ရခိုင်မှာ ရွာသား ၂၅ ဦးကို စစ်တပ်က ဖမ်း

ရခိုင်ပြည်နယ် ဘူးသီးတောင်သင်္ဘောဆိပ်တွင် မြန်မာစစ်သားများရောက်ရှိပုံ (သြဂုတ်၊ ၂၉၊ ၂၀၁၇)
ရခိုင်ပြည်နယ် ကျောက်တော်မြို့နယ်မှာ ရခိုင်လက်နက်ကိုင် AA အဖွဲ့နဲ့ တိုက်ပွဲဖြစ်ပွားအပြီး မသင်္ကာဘွယ်လူ ၂၅ ဦးကို ဖမ်းဆီးထားပြီး ကျောက်တော်ရဲစခန်းမှာ စစ်ဆေးဖို့အပ်နှံထားကြောင်း မြန်မာစစ်တပ်က ပြောပါတယ်။ ဒေသခံတွေကတော့ အဖမ်းဆီးခံရသူတွေဟာ မြောက်ဦးမြို့နယ်ကျေးရွာတွေက မြိုတိုင်းရင်းသားတွေ ဖြစ်တယ်လို့လည်း ပြောနေတာပါ။ ဒီအခြေအနေကို ဗွီအိုအေမြန်မာပိုင်း သတင်းထောက် နိုင်ကွန်းအိန်က သတင်းပေးပို့ထားပါတယ်။

ရခိုင်ပြည်နယ် ကျောက်တော်မြို့နယ် ကျောက်ဆည်ပြင်ကျေးရွာဘက်မှာ မြန်မာစစ်တပ်နဲ့ ရခိုင်လက်နက်ကိုင် AA အဖွဲ့ တို့ တိုက်ပွဲဖြစ်ပွားအပြီး မသင်္ကာဘွယ်လူ ၂၅ ဦးကို ဖမ်းဆီးထားကြောင်း တပ်မတော် သတင်းမှန်ပြန်ကြားရေး အတွင်းရေးမှူး ဗိုလ်မှူးချုပ်ဇော်မင်းထွန်းက ပြောပါတယ်။

“ကျောက်တော်ရဲ့ အရှေ့ဘက်မှာ ကျောက်ဆည်ပြင်ကျေးရွာ ရှိတယ်။ အဲဒီကျောက်ဆည်ပြင်ကျေးရွာ အရှေ့ဘက်မှာပဲ ကျနော်တို့က ထိတွေ့ တိုက်ပွဲဖြစ်ပွားတာ ရှိတယ်။ မနက်ပိုင်းကနေ နေ့လယ်ပိုင်းလောက် ထိတွေ့တိုက်ပွဲ ဖြစ်ပွားတယ်။ ညနေပိုင်းလောက်မှာတော့ ကျနော်တို့ နယ်မြေလုံခြုံရေး ဆောင်ရွက်တဲ့အခါမှာ ကျောက်ဆည်ပြင်ကျေးရွာအပြင် ဘက်မှာ မသင်္ကာစရာ ၂၅ ယောက်ဖမ်းဆီး ရရှိတယ်။ အသက်အားဖြင့်တော့ ၂ဝ၊ ၃ဝ အရွယ်လောက်တွေပဲ။”

ဇွန်လ ၁၃ ရက်နေ့က ဖမ်းဆီးရမိထားတဲ့သူတွေကို လက်ရှိကျောက်တော်မြို့မ ရဲစခန်းမှာ ထိန်းသိမ်းထားပြီး တရားဥပဒေအတိုင်း ဆက်လက်ဆောင်ရွက်နေတယ်လို့ စစ်တပ်ပြောခွင့်ရသူ ဗိုလ်မှူးချုပ်ဇော်မင်းထွန်း ကပြောပါတယ်။

“သူတို့ကို စစ်ဆေးကြည့်တဲ့အခါမှာတော့ အဲဒီနားလေးတဝိုက်က မဟုတ်ဘူး။ ကျောက်ဆည်ပြင်က လူတွေလည်း မဟုတ်ဘူး။ သူတို့ကို ကျနော်တို့ ဖမ်းဆီးထိန်းသိမ်းပြီး စစ်ဆေးနေတာရှိတယ်။ တရားဥပဒေအတိုင်း ဆက်လက်ဆောင်ရွက်သွားမယ်။ ကျောက်တော်ရဲစခန်းမှာရှိနေတယ်။ လုပ်ထုံးလုပ်နည်းကတော့ အဲဒီဘက်ပဲ သွားရမှာပဲ။ အခုလောလောဆယ်တော့ ကျနော်တို့ ဆောင်ရွက်ဆဲပဲရှိတယ်။”

စစ်တပ်က ဖမ်းဆီးထားတဲ့ သူတွေကို ဇွန်လ ၁၄ ရက်နေ့မှာ ကျောက်တော်မြို့မ ရဲစခန်းကို လွှဲပြောင်းပေးအပ်ခဲ့တာပါ။

အဖမ်းဆီးခံထားရတဲ့ သူတွေဟာ မြောက်ဦးမြို့နယ် ရန်အောင်ပြင် ကျောက်ဆည်ပြင် ကြာကန် ဆင်အိုးရွာနဲ့ ကျောက်တော်မြို့နယ် ရှောက်ချောင်းဂါပုရွာက တဦး စုစုပေါင်း ၂၅ ဦးဖြစ်ပြီး ရခိုင်မျိုးနွယ်စု မြိုလူမျိုးများဖြစ်တယ်လို့ ကျောက်တော်ဒေသခံ ကိုကျော်လှမြင့်ကပြောပါတယ်။

“ခေါ်လာတဲ့ လူတွေကလည်း အကုန်လုံးရွာသားတွေဆိုတာပဲ သတင်းရတယ်။ ကျောက်ဆည်ပြင်ရယ် ရန်အောင်ပြင်ရယ် ဆင်အိုးအဲဒီဘက်က လူတွေပါတယ်။ အဲဒီရွာက လူတွေက ၂၄ ဦး။ ကျောက်တော်မြို့နယ် ဂါပုရွာကတဦး စုစုပေါင်း ၂၅ ဦးပေါ့။ သူတို့ကလည်း ရခိုင်မျိုးနွယ်စုမြိုလူမျိးတွေ ဖြစ်နေတော့ ဒီဘက်ကလူတွေနဲ့ နည်းနည်း အဆက်ဆက် အားနည်းချက်ရှိနေတယ်နဲ့ တူတယ်။”

မြောက်ဦးမြို့နယ် မဲဆန္ဒနယ်က ပြည်နယ်လွှတ်တော်ကိုယ်စားလှယ်ဦး ထွန်းသာစိန်ကတော့ အဖမ်းခံရကြောင်းသတင်း ပို့ချက်ကို လက်ခံရရှိကြောင်းပြောပါတယ်။

“အရေအတွက်တော့ ကျနော်အတိအကျ မသိဘူးဗျ။ အဖမ်းခံရတယ်ဆိုတာတော့ ကျနော်ကိုသတင်းပို့ကြပါတယ်။ ရွာသားတွေလို့ သူတို့က သတင်းပို့ကြပါတယ်။”

လက်ရှိဖမ်းဆီးခံထားတဲ့ သူတွေရဲ့အခြေအနေကိုသိရှိဖို့ကျောက်တော်မြို့မရဲစခန်းကိုဆက်သွယ်မေးမြန်းရာမှာ ပြောခွင့်မရှိကြောင်း ဆိုပါတယ်။

“အဲတာ မေးလို့မရဘူး။ အဲတာပြောလို့မရဘူး။ တပ်က ဖြစ်လို့နေမှာလေ။”

ရခိုင်ပြည်နယ်မှာ မြန်မာ့စစ်တပ်နဲ့ AA ရခိုင်လက်နက်ကိုင်အဖွဲ့တို့အကြားမှာ ဖြစ်ပွားတဲ့စစ်ရေးပဋိပက္ခအတွင်း အရပ်သားတွေလည်း AA နဲ့ ဆက်နွယ်နေတယ်ဆိုပြီး အဖမ်းခံရတာ များပြားလာနေပါတယ်။

မေလဆန်းပိုင်းတုန်းက ရသေ့တောင်မြို့နယ် ကျောက်တန်းကျေးရွာအတွင်း စစ်တပ်ကနေ ဝိုင်းပတ်ပိတ်ဆို့ စစ်ဆေးမှုအတွင်း ပစ်ခတ်မှုကြောင့် ရွာသား ခြောက် ဦး သေဆုံးသွားပြီး ရှစ် ဦး ဒဏ်ရာ ရရှိခဲ့သလို ရွာသား ရှစ် ဦးကိုလည်း ဖမ်းဆီးပြီး အမှုဖွင့် အရေးယူထားပါတယ်။

ပြီးခဲ့တဲ့မတ်လကုန်ပိုင်းကလည်း မြောက်ဦးမြို့နယ်၊ အောက်သားကန်ကျေးရွာသား ငါး ဦးကိုလည်း အကြမ်းဖက်မှု ဥပဒေ ပုဒ်မ ၅၀ ဈ ဖြင့် စစ်တွေမြို့မရဲစခန်းမှာ အမှုဖွင့်အရေးယူထားပါတယ်။

ဧပြီလ ၁၀ ရက်နေ့ကလည်း မြောက်ဦးမြို့က ရဲတပ်ရင်း တိုက်ခိုက်ခံရအပြီး မြန်မာစစ်တပ်ကနေ နယ်မြေရှင်းလင်းရေး ဆောင်ရွက်မှုတွေအတွင်း လက္ကာကျေးရွာသား ၂၄ ဦး ဖမ်းဆီးပြီး အမှုဖွင့် အရေးယူထားပါတယ်။

လက်ရှိစစ်ရေး ပဋိပက္ခကာလအတွင်း AA နဲ့ ဆက်နွယ်နေတယ်ဆိုတဲ့ မသင်္ကာမှုနဲ့ ရွာသား ၇၀ ကျော်ကို အကြမ်းဖက်မှုဥပဒေ ပုဒ်မ ၅၀ ဈ နဲ့ သော်လည်းကောင်း မတရားအသင်းဆက်သွယ်မှု ဥပဒေ ၁၇/၁ နဲ့ သော်လည်းကောင်း အမှုဖွင့် အရေးယူထားမှုတွေ ရှိနေပါတယ်။

ကိုနိုင်ကွန်းအိန် / ဗွီအိုအေ (မြန်မာပိုင်း)
https://burmese.voanews.com

မှတ်ချက်ရေးသားလိုတဲ့ စာဖတ်ပရိတ်များ တောင်းဆိုချက်အရ ဖွင့်ပေးလိုက်ပါပြီ။ မှတ်ချက်များ ရေးသားနိုင်ပါပြီ။

အချိန်နဲ့ တပြေးညီ သတင်းများ ဖတ်ရှုနိုင်ဖို့  facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့ နိုင်ပါသည်။
နောက်ဆုံးရ သတင်းများကို အောက်ပါ Tweets မှာ ဖော်ပြထားပါတယ်။ Tweets ရဲ့ ဘေးဘောင်တန်းကို ဆွဲချပြီ မိမိတို့ စိတ်ဝင်စားတဲ့ သတင်းခေါင်းစဉ် အောက်က Link ကို နှိပ်ပြီ အပြည့်အစုံဖတ်ရှုနိုင်ပါတယ်။
 

Advertisement

 

အသစ် တင်သမျှ သတင်းများ အလို အလျှောက်ပို့  ပေးပါမည်

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ