အာဆီယံဝန်ကြီးများ မြန်မာ့အရေး အထူးစည်းဝေးပွဲ ကျင်းပမည်

မှတ်တမ်းဓါတ်ပုံ- ၂၀၂၀ နိုဝင်ဘာတုန်းက အာဆီယံအစည်းအဝေးအတွင်း စင်္ကာပူနိုင်ငံခြားရေးဝန်ကြီး Vivian Balakrishnan ပြောကြားစဉ်

မြန်မာနိုင်ငံမှာ စစ်တပ်ကအာဏာသိမ်းပြီး ဖမ်းဆီးထားတဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို ချက်ချင်းပြန်လွှတ်ပေးရေးတောင်းဆိုမှု အပါအဝင် မြန်မာ့အရေး ဆွေးနွေးဖို့ ဒီကနေ့ အင်္ဂါနေ့မှာ အာဆီယံ နိုင်ငံခြားရေးဝန်ကြီးတွေ အထူးအစည်းဝေးတရပ် ကျင်းပဖို့ရှိကြောင်း စင်္ကာပူနိုင်ငံခြားရေးဝန်ကြီးက တနင်္လာနေ့မှာ ပြောပါတယ်။

အာဆီယံနိုင်ငံခြားရေးဝန်ကြီးတွေရဲ့ အထူးအစည်းဝေးကို အွန်လိုင်းကနေ ကျင်းပမှာ ဖြစ်ပြီး ဒီအစည်းဝေးမှာ မြန်မာစစ်အာဏာပိုင်တွေရဲ့ ကိုယ်စားလှယ် ဘာတွေပြောကြားမယ် ဆိုတာကို နားထောင်ကြမှာ ဖြစ်ကြောင်း စင်္ကာပူနိုင်ငံခြားရေးဝန်ကြီး Vivian Balakrishnan က လွှတ်တော်မှာ ပြောပါတယ်။

မြန်မာစစ်အာဏာပိုင်တွေအနေနဲ့ လူသေစေတဲ့ လက်နက်တွေမသုံးဖို့ တောင်းဆိုလိုက်တဲ့အပြင် နောက်ထပ်သွေးမြေကျတာ၊ အကြမ်းဖက်တာနဲ့ သေဆုံးတာတွေ မဖြစ်အောင် အခြေနေကို ချက်ချင်းထိန်းဖို့လည်း ပြောပါတယ်။

ရဲတွေရဲ့အကြမ်းဖက်နှိမ်နင်းမှုတွေကြောင့် ဆန္ဒပြသူ အနည်းဆုံး ၁၈ ယောက်ထက်မနည်း တနင်္ဂနွေနေ့ကသေဆုံးခဲ့ရပေမယ့် တနင်္လာနေ့မှာလည်း မြန်မာပြည်သူတွေက ဆက်လက် ချီတက် ဆန္ဒပြနေကြတာဖြစ်ပါတယ်။

မြန်မာနိုင်ငံ ဒီမိုကရေစီရေးကူးပြောင်းမှု လမ်းကြောင်းပေါ်ပြန်ရောက်လာဖို့အပါအဝင် နိုင်ငံတွင်း နိုင်ငံရေးပြဿနာအတွက် ရေရှည်အဖြေရှာဖို့ အဖွဲ့အားလုံး တွေ့ဆုံဆွေးနွေးကြဖို့လည်း ဝန်ကြီး Vivian က တိုက်တွန်းခဲ့ပါတယ်။ ဒါဟာ သမ္မတဦးဝင်းမြင့်၊ နိုင်ငံတော်အတိုင်ပင်ခံ နိုင်ငံခြားရေးဝန်ကြီး ဒေါ်အောင်ဆန်းစုကြည် နဲ့ ဖမ်းဆီးထားတဲ့နိုင်ငံရေးအကျဉ်းသားတွေကို အမြန်လွှတ်ပေးမှသာ စတင်နိုင်မယ်လို့ ယုံကြည်ကြောင်းလည်း ပြောပါတယ်။

ပြီးခဲ့တဲ့သီတင်းပတ်တုန်းကတော့ အင်ဒိုနီးရှားနိုင်ငံခြားရေးဝန်ကြီး Retno Marsudi ဟာ ထိုင်းနိုင်ငံခြားရေးဝန်ကြီး Don Pramudwinai နဲ့အတူ မြန်မာစစ်တပ်ရဲ့ စီမံခန့်ခွဲရေးကောင်စီက နိုင်ငံခြားရေးဝန်ကြီးအဖြစ် ခန့်အပ်ထားတဲ့ ဦးဝဏ္ဏမောင်လွင်နဲ့ ဘန်ကောက်မှာတွေ့ဆုံခဲ့တာပါ။ 

ဗွီအိုအေ (မြန်မာပိုင်း)

https://burmese.voanews.com/a/asean-ministers-summit-will-talk-about-myanmar-issue-/5797489.html