ရန်ကုန်-ပုသိမ် ကားလမ်း၌ ခရီးသည်တင်မှန်လုံယာဉ်တစ်စီး မီးလောင်ကျွမ်းမှုဖြစ်ပွား

ကန်ကြီးထောင့် ဧပြီ ၂၃

ဧရာဝတီတိုင်းဒေသကြီး၊ကန်ကြီးထောင့်မြို့နယ်၊ငှက်ကြီးသိုက်ကျေးရွာ (ရန်ကုန်-ပုသိမ် ကားလမ်း) တွင် ဧပြီ ၂၃ ရက်၊မွန်းလွဲ ၂ နာရီ မိနစ် ၂၀ က ယောနသံ ခရီးသည်တင်မှန်လုံယာဉ်တစ်စီး ဝါယာရှော့ဖြစ်ကာမီးလောင်ကျွမ်းမှုဖြစ်ပွားခဲ့ကြောင်းသိရသည်။

ဖြစ်စဉ်မှာ ရန်ကုန်-ပုသိမ် ကားလမ်းအတိုင်း ပုသိမ်ဘက်မှ ငါးသိုင်းချောင်းဘက်သို့ ခရီးသည် ၄၅ ဦးကိုတင်ဆောင်ကာ ယာဉ်မောင်း ကျော်မင်းလှိုင် အသက် (၄၅ နှစ်) မောင်းနှင်လာသော ပုသိမ်-ငါးသိုင်းချောင်း ပြေးဆွဲနေသည့် ယောနသံ ခရီးသည်တင်မှန်လုံယာဉ်သည် မိုင်တိုင်အမှတ် ၁၉/၂ နှင့် ၁၉/၃ ကြားအရောက်တွင် ကားဦးခေါင်းဝဲဘက်အခြမ်းမှ မီးခိုးများထွက်ကာ ဝါယာရှော့ဖြစ်ပြီး မီးစတင်လောင်ကျွမ်းခဲ့ရာ အဆိုပါမီးလောင်မှု ဖြစ်ပွားရာသို့ မြို့နယ်အုပ်ချုပ်ရေးမှူး ဦးဝင်းမြင့်၊မြို့နယ်ရဲတပ်ဖွဲ့မှူး ရဲမှူး လေးမြင့်နှင့်မြို့နယ်မီးသတ်ဦးစီးမှူး ဦးမျိုးမြင့်စိုး တို့ ဦးဆောင်သော သန္ဓမီးသတ်တပ်ဖွဲ့ဝင်များနှင့်အရန် မီးသတ်တပ်ဖွဲ့ဝင်များက မီးငြှိမ်းသတ်ယာဉ် နှစ်စီး၊ရေသယ်ယာဉ် တစ်စီးတို့ဖြင့်ဝိုင်းဝန်းငြှိမ်းသတ်ခဲ့ကြရာ မွန်းလွဲ ၂ နာရီ ၄၅ မိနစ်တွင်မီးငြှိမ်းသွားခဲ့ပြီး ခရီးသည်များထိခိုက်မှုမရှိကြောင်းနှင့် ဆုံရှုံးမှုတန်ဖိုးမှာ ငွေကျပ် သိန်း ၅၀ ကျော်ခန့်ရှိကြောင်း မြို့နယ်မီးသတ်ဦးစီးဌာနမှသိရသည်။

အဆိုပါ ကားမီးလောင်ကျွမ်းမှုကြောင့် ယာဉ်မောင်း ကျော်မင်းလှိုင် အားကန်ကြီးထောင့်မြို့မရဲစခန်းမှဆက်လက်အရေးယူဆောင်ရွက်ထားကြောင်းသိရသည်။

နန်းထိုက်
Myanmaalinn
https://www.facebook.com/MYANMAALINNNEWS/