မြန်မာနိုင်ငံအခြေအနေ လုံခြုံရေးကောင်စီကြားနာမှု တိုက်ရိုက်ထုတ်လွှင့်မည်

မှတ်တမ်းဓါတ်ပုံ- ၂၀၁၈ မေလတုန်းက ပြုလုပ်တဲ့ မြန်မာ့အရေး လုံခြုံရေးကောင်စီကြားနာပွဲ

မြန်မာနိုင်ငံမှာ ဒီမိုကရေစီနည်းကျ ရွေးကောက်တင်မြောက်ခံထားရတဲ့ လွှတ်တော်အမတ်တွေနဲ့ တိုင်းရင်းသားအဖွဲ့အစည်းတွေရဲ့ အမြင်ကို သိရဖို့ ဗြိတိန်နိုင်ငံက ကြီးမှုးတဲ့ ကုလသမဂ္ဂလုံခြုံရေး ကောင်စီရဲ့ သီးသန့်ဆွေးနွေးပွဲကို ဧပြီလ ၉ ရက် သောကြာနေ့မှာ ကျင်းပမှာ ဖြစ်ကြောင်း ဗြိတိန်နိုင်ငံဆိုင်ရာ ကုလသမဂ္ဂရုံးက ကြာသပတေးနေ့မှာ သတင်းထုတ်ပြန်ပါတယ်။

ဒီဆွေးနွေးပွဲကို Estonia ၊ ပြင်သစ်၊ အိုင်ယာလန်၊ နော်ဝေနဲ့ အမေရိကန်နိုင်ငံတွေက ကုလသမဂ္ဂကိုယ်စားလှယ်တွေ တက်ရောက်မှာ ဖြစ်ပြီး ပါဝင်ဆွေးနွေးမယ့် သူတွေကတော့ အရပ်ဖက် လူမှုအဖွဲ့အစည်းခေါင်းဆောင် တဦးဖြစ်တဲ့ စိုင်းစံခမ်း၊ ပြည်ထောင်စုလွှတ်တော် ကိုယ်စားပြုကော်မတီ CRPH က ဒေါ်ဇင်မာအောင်၊ ICG နိုင်ငံတကာ ပဋိပက္ခလေ့လာရေးအဖွဲ့က Richard Horsey နဲ့ ကုလသမဂ္ဂ မြန်မာနိုင်ငံအမြဲတမ်းကိုယ်စားလှယ် ဦးကျော်မိုးထွန်း တို့ဖြစ်ပါတယ်။

မြန်မာနိုင်ငံတွင်း အကြမ်းဖက်မှုတွေ တိုးလာနေတာနဲ့ အတူ အခြေနေတွေ ဆိုးဝါးလာနေပြီး ဒေသတွင်း တည်ငြိမ်မှုကိုရော နိုင်ငံတရာငြိမ်းချမ်းရေးနဲ့ လုံခြုံရေးအတွက်ပါ အန္တရာယ်ကြီးထွား လာနေချိန်မှာ အခုလို ဆွေးနွေးပွဲ ကျင်းပဖို့ လုပ်လာတာ ဖြစ်ပါတယ်။

ကုလဆိုင်ရာ မြန်မာသံအမတ်ကြီး ဦးကျော်မိုးထွန်း တက်ရောက်မယ့် ဒီဆွေးနွေးပွဲမှာ မြန်မာနိုင်ငံတွင်းက တိုင်းရင်းသားတွေနဲ့ ပဋိပက္ခဖြစ်ပွားမှုတွေ အပေါ်မှာ ဖေဖေါ်ဝါရီလ တရက် စစ်တပ်က အာဏာသိမ်းခဲ့တဲ့နောက် ရိုက်ခတ်မှုတွေကို စိုင်းစံခမ်းက ဆွေးနွေးတင်ပြမှာ ဖြစ်သလို ဖက်ဒရယ် ဒီမိုကရေစီ ပဋိဉာဉ် ထုတ်ပြန်ခဲ့တဲ့ CRPH ရဲ့ ရှေ့ဆက် လုပ်ဆောင်မှာတွေကို ဒေါ်ဇင်မာအောင်က ဆွေးနွေးမှာဖြစ်ပါတယ်။ ဒါ့အပြင် အာဏာသိမ်းခဲ့တဲ့ မြန်မာစစ်တပ်ရဲ့ လုပ်ဆောင်မှုတွေကနေ ဒေသတွင်းမှာသာမက နိုင်ငံတကာ ငြိမ်းချမ်းရေးနဲ့ လုံခြုံရေးကို ထိပါးစေမယ့် အန္တရာယ်တွေနဲ့ ပတ်သက်ပြီး ICG က ဆွေးနွေးဖို့ ရှိပါတယ်။

သောကြာနေ့ မြန်မာစံတော်ချိန် ည ၈နာရီခွဲ၊ နယူးရောက်စံတော်ချိန် မနက် ၁၀ နာရီမှာ ကုလမဂ္ဂရုံးကနေ တိုက်ရိုက်ထုတ်လွှင့်ပေးဖို့ရှိတဲ့ ဒီဆွေးနွေးပွဲအပြီးမှာတော့ ဗြိတိန် သံအမတ်ကြီး Barbara Woodward က သတင်းစာရှင်းလင်းပွဲ ပြုလုပ်ဖို့ရှိပါတယ်။

ဗွီအိုအေ (မြန်မာပိုင်း)

https://burmese.voanews.com/a/uk-arrange-for-security-council-to-hear-direct-what-is-happening-in-myanmar-/5846174.html