ဒီးမော့ဆိုမှာ စစ်တပ်နဲ့ ပြည်သူ့ကာကွယ်ရေးတပ်ကြား တိုက်ပွဲဖြစ်နေဆဲ

ဒီးမော့ဆို မြို့ (ဓာတ်ပုံ-ဒီးမော့ဆိုတရားရုံးဖဘ)

ကယားပြည်နယ် ဒီးမော့ဆိုမြို့နယ်မှာ စစ်ကောင်စီစစ်တပ်နဲ့ ကရင်နီပြည်သူ့ကာကွယ်ရေးတပ်ဖွဲ့ (KPDF) တို့အကြား ဒီနေ့ မေလ ၂၈ ရက်နေ့မှာလည်း ပစ်ခတ်တိုက်ခိုက်ကြပါတယ်။ နှစ်ဖက်ပစ်ခတ်မှုအတွင်းအရပ်သားတွေ ထိခိုက်ဒဏ်ရာရခဲ့သလို တိုက်ပွဲတွေကြောင့် နေရပ်စွန့်ခွာ တိမ်းရှောင်နေသူတွေမှာလည်း အခက်အခဲတွေ ဖြစ်နေကြပါတယ်။ ကယားဖက်ကအခြေအနေကို ဗွီအိုအေသတင်းထောက် နိုင်ကွန်းအိန်က သတင်းပေးပို့ထားပါတယ်။

မေလ ၂၁ ရက်နေ့ထဲက စစ်ကောင်စီစစ်တပ်နဲ့ ကရင်နီပြည်သူ့ကာကွယ်ရေးတပ်ဖွဲ့ KPDF တို့အကြား အပြန်အလှန် ပစ်ခတ်တိုက်ခိုက်မှုတွေရှိနေတဲ့ ကယားပြည်နယ် ဒီးမော့ဆိုမြို့မှာ ဒီနေ့ မေလ ၂၈ ရက်နေ့မှာလည်း မနက်ပိုင်းကတည်းက ပစ်ခတ်တာတွေရှိခဲ့တယ်လို့ မြို့ခံတယောက်က ပြောပါတယ်။

"ဒီးမော့ဆိုကတော့မနက်အစောကြီးပစ်ကြတယ်။ ပစ်လိုက်နားလိုက် ပစ်လိုက်နားလိုက်နဲ့ ၁၁ နာရီလောက်ကြာသွား တယ်။ တပ်အင်အားတော့တိုးချဲ့ထားတယ် လွိုင်ကော်မှာရော ဒီးမော့ဆိုမှာရော။ အပြန်လှန်ပစ်ခတ်မှုတော့ရှိတယ်။ အကျဆုံးတော့မသိရသေးဘူး။"

မနက်ပိုင်းထဲကစလို့ နေ့လည် ၁ နာရီလောက်အထိဖြစ်တဲ့ တိုက်ပွဲတွေအတွင်း ထိခိုက်သေဆုံးမှု ရှိမရှိ လောလောဆယ်တော့ မသိရသေးပါဘူး။

ကြာသပတေးညကလဲ စစ်ကောင်စီတပ်နဲ့ ပြည်သူ့ကာကွယ်ရေးတပ်ဖွဲ့ကြား အပြန်အလှန် ပြင်းပြင်းထန်ထန် တိုက်ခိုက်ခဲ့ကြပါတယ်။ အဲဒီတိုက်ပွဲတွေအတွင်း အမျိုးသားတစ်ဦး လက်နက်ကြီး ထိမှန်သေဆုံးသွားတယ်လို့ မြို့ခံတဦးကပြောပါတယ်။

"စစ်တပ်က လက်နက်ကြီးနဲ့ ရမ်းသန်းပစ်ခတ်ပြီး အောင်မင်္ဂလာရပ်ကွက်မှာ တယောက်ထိမှန်ပြီးကျဆုံးသွားတယ်။ ပြည်သူ လူထုတယောက်။ ထိမှန်ပြီးသေသွားတယ်။"

ဒီးမော့ဆိုမြို့ အနောက်ဖက်က မြို့အဝင် ဒေါတဝီဂိတ်ကို ကရင်နီ ပြည်သူ့ကာကွယ်ရေးအဖွဲ့ KPDF အဖွဲ့ဝင်တွေ မေလ ၂၁ ရက်နေ့မှာ တိုက်ခိုက် သိမ်းပိုက်ခဲ့ပြီးကတည်းက ဒီးမော့ဆိုမှာ သူတို့အဖွဲ့တွေနဲ့ စစ်တပ်ကြား တိုက်ပွဲတွေဖြစ်နေတာပါ။ အခုလက်ရှိ မြို့ထဲမှာ စစ်တပ်က အင်အားဖြည့် တပ်စွဲထားပေမဲ့ ပြည်သူ့ကာကွယ်ရေးအဖွဲ့တွေကလည်း တိုက်ခိုက်နေပါတယ်။ ဒီနေ့ပစ်ခတ်တိုက်ခိုက်မှုအခြေအနေကိုသိရှိဖို့ စစ်ကောင်စီပြောခွင့်ရကိုဆက်သွယ်ပေမဲ့ မရခဲ့ပါဘူး။

ဒီးမော့ဆိုမြို့အပြင် လွိုင်ကော်မြို့မှာလည်း စစ်ကောင်စီတပ်နဲ့ ပြည်သူ့ကာကွယ်ရေးအဖွဲ့တွေ အပြန်အလှန် ပစ်ခတ်တိုက်ခိုက်နေကြတဲ့အတွက် အိုးအိမ်စွန့် ထွက်ပြေးနေကြရတဲ့ ပြည်တွင်းဒုက္ခသည် အခုဆို ၇၀,၀၀၀ လောက် ရှိနေပါတယ်။ ဒီစစ်ရှောင်တွေအတွက်လိုအပ်ချက်ကိုတော့ စစ်ရှောင်အရေးအကူညီပေးဆောင်နေသူတဦးက အခုလိုပြောပါတယ်။

"ဒီရက်ဘက်တိုးလာတယ်။ ၇၀,၀၀၀၊ ၈၀,၀၀၀ လောက်တက်နေတယ်။ မိုးတွေကျလာလို့လေ မိုးကာတွေလိုအပ်တယ်။ အစာခြောက်တွေကတော့ ကုလားပဲတို့ကြာဇံတို့ ခေါက်ဆွဲတို့လိုအပ်နေတယ်။ ဆေးပစ္စည်းလဲလိုအပ်နေတယ်။ ပစ္စည်းမလုံလောက်လို့ဘဲ ကလေးတယောက်ဆုံးသွားတယ်။ လပိုင်းဘဲရှိတယ်။"

လက်ရှိ ကယားပြည်နယ်ထဲမှာ စစ်တပ်ဘက်က အင်အားအများအပြားချပြီး လမ်းကြောင်းပိတ်ဆို့ စိစစ်မှုတွေ များနေတာကြောင့် စစ်ပြေးဒုက္ခသည်တွေအတွက် အကူညီပေးဆောင်ဖို့ အခက်ခဲတွေရှိနေတယ်လို့ အကူညီပေးအဖွဲ့ဝင် ခူးရယ်ကပြောပါတယ်။

"လုံခြုံမှုသိပ်မရှိဘူး။ နည်းနည်းအန္တရာယ်များတယ်။ သွားမှသွားရင်လည်း တော်တော်လေး အသက်ရင်းပြီးမှသွားနေရတယ်။ အခက်ခဲကတော့ တော်တော်လေးသတိထားရတယ်။ စစ်ဘေးရှောင်လာတဲ့သူတွေလည်း တွေ့တဲ့နေရာမှာ ဥပဒေမဲ့ လက်နက်နဲ့ပစ်တာပဲ။ ဘုရားကျောင်းလည်း ပစ်နေတာပဲ သူတို့ဘက်က။"

ကယားပြည်နယ်ထဲက အိုးအိမ်ပစ် ထွက်ပြေးနေကြရသူတွေအတွက် မြန်မာနိုင်ငံကြက်ခြေနီအသင်းကနေ အရေးပေါ် ကယ်ဆယ်ရေးပစ္စည်းတွေ ပေးပို့တယ်လို့ ထုတ်ပြန်ထားပေမဲ့ ဒုက္ခသည်တွေက မရသေးဘူးလို့ ပြောပါတယ်။ လက်ရှိကယားပြည်နယ်ထဲမှာ စစ်တပ်ဘက်က လုံခြုံရေးတင်းကြပ်ထားတာကြောင့် စစ်ဘေးဒုက္ခသည်တွေ အကူအညီရနိုင်ဖို့ ခက်ခဲနေတယ်လို့ စစ်ရှောင်ကော်မတီဝင်တွေကပြောပါတယ်။

ကိုနိုင်ကွန်းအိမ်/ VOA Burmese

https://burmese.voanews.com/a/fighting-between-kpdf-and-military-council-troop/5908014.html