TNLA တအန်း (ပလောင်) အဖွဲ့ |
အစိုးရရဲ့ ငြိမ်းချမ်းရေး ကိုယ်စားလှယ်အဖွဲ့နဲ့ KIO ကချင်၊ TNLA တအန်း(ပလောင်)၊ MNDAA ကိုးကန့်နဲ့ AA ရခိုင်အဖွဲ့တွေ ပါဝင်တဲ့ မြောက်ပိုင်းမဟာမိတ်အဖွဲ့ဟာ လာမယ့် ၁၆ ရက်နဲ့ ၁၇ ရက်နေ့တွေမှာ ကျိုင်းတုံမြို့မှာ တွေ့ဆုံဆွေးနွေးဖို့ ပြင်ဆင်နေကြတာ ဖြစ်ပါတယ်။
ဒီလိုပြင်ဆင်နေချိန်မှာပဲ ဒီနေ့ နမ့်ဆန်မြို့အနီးမှာ တပ်မတော်နဲ့ TNLA တို့ တိုက်ပွဲတွေ ဖြစ်ပွားနေကြောင်း ပလောင်ကိုယ်ပိုင် အုပ်ချုပ်ခွင့်ရဒေသ ဦးစီးအဖွဲ့ရဲ့ အလုပ်အမှုဆောင် ဦးမိုင်းသိန်းဇော်က ပြောပါတယ်။
“နမ့်ဆန်မြို့နယ် ကယားလမ်းအုပ်စု ဟိုချောင်းကျေးရွာ တောင်ရိုးဘုရားအောက်မှာ ဖြစ်တာ။ မနက် ၇ နာရီကနေ ၈ နာရီမတ်တင်းလောက်ပဲ ဖြစ်တာ။ တောင်ရိုးဘုရားမှာ TNLA အဖွဲ့တွေက သွားလိုက်လာလိုက်ဆိုရင် ဘာလုပ်သလဲဆိုရင် တောင်ရိုးဘုရားက ပင်လယ်ရေ မျက်နှာပြင်ကဆိုရင် ၆၀၀၀ ကျော် ၇၀၀၀ နားကပ်နေတာ။ အဲဒီကုန်းပေါ်ရောက်ပြီဆိုရင် မြို့နယ် တစ်ခုလုံးကို ရှုခင်းတွေ မြင်ရတဲ့အခါကျတော့ သူတို့က အဲဒီမှာ ခနတဖြုတ်တော့ ၀င်နားတဲ့ အနေအထား ရှိတယ်။ ဒါပေမဲ့ တပ်ကလည်း တောက်လျောက်မြို့ပြင်မှာ ထွက်နေတဲ့အခါကျတော့ နှစ်ဘက်ကို သွားထိတွေ့သလို ဖြစ်သွားတာ။”
TNLA တအန်း (ပလောင်) အဖွဲ့က ပြောရေးဆိုခွင့်ရှိသူ ဗိုလ်မှူးတားအိုက်ကျော်က တိုက်ပွဲတွေ ကြိုးကြားကြိုးကြားဆက်ဖြစ်နေပြီး ရဟတ်ယာဉ်နဲ့ပါ တိုက်ခိုက်တာတွေရှိကြောင်း ပြောပါတယ်။
“ဒီမနက် ၇ နာရီလောက်ကနေ စပြီမှ နမ့်ဆန်မြို့အနောက်ဘက် တောင်ရိုးဘုရားကုန်းပေါ်မှာ အဲဒီဘက်မှာ တပ်မ ၁၀၁၊ ခလရ ၂၅၅က ကျနော်တို့ တပ်ရင်း ၉၁၉ ရှိတဲ့နေရာကို လာရောက် ပစ်ခတ်တိုက်ခိုက်တော့ တိုက်ပွဲ စတင်ဖြစ်ပွားတာ။ တိုက်ပွဲကတော့ ကြိုးကြား ကြိုးကြားဖြစ်နေတဲ့အချိန် နမ့်ဆန်တပ်စခန်းရယ်၊ နောက်တစ်ခါ နမ့်မဝေါရပ်ကွက်က တရုတ်တန်းနားကနေ နေပြီးမှ အခုထိပေါ့ အကြိမ် ၅၀ လောက် အဆက်မပြတ် တောက်လျောက်ပစ်ခတ်နေတယ်။ အခုပေ့ါနော် အခု ၂ နာရီ ၂၀ လောက်မှာ ရဟတ်ယာဉ် နှစ် စီးနဲ့ လာရောက်ပစ်ခတ်နေတာတော့ သိရတယ်။ ”
နမ့်ဆန်မြို့နယ်က သံဃာတော် တပါးကလည်း အခုလို မိန့်ကြားပါတယ်။
“ဒီ မန့်တုံမြို့နယ်နဲ့ နမ့်ဆန်မြို့နယ်ကို ဦးတည်ပြီးတော့ ရဟတ်ယာဉ် နှစ် စီး၊ သုံး စီးလာတယ်။ အမြှောက်သံကတော့ ပစ်နေတာပဲ။ မနက်ကတည်းက အခုထက်ထိ ပစ်နေတယ်နော်။ မြို့ကနေ လှမ်းပစ်တာပေါ့။ ဟိုးတောင်ကုန်းပေါ်မှာ ပစ်တယ်။ ခု ရဟတ်ယာဉ် နှစ် စီးပြန်သွားပြီ။ လားရှိုးဘက် လှည့်သွားပြီ။ ဗုံးသွားချတယ်တဲ့။ ဟိုလှတို့၊ လီရှောရွာတို့ ဗုံးသွားချတယ်တဲ့။ တောင်ရိုးဘုရား ဟိုဘက်နည်းနည်း ကျော်သွားတယ်လေ။”
ဒီနေ့ တိုက်ပွဲဖြစ်ပွားမှုနဲ့ ပတ်သက်လို့ မေးမြန်းနိုင်ဖို့ တပ်မတော်ဘက်ကို ဆက်သွယ်ခဲ့ပေမဲ့ ဆက်သွယ်လို့ မရခဲ့ပါဘူး။
ဒီနေ့ညနေ ၄ နာရီခွဲအချိန်အထိတော့ တိုက်ပွဲအတွင်း အရပ်သားတွေ ထိခိုက်တဲ့သတင်းနဲ့ ထွက်ပြေး တိမ်းရှောင်တဲ့ သတင်းတွေမရရှိသေးကြောင်း ပလောင် ကိုယ်ပိုင်အုပ်ချုပ်ခွင့်ရဒေသ ဦးစီးအဖွဲ့က ပြောပါတယ်။
လက်ရှိ တိုက်ပွဲဖြစ်ပွားနေချိန်ဟာ တပ်မတော်က ကချင်ပြည်နယ်နဲ့ ရှမ်းပြည်နယ်အတွင်းက စစ်တိုင်းဒေသကြီး ငါး ခုမှာ စစ်ရေးလှုပ်ရှားတာတွေ ရပ်ဆိုင်းကြောင်း ကြေညာထားချိန်ဖြစ်ပြီး TNLA အပါအ၀င် မြောက်ပိုင်း အဖွဲ့တွေဘက်ကလည်း တလ အပစ်အခတ်ရပ်စဲကြောင်း ကြေညာထားချိန် ဖြစ်ပါတယ်။
မိုးဇော်/ ဗွီအိုအေ (မြန်မာပိုင်း)
https://burmese.voanews.com
ရှမ်းပြည်မြောက်ပိုင်း ပလောင်ဒေသ တိုက်ပွဲပြင်းထန်
Reviewed by THITHTOOLWIN
on
08:47
Rating: