လက်လုပ်မိုင်းပေါက်ကွဲမှုနဲ့ ဖမ်းဆီးခံထားရသူ ၂ဦးကို ရမန်ယူ

ရခိုင်ပြည်နယ် စစ်တွေမြို့နယ် တရားရုံးကို မြင်ရစဉ်။ Photo: Min Thein Aung/RFA

ရခိုင်ပြည်နယ် စစ်တွေမြို့မှာ ပြီးခဲ့တဲ့ဖေဖော်ဝါရီလက လက်လုပ်မိုင်းပေါက်ကွဲခဲ့တာနဲ့ပတ်သက်ပြီး ဖမ်းဆီးခံနေရသူတွေထဲက နှစ်ဦးကို မြောက်ဦးမြို့နယ်က အခြားပေါက်ကွဲမှုဖြစ်စဉ်တွေနဲ့ ခေါင်းစဉ်ပြောင်းပြီး စစ်တွေမြို့နယ်တရားရုံးမှာ ဒီနေ့ရမန်ယူခဲ့တယ်လို့ မိသားစုဝင်တွေက ပြောပါတယ်။

စစ်တွေမြို့က ပေါက်ကွဲမှုဖြစ်စဉ်နဲ့ ရမန်ယူတာကို တရားရုံးက ပြီးခဲ့တဲ့လက ပယ်ချခဲ့တာကြောင့် အခြားခေါင်းစဉ်ကိုပြောင်းပြီး ရဲက ဖမ်းဆီးထားတာဖြစ်တယ်လို့ ဖမ်းဆီးခံနေရတဲ့ ဦးမောင်အေးဝင်းရဲ့ဇနီး ဒေါ်အေးအေးအောင်က ပြောပါတယ်။

ပထမအကြိမ်ရမန်ကို မြောက်ဦးမြို့နယ်တရားရုံးမှာ ယူခဲ့တာကြောင့် ဒီနေ့ရုံးထုတ်ရမန်ယူမယ့်နေ့မှာ မြောက်ဦးမြို့နယ်တရားရုံးကို မိသားစုတွေသွားရောက်ခဲ့ကြပေမယ့် စစ်တွေမြို့နယ်တရားရုံးမှာ ပြောင်းလဲပြီး ရမန်ယူခဲ့တယ်လို့ ပြောပါတယ်။

စစ်တွေမြို့မှာ လက်လုပ်မိုင်းပေါက်ကွဲတဲ့ဖြစ်စဉ်နဲ့ ပတ်သက်ပြီး ရဲတပ်ဖွဲ့က စစ်တွေမြို့ခံ ၉ ဦးလောက်ကို ဖမ်းဆီးခဲ့ပြီးနောက် တစ်လအကြာ ပြီးခဲ့တဲ့ မတ်လ ၂၆ ရက်နေ့မှာ ထပ်မံရမန်ယူခွင့်ကို စစ်တွေမြို့နယ်တရားရုံးက ပယ်ချခဲ့သလို လူ ၅ ဦးကို ရဲက အာမခံနဲ့ ပြန်လွှတ်ပေးခဲ့ပါတယ်။

လွှတ်မပေးဘဲ ကျန်ရှိနေသူတွေထဲက နှစ်ဦးကို ပြီးခဲ့တဲ့နှစ်က မြောက်ဦးမြို့နယ် စစ်တွေ-ရန်ကုန် ကားလမ်းမတွေမှာ လက်လုပ်မိုင်းပေါက်ကွဲမှုနဲ့ ရဲက ဆက်လက်ဖမ်းဆီးထားတာဖြစ်ပါတယ်။

အဲဒီအမှုကို စီအိုင်ဒီက အဓိကတာဝန်ယူစစ်ဆေးနေတယ်လို့လည်းသိရပါတယ်။

RFA Burmese
https://www.rfa.org/burmese