ဖမ်းမိတယ်ဆိုတဲ့ လက်နက်တွေ မန္တလေး PDF ရဲ့ လက်နက်တွေ မဟုတ်ဘူးလို့ဆို

 ဖမ်းမိသူတွေနဲ့လက်နက်တွေဆိုပြီး စစ်ကောင်စီ ထုတ်ပြန်

လူမှုကွန်ရက်မှာ ဒီကနေ့ မန္တလေးပီဒီအက်ဖ်အဖွဲ့ခေါင်းဆောင် နဲ့ လက်နက်တွေ ဖမ်းမိတယ်လို့ ပျံ့နှံ့နေပေမဲ့ အဲဒီ ဓာတ်ပုံပါလက်နက်တွေနဲ့ လူတွေဟာ မန္တလေး PDF ကမဟုတ်ကြောင်း မန္တလေးပီဒီအက်ဖ်ဘက်က ပြောဆိုပါတယ်။

မန္တလေးမြို့ ၅၄ လမ်း နဲ့ ၁၁၁ လမ်းထွန်တုံးရပ်မှာ ဇွန် ၂၂ရက်က ဖြစ်ပွားခဲ့တဲ့ စစ်ကောင်စီတပ်နဲ့ မန္တလေး PDF တို့ကြား အပြန်အလှန်ပစ်ခတ်မှု နောက် ဒီကနေ့မှာ မန္တလေး PDF က ခေါင်းဆောင်တစ်ဦးဖြစ်တဲ့ ဗိုလ်ထွန်းတောက်နိုင် ဖမ်းဆီးခံရတယ်လို့ သတင်းထွက်ပေါ်ခဲ့တာ ဖြစ်ပါတယ်။

ဒီကနေ့မှာတော့ မန္တလေး PDF စာမျက်နှာကနေ ဗိုလ်ထွန်းတောက်နိုင်ဖမ်းခံရတာ မဟုတ်ကြောင်း အသိပေး ထုတ်ပြန်လာပါတယ်။

ဒီဖမ်းဆီးမှုနဲ့ ပတ်သက်ပြီး စစ်ကောင်စီဘက်ကတော့ ၂၂ ရက် နေ့ ပစ်ခတ်မှုကနေ ဖမ်းဆီးရမိသူတွေကို စစ်ဆေးမေးမြန်းမှုတွေကနေတစ်ဆင့် လက်နက်တွေ သယ်ဆောင်လာစဥ်မှာ လမ်းမှာ ဖမ်းဆီးရမိခဲ့တာလို့ ဖမ်းမိရမိတဲ့သူတွေရဲ့ ပုံတွေနဲ့ ယာဥ်တွေ၊ လက်နက်တွေရဲ့ ပုံတွေနဲ့ သတင်းထုတ်ပြန်ပါတယ်။

ဒီဖမ်းဆီးမှုမှာ လက်နက်သယ်ဆောင်လာတယ်ဆိုတဲ့ သတင်းအရ စစ်ဆေးမှုတွေ လုပ်ရာကနေ လူလေးဦးကို ဇွန်လ ၂၃ ရက်မှာ လမ်းမှာ အရင်ဖမ်းမိခဲ့ပြီး သူတို့ရဲ့ ထွက်ဆိုချက်အရ လက်နက်သယ်ဆောင်လာတဲ့ ခြောက်ဘီးယာဥ် နဲ့ လက်နက်ရာချီ ဖမ်းမိခဲ့တာလို့ ထုတ်ပြန်ပါတယ်။

လက်နက်တွေကို ဗန်းမော်-ငါးအိုး-သပိတ်ကျင်း လမ်းကြောင်းကနေ မန္တလေးမြို့ကို သယ်ဆောင်လာတယ်ဆိုတဲ့ သတင်းအရ ရှာဖွေရာမှာ သပိတ်ကျင်းမြို့နယ် တကောင်းလမ်းခွဲမှာ လူလေးဦးကို ဖမ်းမိပြီး အဲဒီထဲမှာ မန္တလေး ပီဒီအက်ဖ်က အဖွဲ့ဝင် ကိုရန်လင်းအောင် ခေါ် မိုးတိမ်နဲ့ ကိုဝေယံလင်း ခေါ် ထွန်းတောက်နိုင်တို့ ပါဝင်တယ်လို့ ထုတ်ပြန်ပါတယ်။

အဲဒီနောက်ညနေပိုင်းမှာမန္တလေး ဗန်းမော်ကားလမ်းမှာ နစ်ဆန်းခြောက်ဘီးယာဥ်နဲ့လက်နက်တွေကိုဖမ်းမိတယ်လို့ ဆိုပါတယ်။

လက်နက်မျိုးစုံ ၁၁၄ လက်နဲ့ ကျည်တောင့် တစ်သောင်း၊ လက်ပစ်ဗုံး၄၉၉ လုံးနဲ့အတူ အဝေးထိန်းမိုင်းခလုတ်တွေ၊ ယမ်းမှုန့်တွေ၊ စနက်တံ စတာတွေ ဖမ်းမိခဲ့တယ်လို့ ဆိုပါတယ်။

အဲဒီလက်နက်တွေကို မန်စီမြို့က စတင်သယ်ဆောင်လာပြီး ဖမ်းမိသူလေးဦးက သီးခြားလိုက်ပါလာတာ ဖြစ်တယ်လို့ ဆိုပါတယ်။

ဒါပေမဲ့ အဲလို ပြောဆိုမှုတွေဟာ မန္တလေး ပီဒီအက်ဖ်ကို ဖိနှိပ်ချင်လို့ ပြောဆိုမှုတွေသာ ဖြစ်တယ်လို့ မန္တလေး ပီဒီအက်ဖ်ဘက်က ငြင်းဆိုပါတယ်။

ဒါ့အပြင် စစ်ကောင်စီရဲ့ ထုတ်ပြန်ချက်ထဲမှာ ၂၂ ရက် ပစ်ခတ်မှုက သေဆုံးသူတွေထဲမှာ ကချင်လွတ်မြောက်ရေးတပ် ကေအိုင်အေရဲ့ ဗိုလ်အဆင့်ရှိသူ တူးဖိုးနဲ့ ကိုရိုင်းတို့ ပါဝင်တယ်၊ အခုလက်နက်တွေကိုလည်း ကေအိုင်အေက ဆရာလွန်းဆိုသူရဲ့ စီစဥ်ပေးမှုနဲ့ သယ်ဆောင်လာတာဖြစ်တယ်လို့ ဆိုပြီး ဒီပြောဆိုမှုတွေနဲ့ ပတ်သက်ပြီး ကေအိုင်အေဘက်က တုံ့ပြန်မှုတွေကို မတွေ့ရသေးပါဘူး။


BBC Burmese

https://www.bbc.com/burmese/live/burma-57497528

ဖမ်းမိတယ်ဆိုတဲ့ လက်နက်တွေ မန္တလေး PDF ရဲ့ လက်နက်တွေ မဟုတ်ဘူးလို့ဆို ဖမ်းမိတယ်ဆိုတဲ့ လက်နက်တွေ မန္တလေး PDF ရဲ့ လက်နက်တွေ မဟုတ်ဘူးလို့ဆို Reviewed by THITHTOOLWIN on 05:57 Rating: 5

No comments:

Powered by Blogger.