မြန်မာနိုင်ငံတွင်း စစ်ရေးပဋိပက္ခကြောင့် အိုးအိမ်စွန့်ရသူ ၂ သိန်း ၃ သောင်းရှိပြီ (ကုလပြောခွင့်ရ Stéphane Dujarric)

ကုလ ပြောခွင့်ရ Stephane Dujarric

မြန်မာနိုင်ငံမှာ စစ်အာဏာသိမ်းပြီးနောက်ပိုင်း တိုက်ခိုက်မှုတွေ ဆက်လက် ပြင်းထန်နေတဲ့အတွက် သိန်းဂဏန်းအထိရှိတဲ့ ဒေသခံအရပ်သားတွေ အိုးအိမ်စွန့်ခွာ ထွက်ပြေးနေရတဲ့အပေါ် စိုးရိမ်မိကြောင်း ကုလသမဂ္ဂက ပြောဆိုလိုက်ပါတယ်။

“ဖေဖော်ဝါရီလ ၁ ရက်နေ့ အာဏာသိမ်းလိုက်ပြီးနောက်ပိုင်း၊ မြန်မာစစ်တပ်နဲ့ တိုင်းရင်းသား လက်နက်ကိုင် အဖွဲ့တွေကြား တိုက်ခိုက်မှုတွေ၊ တိုင်းရင်းသား လက်နက်ကိုင် အဖွဲ့တွေ အချင်းချင်းကြား တိုက်ခိုက်မှုတွေကြောင့် လူပေါင်း ၂ သိန်း ၃ သောင်းလောက် အိုးအိမ်စွန့်ခွာ ထွက်ပြေးခဲ့ကြရပါတယ်။” လို့ ကုလသမဂ္ဂ စာနာမှု အကူအညီပေးရေး အဖွဲ့အစည်းတွေရဲ့ ပြောကြားချက်ကို ကိုးကားပြီး ကုလသမဂ္ဂ အတွင်းရေးမှူးချုပ်ရဲ့ ပြောခွင့်ရ Stéphane Dujarric က ကြာသပတေးနေ့ သတင်းစာရှင်းလင်းပွဲမှာ ပြောဆိုလိုက်တာပါ။

အထူးသဖြင့် လူပေါင်း ၁ သိန်း ၈ သောင်းလောက် အိုးအိမ်စွန့်ခွာ ထွက်ပြေးနေရတဲ့ မြန်မာနိုင်ငံ အရှေ့တောင်ဖက် ဒေသက အခြေအနေတွေအပေါ် ကုလသမဂ္ဂ အဖွဲ့အစည်းတွေက စိုးရိမ်နေတယ်လို့လည်း ပြောပါတယ်။ ကုလသမဂ္ဂ လူသားချင်းစာနာမှု အကူအညီပေးရေးရုံး (OCHA) ရဲ့ ကြာသပတေးနေ့ ထုတ်ပြန်ချက်မှာတော့ မေလ ၂၁ ရက်နေ့ကစ ကယားပြည်နယ်က ပဋိပက္ခတွေကြောင့် ထွက်ပြေးကြရသူ ၁၀၃,၅၀၀ အပါအဝင်၊ နိုင်ငံ အရှေ့တောင်ပိုင်းမှာ အိုးအိမ်စွန့်ခွာရသူ ခန့်မှန်းခြေ ၁၇၇,၅၀၀ ရှိကြောင်း ဖော်ပြထားတာပါ။

ချင်းပြည်နယ်မှာလည်း ဒေသခံ ကာကွယ်ရေး တပ်ဖွဲ့တွေနဲ့ မြန်မာလုံခြုံရေး တပ်ဖွဲ့တွေကြား ဒီလဆန်းအထိ တိုက်ခိုက်မှုတွေ ဖြစ်ခဲ့ရာက လူပေါင်း ၂ သောင်းကျော် ထွက်ပြေးနေရပြီး၊ လက်နက်ကိုင် ပဋိပက္ခတွေ ဖြစ်ပွားနေတဲ့ ကချင်ပြည်နယ်မှာလည်း မတ်လလယ်ကစ လူပေါင်း ၁၁,၆၅၀ ကျော် ရှိခဲ့ကြောင်းလည်း ပြောပါတယ်။

မြန်မာနိုင်ငံမှာ အရပ်သားအစိုးရကို ဖယ်ရှားပြီး စစ်တပ်က အာဏာသိမ်းလိုက်တာ အခုဆိုရင် ၅ လလောက် ရှိလာပေမဲ့ ဆန့်ကျင်အုံကြွမှုတွေ၊ လက်နက်ကိုင် တိုက်ခိုက်မှုတွေ ဆက်လက်ပေါ်ပေါက်နေသလို တိုင်းရင်းသား လက်နက်ကိုင် အဖွဲ့အစည်းတွေနဲ့ စစ်တပ်ကြား တိုက်ပွဲတွေလည်း တကျော့ပြန် ပြင်းထန်လာနေတာ ဖြစ်ပါတယ်။

VOA (မြန်မာပိုင်း)

https://burmese.voanews.com/a/un-concerns-on-more-myanmar-idp-fleeing/5941632.html