အခေါက်ရွှေ တကျပ်သား မြန်မာကျပ်ငွေ ၁၇ သိန်းကျော်အထိ စျေးပေါက်

ရန်ကုန်မြို့ထဲ တနေရာက ရွှေဆိုင်တခု။ (စက်တင်ဘာ ၀၁၊ ၂၀၁၀)

ပြည်တွင်းမှာ အခေါက်ရွှေ တကျပ်သားကို မြန်မာကျပ်ငွေ ၁၇ သိန်းကျော်လာပေမဲ့ ရွှေဝယ်ယူစုဆောင်းသူတွေ များပြားနေတာကြောင့် ရွှေရောင်းအား ကောင်းလာပါတယ်။ ဘဏ်တွေပြိုလဲသွားမှာ စိုးရိမ်ပြီး အပ်ငွေတွေ ပြန်ထုတ်နေကြတဲ့ ပြည်သူတွေဟာ တန်ဖိုး ခိုင်မာတယ်လို့ ယူဆတဲ့ရွှေကို စုဆောင်းဖို့ ဝယ်ယူနေကြတာ ဖြစ်ပါတယ်။ ဒီရက်ပိုင်း မြန်မာပြည်တွင်း အပြောင်းအလဲဖြစ်နေတဲ့ ရွှေစျေးကွက်အခြေအနေ ရန်ကုန်ကလာတဲ့သတင်းကိုတော့ ကိုခင်မောင်စိုးမင်း ဆက်ပြီး ပြောပြပေးမှာပါ။

ရွှေစျေးက တရိပ်ရိပ်တက်လာပေမဲ့ မြန်မာပြည်တွင်းမှာတော့ စစ်ကောင်စီ အာဏာယူပြီး နိုင်ငံရေး မငြိမ်သက်တာကြောင့် ဘဏ်အပ်ငွေတွေ ပြန်ထုတ်ပြီး ရွှေပြန်ဝယ်နေကြတာပါ။ လက်ထဲက ငွေတန်ဖိုး မပြောင်းအောင် ဝယ်ကြသလို အရောင်းအဝယ်လုပ်ဖို့ ဝယ်နေတာလည်းရှိကြောင်း ရန်ကုန်တိုင်း ရွှေလုပ်ငန်းရှင်များအသင်း ဥက္ကဋ္ဌ ဦးမျိုးမြင့်က ပြောပါတယ်။

“အခုက အဝယ်များနေတယ်ဗျ။ အဝယ်များတယ်ဆိုတာ ကျနော်တို့ ဘဏ်တွေကနေ ငွေထုတ်ပြီးတော့ ဝယ်နေကြတာပဲဗျ။ တချို့ကလည်း ရွှေရောင်းရင် အရောင်းအဝယ်လုပ်ရင် မြတ်တယ်ဆိုတာ သိတဲ့အခါကျတော့ ဒီ ရွှေကိုပြန်ပြီး ဝယ်တဲ့ သဘောပါပဲ။”

ကမ္ဘာ့ရွှေစျေးက တအောင်စကို အမေရိကန်ဒေါ်လာ ၁,၈၃၂ ရှိပါတယ်။ ကိုဗစ်ကပ်ရောဂါ တကမ္ဘာလုံးမှာ တကြော့ပြန် ဖြစ်လာတာကြောင့်လည်း ကမ္ဘာ့ရွှေစျေးက ဆက်တက်နိုင်တယ်လို့ ဦးမျိုးမြင့်က ဆက်ပြောပါတယ်။

“တပြိုင်နက်တည်းလို ဖြစ်နေတာဗျ၊ ရန်ကုန် ကွက်ကွက်ကလေးတင် မဟုတ်ဘူး။ ဥပမာ မနေ့ကဆိုရင် ဒီ ရန်ကုန်မှာ ၁,၅၉၅,၀၀၀ လောက်ပဲ ရှိသေးတယ်။ ကျနော်တို့ ပြည်ဘက်မှာ ၁,၆၂၀,၀၀၀ တို့၊ ဘာတို့ ဖြစ်သွားကုန်ပြီ။ မန္တလေးလည်း ဒီလိုပဲ တပြည်လုံးကို ဖြစ်နေတယ်အခု။”

စစ်ကောင်စီအာဏာ ယူထားတဲ့ သုံးလအတွင်းမှာ ပြည်တွင်းက ဝန်ဆောင်မှုနဲ့ ကုန်လုပ်လုပ်ငန်းအားလုံး ရပ်ဆိုင်းနေပြီး အခြေခံ လူသုံးကုန်နဲ့အတူ ရွှေစျေး၊ ဒေါ်လာစျေး၊ စက်သုံးဆီစျေးတွေလည်း တက်လာပါတယ်။ ဒီကနေ့ ငွေလဲနှုန်းက တဒေါ်လာကို မြန်မာကျပ်ငွေ ၁,၈၀၀ အထိ ရှိလာနေတာပါ။ ကျပ်ငွေတန်ဖိုး တဖြည်းဖြည်း ကျနေတဲ့အတွက် အခြေခံလူတန်းစားက လွဲလို့ အများစုက ရွှေဝယ်ဖို့ပဲ ဆုံးဖြတ်လာကြတာပါ။

“ရှိသမျှပိုက်ဆံလေးတွေ ရွှေဝယ်နေလို့ပါ။ ငွေမကိုင်ချင်လို့ ဝယ်တဲ့သဘောမျိုးဖြစ်မယ်။”

ဒါကတော့ မန္တလေးတိုင်း ရွှေလုပ်ငန်းရှင်များအသင်း ဥက္ကဋ္ဌ ဦးဝင်းစိန် ပြောသွားတာပါ။

ပြည်တွင်းမှာ နှစ်ရက်အတွင်း ကျပ် ၂၀၀,၀၀၀ ကျော်လောက်ခုန်တက်သွားတဲ့ ရွှေစျေးဟာ နိုင်ငံရေး မတည်ငြိမ်မှုကြောင့်လို့ ရွှေဝယ်ယူ စုဆောင်းနေတဲ့ ရန်ကုန်ဒေသခံတဦးက ပြောပါတယ်။

“ပြောရရင် ကျနော်အခုဆို ဘာစီးပွားရေးမှ လုပ်လို့ အဆင်မပြေဘူးဗျာ။ အဲဒီတော့ ကျပ်ငွေကိုင်ထားမယ့်အတူတူ အိမ်မှာပဲငွေကို အထုပ်လိုက်၊ အထည်လိုက် ထားမယ်ဆိုရင်လည်း စိတ်မချရဘူး။ အန္တရာယ်များတယ်။ အဲဒီတော့ လူတွေက ရွှေကိုပဲ ဝယ်ကြတယ်။ အဓိက အဲဒီအချက်ကြောင့်ပါပဲ။ ပြောရမယ်ဆိုရင် ကျပ်ငွေအပေါ် မယုံကြည်မှုရယ်၊ ကျပ်ငွေထားရာ ဘဏ်တွေရဲ့ စိတ်မချရမှုရယ်၊ ဒါကြောင့် ရွှေတွေပဲ ဝယ်ဖြစ်တာပေါ့။”

လေးရက်အတွင်း ကျပ်ငွေ ၂၀၀,၀၀၀ ကျော်တက်ခဲ့တဲ့ မြန်မာ့ရွှေစျေးအပေါ်မှာ စိုးရိမ်နေကြတဲ့သူတွေလည်း ရှိပါတယ်။ ဒါပေမဲ့ လတ်တလော အခြေအနေတွေကြောင့် ရွှေစျေးပြိုကျသွားတဲ့ အခြေအနေ ရောက်လာဖို့တော့ မဖြစ်နိုင်သေးကြောင်း ရွှေလုပ်ငန်းရှင် အသိုင်းအဝန်းက ခန့်မှန်းပါတယ်။

ကိုခင်မောင်စိုးမင်း/ VOA Burmese

https://burmese.voanews.com/a/myanmar-military-coup-and-myanmar-gold-market-economy/5887755.html