မြန်မာနိုင်ငံမှာ ပထမဆုံးအကြိမ် ကိုဗစ်ရောဂါ ကာကွယ်ဆေးထိုးမယ့် အစီအစဉ်အဖြစ် နိုင်ငံအနှံ့က ကျန်းမာရေးဝန်ထမ်း ၁၀၀,၀၀၀ ကျော်ကို မနက်ဖြန်ကစ ထိုးနှံပေးဖို့ ပြင်ဆင်နေတဲ့အကြောင်း တင်ပြပါမယ်။ ဗွီအိုအေမြန်မာပိုင်း သတင်းထောက် မစုစုက သတင်းပေးပို့ထားပါတယ်။
ကိုဗစ်ရောဂါ ကာကွယ်ဆေးထိုးမယ့် အစီအစဉ်မှာ ရောဂါတိုက်ဖျက်ရေး ရှေ့တန်းက တာဝန်ယူနေကြတဲ့ နိုင်ငံတဝန်းက ကျန်းမာရေးဝန်ထမ်း ၁၁၀,၀၀၀ ကျော်ကို အရင်ဆုံး စတင်ထိုးနှံပေးဖို့ စီစဉ်နေတာဖြစ်ပါတယ်။ ကာကွယ်ဆေး ဦးစားပေး ထိုးနှံပေးမယ့် အထဲမှာတော့ ကျန်းမာရေးဝန်ထမ်းတွေ၊ စေတနာ့ဝန်ထမ်းတွေ၊ ဗဟိုနဲ့တိုင်းဒေသကြီး၊ ပြည်နယ်အစိုးရအဖွဲ့ဝင်တွေ၊ လွှတ်တော်ကိုယ်စားလှယ်တွေ အဆင့်ဆင့် ပါဝင်မှာဖြစ်တယ်လို့လည်း ကျန်းမာရေးဝန်ကြီးဌာန တာဝန်ရှိသူတွေက ပြောပါတယ်။
နောက်ပိုင်းမှာလည်း အများပြည်သူကြား လိုအပ်သူတွေကို ကာကွယ်ဆေး ထိုးနှံရာမှာ ပူးပေါင်းဆောင်ရွက်ကြဖို့ ကျန်းမာရေးနဲ့ အားကစားဝန်ကြီးဌာန ပြောခွင့်ရ၊ ဗဟိုကူးစက်ရောဂါ တိုက်ဖျက်ရေးဌာနခွဲ ညွှန်ကြားရေးမှူး ဒေါက်တာခင်ခင်ကြီးက တိုက်တွန်းထားပါတယ်။
"ကာကွယ်ဆေးထိုးခြင်းသည် လက်ရှိအခြေအနေမှာဆိုရင် COVID- 19 ကပ်ရောဂါကို ရပ်တန့်ဖို့အတွက် လက်နက်တခုလည်းဖြစ်ပါတယ်။ ကာကွယ်ဆေးနဲ့ ကာကွယ်ခြင်းသည် မိမိအတွက်အကောင်းဆုံး အခွင့်အလမ်း တခုကို ရရှိတယ်လို့ သဘောထားပြီးတော့ ကာကွယ်ဆေးကို ထိုးနှံဖို့အတွက် အထူးတိုက်တွန်းလိုပါတယ်။ ကာကွယ်ဆေးထိုးနှံတဲ့အခါမှာလည်း အန္တရာယ်မရှိစေဖို့အတွက် ကာကွယ်ဆေးထိုးနေစဉ် တလျှောက်မှာလည်း ကျမတို့ရောဂါရာဇဝင်မေးမြန်းတာ၊ ကာကွယ်ဆေးထိုးနေတုန်းလည်း Emergency Box တွေထားရှိပြီးတော့ ဆောင်ရွက်မှာဖြစ်ပါတယ်။ ဒါ့အပြင် လိုအပ်လို့ ဆေးရုံတက်ရောက်ဖို့ ကုသဖို့လိုတယ်ဆိုရင်လည်း နဂိုကတည်းက ဆေးရုံတွေနဲ့တခါတည်း ကွန်ယက်ကချိတ်ဆက်ထားပြီးတော့ Ambulance အပါအဝင်၊ ဆရာဝန်၊ သူနာပြု၊ အကူ၊ အရေးပေါ် ကားယာဉ်မောင်းကအစ Ready & Stand by ထားရှိပြီးတော့ ကာကွယ်ဆေးထိုးပေးမှာဖြစ်ပါတယ်။ ဒါကြောင့်မို့ စိတ်ချလက်ချ ကာကွယ်ဆေးကို လာရောက်ထိုးနှံကြဖို့ ဖိတ်ခေါ်ပါတယ်။"
ဗြိတိန်အောက်စ်ဖို့ တက္ကသိုလ်နဲ့ ဗြိတိန်-ဆွီဒင် နိုင်ငံတကာ ကုမ္ပဏီကြီးဖြစ်တဲ့ AstraZeneca တို့ ပူးတွဲသုတေသနလုပ်ပြီး အိန္ဒိယနိုင်ငံ Serum Institue က မူပိုင်ခွင့်ယူပြီး Covishield နာမည်နဲ့ ထုတ်တဲ့ ကာကွယ်ဆေးကို အသုံးပြု ထိုးနှံပေးမှာ ဖြစ်ပါတယ်။ ကိုဗစ်ရောဂါ ကာကွယ်နိုင်စွမ်း ၉၀ ရာခိုင်နှုန်းအထိရှိတယ်လို့ ပြောဆိုထားတဲ့ ဆေးကိုတော့ ရောဂါကူးစက်ခံနေရသူ ဒါမှမဟုတ် ရောဂါသက်သာ ပျောက်ကင်းချိန် ၁၄ ရက်မကျော်သေးသူ အပါအဝင် ရောဂါသံသယရှိသူတွေနဲ့ နို့တိုက်နေဆဲ ကလေးမိခင်တွေ၊ ကိုယ်ဝန်ဆောင်ထားသူတွေနဲ့ အသက် ၁၈ နှစ်အောက်ရှိသူတွေက လွဲလို့ ကျန်တဲ့လူတွေ ထိုးနှံနိုင်မှာ ဖြစ်တယ်လို့လည်း ကျန်းမာရေး ပညာရှင်တွေက ပြောပါတယ်။
ကာကွယ်ဆေးထိုးပြီးချိန်မှာ လူအနည်းစုဖြစ်လေ့ရှိတဲ့ နောက်ဆက်တွဲ လက္ခဏာတွေ ရှိနိုင်ပေမဲ့ ကာကွယ်ဆေး ထိုးခွင့်ရတဲ့ အချိန်မှာ ထိုးဖြစ်အောင် ထိုးကြဖို့လည်း ကျန်းမာရေးဝန်ကြီးဌာနပြောခွင့်ရ ဒေါက်တာခင်ခင်ကြီးက တိုက်တွန်းထားပါတယ်။
"တိုးတက်ပြီးနိုင်ငံတွေ၊ ဖွံ့ဖြိုးပြီးနိုင်ငံတွေမှာတောင်မှ Anti-Vaccine Lobby ဆိုပြီးတော့လေ ကာကွယ်ဆေးကို ဆန့်ကျင်မယ့် အဖွဲ့တွေရှိပါတယ်။ ဒါတွေကတော့ ကာကွယ်ဆေးထိုးစရာမလိုဘူး၊ ခန္ဓာကိုယ်ရဲ့ ကိုယ်ခံအားသည်သာ အကောင်းဆုံး၊ ငါတို့ရဲ့ ကိုယ်ခံအားသည် ငါတို့ရောဂါတွေကို တိုက်ထုတ်ပေးနိုင်ဖို့အစွမ်း ရှိတယ်။ စသဖြင့် တဘက်စွန်းရောက်တဲ့သူတွေလည်း ရှိပါတယ်။ တချို့လူတွေကျတော့ ဒီကာကွယ်ဆေးအပေါ်မှာ ဒါဟာ ခန္ဓာကိုယ်ရဲ့မျိုးရိုးဗီဇတွေကို ပြောင်းလဲပြီးတော့ Gay အဖြစ်နဲ့ပြောင်းသွားနိုင်တယ် စသဖြင့်ပေါ့နော်။ တချို့တွေကျတော့လည်း Micro Chip တွေထည့်သွင်းထားတာမို့လို့ ဒါဟာမထိုးသင့်ဘူး၊ ကိုယ်ရောက်တဲ့နေရာကို ထောက်လှမ်းနေမယ် စသဖြင့်ပေါ့နော်။ တချို့အစွန်းရောက်အုပ်စုတွေကနေပြီးတော့ မမှန်သတင်းတွေကို ပြောတာမျိုးတွေ ရှိပါတယ်။ အဲတော့ အခုလက်ရှိအနေအထားအရဆိုရင် ကာကွယ်ဆေးထိုးဖို့ဆိုပြီးတော့ တရားဝင်ခွင့်ပြုပေးလိုက်တယ်ဆိုရဲ့ နောက်ကွယ်မှာ ကာကွယ်ဆေးရဲ့စိတ်ချရမှု၊ ဘေးကင်းလုံခြုံမှု၊ အာနိသင်ထက်မြက်မှု၊ ကာကွယ်နိုင်စွမ်းရှိမှု၊ ဒါတွေကလည်း စိတ်ချရတဲ့အနေအထား ရှိလို့သာ ပေးခြင်းဖြစ်ပါတယ်။ အဲဒီတော့ ကာကွယ်ဆေးဟာ သူ့ကိုထိုးမယ်ဆိုရင် ကာကွယ်ဆေးတွေရဲ့အာနိသင်တွေဟာ အများကြီးရှိပါတယ်။"
အိန္ဒိယနိုင်ငံအစိုးရက နှစ်နိုင်ငံအစိုးရကြား ဆက်ဆံရေးအတွက် လက်ဆောင်အဖြစ်ပေးထားတဲ့ Covishield အလုံးရေ ၁,၅၀၀,၀၀၀ ကို မနက်ဖြန်မှာ စပြီးအသုံးပြုမှာပါ။ ကာကွယ်ဆေးထိုးနှံပြီးနောက်ပိုင်းမှာလည်း ရောဂါကာကွယ်ရေး နည်းလမ်းတွေဖြစ်တဲ့နှာခေါင်းစည်းတပ်တာ၊ လက်ဆေးတာနဲ့ လူစုလူဝေးရှောင်ကြဉ်တာတွေကို ဆက်ပြီးဆောင်ရွက်သွားကြဖို့လိုတယ်လို့ ကျန်းမာရေးပညာရှင်တွေက တိုက်တွန်းထားပါတယ်။
ကျန်းမာရေးနဲ့ အားကစားဝန်ကြီးဌာနရဲ့ ဇန်နဝါရီလ ၂၅ ရက်နေ့အထိ ထုတ်ပြန်ထားတဲ့စာရင်းအရ ပြည်တွင်းမှာ ကပ်ရောဂါကြောင့် သေဆုံးသူ ၃,၀၀၀ ကျော်နဲ့ ရောဂါကူးစက်ခံရသူပေါင်း ၁၃၇,၀၀၀ ကျော်ရှိပါတယ်။
စုစု/ VOA Burmese
https://burmese.voanews.com/a/myanmar-covid-vaccine/5752123.html
Reviewed by THITHTOOLWIN
on
21:31
Rating:
No comments:
Post a Comment