူမင်းအပြည်ပြည်ဆိုင်ရာ လေဆိပ်၌ ကြိုဆိုကြသည်။

ထို့နောက် နိုင်ငံတော်၏အတိုင်ပင်ခံပုဂ္ဂိုလ်သည် မော်တော်ယာဉ်များဖြင့် ခေတ္တ နားနေမည့် ကူမင်းမြို့ Hai Geng Garden Hotel သို့ ရောက်ရှိရာ ယူနန်ပြည်နယ် ကွန်မြူနစ်ပါတီအတွင်းရေးမှူး မစ္စတာ Chen Hao နှင့် တာဝန်ရှိသူများက ကြိုဆိုကြပြီး နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် ယူနန် ပြည်နယ် ကွန်မြူနစ်ပါတီအတွင်းရေးမှူး Mr. Chen Hao တို့သည် မှတ်တမ်းတင်ဓာတ် ပုံရိုက်သည်။
ထို့နောက် နိုင်ငံတော်၏အတိုင်ပင်ခံပုဂ္ဂိုလ်နှင့်အဖွဲ့ဝင်များသည် ယူနန်ပြည်နယ် ကွန်မြူနစ်ပါတီ အတွင်းရေးမှူး Mr. Chen Hao ကတည်ခင်းဧည့်ခံသည့် နေ့လယ်စာ စားပွဲသို့တက်ရောက်သည်။

ဆက်လက်၍ နိုင်ငံတော်၏အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်နှင့် အဖွဲ့သည် တရုတ်ပြည်သူ့ သမ္မတနိုင်ငံဆိုင်ရာမြန်မာသံအမတ်ကြီးနှင့် အတူ ကူမင်းမြို့မှ အထူး လေယာဉ်ဖြင့် ထွက်ခွာပြီး ဒေသစံတော်ချိန် ညနေ ၅ နာရီတွင် ပေကျင်းအပြည်ပြည် ဆိုင်ရာ လေဆိပ် သို့ ရောက်ရှိသည်။

နိုင်ငံတော်၏အတိုင်ပင်ခံပုဂ္ဂိုလ်နှင့်အဖွဲ့အား တရုတ်ကွန်မြူနစ်ပါတီ နိုင်ငံတကာ ဆက်ဆံရေးဌာန ဒုတိယ၀န်ကြီး မစ္စတာ ကောရဲ့ကျိုး၊ စစ်သံမှူး ဗိုလ်မှူးချုပ် တင့်ဆန်း၊ မြန်မာသံရုံးနှင့်စစ်သံရုံးဝန်ထမ်းများ နှင့်တာဝန်ရှိသူများက ပေကျင်းအပြည်ပြည်ဆိုင်ရာ လေဆိပ်၌ ကြိုဆိုနှုတ်ဆက်ကြသည်။

ထို့နောက် နိုင်ငံတော်၏အတိုင်ပင်ခံပုဂ္ဂိုလ်နှင့်အဖွဲ့သည် မော်တော်ယာဉ်များဖြင့် ခေတ္တတည်းခိုမည့် ပေကျင်းမြို့ရှိ ကျောက်ယုထိုင် နိုင်ငံတော်ဧည့်ဂေဟာသို့ရောက်ရှိသည်။

ယင်းနောက် ဒေသစံတော်ချိန် ည ၇ နာရီတွင် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် တရုတ်ကွန်မြူနစ်ပါတီ နိုင်ငံတကာဆက်ဆံရေးဝန်ကြီး Mr. Song Tao ကတည်ခင်းဧည့်ခံသည့် ညစာစားပွဲသို့တက်ရောက်သည်။

Myanmar State Counsellor Office
https://www.facebook.com/state.counsellor
 

ချမ်းမြသာစည်မြို့နယ်တွင် နေအိမ်(၆)လုံး မီးလောင်မှုဖြစ်ပွား


မန္တလေး နိုဝင်ဘာ ၃၀

မန္တလေးမြို့၊ ချမ်းမြသာစည်မြို့နယ်၊ ၇၀×၇၁ လမ်းကြား၊ စိန်ပန်းလမ်းနှင့် မနော်ဟရီ လမ်းကြားရှိ မြို့သစ်(၅) ရပ်ကွက်တွင် နိုဝင်ဘာ ၃၀ ရက် မွန်းလွဲ ၁၂ နာရီ ၃၅ မိနစ်ခန့်က နေအိမ်(၆)လုံးခန့် မီးလောင် ကျွမ်းမှုဖြစ်ပွားခဲ့ရာ မီးလောင်ရာသို့ အုပ်ချုပ်မှု ယာဉ်(၂)စီး၊ မီးငြိမ်း သတ်ယာဉ် (၃၀)စီး၊ ရေသယ် ယာဉ်(၂၀)စီး၊ သန္ဓေမီးသတ်(၇၀)ဦး၊ အရန်မီးသတ် (၁၂၀)ဦးနှင့် ရပ်ကွက်နေပြည်သူများ ၀ိုင်းဝန်း ငြိမ်း သတ်ရာ မွန်းလွဲ ၁ နာရီ ၅ မိနစ်ခန့် တွင် မီးငြှိမ်းသတ်နိုင်ခဲ့သည်။
မီးလောင်မှုကြောင့် (၃၀×၁၆)ပေ နံကပ်တိုက်(၁)လုံး၊ (၈၀×၃၂)ပေ၊ သွပ်မိုး ထရံကာ(၁)လုံး၊ (၄၀×၂၀)ပေ သွပ်မိုး ထရံကာ(၁)လုံး၊ (၂၀×၂၀)ပေ သွပ်မိုး ထရံကာ(၁)လုံး၊ (၂၀×၃၀)ပေ သွပ်မိုး ထရံကာ (၁)လုံး၊ (၃၀×၂၀)ပေ နံကပ်တိုက်(အပေါ်ထပ်) (၁)လုံး စုစုပေါင်းနေအိမ်(၆)လုံး မီးလောင် ကျွမ်း ခဲ့ပြီး လူ၊ တိရစ္ဆာန် ထိခိုက်ဒဏ်ရာရရှိမှု မရှိကြောင်းသိရပြီး မီးလောင် ကျွမ်း သည့် အကြောင်းအရင်းနှင့် မီးပေါ့ဆစွာ သုံးစွဲသူအား မီးသတ် ဦးစီးဌာနနှင့် ပူးပေါင်း၍ တာဝန်ရှိသူများက စုံစမ်းစစ်ဆေးလျက် ရှိကြောင်း သိရသည်။

သန်းဇော်မင်း(ပြန်/ဆက်)
MOI Webportal Myanmar
https://www.facebook.com/MOIWebportalMyanmar

မောင်တောတွင် WYနှင့် R စာတန်းပါ မူးယစ်ဆေး ခြောက်သိန်းကျော် (၆၅၅၅၀၀)ပြား ထပ်မံဖမ်းဆီးရမိ


ရခိုင်ဂေဇက်၊ နိုဝင်ဘာ ၃၀

ရခိုင်ပြည်၊ မောင်တော ရွက်ညိုတောင် ချောင်းဝ အနောက်ဖက် (၀.၅)မိုင်အကွာ ဦးစောလှကျွန်း မြောက်ဘက်ထိပ်အနီးတွင် ယနေ့ နိုဝင်ဘာ ၃၀ နံနက် ၆ နာရီခန့်အချိန်တွင် မသင်္ကာဖွယ်ရာ လောင်းလှေတစ်စီးအား စစ်ဆေးရာမှ စိတ်ကြွမူးယစ်ဆေးပြား(၆၅၅၅၀၀)ကို ဖမ်းမီခဲ့ကြောင်း သိရသည်။

ဖြစ်စဉ်မှာ မောင်တောမြို့နယ်၊ ဓည၀တီရေတပ်စခန်းဌာနချုပ်မှ တာဝန်ရှိသူများမှ နတ်မြစ်အတွင်းလှည့်ကင်းလှည့်လည်နေစဉ် ရွက်ညိုတောင် ချောင်းဝ အနောက်ဖက် (၀.၅)မိုင်အကွာတွင် ဘင်္ဂလားဒေရှ့်နိုင်ငံသို့ လှော်ခတ်နေသော မသင်္ကာဖွယ်စက်လှေတစ်စီးအား မီးအချက်ပြခေါ်ယူစဉ် လာရောက်ခြင်းမရှိဘဲ ထွက်ပြေးသဖြင့် လိုက်လံဖမ်းဆီးရာ ဦးစောလှကျွန်းမြောက်ဘက်ထိပ်အနီးတွင် ၄င်းလှေအား ဖမ်းဆီးမိခဲ့ပြီး လှေပေါ်မှဆာလာအိတ်ဖြင့် ထုတ်ပိုးထားသော မူးယစ်ဆေးပြား (၆၅၅၅၀၀)ပြား၊ ကာလတန်ဖိုး(၁၃၁၁၀၀၀၀၀၀)အား ဖမ်းဆီးရမိခဲ့ခြင်း ဖြစ်ကြောင်းသိရသည်။

ဖမ်းဆီးရမိသော ဆေးပြားများအား လောင်းလှေဖြင့် တင်ဆောင်ကာ တရားခံမောင်တောမြို့
နယ် သရက်အုပ်ကျေးရွာမှ မော်နို အား စစ်ဆေးမေးမြန်းရာမှ လှေပိုင်ရှင်မှာ သရက်အုပ်ကျေးရွာမှ မော်ဘူလာဖြစ်ကြောင်း၊ ၄င်းမှ တစ်ဘက်နိုင်ငံသို့  ပို့ဆောင်ရန်​ မြန်မာငွေကျပ်(၁၅၀၀၀၀) ပေး၍ ခိုင်းစေခြင်းဖြစ်ကြောင်း သိရသည်။

ဖမ်းဆီးရမိသော မူးယစ်ဆးဝါးများ၏ပိုင်ရှင်အား ဆက်လက်အရေးယူသွားနိုင်ရန် တရားခံအားဖမ်းမိရေးအတွက် ဆက်လက်စုံစမ်းနေကြောင်းသိရှိရသည်။

Rakhine Gazette
https://www.facebook.com/RakhineGazetteJournal/

နမ္မတူမြို့နယ်၌ မိုင်းပေါက်ကွဲမှုကြောင့် ကလေး ၁ ဦးသေဆုံး

၂၀၁၇ ခုနှစ်၊ နိုဝင်ဘာလ ၂၈ ရက်နေ့ ၁၆၀၀ အချိန် နမ္မတူမြို့နယ်၊ နားဆန်းကျေးရွာနှင့် ၃ မိုင်ခန့်အကွာရှိ တောင်ယာတဲ၌ နေထိုင်သူ အိုက်လျှန်၊ (၇)နှစ်သည် တောင်ယာအနီးဝန်းကျင်တွင် ဖရုံရွက်ခူးပြီး ပြန်လာစဉ် တောင်ယာအနီး တွေ့ရှိသည့် မိုင်းဟု ယူဆရသောပစ္စည်းအား ယူဆောင်ဆော့ကစားရာမှ ပေါက်ကွဲခဲ့ရာ အိုက်လျှန်တွင် လက်နှစ်ဖက် ပြတ်၊ ဝမ်းဗိုက်ပွင့်ထွက် ဒဏ်ရာများဖြင့် သေဆုံးခဲ့သဖြင့် အလောင်းအား ၎င်း၏မိဘများမှ အခင်းဖြစ်တောင်ယာအနီး၌ သင်္ဂြိုဟ်ခဲ့ ကြောင်းသတင်းရရှိပါသည်။

တနိုင်းမြို့နယ်၌ မိုင်းပေါက်ကွဲမှုကြောင့် လူ(၁)ဦး ဒဏ်ရာရရှိ
အလားတူ ၂၀၁၇ ခုနှစ်၊ နိုဝင်ဘာလ ၂၉ ရက်နေ့ ၁၅၃၀ အချိန် တနိုင်းမြို့နယ်၊ မိုင်းခွန်ပယင်းမှော်နေ အားတီ၊ (၃၀)နှစ်သည် ၎င်းနေထိုင်ရာတဲ၏ တောင်ဘက်သို့ ထင်းခုတ်သွားရာမှ ရွာသို့ ပြန်လာစဉ် KIA သောင်းကျန်းသူများ ထောင်ထားသည့် မိုင်းအားတိုက်မိ ပေါက်ကွဲခဲ့ရာ အားတီတွင် ဝဲရင်အုံအထက်နှင့် တင်ပါးပေါက်ပြဲဒဏ်ရာ ၂ ချက်(မစိုးရိမ်ရ)ရရှိခဲ့သဖြင့် တနိုင်းဆေးရုံသို့ တင်ပို့ကုသလျက် ရှိကြောင်း ပြည်ထဲရေးဝန်ကြီးဌာန၏ သတင်းထုတ်ပြန်ချက်အရ သိရပါသည်။

သစ်ထူးလွင်

၈၈ ငြိမ်းပွင့်ကနေ ဦးမြအေး နုတ်ထွက်

၈၈ ရုံးခန်းမှာ အောက်တိုဘာလ ၃ဝ ရက်နေ့ကပြုလုပ်တဲ့ တောင်ယာခင်းနဲ့ သွေးချင်းမျက်ရည် သတင်းစာရှင်လင်းပွဲမှာ ကိုမြအေး ကို တွေ့ရစဉ်။ Photo: Kyaw Zaw Win/RFA
၈၈ မျိုးဆက်ငြိမ်းချမ်းရေးနဲ့ ပွင့်လင်းလူ့အဖွဲ့အစည်းရဲ့ခေါင်းဆောင်တစ်ဦးဖြစ်တဲ့ ကိုမြအေးဟာ နိုင်ငံရေးနဲ့ ငြိမ်းချမ်းရေးကိစ္စတွေမှာ သူ့သဘောထားတွေကို လွတ်လွတ်လပ်လပ် ထုတ်ဖော်ပြောကြားလိုတဲ့အတွက် ၈၈ ငြိမ်းပွင့်ကနေ နုတ်ထွက်လိုက်ပါတယ်။

မနေ့က နုတ်ထွက်ခဲ့တာဖြစ်ပြီး ပုဂ္ဂိုလ်ရေးပြဿနာကြောင့် နုတ်ထွက်တာမျိုးမဟုတ်ဘူးလို့ ကိုမြအေး က RFA ကို ပြောပါတယ်။

"မနေ့က ထွက်လိုက်တယ်ဗျ။ ဟုတ်ကဲ့ပါ။ ခုအခြေနေမှာတော့ တိုင်းပြည်ရဲ့အခြေအနေက ကျနော်တို့က ဝိုင်းဝန်း ပြီး ထောက်ပြရမယ့် အခြေအနေလို့ မြင်လို့လေ၊ ကျနော့်အနေနဲ့ကတော့ နုတ်ထွက်လိုက်တာပဲ ဖြစ်ပါတယ်။ အဲလိုပြောလို့ မထောက်ပြဘဲနေတယ်လို့ ဘယ်သူ့ကိုမှ ပြောတာမဟုတ်ဘူးလေ။ ခုထွက်လိုက်တဲ့အပေါ်မှာ ပုဂ္ဂိုလ်ရေးအရကော ကျန်တဲ့ကိစ္စတွေအပေါ်မှာကော ဘာမှပြဿနာမရှိဘူး။ ကျနော်တို့ ဆက်ဆံရေးကတော့ အမြဲတမ်း ပါတီထောင်တဲ့ ကျနော့်ရဲ့ ရဲဘော်ရဲဘက် ကိုကိုကြီးနဲ့ကော CSO အနေနဲ့ရှိနေတဲ့ ကိုမင်းကို နိုင်နဲ့ကော ကျနော်တို့က အချိတ်အဆက်တွေ၊ အဆက်အသွယ်တွေက ရှိနေဦးမှာပဲ"

နိုင်ငံရေးမှာ အမြင်မတူသူတိုင်းကို ရန်သူလို့ သတ်မှတ်လို့ မရကြောင်းနဲ့ သူအနေနဲ့ လက်ရှိမှာ ပါတီထောင်ဖို့နဲ့ ပါတီတစ်ခုထဲကိုဝင်ဖို့ဆိုတဲ့ အခြေအနေတွေမရှိသေးဘူးလို့ ကိုမြအေး ကပြောပါတယ်။

နိုင်ငံရေးကို ဆက်လုပ်သွားမှာ ဖြစ်ပေမယ့် ဘယ်လိုပုံစံလုပ်ဆောင်မယ်ဆိုတာ လတ်တလောပြောဖို့ ခက်သေးကြောင်းနဲ့ သူနဲ့သဘောထားခြင်း တူညီတဲ့ နိုင်ငံရေးအင်အားစုတွေနဲ့ ညှိနှိုင်းတိုင်ပင်ရဦးမှာ ဖြစ်တယ်လို့လည်း ပြောပါတယ်။

၈၈ မျိုးဆက်တွေ အဓိက ပါဝင်တဲ့ နိုင်ငံရေးပါတီတစ်ခုကို ဖြစ်ပေါ်လာရေးအတွက် ဆောင်ရွက်နေတာရှိပြီး အဲဒီပါတီကို ဝင်ရောက်ဖို့လည်း အစီစဉ်မရှိဘူးလို့ ကိုမြအေး ကပြောပါတယ်။

ကိုမြအေးဟာ ၈ လေးလုံးအရေးတော်ပုံကာလ ကျောင်းသားလှုပ်ရှားမှုမှာ ပါဝင်ခဲ့တဲ့ ကျောင်းသားခေါင်းဆောင် တစ်ယောက်ဖြစ်ပြီး ၈၈ မျိုးဆက် ငြိမ်းချမ်းရေးနဲ့ ပွင့်လင်းလူ့အဖွဲ့အစည်းကို စတင်တည်ထောင်ကတည်းက ဦးဆောင်ပါဝင်ခဲ့သူ တစ်ယောက်လည်း ဖြစ်ပါတယ်။

RFA Burmese
http://www.rfa.org/burmese

ဥပဒေမလိုက်နာတဲ့ ကျောက်မျက်ကုမ္ပဏီတွေ အရေးယူဖို့ လွှတ်တော်မှာ မေးမြန်း

ကချင်ပြည်နယ်လွှတ်တော် အစည်းအဝေး ကျင်းပနေစဉ်။ Photo: Kyaw Myo Min/RFA
ကချင်ပြည်နယ် ဖားကန့်မြို့နယ်မှာ ကျောက်စိမ်းတူးဖော် လုပ်ကိုင်ကြသူတွေထဲက နည်းဥပဒေတွေအတိုင်း လိုက်နာမှုမရှိတဲ့ ကျောက်မျက်တူးဖော်ရေး ကုမ္ပဏီတွေကို အခုနှစ်ကစလို့ ဥပဒေအတိုင်း စိစစ်ဆောင်ရွက်ဖို့ ရှိမရှိနဲ့ပတ်သက်ပြီး ဖားကန့်မြို့နယ် လွှတ်တော်ကိုယ်စားလှယ်က ပြည်နယ်လွှတ်တော်မှာ ဒီကနေ့ မေးမြန်းခဲ့ပါတယ်။

တိုင်းရင်းသားပြည်သူတွေ အလုပ်အကိုင်အခွင့်အလမ်း ဆုံးရှုံးနေပြီး နိုင်ငံတော်က အခွန်ငွေတွေ လေလွင့်မှုတွေ ရှိနေတာကြောင့် အခုလိုမေးရတာလို့ ဖားကန့်မြို့နယ်လွှတ်တော် ကိုယ်စားလှယ် ဦးဒါရှီလဆိုင်းက လွှတ်တော် အစည်းအဝေးမှာ ပြောပါတယ်။

"ဒီကုမ္ပဏီတွေဟာဆိုရင် ဒီနေ့ပဲ မှတ်ပုံတင်တယ်။ ဒီနေ့ပဲ တူးတယ်။ ကုမ္ပဏီတွေ ဒီလိုတူးတာကိုကြတော့ လက်ပိုက်ကြည့်ပြီးမှနေတယ်။ ပြည်သူတွေအနေနဲ့ကျတော့ မြေလေးသွားတူးဆွတယ်။ ရေမဆေးလေး သွားရှာတယ်။ ဒါကိုကျတော့ အကြောင်းအမျိုးမျိုးနဲ့ ဆောင်ရွက်နေတဲ့အပေါ်မှာလည်း ဒါဟာကွဲလွဲမှုတွေက စဉ်းစားကြည့်ရင် ဖားကန့်နယ်မြေမှာ မဆုံးရှုံးသင့်ဘဲ ဆုံးရှုံးနေတယ်။ နိုင်ငံ့ဘဏ္ဍာ မလေလွင့်သင့်ဘဲ လေလွင့်နေတဲ့ အနေအထားမျိုးကို သက်ဆိုင်ရာ အစိုးရတွေကနေပြီးမှ ကွင်းကွင်းကွက်ကွက် သိရှိနိုင် ဖို့အတွက်ကို ကျနော့်အနေနဲ့ မေးရခြင်းဖြစ်ပါတယ်"

တူးဖော်ခွင့်ရရှိတဲ့ ကုမ္ပဏီတွေဟာ မြေပုံပါ ဧရိယာအတွင်းမှာသာ တူးဖော်ရခြင်း၊ သဘာဝပတ်ဝန်းကျင် မထိ ခိုက်အောင် စီမံဆောင်ရွက်ခြင်း၊ အလုပ်သမားစာရင်းတွေကို ပြုစုထားခြင်း၊ စက်ယန္တရားတွေကို သတ်မှတ်ချက် အတိုင်း အသုံးပြုမှုစတဲ့ အချက် ၁၉ ချက်ပါတဲ့ ကျောက်မျက်ဥပဒေရဲ့ နည်းဥပဒေ ၈ ကို အပြည့်အဝ လိုက်နာမှု အားနည်းကြောင်း ဦးဒါရှီလဆိုင်းက ထောက်ပြပါတယ်။

ဒီကိစ္စနဲ့ပတ်သက်ပြီး ဥပဒေ၊ နည်းဥပဒေတွေကို လိုက်နာမှုမရှိတဲ့ ကုမဏီတွေကို စိစစ်အရေးယူ ဆောင်ရွက် မှာဖြစ်တယ်လို့ ကချင်ပြည်နယ် သဘာဝပတ်ဝန်းကျင်ထိန်းသိမ်းရေးနဲ့ သယံဇာတဝန်ကြီး ဦး H လအောင်က ဖြေကြားခဲ့ပါတယ်။

ဒီအတောအတွင်း ဖားကန့်မြို့နယ်က တရားစီရင်ရေး၊ မြေစာရင်း၊ အုပ်ချုပ်ရေး စတဲ့ဌာနဆိုင်ရာတွေရဲ့ မမှန်မကန်လုပ်ဆောင်မှုနဲ့ ကျောက်မျက်ကုမ္ပဏီတွေက မတရားအနိုင်ကျင့်မှုတွေ လုပ်ဆောင်နေလို့ဆိုပြီး ဒေသခံအချို့က ဖားကန့်မှာ ဒီကနေ့ ဆန္ဒပြကြပါတယ်။

ဖားကန့်ကျောက်စိမ်းတွင်းနယ်မြေမှာ ကျောက်စိမ်းအရိုင်းတုံးတွေကို အလွန်အကျွံတူးဖော် ထုတ်လုပ်ရောင်းချ မှုတွေနဲ့အတူ သဘာဝပတ်ဝန်းကျင်ပျက်စီးမှု၊ ရေမဆေးသမားနဲ့ လုံခြုံရေးတပ်ဖွဲ့ဝင်တွေရဲ့ ပဋိပက္ခ၊ မူးယစ်ဆေးဝါးအန္တရာယ် စတဲ့ပြဿနာတွေ မကြာခဏဖြစ်ပွားလေ့ရှိတဲ့ စီးပွားရေးနယ်မြေတစ်ခု ဖြစ်ပါတယ်။

RFA Burmese
http://www.rfa.org/burmese

ချမ်းမြသာစည်​မြို့နယ်​တွင်​ မီး​လောင်​မှု ဖြစ်​ပွား


မန္တ​လေးမြို့ ချမ်းမြသာစည်​မြို့နယ်​၊ မြို့သစ်​ (၅)ရပ်​ကွက်​၊ အကွက်​(က-၂) မ​နော်​ဟရီလမ်းနှင့်​ စိန်​ပန်းလမ်းကြား၊ ၇၁လမ်းနှင့်​ ၇၂လမ်းကြားရှိ အိမ်​အမှတ်​(၁၀)မှ စတင်​၍ နိုဝင်​ဘာ ၃၀ ရက်​ မွန်းလွဲ ၁၂:၃၅ နာရီအချိန်​က မီး​လောင်​မှုဖြစ်​ပွားရာ မီးသတ်​ယာဉ်​ ၃၀ စီး၊ ​ရေသယ်​ယာဉ်​ ၂၀ စီး၊ သ​န္ဓေမီးသတ်​ ၇၀ ဦး၊ အရန်​မီးသတ်​ ၁၂၀ ဦးတို့ဖြင့်​ ဝိုင်းဝန်းငြိမ်းသတ်​ခဲ့ကြရာ မွန်းလွဲ ၁နာရီ ၅မိနစ်​​တွင် မီးငြိမ်း​သွားကြောင်း သိရသည်​။

အဆိုပါမီး​လောင်​မှု​ကြောင့်​ နံကပ်​အိမ်​ ၂ လုံး၊ သွပ်​မိုးထရံကာ နှစ်​ထပ်​အိမ်​ ၁ လုံး၊ သွပ်​မိုးထရံကာ တစ်​ထပ်​အိမ်​ ၃ လုံးနှင့်​ ဆိုင်​ကယ်​ ၂ စီး ပျက်​စီးဆုံးရှုံး​ကြောင်း သတင်းရရှိသည်​။

MRG
The Mandalay News Journal
https://www.facebook.com/TheMandalayNewsJournal/

အမျိုးအမည်​မသိယာဉ်​တစ်​စီး ဝင်​​ရောက်​တိုက်​မိ၍ လူတစ်​ဦး​သေဆုံး


 နိုဝင်​ဘာ ၃၀ ရက်​ နံနက်​ ၇ နာရီခန့်​က ကချင်ပြည်နယ် ဗန်း​မော်​မြို့နယ်​၊ ဗန်း​မော်​-မိုး​မောက်​ကားလမ်း မိုင်​တိုင်​အမှတ်​(၃၇၃/၅)၊ ​လေးမိုင်​ စိန့်​စတီဖင်​ ကတ်​သလစ်​ဘုရား​ကျောင်း​ရှေ့ ကားလမ်းမ​ပေါ်တွင်​ ယာဉ်​တိုက်​မှုဖြစ်​ပွားပြီး လူတစ်​ဦး​သေဆုံး​နေ​ကြောင်း သိရသည်။

အဆိုပါ သတင်းအရ အမှတ်​(၁၀၀)ယာဉ်​ထိန်းရဲတပ်​ဖွဲ့စုမှူးရုံးမှ ဒုရဲအုပ်​​ဇော်​​အောင်​ နှင့် အဖွဲ့က သွား​ရောက်​စစ်​​ဆေးရာ ​သေဆုံး​နေသူမှာ ဦးခို(၅၇)နှစ်​၊ (ပန်းရံလုပ်​ကိုင်​)၊ မုံညင်း​ကျေးရွာ၊ ​ရေစကြိုမြို့နယ်​၊ မ​ကွေးတိုင်း​ဒေသကြီးနေသူဖြစ်​ကြောင်း သိရပါသည်။


 ယင်း​နေ့နံနက်​ ၅ နာရီက ဘီအိုစီ​ဆောက်​လုပ်​​ရေးဝင်းမှ လက်​ဖက်​ရည်​​သောက်​ရန်​ လမ်း​လျှောက်​ထွက်​လာစဉ်​ အမျိုးအမည်​မသိ ယာဉ်​တစ်​စီးက ဦးခို အား အ​နောက်​မှဝင်​တိုက်​မိကာ ဦး​ခေါင်း​နောက်​​စေ့ ​ပေါက်​ပြဲ​သွေးထွက်​ဒဏ်​ရာနှင့် ယာဘက်​နား​သွေးထွက်​ဒဏ်​ရာဖြင့် အချင်းဖြစ်​​နေရာ၌ ​သေဆုံးခြင်းဖြစ်​သည်​။

ဖြစ်​စဉ်​နှင့် ပတ်​သက်​၍ ဗန်း​မော်​မြို့မ ရဲစခန်းက ယာဉ်​(ပ)၅၆/၂၀၁၇ ရာဇသတ်​ကြီးပုဒ်​မ ၃၀၄ (က) ဖြင့် အမှုဖွင့်​ကာ ယာဉ်​တိုက်​မှုဖြစ်​ပွားပြီး ထွက်​​ပြေးတိမ်း​ရှောင်​သွားသူအား ဖမ်းဆီးရမိ​ရေးစုံစမ်း ​ဆောင်​ရွက်​လျက်​ရှိ​ကြောင်း သိရသည်​။

သတင်း - ဓါတ်ပုံ ။  ။ ဗန်းမော်ပွင့်သစ်

ပုပ်ခရီးစဉ်ဟာ ဒုက္ခသည်တွေအတွက်လာတဲ့ ခရီးမဟုတ်ဘူးလို့ ပြော

ပုပ်ရဟန်းမင်းကြီး ဖရန်စစ်ရဲ့ မြန်မာနိုင်ငံခရီးစဉ်နဲ့ပတ်သက်ပြီး ရန်ကုန်မြို့ ရှန်ဂရီလာဟိုတယ်မှာ နိုဝင်ဘာလ ၂၉ ရက်နေ့က သတင်းစာရှင်းလင်းပွဲ ကျင်းပစဉ် / Photo: Thant Zin Oo/RFA
ပုပ်ရဟန်းမင်းကြီး ဖရန်စစ်ရဲ့ ၄ ရက်ကြာ မြန်မာခရီးစဉ်ဟာ ဒုက္ခသည်တွေနဲ့ တွေ့ဆုံဖို့မဟုတ်ဘဲ သံတမန်ရေးအရ လာရောက်တဲ့ ခရီးစဉ်သာဖြစ်တယ်လို့ ဗာတီကန် နန်းတော်ရဲ့ ပြောရေးဆိုခွင့်ရှိသူက ပြောပါတယ်။

မနေ့ညက ရန်ကုန်မြို့ ရှန်ဂရီလာဟိုတယ်မှာ ကျင်းပတဲ့ သတင်းစာရှင်းလင်းပွဲမှာ သတင်းထောက်တစ်ဦးက ဂရိနိုင်ငံ၊ Lesbos ကျွန်းကို ရောက်ရှိလာတဲ့ ဒုက္ခသည်တွေကို ပုပ်ရဟန်းမင်းကြီး သွားတွေ့ခဲ့တာရှိပေမယ့် ရခိုင်ပြည်နယ်မြောက်ပိုင်းကို ဘာလို့မသွားလဲဆိုပြီး မေးမြန်းရာမှာ ဗာတီကန်နန်းတော်ရဲ့ ပြောရေးဆိုခွင့်ရှိသူ Mr.Gerg Burk က အခုလို ဖြေကြားပါတယ်။

"လစ်စ်ဘိုခရီးစဉ်ဟာ ဒုက္ခသည်တွေကို သွားတွေ့ဖို့ စီစဉ်ပြီးသွားတာဖြစ်ပါတယ်။ ဒီခရီးစဉ်ဟာ ဒုက္ခသည်တွေကို လာရောက်တွေ့ဆုံတဲ့ ခရီးစဉ်မဟုတ်ပါဘူး။ မြန်မာခရီးစဉ်ကို စီစဉ်နေစဉ်မှာပဲ ဒုက္ခသည်အရေးဖြစ်လာတာပါ။ ဒါကြောင့် မြန်မာခရီးစဉ်ကို ဒုက္ခသည်တွေကို လာတွေ့တဲ့ ခရီးစဉ်အဖြစ် မရှုမြင်စေလိုပါဘူး" လို့  Mr. Greg က ပြောခဲ့တာပါ။

မြန်မာနဲ့ ဗါတီကန်နန်းတော်အကြား သံတမန်ဆက်ဆံရေး တည်ဆောက်အပြီး ၆ လအကြာမှာ ပုပ်ဖရန်စစ်ဟာ မြန်မာနိုင်ငံကို လာရောက်လည်ပတ်တာ ဖြစ်ပါတယ်။

ပုပ်ရဟန်းမင်းကြီးရဲ့ မြန်မာပြည်ခရီးစဉ်နဲ့ ပတ်သက်ပြီးတော့လည်း မစ္စတာ ဂရက်က သူ့အနေနဲ့ စကားလုံး တစ်လုံးတည်းနဲ့သာ ပြောလိုကြောင်း အဲဒီစကားလုံးဟာ သတင်းထောက်တွေကြားလိုတဲ့ စကားလုံးမဟုတ်ကြောင်း၊ ပုပ်ခရီးစဉ်ဟာ Unity in Diversity မတူကွဲပြားခြားနားမှုများအားလုံး စည်းလုံးညီညွတ်ကြဖို့နဲ့ အဲဒီလို စည်းလုံး ညီညွတ်ကြပြီး ဘုံသဘောတူတဲ့ မျှော်လင့်ချက်ကိုထားကြဖို့ အဲဒါဟာ လူ့အခွင့်အရေးကို အားလုံးက လေးစား လိုက်နာကြဖို့ ဖြစ်တယ်လို့လည်း ပြောပါတယ်။

မနေ့က သတင်းစာရှင်းလင်းပွဲကို ပုပ်ရဟန်းမင်းကြီးရဲ့ ပြောရေးဆိုခွင့်ရှိသူ Mr.Gerg Burk နဲ့အတူ မြန်မာနိုင်ငံရဲ့ ကက်သလစ်ဆရာတော်ကြီး ၃ ပါးနဲ့ ပုပ်ရဟန်းမင်းကြီးရဲ့ မြန်မာနိုင်ငံခရီးစဉ် ပြန်ကြားရေးတာဝန်ခံ ဖာသာမာရီယာနို စိုးနိုင်တို့က ဦးဆောင်ပြုလုပ်ခဲ့ပါတယ်။ ဖါသာစိုးနိုင်က ကက်သလစ် ဘုရားကျောင်းအနေနဲ့ အစိုးရနဲ့အတူ ဘာကြောင့်ရပ်တည်ပေးရသလဲဆိုရင် အခုလို စကားပြောနိုင်ဖို့အတွက် ၁၉၈၈ ခုနှစ်က မဆလ တစ်ပါတီ အာဏာရှင်စနစ်ကို ဆန့်ကျင်ရင်း လူထောင်နဲ့ချီပြီး အသက်ပေးခဲ့ရကြောင်း အဲဒါကို မိမိတို့ မေ့ပစ်လို့မရကြောင်း ပြောပါတယ်။

ပုပ်ရဟန်းမင်းကြီးဖရန်စစ်ဟာ သူ့ရဲ့ မြန်မာနိုင်ငံခရီးစဉ်အတွင်း၊ နိုင်ငံတ်ေသမ္မတ၊ နိုင်ငံတော်၏ အတိုင်ပင်ခံပုဂ္ဂိုလ်၊ တပ်မတော်ကာကွယ်ရေးဦးစီးချုပ်၊ သီတဂူဆရာတော်ကြီး၊ နိုင်ငံတော်သံဃမဟာနယကအဖွဲ့၊ ဘာသာပေါင်းစုံ ချစ်ကြည်ရေးအဖွဲ့၊ ကတ်သလစ်ဘာသာ ခေါင်းဆောင်တွေ၊ ကတ်သလစ်ဘာသာဝင် လူငယ်တွေအပြင် ပြည်သူတွေ နဲ့ပါတွေ့ဆုံခဲ့ပါတယ်။

ပုပ်ရဟန်းမင်းကြီးဟာ မြန်မာနိုင်ငံခရီးစဉ်အပြီး ဒီကနေ့ နိုဝင်ဘာ ၃၀ ရက်မှာ ဘင်္ဂလားဒေ့ရ်ှနိုင်ငံကို ဆက်လက် ထွက်ခွာသွားပါတယ်။

RFA Burmese
http://www.rfa.org/burmese

ဘာသာရေးကို ခုတုံးလုပ်လို့ အစွန်းရောက်မှု ဖြစ်နေလို့ မဟနပြော

ဗန်းမော်ဆရာတော်နဲ့ ပုပ်ရဟန်းမင်းကြီး ဖရန်စစ် ဗုဒ္ဓဟူးနေ့ ရန်ကုန်မြို့မှာ လက်ဆွဲနှုတ်ဆက်စဉ်
ကိုးကွယ်သူတွေက ဘာသာရေးရဲ့မူရင်းသင်ကြားမှုတွေထက်ကျော်လွန်ပြီး ကိုယ်လိုရာဘာသာရေးကိုခုတုံးလုပ်တဲ့အတွက် အစွန်းရောက်အကြမ်းဖက်မှုတွေ ဖြစ်ပေါ်နေတယ်လို့ နိုင်ငံတော်သံဃမဟာနာယကအဖွဲ့ ဥက္ကဌ ဗန်းမော်ဆရာတော်က ပုပ်ရဟန်းမင်းကြီး ဖရန်စစ်ကို ဗုဒ္ဓဟူးနေ့ ရန်ကုန်မြို့က တွေ့ဆုံပွဲမှာ မိန့်ကြားခဲ့ပါတယ်။

အမည်နာမတပ်ပြောဆိုတာမရှိပေမယ့် ကိုးကွယ်သူတွေက ဘာသာရေးရဲ့မူရင်းသင်ကြားမှုတွေကို ဆန္ဒ၊ ဒေါသ မောဟစတဲ့ အဂတိတရားတို့နဲ့ ရောနှောအသုံးချနေတဲ့အတွက် အစွန်းရောက်မှုတွေ ဖြစ်ပေါ်နေတယ်လို့ ယုံကြည်ကြောင်း ဗန်းမော်ဆရာတော်ကဆိုပါတယ်။ အဲဒီလို ဘာသာရေးကိုခုတုံးလုပ်ပြီး ဖြစ်ပေါ်လာတဲ့ ဆိုးကျိုးတွေကို ရှုတ်ချရမယ်လို့ မိန့်ပါတယ်။

ပုပ်ရဟန်းမင်းကြီးကလည်း မြန်မာပြည်က လူမှုအဖွဲ့အစည်းခေါင်းဆောင်နဲ့ ဘာသာရေးခေါင်းဆောင်တွေအနေနဲ့ အသံမဲ့သူတွေရဲ့အသံတွေကို ကြားနိုင်ဖို့ ကြိုးစားရမှာဖြစ်တယ်လို့ ပုပ်ရဟန်းမင်းကြီးက မိန့်ကြားခဲ့ပါတယ်။ မြန်မာပြည်မှာ မတူကွဲပြားမှုတွေရှိနေပေမယ့် သဟဇာတဖြစ်အောင်နထိုင်ဖို့ ဘာသာရေးခေါင်းဆောင်တွေ ကူညီပေးဖို့လည်း သူကတိုက်တွန်းပါတယ်။

မြန်မာနိုင်ငံရဲ့ ငြိမ်းချမ်းရေး၊ ဥပဒေစိုးမိုးရေးအတွက် ဘာသာရေးခေါင်းဆောင်တွေရဲ့ ပူးပေါင်းဆောင်ရွက်မှုတွေလည်း အရေးကြီးတယ်လို့ ပုပ်ဖရန်စစ်က မိန့်ပါတယ်။ မြန်မာပြည်လေးရက်ကြာ လာရောက်လည်ပတ်ခဲ့ပြီး နိုဝင်ဘာလ ၃၀ ရက်နေ့မှာ ဘင်္ဂလားဒေ့ခ်ျနိုင်ငံ ဒါကာမြို့ကို ကြွရောက်မှာဖြစ်ပါတယ်။ ဘင်္ဂလားဒေ့ခ်ျမှာ ရိုဟင်ဂျာဒုက္ခသည်တွေနဲ့လည်း တွေ့ဆုံမယ်လို့ သိရပါတယ်။

BBC Burmese
http://www.bbc.com/burmese

မြောက်ကိုးရီးယားအပေါ် ပြင်းထန်တဲ့ ဒဏ်ခတ်မှုတွေတိုးချဖို့ ကန်ပြင်ဆင်

မြောက်ကိုးရီးယားက Hwasong-15 တိုက်ချင်းပစ်ဒုံးကျည် စမ်းသပ် ပစ်လွှတ်စဉ်။
မြောက်ကိုရီးယားက တိုက်ချင်းပစ်ဒုံးလက်နက်ကို အင်္ဂါနေ့မှာ စမ်းသပ်ပစ်လွှတ်ခဲ့တာနဲ့ ပတ်သက်လို့ အမေရိကန် ပြည်ထောင်စုက ဒဏ်ခတ်ပိတ်ဆို့မှုတွေ တိုးပြီးတော့ ချမယ် ဆိုပြီး သမ္မတ Donald Trump က ပြောကြားလိုက်ပါတယ်။ တချိန်တည်းမှာပဲ ကုလသမဂ္ဂ လုံခြုံရေးကောင်စီက ဗုဒ္ဓဟူးနေ့မှာ အရေးပေါ် အစည်းအဝေး ခေါ်ယူခဲ့သလို အတွင်းရေးမှူးချုပ် Antonio Guterres ကလည်း မြောက်ကိုရီးယားကို ပြင်းပြင်းထန်ထန် ရှုတ်ချလိုက်ပါတယ်။ အကြောင်းစုံကို ဒေါ်လှလှသန်းက တင်ပြထားပါတယ်။

စက်တင်ဘာလနောက်ပိုင်း၊ ပထမဦးဆုံးအကြိမ်အဖြစ် အင်္ဂါနေ့က မြောက်ကိုးရီးယား ကနေ ICBM – Hwasong -၁၅ အမျိုးအစား တိုက်ချင်းပစ်ဒုံးလက်နက်ကို ပစ်လွှတ်လိုက် တဲ့အတွက် သမ္မတ Trump က မြောက်ကိုရီးယား အပေါ် နောက်ထပ် အဓိကပိတ်ဆို့ မှုတွေ ချမှတ်မယ်လို့ twitter ကတဆင့် ဗုဒ္ဓဟူးနေ့က ပြောလိုက်ပါတယ်။ ဒါ့အပြင် မြောက် ကိုရီးယားရဲ့ ရန်စရာရောက်တဲ့လုပ်ရပ်တွေနဲ့ပတ်သက်လို့ တရုတ်သမ္မတ ရှီကျင့်ပင်နဲ့အတူ စကား ပြောခဲ့ပြီး ဂျပန်နဲ့ တောင်ကိုးရီးယားခေါင်းဆောင်တွေနဲ့လည်း ဆက်သွယ်စကားပြောခဲ့တယ်လို့ သမ္မတ Trump က twitter မှာ ဖော်ပြထားပါတယ်။ တချိန်တည်းမှာပဲ တရုတ်က မြောက်ကိုးရီးယားရဲ့အဓိက ကုန်သွယ်ဘက်နိုင်ငံဖြစ်ပြီး စီးပွားရေးဒဏ်ခတ်မှုတွေ ထိရောက်နိုင်ရေးမှာ အဓိကကျတဲ့နိုင်ငံဖြစ်တယ်လို့လည်း သမ္မတ Trump က twitter မှာရေးသားခဲ့ပါတယ်။


ဒဏ်ခတ်ပိတ်ဆို့မှုတွေချမှတ်ရာမှာ ဘယ်ပုံစံမျိုးနဲ့ ချမှတ်မယ်ဆိုတာကိုတော့ သမ္မတ Trump က အသေးစိတ် မဖော်ပြခဲ့ပေမယ့်လို့ အမေရိကန်နိုင်ငံခြားရေးဝန်ကြီး Rex Tillerson ဗုဒ္ဓဟူးနေ့ သတင်းစာရှင်းလင်းပွဲမှာ မြောက် ကိုးရီးယားအပေါ် အမေရိကန်က ချမှတ်နိုင်တဲ့ ဒဏ်ခတ်ပိတ်ဆို့မှုတွေနဲ့ပတ်သက်လို့ သတင်းထောက်တွေရဲ့အမေးကို အခုလို ဖြေသွားပါတယ်။

“နောက်ထပ်ချမှတ်မယ့် ဒဏ်ခတ်ပိတ်ဆို့မှုတွေ အများကြီးရှိပါတယ်။ အဲဒီထဲမှာ တချို့က aတာ့ ငွေရေး ကြေးရေး ဆိုင်ရာ လုပ်ငန်းတွေအပေါ်မှာ နောက်ထပ်တိုးပြီးတော့ ချမှတ်ဖို့ ဖြစ်ပါတယ်။”

မြောက်ကိုးရီးယားအစိုးရပိုင် KCNA သတင်းဌာနကတော့ ဗုဒ္ဓဟူးနေ့က ထုတ်ပြန်တဲ့ ကြေညာချက်မှာ အထူး ကြီးမားတဲ့ ဒုံးကျည် ထိပ်ဖူးတပ်ပြီး ICBM – Hwasong-၁၅ အမျိုးအစား တိုက်ချင်းပစ် ဒုံးလက်နက်ဟာ အမေရိကန်ပြည်ထောင်စု ကုန်းတွင်းပိုင်းအထိ ရောက်နိုင်တယ်လို့ ဖော်ပြထားပါတယ်။ ဂျပန်ပင်လယ် အတွင်းကို ကျရောက်ခဲ့တဲ့ ဒီ ဒုံးလက်နက် စမ်းသပ်ပစ်လွှတ်မှုနဲ့ပတ်သက်လို့ ကုလသမဂ္ဂ လုံခြုံရေးကောင်စီမှာ ဂျပန်က အရေးပေါ်အစည်းအဝေးပွဲတရပ် ခေါ်ယူဖို့ တောင်းဆိုခဲ့ပါတယ်။ လုံခြုံရေးကောင်စီရဲ့ စည်းဝေးပွဲမှာ ကုလသမဂ္ဂ နိုင်ငံရေးဆိုင်ရာ အကြီးအကဲ Jeffrey Feltman က အထွေထွေ အတွင်းရေးမှူးချုပ်အနေနဲ့ မြောက် ကိုးရီးယားရဲ့လုပ်ရပ်ကို ပြစ်တင်ရှုတ်ချကြောင်း အခုလို ပြောကြားခဲ့ပါတယ်။

“အတွင်းရေးမှူးချုပ်အနေနဲ့ မြောက်ကိုရီးယားက အခုလို နောက်ဆုံးဒုံးကျည် ပစ်လွှတ် လိုက်တဲ့ အပေါ် ပြင်းပြင်း ထန်ထန် ရှုတ်ချလိုက်ပါတယ်။ ဒါဟာ ကုလသမဂ္ဂလုံခြုံရေး ကောင်စီဆုံးဖြတ်ချက်ကို အထင်အရှား ချိုးဖောက် လိုက်တာပဲ ဖြစ်ပါတယ်။ ကုလသမဂ္ဂနဲ့ နိုင်ငံတကာလူ့အဖွဲ့အစည်းကိုလည်း လုံးဝ ဂရုမစိုက်ကြောင်း ပြသရာရောက်ပါတယ်။ ဒါကြောင့် မြောက်ကိုးရီးယားအစိုးရအနေနဲ့ အခုလို မတည်မငြိမ်ဖြစ်စေမယ့် ခြေလှမ်း တွေကို မယူဖို့ တိုက်တွန်းပါတယ်။ တင်းမာမှုအားလုံး လျှော့ချရေးအတွက်လည်း အတွင်းရေးမှူးချုပ်အနေနဲ့ အုပ်စုအားလုံးနဲ့ပူးပေါင်းဆောင်ရွက်ဖို့ အဆင်သင့် ရှိပါတယ်။”

လုံခြုံရေးကောင်စီအစည်းအဝေးပွဲမှာ ကုလသမဂ္ဂဆိုင်ရာ အမေရိကန်သံအမတ်ကြီး Nikki Haley ကမြောက် ကိုးရီးယားအပေါ် ဒဏ်ခတ်အရေးယူမှုတွေ ထိရောက်နိုင်ရေးမှာ တရုတ်နိုင်ငံရဲ့ အခန်းကဏ္ဍဟာ အရေးကြီး တယ်လို့ အခုလို ထောက်ပြသွားပါတယ်။
ကုလသမဂ္ဂဆိုင်ရာ အမေရိကန်သံအမတ်ကြီး Nikki Haley ကုလ လုံခြုံရေးကောင်စီအစည်းအဝေးတွင်း စကားပြောစဉ်။ (နိုဝင်ဘာ ၂၉၊ ၂၀၁၇)
“သမ္မတ Trump က သမ္မတ Xi ကို ဒီကနေ့ တယ်လီဖုံးဆက်ခဲ့ပါတယ်။ တရုတ်နိုင်ငံ အနေ နဲ့ မြောက်ကိုးရီးယား ကို ပေးပို့နေတဲ့ရေနံကို ဖြတ်တောက်ရပါလိမ့်မယ်။ နိုင်ငံ တကာ လူဆိုးစာရင်းဝင် ဒီနိုင်ငံကို ဟန့်တားရာမှာ ဒါဟာ အဓိကခြေလှမ်းပဲ ဖြစ်ပါတယ်။ ကျမ ပြောခဲ့တဲ့အတိုင်း နိုင်ငံအတော်များများဟာ မြောက်ကိုးရီးယားနဲ့ ဆက်ဆံရေြး ဖြတ်တောက်ခဲ့လို့ စီးပွားရေးနဲ့နိုင်ငံရေးအရ စွန့်လွှတ်အနစ်နာခံခဲ့ကြတာတွေ ရှိပါတယ်။ အားလုံး ရဲ့ငြိမ်းချမ်းရေး၊ လုံခြုံရေးကို ရှေ့ရှုပြီး လုပ်ဆောင်ကြတာပါ။ ဒီအတိုင်း ပါပဲ၊ သမ္မတ Xi အနေနဲ့ ဒီလို ရပ်တည်ဖို့ ကျမတို့ မေတ္တာရပ်ခံပါတယ်။ အမှန်ဘက်က ရပ်တည်ဖို့လည်း သမ္မတ Xi မှာ အခွင့်အရေးရှိပါတယ်။” ဆိုပြီးတော့ သံအမတ်ကြီး Haley က ပြောသွားတာ ဖြစ်ပါတယ်။

ဒါ့အပြင် မြောက်ကိုရီးယားရဲ့ ရန်စတဲ့လုပ်ရပ်ကိုလည်း အစွန်းကုန်တုံ့ပြန်သွားမယ် လို့လည်း သံအမတ်ကြီးက အခုလို ပြောခဲ့ပါတယ်။

“မြောက်ကိုးရီးယားအာဏာရှင်ဟာ ကမ္ဘာကြီးကို စစ်နဲ့ပိုနီးစပ်စေမယ့် နည်းလမ်းကို မနေ့ က ရွေးလိုက်ပါတယ်။ အမေရိကန်အနေနဲ့ မြောက်ကိုးရီးယားနဲ့ စစ်မဖြစ်လိုပါဘူး။ ကနေ့ အထိလည်း မလိုလားပါဘူး။ စစ်ဖြစ်မယ် ဆိုရင်လည်း မနေ့ကမြင်တွေ့ခဲ့ရတဲ့ ရန်စတဲ့ လုပ်ရပ်တွေကြောင့်ပဲ ဖြစ်ရပါလိမ့်မယ်။ ဖြစ်မယ်ဆိုရင် သံသယ ရှိစရာမလိုတာကတော့ မြောက်ကိုးရီးယားအစိုးရဟာ လုံးဝချေမှုန်းခံရမှာဖြစ်တယ်…” လို့ သံအမတ်ကြီး Haley က ပြောသွားတာ ဖြစ်ပါတယ်။

သမ္မတ Trump အစိုးရက ပြုံယမ်းအစိုးရအပေါ် ဒဏ်ခတ်ပိတ်ဆို့မှုတွေ ပိုတင်းကြပ် လိုက်ပြီး အကြမ်းဖက်မှုကို အားပေးထောက်ခံတဲ့နိုင်ငံစာရင်းထဲမှာ မြောက်ကိုးရီးယားကို ပြန်ထည့်လိုက်ပြီးတပတ်အကြာမှာ အခုလို မြောက် ကိုးရီးယားအနေနဲ့ တိုက်ချင်းပစ် ဒုံးလက်နက်ကို ပစ်လွှတ်လိုက်တာလည်း ဖြစ်ပါတယ်ရှင်။

 ဒေါ်လှလှသန်း  / ဗွီအိုအေ (မြန်မာပိုင်း)
https://burmese.voanews.com

ယာဉ်တိုက်မှုဖြစ်ပွား၍ နှစ်ဦးသေဆုံး


ပဲခူးတိုင်းဒေသကြီး၊ တောင်ငူမြို့၊ ကံရိုးရွာ၊ ကွန်ပျူတာတက္ကသိုလ်နဲ့ အစိုးရနည်းပညာအထက်တန်းကျောင်းတို့ကြား မှာ နိုဝင်ဘာ (၃၀)ရက် မနက် (၅)နာရီဝန်းကျင်ခန့်က ယာဉ်တိုက်မှုဖြစ်ပွားပြီး လူနှစ်ဦးသေဆုံးတယ်လို့ သိရပါတယ်။


 ဖြစ်စဉ်မှာ ရန်ကုန်ဘက်ကနေ မန္တလေးဘက်ကို မောင်းနှင်လာတဲ့ အဖြူရောင် နောက်တွဲယာဉ်ပါ ဖူဆိုအမျိုးအစားယာဉ်ဟာ မန္တလေးဘက်ကနေ ရန်ကုန်ဘက်ကို မောင်းနှင်ပြီး ယာဉ်ပေါ်မှာ ယာဉ်အကူတစ်ဦး လိုက်ပါလာတဲ့ နစ်ဆန်းအဖြူရောင်ယာဉ်ရဲ့ ယာဉ်ကြောဘက်ကို ရောက်ရှိသွားပြီး နစ်ဆန်းအဖြူရောင်ယာဉ်ရဲ့ ဝဲဘက်အခြမ်းနဲ့ ပွတ်တိုက်မိကာ ဖူဆိုယာဉ်ဟာ လမ်းရဲ့အရှေ့ဘက်အခြမ်းရှိ ရေမြောင်းထဲကို ထိုးကျတိမ်းမှောက် သွားတယ်လို့ သိရပါတယ်။


 ဖူဆိုယာဉ်ပေါ်ပါသူ (၂)ဦးတို့ဟာ ဒဏ်ရာတွေရရှိပြီး ကားအတွင်းပိတ်မိသေဆုံးသွားတယ်လို့ သိရပါတယ်။ အဲဒီဖြစ်စဉ်နဲ့ပတ်သက်ပြီး တောင်ငူမြို့မရဲစခန်းက ယာဉ် (ပ)၁၁၀/၂၀၁၇ ရာဇသတ်ကြီးဥပဒေပုဒ်မ ၃၀၄-က အရ အမှုဖွင့်အရေးယူဆောင်ရွက်ထားရှိတယ်လို့ သိရပါတယ်။
ဒီသတင်းကို ပဲ့ကိုင်ရှင်(ညောင်လေးပင်) ပေးပို့တာ ဖြစ်ပါတယ်။

Central News Bureau
https://www.facebook.com/skynetcnb

နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် တရုတ်ပြည်သူ့သမ္မတနိုင်ငံအစိုးရ၏ ဖိတ်ကြားချက်အရ အလုပ်သဘောချစ်ကြည်ရေးခရီး သွားရောက်ရန် ပေကျင်းမြို့သို့ ထွက်ခွာ


(နေပြည်တော်၊ ၃၀-၁၁-၂၀၁၇)

ပြည်ထောင်စုသမ္မတမြန်မာနိုင်ငံတော်၊ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် တရုတ်ပြည်သူ့သမ္မတနိုင်ငံအစိုးရ၏ ဖိတ်ကြားချက်အရ အလုပ်သဘောချစ်ကြည်ရေးခရီး သွားရောက်ရန် ယနေ့ (ဝ၈၀ဝ)နာရီတွင် နေပြည်တော်မှ အထူးလေယာဉ်ဖြင့် တရုတ်ပြည်သူ့ သမ္မတနိုင်ငံသို့ ထွက်ခွာသွားပါသည်။

နိုင်ငံတော်၏အတိုင်ပင်ခံပုဂ္ဂိုလ်သည် အလုပ်သဘောချစ်ကြည်ရေး ခရီးစဉ်အတွင်း တရုတ်ပြည်သူ့ သမ္မတနိုင်ငံ၊ သမ္မတ မစ္စတာရှီကျင့်ဖျင်နှင့် နှစ်နိုင်ငံတွေ့ဆုံ ဆွေးနွေးပွဲသို့ တက်ရောက်ရန်နှင့် ပေကျင်းမြို့၌ ကျင်းပပြုလုပ်မည့် တရုတ်ကွန်မြူနစ်ပါတီနှင့် ပြည်ပနိုင်ငံရေးပါတီများ၏ အဆင့်မြင့်ခေါင်းဆောင်များ ဆွေးနွေးပွဲ ဖွင့်ပွဲအခမ်းအနားသို့ တရုတ်ပြည်သူ့သမ္မတနိုင်ငံအစိုးရ၏ အထူးဧည့်သည်တော်အဖြစ် တက်ရောက် မိန့်ခွန်းပြောကြားမည်ဖြစ်ကြောင်း သိရှိရသည်။

နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် ကိုယ်စားလှယ်အဖွဲ့ဝင်များအား နိုင်ငံတော်အတိုင်ပင်ခံရုံးဝန်ကြီးဌာန ပြည်ထောင်စုဝန်ကြီး ဦးကျော်တင့်ဆွေ၊ အပြည်ပြည်ဆိုင်ရာ ပူးပေါင်း ဆောင်ရွက်ရေးဝန်ကြီးဌာန ပြည်ထောင်စုဝန်ကြီး ဦးကျော်တင်နှင့် ရန်ကုန်မြို့၊ တရုတ်ပြည်သူ့သမ္မတနိုင်ငံသံရုံးမှ တာဝန်ရှိသူများက နေပြည်တော် အပြည်ပြည်ဆိုင်ရာလေဆိပ်၌ ပို့ဆောင်နှုတ်ဆက်ခဲ့ကြပါသည်။

နိုင်ငံတော်၏ အတိုင်ပင်ခံပုဂ္ဂိုလ်နှင့်အတူ ကိုယ်စားလှယ်အဖွဲ့ဝင်များအဖြစ် လျှပ်စစ်နှင့် စွမ်းအင်ဝန်ကြီးဌာနနှင့် ဆောက်လုပ်ရေးဝန်ကြီးဌာန၊ ပြည်ထောင်စုဝန်ကြီး ဦးဝင်းခိုင်၊ မန္တလေးတိုင်းဒေသကြီး၊ ဝန်ကြီးချုပ် ဦးဇော်မြင့်မောင်၊ သမ္မတရုံးဝန်ကြီးဌာန၊ ဒုတိယဝန်ကြီး ဦးမင်းသူနှင့် တာဝန်ရှိသူများ လိုက်ပါသွားကြကြောင်း သိရှိရပါသည်။

Ministry of Foreign Affairs Myanmar
https://www.facebook.com/mofamyanmar/

ဂွမြို့ ဗေဒါစစ်ဆင်ရေးဂိတ်တွင် ဖမ်းဆီးမိသည့်ကျောက်နီမော်မှ ဘင်္ဂလီသုံးဦးကို လ၀ကမှုဖြင့် တရားစွဲ


စစ်တွေ၊ နိုဝင်ဘာ ၃၀

ရခိုင်ပြည်နယ် ဂွမြို့ရှိ ဗေဒါစိစစ်ရေးဂိတ်တွင် ဖမ်းဆီးမိသည့် ရမ်းဗြဲကျောက်နီမော်မှ ဘင်္ဂလီလူမျိုး ၃ ဦးကို လ၀ကမှုဖြင့် တရားစွဲထားကြောင်း သတင်းရရှိသည်။

“ ဒီဘင်္ဂလီသုံးဦးကို လ၀က မှတ်ပုံတင် အက် ၆(၂)/၆(၃) ဖြင့် တရားရုံးမှာတိုက်ရိုက် တရားစွဲထားပါတယ်။ တရားမဝင် အထောက်အထားမဲ့ သွားလာနေကြရာကနေ ဖမ်းမိခဲ့တာပါ” ဟု ဂွရဲမြို့နယ်မှူးက ပြောသည်။

၎င်းတို့ သုံးဦးအား ဆိုင်ကယ် ကယ်ရီပြေးဆွဲသည့် ကမန် လူမျိုး ၂ဦး နောက်တွင် လိုက်ပါ လာရာမှ နိုဝင်ဘာလ ၂၃ ရက် ည ၈ နာရီခန့် တွင် ဖမ်းဆီးရမိခဲ့သည်ဟု ဆိုသည်။

“ ညဘက်တရား မဝင်သွားတာနေတာတွေ့တဲ့ အခါ စိစစ်တယ်။ ဘာအထောက်အထားမှ မပါဘူး။ ကျောက်နီမော်ကလို့ ပြောတယ်။ အထောက်အထားမပါတဲ့ အတွက် တရားစွဲဆိုရတာပါ” ဟု ဂွ မြို့နယ်မှူးက ပြောသည်။

ဖမ်းဆီးရမိသူများမှာ ကျောက်နီမော်တွင် နေထိုင်သည့် ဘင်္ဂလီလူမျိုးများ ဖြစ်ကြသည့် နှင်းဝေလှိုင် (ခ) ရောရှီတာ (၂၁)နှစ်၊ ဦးအောင်ဆန်းလင်း (၄၁နှစ်)နှင့် ဦးထွန်းလင်း (၃၀နှစ်) တို့  ဖြစ်ကြသည်ဟု သိရသည်။

၎င်းတို့သုံးဦးအား အထောက်အထားမပြနိုင်သဖြင့် ဂွမြို့မရဲစခန်းမှလည်း ရာဇသတ်ကြီးပုဒ်မ ၃၆၇/၃၇၀ အရ အရေးယူဆောင်ရွက်ထားကြောင်း သိရသည်။

မဘုကေ
Narinjara
https://www.facebook.com/Narinjara-151742128171206/

မြောက်ကိုရီးယားနဲ့ အဆက်ဖြတ်ဖို ကန် တိုက်တွန်း

ကမ္ဘာ့နိုင်ငံတွေအားလုံး မြောက်ကိုရီးယားနိုင်ငံနဲ့ သံတမန်ရေး၊ ကုန်သွယ်ရေး အဆက်အသွယ်တွေ ဖြတ်ကြဖို့ တိုက်တွန်း
ကုလသမဂ္ဂ ဆိုင်ရာ အမေရိကန် သံအမတ် Nikki Haleyက တကယ်လို့ စစ်ဖြစ်လာခဲ့ရင် မြောက်ကိုရီးယားနိုင်ငံကို လုံးဝ ချေမှုန်းပစ်မယ်လို့ မြောက်ကိုရီးယား ခေါင်းဆောင်ပိုင်းကို သတိပေးလိုက်ပါတယ်။

နယူးယောက်မြို့မှာ ကျင်းပတဲ့ ကုလသမဂ္ဂ လုံခြုံရေး ကောင်စီ အရေးပေါ် အစည်းအဝေးမှာ Ms Haley က ကမ္ဘာ့နိုင်ငံတွေအားလုံး မြောက်ကိုရီးယားနိုင်ငံနဲ့ သံတမန်ရေး၊ ကုန်သွယ်ရေး အဆက်အသွယ်တွေ ဖြတ်ကြဖို့ တိုက်တွန်းလိုက်ပါတယ်။

မြောက်ကိုရီးယားရဲ့ အခုနောက်ဆုံး တိုက်ချင်းပစ် မစ်ဆိုင်းဒုံးကျည် လွှတ်တင်ခဲ့မှု ကိစ္စအကြောင်း အမေရိကန် သမ္မတ ထရမ့်နဲ့ တရုတ်သမ္မတ ရှီကျင်ပင်း တို့ ဆွေးနွေး ပြောခဲ့စဉ်မှာလည်း တရုတ်အစိုးရအနေနဲ့ မြောက်ကိုရီးယားကို ရေနံစိမ်း တင်ပို့နေမှုကို ဖြတ်တောက်ဖို့ သမ္မတ ရှီကျင်းပင်ကို သမ္မတ ထရမ့်က တိုက်တွန်းပြောဆိုခဲ့တယ်လို့ Ms Haley က ပြောပါတယ်။

မြောက်ကိုရီးယားအပေါ် နောက်ထပ် ဒဏ်ခတ် ပိတ်ဆို့မှုတွေ လုပ်မယ်လို့ သမ္မတ ထရမ့်က အစောပိုင်းတုန်းက ပြောခဲ့ပါတယ်။

BBC Burmese
http://www.bbc.com/burmese

လက်ျာစွန်းရောက် အမုန်းတရားတွေ ထရမ့် ဖြန့်ချီ

ယူကေ က အစွန်းရောက် ဘာသာရေးသမားတွေရဲ့ အကြမ်းဖက်မှု ပြဿနာတွေကိုသာ ဖြေရှင်းပါဉီးလို့ တွစ်တာ မှာ ဒေါ်နယ် ထရမ့် က ထပ်မံ ရေးသား ခဲ့
လက်ျာစွန်း အုပ်စု တစု လူမှုကွန်ရက်ပေါ်မှာ သွေးထိုးလှုံ့ဆော်ဖို့ တင်ထားတဲ့ မွတ်ဆလင် ဆန့်ကျင်ရေး ဗီဒီယိုပုံ ၃ခုကို သမ္မတ ထရမ့်က သူ့ရဲ့ တွစ်တာ လူမှုကွန်ရက် မှာ ပြန်ဖြန့်ခဲ့အပြီး ဗြိတိန်အစိုးရက သမ္မတ ထရမ့်ကို ပြစ်တင် ဝေဖန်လိုက်ပါတယ်။

Britain First နိုင်ငံရေး အဖွဲ့ရဲ့ ခေါင်းဆောင်တွေထဲက တဦး တင်ထားတဲ့ အဲဒီ ဗီဒီယိုတွေ ထဲမှာ မွတ်ဆလင်တွေက ခရစ်ယာန် ရုပ်ထုတခုကို ဖျက်ဆီးနေပုံ၊ ကလေးငယ်လေးတဦးကို သတ်နေပုံနဲ့ မသန်စွမ်း လူတဦးကို တိုက်ခိုက်နေပုံတွေ ကို တွေ့ရပါတယ်။

ဒီလို ဗီဒီယိုမျိုးတွေကို သမ္မတ ထရမ့်က ပြန်ဖြန့်တာဟာ မှားယွင်းတဲ့ လုပ်ရပ် ဖြစ်တယ်လို့ ဗြိတိန် ဝန်ကြီးချုပ် ထရီစာ မေရဲ့ ပြောခွင့်ရ ပုဂ္ဂိုလ်က ပြောကြားလိုက်ပြီး Britain First အဖွဲ့ဟာ အမုန်းတရားပွားစေမယ့် အလိမ်အညာ ဇာတ်လမ်းတွေ ဆင်ခဲ့တယ်လို့ ပြောပါတယ်။

ဒါပေမယ့် အိမ်ဖြူတော်ကတော့ သမ္မတ ထရမ့်ဟာ နိုင်ငံတော် လုံခြုံရေး အန္တရာယ်အကြောင်း ပြောနေတာသာ ဖြစ်ပြီး ဒီလို လုပ်ဖို့ သိပ်ကို အရေးကြီးတယ်လို့ ဆိုပါတယ်။

နောက်ဆုံး ရရှိတဲ့ သတင်းတွေ အရ ဗြိတိန်ရဲ့ ဝေဖန်မှုတွေနဲ့ ပတ်သက်လို့ သူ့ကိုယ် ဂရုစိုက် မနေဘဲ ဗြိတိန် ဝန်ကြီးချုပ် ကြုံတွေ့ နေရတဲ့ ယူကေ က အစွန်းရောက် ဘာသာရေးသမားတွေရဲ့ အကြမ်းဖက်မှု ပြဿနာတွေကိုသာ ဖြေရှင်းပါဉီးလို့ တွစ်တာ မှာ ဒေါ်နယ် ထရမ့် က ထပ်မံ ရေးသား ခဲ့ပြန်ပါတယ်။

BBC Burmese
http://www.bbc.com/burmese

ဒေါ်အောင်ဆန်းစုကြည် တရုတ်ခရီးစဉ်အပေါ် မျှော်လင့်ချက်

မြန်မာနိုင်ငံ အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်နဲ့ တရုတ်နိုင်ငံခြားရေးဝန်ကြီး Wang Yi after their meeting (Myanmar State Counsellor Office)
နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ ဒီကနေ့ စတင်မယ့် တရုတ်နိုင်ငံ ခရီးစဉ် အတွင်း ရခိုင်အရေးကိစ္စ အပါအဝင် ဘင်္ဂလားဒေ့ရ်ှနိုင်ငံဘက် ထွက်ပြေး သွားကြ တဲ့ ရခိုင်မြောက် ပိုင်းက ဒေသခံ မွတ်ဆလင် ဒုက္ခသည်တွေ အရေးနဲ့ပတ်သက်ပြီးလည်း ဆွေးနွေး နိုင်တယ်လို့ တရုတ်အရေး ကျွမ်းကျင်သူ တဦးက သုံးသပ်ပါတယ်။ NLD အစိုးရ တက်လာပြီးနောက်ပိုင်း သုံးကြိမ်မြောက် သွားရောက်မယ့် ဒေါ်အောင် ဆန်းစုကြည်ရဲ့ ဒီခရီးစဉ်ဟာ NLD အစိုးရရဲ့ နိုင်ငံခြားရေးမူဝါဒမှာ တရုတ် နိုင်ငံရဲ့အရေးပါမှုကို ဦးစားပေး ပြသလိုက်တာဖြစ်တယ် လို့လည်း သုံးသပ်ကြပါတယ်။ ဒီအကြောင်း ကိုဉာဏ်ဝင်းအောင် တင်ပြပါမယ်။

တရုတ်အစိုးရရဲ့ ဖိတ်ကြားချက်အရ ဘေဂျင်းမြို့မှာကျင်းပမယ့် တရုတ်ကွန်မြူနစ်ပါတီနဲ့ ပြည်ပနိုင်ငံရေးပါတီ တွေရဲ့ အဆင့်မြင့်ခေါင်းဆောင် တွေကြား ဆွေးနွေးပွဲကို တက် ရောက် ဖို့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ဒီကနေ့ တရုတ်နိုင်ငံကို သွားရောက်မှာဖြစ် ပါတယ်။ သူ့ရဲ့ ဒီတရုတ်ခရီးစဉ်ဟာ အလုပ် သဘော ချစ်ကြည်ရေး ခရီး သွားရောက်တာဖြစ်သလို၊ နှစ်နိုင်ငံ ချစ်ကြည်ရေး မြှင့်တင်ဖို့အတွက်ဖြစ်တယ်လို့ လည်း နိုင်ငံတော်အတိုင်ပင်ခံရုံးက သတင်းထုတ်ပြန် ထားပါတယ်။

ဒေါ်အောင်ဆန်းစုကြည်ရဲ့ အခုတခေါက် တရုတ်နိုင်ငံ ခရီးစဉ်အတွင်း ရခိုင်အရေးကိစ္စ အပါအဝင် ဘင်္ဂလားဒေ့ရ်ှနိုင်ငံဘက် ထွက်ပြေးသွား ကြတဲ့ ရိုဟင်ဂျာဒုက္ခသည် အရေးနဲ့ ပတ်သက်လို့ ဆွေးနွေးနိုင် တယ်လို့ Stimson Center သုတေသနအဖွဲ့က တရုတ်ရေးရာ ကျွမ်းကျင်သူ Yun Sun က သုံးသပ်ပါ တယ်။

“သူ့ခရီးစဉ်အတွင်း တရုတ်-မြန်မာ စီးပွားရေး ပူးပေါင်းဆောင်ရွက်မှုဆိုင်ရာ ကိစ္စတွေ ဆွေးနွေးနိုင်သလို၊ ရခိုင် ပဋိပက္ခနဲ့ ပတ်သက်လို့လည်း ဆွေးနွေးမှာပါ။ ဒါ့အပြင် ဘင်္ဂလား ဒေ့ရ်ှဘက် ထွက်ပြေးသွားတဲ့ ဒုက္ခသည်အရေးနဲ့ ပတ်သက်လို့ ဘင်္ဂလားဒေ့ရ်ှနိုင်ငံနဲ့ အပြန် အလှန် ဘယ်လို သဘောတူညီမှုတွေ ရထားတယ်ဆိုတဲ့ ကိစ္စတွေကိုလည်း ဒေါ်အောင်ဆန်းကြည်ဘက်က ဆွေးနွေးလိမ့်မယ် ထင်ပါတယ်။ ဒီတခေါက် ခရီးစဉ်မှာ မြစ်ဆုံစီမံကိန်းလို ကိစ္စမျိုးကို ဆွေးနွေးလိမ့်မယ်လို့တော့ ကျမ မမြင်မိပါဘူး”

တရုတ်နိုင်ငံခြားရေးဝန်ကြီး Wang Yi ဟာ ပြီးခဲ့တဲ့သီတင်းပတ်ထဲ နေပြည်တော်မှာ ကျင်းပတဲ့ ၁၃ ကြိမ်မြောက်၊ အာရှ-ဥရောပ နိုင်ငံခြားရေး ၀န်ကြီးများ ASEM အစည်း အဝေးကို တက်ရောက် ခဲ့ချိန်တုန်းက ရခိုင် ပြဿနာကို ကဏ္ဍသုံးခုခွဲပြီး ဖြေရှင်းဖို့ အကြံပြု သွားခဲ့တာပါ။

ဝန်ကြီး Wang Yi ရဲ့ အကြံပြုချက်ထဲမှာ ရခိုင်ဒေသ တည်ငြိမ်အေးချမ်းဖို့နဲ့ နောက်ထပ် ပစ်ခတ်တိုက်ခိုက်မှုတွေ မဖြစ်ပေါ်စေရေး ထိန်းသိမ်းဖို့ဘင်္ဂလားဒေ့ရှ်-မြန်မာ နှစ်နိုင်ငံ ဆွေးနွေးပွဲအတွက် ကောင်းမွန်တဲ့ နည်းလမ်းရှာဖို့ နဲ့ နှစ်နိုင်ငံသဘောတူစာချုပ် အမြန်ဆုံး ချုပ်ဆိုပြီး ဆင်းရဲ နွမ်းပါးမှု လျော့ပါးရေး လုပ်ဆောင်ဖို့တို့ဖြစ်ပါတယ်။ တရုတ်နိုင်ငံဟာ ရခိုင်ပြည်နယ်က ရေနံသဘာဝဓါတ်ငွေ့တွေကို ယူနန်ပြည်နယ်ကတဆင့် တရုတ်နိုင်ငံထဲ တင်ပို့ နေတာပါ။ ကျောက်ဖြူရေနက်ဆိပ်ကမ်းနဲ့ အထူးစီးပွားရေးဇုံ မှာလည်း ရင်းနှီး မြှုပ်နှံမှုတွေ လုပ်နေတာ ဖြစ်ပါတယ်။

ဘေဂျင်းမြို့မှာ ကျင်းပမယ့် တရုတ်ကွန်မြူနစ်ပါတီနဲ့ ပြည်ပ နိုင်ငံရေးပါတီ အဆင့်မြင့် ခေါင်းဆောင်တွေကြား ဆွေးနွေးပွဲရဲ့ အရေးပါပုံနဲ့ ပတ်သက်လို့ ယူနန်ပြည်နယ်မှာနေတဲ့ တရုတ်-မြန်မာအရေးလေ့လာသူ ဒေါက်တာ လှကျော်ဇောက ခုလိုမြင်ပါတယ်။

“ဒီတခါကတော့ Forum ကြီးလုပ်မှာ။ နိုင်ငံတကာ နိုင်ငံပေါင်း ၁၂၀ က ပါတီခေါင်းဆောင် ပေါင်း ၂၀၀ လောက် တောင်တက်မှာ။ အဲဒီမှာ အခုခေတ်နဲ့ ပတ်သက်တဲ့ Globalization လိုဟာမျိုး Financial Crisis လိုဟာမျိုး၊ ဒါမျိုးတွေကို ဘယ်လိုဖြေရှင်းကြမလဲ ဆိုပြီး ဝိုင်းပြီး အဖြေရှာ ကြမယ်။ သူက ကွန်မြူနစ်ပါတီမှ မဟုတ်ဘူး၊ တခြားဘက်စုံ ပါတီအသီးသီးက လူတွေ ခေါင်းဆောင်တွေကို ဖိတ်ပြီးတော့ အမြင်တွေ ဖလှယ်တဲ့သဘောပဲ။ အဲဒီတော့ မြန်မာပြည်အတွက်က ဘာအကျိုးရှိမလဲဆိုရင် တရုတ်ပြည်က ချထားတဲ့ ဖွံ့ဖြိုးတိုးတက်မှု လမ်း ကြောင်းကနေ ကိုယ်ရသင့်ရထိုက်တာ ကိုယ်ရနိုင်တာလေးကို ဆွဲယူနိုင်တာပေါ့ ဗျာ။”

ဒေါ်အောင်ဆန်းစုကြည်ရဲ့ ခုတခေါက် တရုတ်နိုင်ငံခရီးစဉ်ဟာ NLD အစိုးရတက် လာပြီး နောက်ပိုင်း သုံးကြိမ် မြောက် သွားရောက်တဲ့ ခရီးစဉ်ဖြစ်တဲ့အတွက် NLD အစိုးရရဲ့ နိုင်ငံခြားရေး မူဝါဒမှာ တရုတ်ရဲ့အရေးပါမှုကို ထင်ဟပ်စေတယ်လို့ Yun Sun က သုံးသပ်ပါတယ်။

“ဒေါ်အောင်ဆန်းစုကြည်ရဲ့ ခရီးစဉ်အတွင်း နှစ်နိုင်ငံ အပြန်အလှန်ဆက်ဆံရေး တိုးမြှင့် မယ့် ကိစ္စတွေကို ဆွေးနွေး မှာ သေချာပါတယ်။ ပိုပြီး အဓိက ကျတာကတော့ NLD အစိုးရ တက်လာပြီးနောက်ပိုင်း ဒါဟာ သူမရဲ့ သုံးကြိမ် မြောက်ခရီးစဉ် ဖြစ်တဲ့အတွက် ဒါကို ကြည့်ရင် NLD အစိုးရရဲ့ နိုင်ငံခြားရေးမူဝါဒမှာ တရုတ်နိုင်ငံရဲ့ အရေးပါမှုကို ထင်ဟပ်ပြသ နေတယ်ဆိုတာ ထူးခြားမှုအဖြစ် တွေ့နိုင်ပါတယ်။”

တရုတ်နိုင်ငံ ဘေဂျင်းမြို့မှာ ကျင်းပမယ့် တရုတ်ကွန်မြူနစ်ပါတီနဲ့ ပြည်ပ နိုင်ငံရေး ပါတီတွေရဲ့ အဆင့်မြင့် ခေါင်းဆောင်များ ညီလာခံကို ဒီဇင်ဘာလ (၁) ရက်နေ (၃) ရက်နေ့ထိ ကျင်းပမှာဖြစ်ပြီး ဖွင့်ပွဲနေ့မှာတော့ တရုတ်သမ္မတ Xi Jinping ကိုယ်တိုင် မိန့်ခွန်းပြောကြားမှာ ဖြစ်ပါတယ်။

ကိုဉာဏ်ဝင်းအောင်  / ဗွီအိုအေ (မြန်မာပိုင်း)
https://burmese.voanews.com

Bosnia စစ်ရာဇဝတ်မှုကျူးလွန်သူ တပ်မှူး တရားခွင်မှာ အဆိပ်သောက်အဆုံးစီရင်

Bosnia War Crimes
ဘော့စနီးယားနိုင်ငံ၊ Croat နွယ်ဖွား စစ်တပ်မှူးဟောင်း အသက် (၇၂) နှစ်ရှိပြီဖြစ်တဲ့ Slobodan Praljak ဟာ သူ့အပေါ် ထောင်ဒဏ်အနှစ် (၂၀) ချမှတ်ထားတာကို ကုလသမဂ္ဂ တရားသူကြီးတဦးက အတည်ပြုလိုက်ပြီးချိန်မှာပဲ ဗုဒ္ဓဟူးနေ့ တုန်းက the Hague မြို့ တရားရုံးအတွင်း အဆိပ်သောက်လိုက်တဲ့အတွက် သေဆုံးသွားပြီဖြစ်ကြောင်း Croatia နိုင်ငံပိုင် သတင်းဌာနက ပြောပါတယ်။

Praljak ဟာ Bosnia မွတ်ဆလင်တွေအပေါ် စစ်ရာဇ၀တ်မှု ကျူးလွန်ခဲ့တဲ့အတွက် the Hague မြို့ နိုင်ငံ တကာ ရာဇဝတ်မှုခုံရုံးက ထောင်ဒဏ် နှစ် (၂၀) စီရင်ထားတာ ဖြစ်ပါတယ်။

Praljak ဟာ တရားရုံးရှေ့မှောက်မှာ အဆိပ်သောက်ပြီးနောက် - “ကျွန်ုပ်ဟာ စစ် ရာဇဝတ်ကောင် မဟုတ်ဘူး” လို့ အော်ဟစ်သွားခဲ့တဲ့တရားခွင်ကို မှုခင်းဖြစ်ပွားရာ နေရာအဖြစ် Dutch ရဲအာဏာပိုင်တွေက သတ်မှတ်လိုက်ပါတယ်။

ခုံရုံးသဘာပတိ တရားသူကြီးက ကြားနာမှုကိုရပ်ဆိုင်းလိုက်ပြီး တရားရုံးတော်အတွင်း ရှိနေတဲ့ ဆေးဝန်ထမ်းတွေကို Praljak ကို ကုသမှုပေးဖို့ခေါ်ယူလိုက်ပါတယ်။ တရားခံက အဆိပ်သောက်တယ်လို့ ဝန်ခံခဲ့တဲ့အတွက် ဆေးဝန်ထမ်းတွေက ၁ နာရီကျော်ကြာ ကုသပေးခဲ့ကြပြီး သူ့ကို ဆေးရုံကို ခေါ်ဆောင်ပြီးတဲ့နောက် သေဆုံးသွားပါတယ်။

ဒီအဆိပ်သောက် သေကြောင်းကြံစည်မှုဟာ ကုလသမဂ္ဂ နိုင်ငံတကာ စစ်ရာဇဝတ်ခုံရုံး ကနေ ၁၉၉၀ ခုနှစ်တွေအတွင်းက ကျူးလွန်ခဲ့တဲ့ စစ်ရာဇ၀တ်မှုတွေအတွက် Praljak နဲ့အတူ နောက်ထပ် ဘော်စနီးယားနဲ့ Croat နိုင်ငံရေး၊ စစ်ရေးခေါင်းဆောင် ၅ ဦးတို့ အပေါ် ၂၀၁၃ ခုနှစ်မှာ ချမှတ်ခဲ့တဲ့ ပြစ်ဒဏ်တွေကို ထပ်မံအတည်ပြုနေစဉ် ဖြစ်သွားခဲ့ တာပါ။

Bosnia စစ်အတွင်း Bosnia မွတ်ဆလင်တွေအပေါ် လူမျိုးအလုပ် သုတ်သင် ရှင်းလင်း မှုမှာ ပါဝင်ခဲ့မှုအတွက် လွန်ခဲ့တဲ့ ၄ နှစ်က ဒီလူ ၆ ဦးကို ပြစ်ဒဏ် စီရင်ခဲ့တာ ဖြစ်ပါတယ်။

ဗွီအိုအေ (မြန်မာဌာန)
https://burmese.voanews.com

မြန်မာအမျိုးသမီး ငွေမဲခဝါချမှုနဲ့ ထိုင်းရဲ ဖမ်းဆီး


ထိုင်းနိုင်ငံ မူးယစ်ဆေးဝါးတိုက်ဖျက်ရေးရဲတပ်ဖွဲ့က အလိုရှိနေတဲ့ မြန်မာနိုင်ငံသူ နန်းမြင့်သိန်းအေး ဆိုသူကို ဘန်ကောက်မြို့မှာ နိုဝင်ဘာလ ၂၉ ရက်နေ့က ဖမ်းဆီးလိုက်ပါတယ်။ မူးယစ်ဆေးဝါးကရတဲ့ထိုင်းဘတ်ငွေ သန်းပေါင်း တသန်းကျော်ကို ၁၀ နှစ်ကျော်ကြာ လွဲပြောင်း ပေးမှုနဲ့ ဖမ်းဆီးလိုက်တာလို့ ဆိုပါတယ်။

သူဟာ ရှမ်းပြည်နယ် တာချီလိတ်မြို့မှာစီးပွားရေးလုပ်ကိုင်နေသူဖြစ်ပါတယ်။ နန်းမြင့်သိန်းအေး စီးလာတဲ့ ကားကို ဘန်ကောက်မြို့ ကန်ဖဲဖစ် ၆ လမ်းမှာရှိတဲ့ မူးယစ်ဆေးဝါးတိုက်ဖျက်ရေးရုံးနားမှာ ရပ်တန့်စစ်ဆေးပြီးတဲ့နောက် ဖမ်းဆိးလိုက်တာပါ။ သူဟာ ထိုင်းမူးယစ်ဆေးဝါးတိုက်ဖျက်ရေးရဲတပ်ဖွဲ့က အလိုရှိနေသူ ၄ ဦးထဲက တဦးဖြစ်ပြီး ပူးပေါင်းကြံစည်မှု၊ ဥပဒေမဲ့မှားယွင်းစွာလုပ် ဆောင် နေသူတွေကို ကူညီမှု၊ လက်ခံဆောင်ရွက်ပေးမှုတွေနဲ့ သူ့ကိုဖမ်းဆီးလိုက်တာလို့ ထိုင်းရဲအရာရှိက သတင်းထောက်တွေကို ပြောပါတယ်။


မြန်မာနိုင်ငံသူ နန်းမြင့်သိန်းအေး ဟာ ထိုင်းနိုင်ငံမှာ ဘဏ်စာအုပ်တွေ အတော်များများဖွင့်ထားပြီး မူးယစ်ဆေးဝါးလုပ်ကိုင်သူတွေအတွက် ငွေလွှဲပြောင်းပေးနေသူဖြစ်တယ်လို့လည်း ပြောပါတယ်။ သူ့ဘဏ်ငွေစာရင်းစာအုပ်တွေကို ပြီးခဲ့တဲ့ သုံးနှစ်ကတည်းက စောင့်ကြည့်စစ်ဆေးတဲ့အခါ ထိုင်းဘတ်ငွေ သန်း ၅ ထောင်ဖိုး လွဲပြောင်းခဲ့တာ တွေ့ရတယ်လို့ ဆိုပါတယ်။ နိုင်ငံတကာကို လွဲပြောင်းခဲ့တာတွေနဲ့ပါ ပေါင်းလိုက်ရင် ထိုင်းဘတ်ငွေ သန်းပေါင်းတသောင်းထက်မနည်း ငွေလွှဲပေးတာတွေ့ရှိရတယ်လို့လည်း ပြောပါတယ်။

နန်းမြင့်သိန်းအေး ဟာ လောလောဆယ် မြန်မာနိုင်ငံမှာ တခြားစီးပွားရေးလုပ်ငန်းတွေအပြင် ငွေလွှဲလုပ်ငန်းလုပ်ကိုင်နေပြီး ဆေးကုသဖို့ထိုင်းကို လာရောက်ချိန်မှာဖမ်းဆီးခံရတာပါ။ သူဟာမူးယစ်ဆေးဝါးနဲ့ မပတ်သက်ဘဲ ဘာကြောင့်ဖမ်းတယ်ဆိုတာ မသိဘူးလို့ သူ့ကို ဖမ်းဆီးချိန်မှာ ရဲအရာရှိတွေကို ပြောပါတယ်။

သူ့နာမည်နဲ့ဖွင့်ထားတဲ့ ဘဏ်စာရင်း ကို ထိုင်းမူးယစ်ဆေးဝါးနှိမ်နင်းရေး ရဲတပ်ဖွဲ့က စစ်ဆေးတဲ့အခါ ခုနှစ် စက်တင်ဘာလတုန်းက ဖမ်းမိခဲ့တဲ့ မူးယစ်ဂိုဏ်းတဂိုဏ်းက ငွေတွေလွှဲထားတာ တွေ့ရပြီး ထိုင်းသက္ကရာဇ် ၂၅၅၈ ခုနှစ် နဲ့ ၂၅၅၉ ခုနှစ်တုန်းက ဖမ်းမိခဲ့တဲ့ မူးယစ်ဆေးဝါးဂိုဏ်းတွေရဲ့ငွေတွေကို လွှဲပြောင်းလက်ခံထားတာလည်း စစ်ဆေးတွေ့ရှိရတဲ့အတွက် ဖမ်းဆီးရတာလို့ သတင်းမီဒီယာတွေကို ထိုင်းမူးယစ်ရဲတပ်ဖွဲ့ကပြောပါတယ်။

နန်းမြင့်သိန်းအေးဟာ ထိုင်းမူးယစ်ရဲတပ်ဖွဲ့က အဓိကအလိုရှိနေသူတဦးဖြစ်ပြီး ထိုင်းနိုင်ငံက မူးယစ်ဆေးဝါးဂိုဏ်းကြီးတွေရဲ့ ငွေတွေကို ၁၀ နှစ်ကျော်ကြာ ငွေလွဲပြောင်းပေးနေသူဖြစ်တယ်လို့ပြောပါတယ်။ နှစ်စဉ်လည်း ဘဏ်စာအုပ်တွေမှာ ထိုင်းဘတ်ငွေ သန်းတသောင်းကျော်အပြောင်းအလဲ လုပ်နေတယ်လို့လည်း ထိုင်းရဲတပ်ဖွဲ့က ပြောပါတယ်။

RFA Burmese
https://www.facebook.com/rfaburmese

ထိုင်းမိသားစုဝင် (၄)ဦး သတ်ဖြတ်ခံရတဲ့ အမှုမှ အဓိကတရားခံ မြန်မာနိုင်ငံသားတဦး ဖမ်းဆီးမိ


ထိုင်းနိုင်ငံ ပကျော့ ခီရီခန် ဘန်စဖန်နွိုင်ခရိုင် ကျေးရွာအုပ်စု (၄) မှာရှိတဲ့ ရာဘာခြံ အလုပ်သမားအိမ်ယာဝန်းအတွင်းမှာ ထိုင်းမိသားစုဝင် ( ထိုင်းအလုပ်သမားမိသားစု) လေးဦး သတ်ဖြတ်ခံရတဲ့ အမှုမှ အဓိကတရားခံ မြန်မာနိုင်ငံသားတဦးကို နိုဝင်ဘာလ ၂၉ ရက်နေ့ ညနေပိုင်းက ဖမ်းမိခဲ့ကြောင်း သိရပါတယ်။


အဆိုပါ တရားခံက ရဲစခန်းမှာ သူနဲ့ အတူ သူငယ်ချင်း(၄)ယောက် ပူးပေါင်းသတ်ခဲ့တာလို့  ရဲစခန်းမှာ ၀န်ခံခဲ့တယ်လို့  ဆိုပါတယ်။


ငွေကြေးဆိုင်ရာ ပြဿနာကနေ အချင်းများ ရန်ဖြစ်ခဲ့ကြပြီး လူသတ်မှု ကျူးလွန်တဲ့ တရားခံတွေဟာ အရက်စုသောက်ပြီး တဲ့နောက်မှာ အခုလို လူသတ်မှု ဖြစ်ခဲ့တာဖြစ်ပါတယ်။ တခြား တရားခံ (၄)ဦးကတော့ ထွက်ပြေးလွတ်မြောက်နေသေးကြောင်း ထိုင်းသတင်းတွေမှာရေးသားနေပါတယ်။

Credit Daily news
Social Action for Children and Women - SAW

ခရိုအက် ဗိုလ်ချုပ်ကြီး အဆိပ်သောက် သေ

ခရိုအက် ဗိုလ်ချုပ်ကြီး Slobodan Praljak
ယူဂိုဆလားဗီးယား ပြည်ထောင်စုဟောင်းမှာ ဖြစ်ပွားခဲ့တဲ့ ရာဇ၀တ်မှုတွေကို စိစစ် စစ်ဆေးနေတဲ့ နိုင်ငံတကာ ရာဇ၀တ်မှု တရားရုံးမှာ အယူခံမှုကို လာရောက် ရင်ဆိုင်နေတဲ့ ဘော့စနီးယား ခရိုအက် လူမျိုး ၆ ဦးထဲက တဦး ဟာ အဆိပ်သောက် သေဆုံးခဲ့ပါတယ်။

တရားရုံးက သူ့ကို ထောင်ဒဏ် အနှစ် ၂ဝ အပြစ်ပေး ထားတာကို အတည်ပြု လိုက်ပြီးတဲ့နောက် ခရိုအက် ဗိုလ်ချုပ်ကြီး Slobodan Praljak က ဆေးရည်တချို့ သောက်ခဲ့ပါတယ်။

တရားရုံးထဲမှာ သူဟာ ရာဇဝတ်ကောင် မဟုတ်ဘူး ဆိုပြီး ကြေညာပြီး အဆိပ်သောက် ခဲ့တာ ဖြစ်ပါတယ်။

အဲဒီနောက် တရားရုံးက တရားစီရင်တာ ရုတ်တရက် ရပ်ဆိုင်းလိုက်ပါတယ်။

ဒီအဖြစ်အပျက်ကြောင့် တရားရုံးထဲမှာ ရုတ်ရုတ်သဲသဲတွေ ဖြစ်ခဲ့ပြီး အရေးပေါ် ကားလည်း ရောက်ရှိခဲ့တယ်လို့ အဲဒီ့ကို ရောက်နေတဲ့ ဘီဘီစီ သတင်းထောက်က ပြောပါတယ်။

သူ့ကို ဆေးကုသမှုတွေ လုပ်ပေးပေမယ့် ဆေးရုံမှာ သေဆုံးသွားကြောင်း ခုံရုံးက အတည်ပြုပါတယ်။

၁၉၉ဝ ဝန်းကျင် ကာလတုန်းက ဘော့စနီးယား မွတ်စလင် အမျိုးသားတွေကို စစ်ပွဲအတွင်းမှာ လူမျိုးရေး ရှင်းလင်းမှုတွေ ကျူးလွန်ခဲ့တဲ့ လူ ၆ ဦး တရားရုံးမှာ အယူခံဝင်တာကိုလည်း တရားသူကြီးတွေက မူလ ပြစ်ဒဏ် အတိုင်းပဲ ဆက်ပြီး ထားရှိခဲ့ကြပါတယ်။

BBC Burmese
http://www.bbc.com/burmese

ကာချုပ်နဲ့ အရင်တွေ့မှု သံတမန်ကျင့်ဝတ်ချိုးဖေါက်ရာကျဟု ဗာတီကန် ဝန်ခံ


ပုပ်ရဟန်းမင်းကြီး ဖရန်စစ်က မြန်မာပြည်ခရီးစဉ်မှာ နိုင်ငံတော်အကြီးအကဲတွေနဲ့ မတွေ့ဆုံခင် ဗိုလ်ချုပ်မှူးကြီး မင်းအောင်လှိုင်နဲ့ တွေ့ဆုံခဲ့တဲ့အတွက် Protocol နိုင်ငံတကာ သံတမန်ကျင့်ဝတ်ကို ချိုးဖေါက်ရာကျတယ်ဆိုတဲ့ အချက်ကို ဗာတီကန်အာဏာပိုင်တွေက ဗုဒ္ဓဟူးနေ့ မနေ့က ဝန်ခံလိုက်ပါတယ်။

မူလအစီအစဉ်အရ ပုပ်ရဟန်းမင်းကြီးဟာ နိုင်ငံတော်သမတ ဦးထင်ကျော်နဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ကို နေပြည်တော်မှာ အင်္ဂါနေ့ တရားဝင်တွေ့ဆုံနုတ်ဆက်ပြီးနောက် ဗုဒ္ဓဟူးနေ့ကျမှ ဗိုလ်ချုပ်မှူးကြီး မင်းအောင်လှိုင်နဲ့ တွေ့ဆုံဖို့ဖြစ်ပေမယ့် ဗိုလ်ချုပ်မှူးကြီးရဲ မေတ္တာရပ်ခံချက်အရ အခုလို ခရီးရောက်မဆိုက် တနင်္လာနေ့မှာပဲ တွေ့ဆုံခဲ့တာဖြစ်တယ်လို့ ဗာတီကန်နန်းတော်ပြောခွင့်ရသူ Greg Burke ဂရက် ဘာ့က် က ပြောပါတယ်။

မူလအစီအစဉ်အတိုင်း ဒေါ်အောင်ဆန်းစုကြည်နဲ့ တွေ့ဆုံနုတ်ဆက်ပြီးမှ ကာကွယ်ရေးဦးစီးချုပ်နဲ့တွေ့ဆုံမယ် ဆိုရင် သံတမန်ကျင့်ဝတ်အရ ပိုပြီးမှန်ကန်ရှင်းလင်းမှာဖြစ်ပါတယ်လို့လည်း သူက ပြောပါတယ်။

အခုလို နိုင်ငံတော်သမတနဲ့ အတိုင်ပင်ခံပုဂ္ဂိုလ်တို့ကို မတွေ့ခင် ကာကွယ်ရေးဦးစီးချုပ်နဲ့ တွေ့ဆုံခဲ့တဲ့အတွက် ဗိုလ်ချုပ်မှူးကြီး မင်းအောင်လှိုင်က ဒေါ်အောင်ဆန်းစုကြည်ထက်ပိုပြီး အာဏာရှိကြောင်း ပြသရာကျတယ်လို့ နိုင်ငံတကာသတင်းတွေမှာ ဖေါ်ပြထားပါတယ်။

ဒီအတောအတွင်းမှာပဲ မြန်မာပြည် ကက်သလစ်ဘုရားကျောင်း ဆရာတော် Bishop John Hsane Hgyi ဂျွန် စိန်ကြီး က ရခိုင်ပြည်နယ်မှာ ထိတ်လန့်ဖွယ်ရာ ရက်စက်ကြမ်းကြုတ်မှုတွေဖြစ်ပွားခဲ့တယ်ဆိုတဲ့ သတင်းတွေဟာ အခြေအမြစ် ခိုင်ခိုင်မာမာ မရှိပါဘူးလို့ မနေ့က ကျင်းပတဲ့ သတင်းစာရှင်းလင်းပွဲမှာ ပြောကြားခဲ့ပါတယ်။

အဲဒီပြသနာနဲ့ပတ်သက်ပြီး မြန်မာအစိုးရရဲ့ တုံ့ပြန်ဆောင်ရွက်မှုတွေကို ဝေဖန်နေကြသူတွေအနေနဲ့ ဖြစ်ပွားရာဒေသကို ကိုယ်တိုင်သွားရောက်ပြီး အဖြစ်ပျက်မှန်တွေသိရှိအောင် လေ့လာသင့်ကြောင်းလည်း သူက ပြောဆိုတယ်လို့ အေပီသတင်းမှာ ဖေါ်ပြထားပါတယ်။

မြန်မာပြည်ခရီးစဉ်မှာ ပုပ်ရဟန်းမင်းကြီးက ရိုဟင်ဂျာဆိုတဲ့အသုံးအနှုန်းနဲ့ ရခိုင်ပြည်နယ်က ထွက်ပြေးရတဲ့ မွတ်ဆလင်တွေအကြောင်း ထည့်သွင်းပြောဆိုခဲ့ခြင်း မရှိတာနဲ့ ပတ်သက်ပြီး ဗာတီကန်ပြောခွင့်ရ Greg Burke ဂရက် ဘာ့က် က အဲဒီကိစ္စကြောင့် ပုပ်ရဟန်းမင်းကြီးရဲ့ ဂုဏ်သိက္ခာကို ထိခိုက်စေခြင်းမရှိပါဘူးလို့ ပြောပါတယ်။

အခုခရီးစဉ်မှာ ပုပ်ရဟန်းမင်းကြီးက မပြောတဲ့အတွက် အရင်က ဒီကိစ္စနဲ့ပတ်သက်ပြီး သူပြောကြားခဲ့တဲ့စကားတွေကို ပယ်ဖျက်ရာလည်း မကျရောက်ပါဘူး။ လူတွေက ပုပ်ရဟန်းမင်းကြီးဟာ သိပ်ပြီး သြဇာကိတ္တမကြီးမားတယ်လို့ ယူဆကြတာကို ကျေးဇူးတင်ပါတယ်။ ဒါပေမယ့် တကယ်တော့ အဲဒီလို မဟုတ်ပါဘူး။ ဖြေရှင်းလို့ မဖြစ်နိုင်တဲ့ ပြသနာတွေကို ပုပ်ရဟန်းမင်းကြီးက ဖြေရှင်းပေးဖို့လည်း လူတွေက မျှော်လင့်မနေကြပါဘူးလို့ သူက ပြောပါတယ်။
ဒါ့အပြင် ပုပ်ရဟန်းမင်းကြီးရဲ့ အခု ခရီးစဉ်ဟာ ပေါင်းကူးတံတားတွေ တည်ဆောက်ပေးဖို့ အပြုသဘော လာရောက်တာဖြစ်ပါတယ်လို့လည်း ဗာတီကန်ပြောခွင့်ရသူက မနေ့က ကျင်းပတဲ့ သတင်းစာရှင်းပွဲမှာ ပြောကြားခဲ့ပါတယ်။

RFA Burmese
https://www.facebook.com/rfaburmese

ရသေ့တောင်မြို့နယ် လယ်ရိတ်သိမ်းဖို့အခက်အခဲ (ရုပ်/သံ)

ရခိုင်ပြည်နယ်မြောက်ပိုင်းမှာ အကြမ်းဖက်တိုက်ခိုက်မှုတွေ ဖြစ်ပွားခဲ့ပြီးနောက် ဒေသခံတွေ နေရပ်စွန့်ခွာထွက်ပြေးခဲ့ကြတဲ့ ရသေ့တောင်မြို့နယ်က ကျေးရွာတွေမှာ လယ်ယာမြေတွေကို အချိန်မီ ရိတ်သိမ်းနိုင်ဖို့ အခက်အခဲ တွေ့နေကြပါတယ်။

RFA သတင်းထောက် ကိုမင်းသိန်းအောင် ရိုက်ကူးတင်ပြထားပါတယ်။



စကုကျောက်မီးသွေးတွင်းပေါက်ကွဲလို့ သေဆုံးသူ ၈ ဦးအထိ ရှိ

 စကုမြို့နယ်ထဲမှာ ပေါက်ကွဲခဲ့တဲ့ ကျောက်မီးသွေးတွင်း
မကွေးတိုင်း ဒေသကြီး မင်းဘူး စကုမြို့နယ်ထဲမှာ ကျောက်မီးသွေးတွင်း ပေါက်ကွဲခဲ့ပြီး သေဆုံးခဲ့ရတဲ့ တရုတ်နိုင်ငံသား အပါအဝင် လူ ၈ ဦး အလောင်းအားလုံးကို တွေ့ရှိခဲ့ပါတယ်။

အင်္ဂါနေ့ ညပိုင်းအထိ အလောင်း ၆ လောင်းပဲ တွေ့ရှိခဲ့ပြီး ဗုဒ္ဓဟူးနေ့ နေ့လည်ပိုင်းကျမှ တရုတ်နိုင်ငံသားနဲ့ ကျန်အလောင်းတစ်လောင်းကို ဆယ်ယူရရှိခဲ့ပါတယ်။

ဒီကျောက်မီးသွေးတွင်းကို ဟန်ထက် ပြည်တွင်း ကုမ္ပဏီက ၅ နှစ်စီမံကိန်းနဲ့ တူးဖော်နေတာ ဖြစ်ပါတယ်။

လက်ရှိအချိန်မှာ အဲဒီကျောက်မီးသွေးတွင်း လုပ်ငန်းခွင်ကို ပိတ်ထားပြီး ကုမ္ပဏီ ပိုင်ရှင်နဲ့ လုပ်ငန်းတာဝန်ခံ ၂ ဦးကို ပေါ့လျော့မှုကြောင့် ပြစ်မှုဆိုင်ရာ ပုဒ်မ (၃၀၄)နဲ့ မင်းဘူးရဲစခန်းမှာ အမှုဖွင့်ထားတယ်လို့ မင်းဘူးမြို့နယ် ရဲမှူး ဉာဏ်ကီးရှိန်က ဘီဘီစီကို ပြောပါတယ်။

မကွေးတိုင်းထဲမှာ တူးဖော်နေတဲ့ ကျောက်မီးသွေးတွင်းတွေ အများအပြား ရှိနေပြီး ဒီတွင်းတွေဟာ သဘာဝပတ်ဝန်းကျင်နဲ့ လုပ်ငန်းခွင် လုံခြုံမှုကို စနစ်တကျ လိုက်နာဆောင်ရွက်မှု ရှိဖို့ လိုက်လံစစ်ဆေးနေတယ်လို့ မကွေးတိုင်း ဒေသကြီး အစိုးရ သယံဇာတ သဘာဝပတ်ဝန်းကျင် လျှပ်စစ်နဲ့ စွမ်းအင်ဝန်ကြီး ဦးမြင့်ဇော်က ပြောပါတယ်။

လုပ်ငန်းခွင်အတွင်း အောက်ဆီဂျင်ဗူးနဲ့ ဆက်ထားတဲ့ လေပိုက် ပေါက်ထွက်လို့ တွင်းပြိုကျခဲ့ရပြီး တွင်းထဲမှာ လူတွေပိတ်မိ သေဆုံးခဲ့တယ်လို့လည်း သိရပါတယ်။

မကွေးတိုင်းထဲမှာ လုပ်ငန်းလိုင်စင် ချပေးထားတဲ့ ကျောက်မီးသွေးတွင်း (၄၁) တွင်း ရှိနေပြီး အများစုကတော့ ဧရာဝတီမြစ် အနောက်ဖက်ခြမ်း မြို့တွေဖြစ်တဲ့ မင်းဘူး-စကု၊ ငဖဲ၊ မင်းလှ၊ ပွင့်ဖြူစတဲ့ မြို့နယ်တွေမှာ ဖြစ်ပါတယ်။

BBC Burmese
http://www.bbc.com/burmese

မြောက်ကိုရီးယားဒုံးကျည် အမေရိကန် ရောက်နိုင်လို့ ကြေညာ

နျူကလီယား လက်နက်ပိုင်လိုတဲ့ မြောက်ကိုရီးယား
မြောက်ကိုရီးယားက နောက်ဆုံး စမ်းသပ် ပစ်လွှတ် လိုက်တဲ့ အိုင်ဘီအမ်စီ တိုက်ချင်းပစ် ထိပ်ဖူးတပ် ဒုံးကျည်ဟာ အမေရိကန် ပြည်ထောင်စု ကို လုံးဝရောက်နိုင်တယ်လို့ ကြေညာသွားပါတယ်။

ဗုဒ္ဓဟူး မနက် စောစောပိုင်းက စမ်းသပ် ပစ်လွှတ်တဲ့ ဟွာဆောင် ၁၅ ဒုံးကျည်ဟာ အခုစမ်းသပ်မှုတွေ အတွင်း အင်အား အကြီးဆုံးလို့ အစိုးရ သတင်းဌာနက ကြေညာလိုက်ပြီး နျူကလီယား လက်နက်ပိုင်တဲ့ နိုင်ငံအဖြစ် ရည်မှန်းချက် ပြည့်သွားပြီလို့ ပြောပါတယ်။

ဒီနှစ်ပိုင်းအတွင်း မြောက်ကိုရီးယားနိုင်ငံရဲ့ အကြိမ် ၂၀ မြောက် စမ်းသပ် ပစ်လွှတ်မှုကြောင့် တရုတ်ကလည်း အကြီးအကျယ် စိုးရိမ်နေပါတယ်။

အမေရိကန် ကာကွယ်ရေး ဝန်ကြီး ဂျင် မက်တစ်ကတော့ မြောက်ကိုရီယားရဲ့ ဒုံးလက်နက် တည်ဆောက်နေတာဟာ တကမ္ဘာလုံးကို ချိန်းခြောက်လိုက်တာပဲလို့ ပြောပါတယ်။

ဒီပစ်လွှတ်မှုဟာ မဆင်မခြင် ပြုလုပ်မှုတခု ဖြစ်တယ်လို့လည်း တောင်ကိုရီးယား သမ္မတ က ဝေဖန်ပါတယ်။

ဒီကိစ္စနဲ့ ပတ်သက်လို့ ကုလသမဂ္ဂ လုံခြုံရေး ကောင်စီမှာလည်း အရေးပေါ် အစည်းအဝေးတခု ကျင်းပဖို့ ရှိပါတယ်။
 မြောက်ကိုရီးယား ခေါင်းဆောင် ကင်ဂျုံအွန်း
ဒီတခေါက် စမ်းသပ်ပစ်လွှတ်လိုက်တဲ့ ဒုံးကျည်ဟာ ကီလိုမီတာ တစ်ထောင်သာ ရောက်ခဲ့ပေမယ့် တက်သွားနိုင်တဲ့ အမြင့်ဟာ အာကာသ ဝေဟင် လမ်းကြောင်းကနေ အမေရိကန်နိုင်ငံ ဝါရှင်တန်အထိ တိုက်ခိုက်နိုင်တဲ့ အတိုင်းအတာ ရှိတယ် လို့ လေ့လာသူတွေက သုံးသပ်ကြပါတယ်။

အခု ဂျပန်ရေပိုင်နက် ထဲကို ကျသွားတဲ့ ဒုံးကျည်ဟာ စောစောက စမ်းသပ်မှုတွေထက် ပိုမြင့်အောင် ပျံသန်းနိုင်ပါတယ်။

ဒါကြောင့် အရင်လို ဂျပန်နိုင်ငံပေါ်က ဖြတ်မပျံဘဲ မိုးပေါ်ကို အမြင့်ကြီးရောက်အောင် ပျံသန်းခဲ့တာဖြစ်ပါတယ်။

မြောက်ကိုရီးယား အဆိုအရ ဒီဒုံးကျည်ဟာ မိုင်၂၈ဝဝ လောက်အမြင့် ပျံသန်းနိုင်တယ်လို့ ဆိုပါတယ်။

ဒါဟာ တောင်ကိုရီးယားက ခန့်မှန်းတာနဲ့ နီးစပ်ပါတယ်။


အမေရိကန် အခြေစိုက် သိပ္ပံပညာရှင် အဖွဲ့ကတော့ ဒီဒုံးကျည်ဟာ ကီလိုမီတာ တသောင်း သုံးထောင်ကျော် သွားနိုင်တယ်လို့ ယူဆရပြီး အမေရိကတိုက် ဘယ်နေရာမဆို ရောက်နိုင်တယ်လို့ ပြောပါတယ်။

ဒါပေမဲ့ အခုပစ်လိုက်တဲ့ ဒုံးကျည်မှာတပ်ထားတဲ့ ထိပ်ဖူး လက်နက်အတုဟာ အလွန် ပေါ့ပါးတာတွေ့ရလို့ ဒီထက်ပိုလေးလံတဲ့ နျူးကလီးယား ထိပ်ဖူး တပ်ထားရင် ဒီလောက် ခရီးဝေးရောက်ဖို့ မလွယ်ဘူးလို့ ဆိုပါတယ်။

မြောက်ကိုရီးယား ဘက်ကတော့ ဟွာဆောင် ၁၅ ဟာ အလွန်လေးတဲ့ ထိပ်ဖူးကို သယ်ဆောင်ပြီးအမေရိကန် ပြည်မကြီး အထိ ရောက်အောင်ပစ်နိုင်တယ် လို့ပြောပါတယ်။

ကျွမ်းကျင်သူတွေ ကတော့ အိုင်စီဘီအမ်ကို သုံးပြီး နျူကလီယားထိပ်ဖူးနဲ့ အောင်အောင်မြင်မြင် ပစ်ဖို့ဆိုရင် နောက်တနှစ် နှစ်နှစ် လောက် အချိန်ယူနိုင်တယ်လို့ခန့်မှန်းပါတယ်။

ဒီနေရာမှာ အလွန်သိမ်မွေ့ပြီး ခက်ခဲတဲ့ နည်းပညာ လိုပါတယ်။

တကယ်လို့ ကမ္ဘာကြီးရဲ့ လေထုထဲကို ပြန်ဝင်တဲ့အခါ နူကလီးယား ထိပ်ဖူး ပြိုကွဲသွားရင် ဒီနည်းကိုသုံးပြီး ပစ်တာဟာ အကျိုးမရှိနိုင်ပါဘူး။
နျူကလီးယား လက်နက်ပိုင်ဖို့ ရပ်မှာ မဟုတ်
ဒီအကျပ်အတည်းကို သူတို့ဖြေရှင်းနိုင်ပြီလို့ ဘယ်သူမှသိပ်မယုံကြပါဘူး။

မြောက်ကိုရီးယား အကျိုးစီးပွားကို မထိခိုက်သမျှ သူတို့က ဘယ်သူ့ကိုမှ အန္တရာယ်ပေးမှာ မဟုတ်ဘူးလို့ ကြေညာခဲ့ပါတယ်။

ဒါဟာ အပြုသဘော ကမ်းလှမ်းတာ ဖြစ်နိုင်ပေမယ့် အများကတော့ သံသယနဲ့ကြိုဆိုမှာပါ။

လူသားကို အဆိုးဝါးဆုံး ထိခိုက်စေမယ့် လက်နက် ထုတ်လုပ်မှုဟာ သူတို့ရဲ့ အကျိုးစီးပွားတွေထဲမှာ ပါဝင်နေပါတယ်။

ကင်ဂျုံအွန်က မဖြစ်မနေ နျူးကလီးယား လက်နက်ပိုင်ဖို့ ကြိုးစားမှု ကိုတော့ ရပ်မှာ မဟုတ်ပါဘူးလို့ ကျွမ်းကျင်သူ အများစုက သုံးသပ် နေကြပါတယ်။

BBC Burmese
http://www.bbc.com/burmese
အချိန်နဲ့ တပြေးညီ သတင်းများ ဖတ်ရှုနိုင်ဖို့  facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့ နိုင်ပါသည်။
နောက်ဆုံးရ သတင်းများကို အောက်ပါ Tweets မှာ ဖော်ပြထားပါတယ်။ Tweets ရဲ့ ဘေးဘောင်တန်းကို ဆွဲချပြီ မိမိတို့ စိတ်ဝင်စားတဲ့ သတင်းခေါင်းစဉ် အောက်က Link ကို နှိပ်ပြီ အပြည့်အစုံဖတ်ရှုနိုင်ပါတယ်။
 

Advertisement

 

အသစ် တင်သမျှ သတင်းများ အလို အလျှောက်ပို့  ပေးပါမည်

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ