မြင်းခြံမှာ ချောင်းမြောင်းပစ်ခတ်မှုတချို့ ဖြစ်ပွား

မြန်မာနိုင်ငံမှာ စစ်တပ်က အာဏာသိမ်းထားတာ ၅ လကျော်လာပြီဖြစ်ပေမယ့် အာဏာရှင်ဆန့်ကျင်ရေး ဆန္ဒပြပွဲတွေကို ဒေသတချို့မှာ ဆက်လက် ပြုလုပ်နေကြဆဲ ဖြစ်သလို ဗုံးဖောက်ခွဲမှုတွေနဲ့ ပစ်ခတ် သတ်ဖြတ်မှုတွေလည်း နေ့စဉ်ဆိုသလို ဆက်တိုက် ဖြစ်ပေါ်နေပါတယ်။

ဒီကနေ့ ဇူလိုင်လ ၄ ရက်နေ့ နေ့လယ်ပိုင်းက မန္တလေးတိုင်း၊ မြင်းခြံမြို့မှာ စစ်ကောင်စီတပ်သားတွေ စီးလာတဲ့ အိမ်စီးကားကို ဆိုင်ကယ်သမားက သေနတ်နဲ့ ပစ်ခတ်ခဲ့ပေမယ့် သေဆုံးသူမရှိဘူးလို့ ဒေသခံတွေက ပြောပါတယ်။ စစ်ကောင်စီကားက သေနတ်သမားကို လိုက်လံဖမ်းဆီးပေမယ့် မမိလိုက်ဘူးလို့ ဆိုပါတယ်။

မြင်းခြံမြို့မှာပဲ စစ်ကောင်စီက ခန့်ထားတဲ့ ၁၉ ရပ်ကွက် အုပ်ချုပ်ရေးမှူး အောင်မိုးသန့်ဆိုသူ ဒီကနေ့ သေနတ်နဲ့ ၃ ချက် အပစ်ခံလိုက်ရတဲ့ ဒဏ်ရာတွေနဲ့ ဆေးရုံမှာ ဆေးကုသမှု ခံယူနေတယ်လို့ ဒေသခံတွေက ပြောပါတယ်။

ရန်ကုန်တိုင်း၊ အင်းစိန်မြို့ ကမ်းနားလမ်းမှာ စစ်ကားပေါ်ကို လက်ပစ်ဗုံးတလုံးနဲ့ ပစ်လိုက်ပေမယ့် အဲဒီဗုံးက ပေါက်ကွဲခဲ့ခြင်း မရှိဘူးလို့ ဒေသခံတွေက ပြောပါတယ်။ အခင်းဖြစ်ပွားပြီးတဲ့နောက် အင်းစိန် အောင်ဇေယျအိမ်ယာဝင်းအတွင်း စစ်ကောင်စီတပ်ဖွဲ့တွေက ဝင်ရောက်ရှာဖွေပြီး လူငယ်တချို့ကို ဖမ်းဆီး ခေါ်ဆောင်သွားတယ်လို့ ဆိုပါတယ်။

တချိန်တည်းမှာပဲ ဒီကနေ့ ရေးမြို့၊ မြို့မရဲစခန်းအတွင်း ဗုံးပေါက်ကွဲမှု ဖြစ်သွားခဲ့ပေမယ့် ထိခိုက်ဒဏ်ရာရသူ မရှိဘူးလို့ ဒေသခံတွေက ပြောပါတယ်။

တဖက်မှာ ပစ်ခတ် ဖောက်ခွဲမှုတွေ ရှိနေတဲ့ တချိန်တည်းမှာပဲ အာဏာရှင်ဆန့်ကျင်ရေး ဆန္ဒပြပွဲတွေလည်း မြို့နယ်တချို့မှာ ဆက်လက် ပြုလုပ်နေကြပါတယ်။ ဒီကနေ့ တနင်္သာရီတိုင်း၊ လောင်းလုံမြို့နယ်အတွင်းက ကျေးရွာတချို့ စုပေါင်းပြီး စစ်အာဏာသိမ်းမှု ဆန့်ကျင်ရေး ဆန္ဒပြခဲ့ကြပါတယ်။

အလားတူပဲ မန္တလေးမြို့မှာလည်း ဒီကနေ့ နေ့လယ်ပိုင်းက အင်ဂျင်နီယာများအဖွဲ့ သပိတ်စစ်ကြောင်းနဲ့ သံဃသမဂ္ဂ သပိတ်စစ်ကြောင်းတို့ စစ်အာဏာရှင်ပြုတ်ကျရေး၊ ဖက်ဒရယ်ဒီမိုကရေစီ ရရှိရေးတို့အတွက် အသီးသီး ချီတက် ဆန္ဒပြခဲ့ကြပါတယ်။

စစ်အာဏာရှင်ဆန့်ကျင်ရေး ဆန္ဒပြပွဲတွေကို ကချင်ပြည်နယ်၊ ဖားကန့်မြို့၊ မွန်ပြည်နယ် ပေါင်မြို့တို့အပြင် စစ်ကိုင်းတိုင်းအတွင်းက ဆားလင်းကြီးနဲ့ ယင်းမာပင်မြို့နယ်တွေမှာလည်း ကျေးရွာပေါင်းစုံ သပိတ်အဖြစ်နဲ့ ပြုလုပ်ခဲ့ကြပါတယ်။

ဗွီအိုအေ (မြန်မာပိုင်း)

https://burmese.voanews.com/a/myanmar-protests-myinchan-shot/5952710.html