သမ္မတ Biden ရဲ့ ကိုဗစ်ကာလ ထောက်ပံ့ရေးအစီအစဉ်

My American Dream အစီအစဉ်ကို တင်ဆက်နေတဲ့ Financial Professional ငွေကြေးစျေးကွက်ဆိုင်ရာ ကျွမ်းကျင်သူ မဝင်းမြတ်သူ နှင့် VOA မေးမြန်း

American Rescue Plan လို့ခေါ်တဲ့ သမ္မတ ဂျိုးဘိုင်ဒန်ရဲ့ ဒေါ်လာ ၁.၉ထရီလီယံ တန်ဖိုးရှိတဲ့ ကိုဗစ်-၁၉ထောက်ပံ့ရေး အစီအစဉ်သစ် ဟာ အရင်သမ္မတ ဒေါ်နယ်လ်ထရမ့်လက်ထက်က ထောက်ပံ့မှုမျိုးနဲ့ ဘာတွေကွာခြားသလဲ။ မြန်မာအပါအဝင် အမေရိကန်ရောက် နိုင်ငံခြားသားတွေအတွက် ဒီအစီအစဉ်ကနေ ဘာတွေ ပိုပြီး ထောက်ပံ့ပေးမှာလဲ။

လွှတ်တော်ရဲ့ အတည်ပြုချက်ရဖို့ စောင့်ဆိုင်းနေတဲ့ သမ္မတ ဂျိုးဘိုင်ဒန်ရဲ့ကိုဗစ်ထောက်ပံ့ရေးနဲ့ ပတ်သက်လို့ My American Dream အစီအစဉ်ကို တင်ဆက်နေတဲ့ Financial Professional ငွေကြေးစျေးကွက်ဆိုင်ရာ ကျွမ်းကျင်သူ မဝင်းမြတ်သူကို မအင်ကြင်းနိုင်က Skype ကနေ ဆက်သွယ်မေးမြန်းထားပါတယ်။

အင်ကြင်းနိုင်။။ သမ္မတသစ် ဂျိုးဘိုင်ဒန်ရဲ့ ကိုဗစ်-၁၉ထောက်ပံ့ရေးအစီအစဉ်က အရင်သမ္မတ ဒေါ်နယ်လ်ထရမ့်လက်ထက်က ထောက်ပံ့တဲ့ ပုံစံမျိုးနဲ့ ဘာတွေကွာခြားမှုရှိလဲရှင့်။

မဝင်းမြတ်သူ။ ။ ဟုတ်ကဲ့ အဓိကအားဖြင့်တော့ ဒီ သမ္မတသစ် Joe Biden ရဲ့ rescue plan ထဲမှာတော့ ပိုပြီးတော့ ပြည်သူတွေအပေါ်မှာ ရက်ရက်ရောရော ပေးထားတာကို တွေ့ရတယ်။ သူက COVID တခုတည်းတင်မဟုတ်ပဲနဲ့ တနိုင်ငံလုံးအတွက် Minimum wage တွေကို တိုးပေးထားတာမျိုးတွေ ၊ နောက်တခု က တခြား ပြည်နယ်အစိုးရတွေ အထောက်အပံ့ပေးမယ့် အစီအစဉ် တွေလည်း သူ့အထဲမှာ ပါဝင်တယ် ။ နောက်ပြီးတော့ သူ့ အစီအစဉ်(Program) ထဲမှာက ဗဟိုအစိုးရ (federal) ရဲ့ အနိမ့်ဆုံးလစာ (Minimum wage) သတ်မှတ်ချက် ကိုတိုးပေးမှာမျိုးတွေ၊ နောက်ပြီးတော့ ပြည်နယ်အစိုးရ တွေဆီကိုလည်း အထောက်အပံ့လုပ်မယ့် အစီအစဉ်တွေလည်း ပါဝင်တယ်။ နောက်ထပ် COVID ကာကွယ်ဆေး ကို ပြည်နယ်နဲ့တိုင်း နေရာအနှံ့အပြားကို အမြန်ဆုံးရောက်အောင် ပို့ပေးမယ်ဆိုတဲ့ အစီအစဉ်တွေလည်း ပါဝင်တဲ့အတွက် ခြုံပြီးပြောရမယ်ဆိုရင် ဒီ Program က ပိုပြီးလည်း ရက်ရောတယ်၊ ပိုပြီးတော့လည်း အများအတွက် အကျိုးရှိမယ်လို့ ထင်ပါတယ်။

အင်ကြင်းနိုင်။။ အဲတော့ သမ္မတ ဂျိုးဘိုင်ဒန်ရဲ့ American Rescue အစီအစဉ်က မြန်မာတွေအပါအဝင် အမေရိကန်ပြည်ထောင်စုမှာ အခြေချနေထိုင်တဲ့ နိုင်ငံခြားသားတွေအတွက်ရော ဘယ်လိုပိုပြီး ထောက်ပံ့တဲ့ အစီအစဉ်တွေ ပါသလဲရှင့်။

မဝင်းမြတ်သူ။ ။ ဟုတ်ကဲ့။ မြန်မာအပါအဝင် ဒီနိုင်ငံကို ရောက်ရှိနေတဲ့ ဒီမှာ တရားဝင်နေထိုင်တဲ့သူတွေ အားလုံးအတွက် အကျုံးဝင်တာကတော့ နောက်ထပ် ဒေါ်လာ ၁,၄၀၀ stimulus check ရမှာဖြစ်တယ်။ ဒီ ဒေါ်လာ ၁,၄၀၀ က (stand alone cash) ငွေသား အနေနဲ့ ထုတ်ယူဖို့ ပေးပို့မှာဖြစ်ပြီးတော့ ပြီးခဲ့တဲ့ အရင်သမ္မတဟောင်း Trump လက်ထက်တုန်းက ပေးခဲ့တဲ့ ဒေါ်လာ ၆၀၀ နဲ့ဆိုရင် စုစုပေါင်း ၂၀၀၀ ရမှာဖြစ်တယ်။ ဒါပေမယ့် အဲဒီ ဒေါ်လာ ၆၀၀ ပေးတုန်းကဆိုရင် Dependent တွေအနေနဲ့ မရရှိခဲ့ဘူး။ Dependent ဆိုတာ အသက် ၁၇ နှစ်အထက် ၊ ပြီးတော့ Parents Dependent တွေပေါ့နော်။ သူတို့တွေက မရဘူး။ ကလေးဆိုရင်လည်း အသက် ၁၆ နှစ် နဲ့ ၁၇ နှစ်အောက် Dependent တွေပဲ ဒီ ဒေါ်လာ ၆၀၀ ကို ရခဲ့တယ်။ အခု နောက်ထပ်ပေးမယ့် ၁၄၀၀ အစီအစဉ်မှာတော့ မည်သူမဆို ဒီနိုင်ငံမှာ တရားဝင်နေတဲ့သူတွေအကုန်လုံး ရနိုင်ပါတယ်။ အဲဒီ တချို့က ဒီ ၁၄၀၀ ကိုရပြီးတော့ ဒီ ဒေါ်လာ ၆၀၀ ကို ပြန်ရမလားဆိုပြီးတော့ မေးတယ်။ အဲလိုတော့ ပြန်ပြီးတော့ ရမှာ မဟုတ်ပါဘူး။

အင်ကြင်းနိုင်။။ ဒီတော့ ဒေါ်လာ ၁၄၀၀ တန် ချက်လက်မှတ်ကို ဘယ်တော့လောက်ရမယ်လို့ မျှော်လင့်ရသလဲရှင်။

မဝင်းမြတ်သူ။ ။ ဒီနေ့အထိပေါ့နော် ကျမကြားရသလောက်ကတော့ Pass မဖြစ်သေးဘူး။ ဒါပေမယ့် ရဖို့ chance ကတော့ အရမ်းများပါတယ်။ ဘာဖြစ်လို့လဲဆိုတော့ President Biden က President ဖြစ်ဖြစ်ချင်းကို ဒါနဲ့ ပတ်သက်ပြီးတော့ approve လုပ်မယ်ဆိုပြီးတော့ executive order နဲ့တောင်လုပ်မယ်ဆိုပြီးတော့ ကတိပေးထားတာမျိုးတွေရှိတယ်။ အဲဒါကြောင့်မို့လို့ ဒီတပတ်ထဲမှာ ဒေါ်လာ ၁၄၀၀ stimulus check နဲ့ ပတ်သက်ပြီး ကျမတို့ သိရမှာ ဖြစ်ပါတယ်။ ရဖို့ အလားအလာ အရမ်းများပါတယ်။ ဒါပေမယ့် ခုနက ကျမပြောသလိုပါပဲ ဘာမှ တော့ အတိအကျ မသိရသေးဘူး။

ဗွီအိုအေ (မြန်မာပိုင်း)

https://burmese.voanews.com/a/us-biden-american-rescue-plan-/5751849.html