ရခိုင်ပြည်နယ်အတွင်းဌာနများမှ ပိုလျှံငွေများအား ပြည်နယ်အစိုးရအနေဖြင့် ဘဏ္ဍာရေးစည်းမျဉ်းနှင့် အညီသုံးစွဲခဲ့ဟုဆို
ရခိုင်ဂေဇက်၊ ဇန်နဝါရီ ၂၄
ရခိုင်ပြည်နယ်အတွင်းဌာနများမှ ပိုလျှံငွေများအား ပြည်နယ်အစိုးရအနေဖြင့် ဘဏ္ဍာရေးစည်းမျဉ်းနှင့် အညီသုံးစွဲခဲ့ခြင်းဖြစ်သည်ဟုအခွန်ဘဏ္ဍာ ၊စီမံကိန်းနှင့် စီးပွားရေးဝန်ကြီးရေးဦးကျော်အေးသိန်းမှ ရခိုင်ပြည်နယ် အစိုးရရုံး အစည်းဝေးခန်း (၁)တွင် ဇန်နဝါရီလ (၂၂) နေ့လည် ၂ နာရီက ရသေ့တောင်၊ မြောက်ဦးဖြစ်စဉ်များနှင့် ပတ်သက်ပြီး မြို့မိမြို့ဖများ၊ အရပ်ဘက်လူမှု အဖွဲ့အစည်းများနှင့် ရခိုင်ပြည်နယ်အစိုးရ အဖွဲ့တို့တွေ့ဆုံဆွေးနွေးချိန်တွင် မြို့မိမြို့ဖ ဦးအောင်သန်းဝေမှ မေးမြန်းသော ၂၀၁၆_၁၇ ဘဏ္ဍာနှစ်တွင် ငွေကျပ် ၄.၄၂ဘီလီယံကို ဘဏ္ဍာရေးစည်းမျဉ်းနှင့်အညီသုံးစွဲခဲ့ခြင်းရှိမရှိ မေးခွန်းအပေါ် ရှင်းလင်းပြောဆိုခဲ့သည်။
အဆိုပါငွေကျပ် ၄.၄၂ ဘီလီယံအားအသုံးပြုခြင်းကိစ္စအား အမ်းမြို့နယ် ပြည်သူ့လွှတ်တော် ကိုယ်စားလှယ်ဒေါက်တာအေးမောင်မှပြည်သူ့လွှတ်တော်တွင် မေးမြန်းထားသည်ဟုသိရပြီး ရခိုင်ပြည်နယ်အစိုးရအဖွဲ့မှ အလွဲသုံးစားလုပ်သည်ဟု အွန်လိုင်းတွင်ရေးသားမှုများရှိခဲ့သည်။
“ပြည်နယ်အစိုးရအနေဖြင့် ဌာနဆိုင်ရာများမှ ပိုလျှံငွေများအား လိုအပ်သလို လိုအပ်သည့်နေရာတွင် ဥပဒေနှင့်အညီ ပြောင်းရွှေ့ သုံးစွဲ့ခွင့်ရှိသည်ဟု ဘဏ္ဍာရေးစည်းမျဉ်းစည်းကမ်းဥပဒေမှာ ပြဌာန်းန်းပြီးသားဖြစ်ပါတယ်။ အဲ့အတွက် ကျွန်တော်တို့ကပိုလျှံဘဏ္ဍာငွေကို ဘဏ္ဍာရေးစည်းမျဉ်းစည်းကမ်းအရ သုံးစွဲခဲ့တာဖြစ်ပါတယ်။”ဟု ဘဏ္ဍာရေးနှင့် စီမံကိန်းဝန်ကြီး ဦးကျော်အေးသိန်းကပြောသည်။
ရခိုင်ပြည်နယ်အစိုးရအနေဖြင့် ၂၀၁၆-၂၀၁၇ ဘဏ္ဍာနှစ်တွင် ဌာနဆိုင်ရာများမှ ငွေပိုငွေလျှံကျပ် ၄ဘီလီယံကျော်ကျန်ရှိ ခဲ့ခြင်းဖြစ်ကာ ထိုငွေများအား လုပ်ထုံးလုပ်နည်းအရ ရခိုင်ပြည်နယ်တွင်းမှ မြို့နယ်တစ်ခုစီအား သန်း ၂၆၀ စီဖြင့်ရခိုင်ပြည်နယ်အစိုးရအဖွဲ့၏ ဆုံးဖြတ်ချက်ဖြင့် စုစုပေါင်း ၄.၄၂ ဘီလီယံ ခွဲဝေသုံးစွဲခဲ့ကြောင်းသိရသည်။
“ငွေပိုငွေလျှံကတော့ ၄ ဘီလီယံကျော်ပိုပါတယ်။ အဲ့ဒီထဲကမှ ပြည်နယ်အစိုးရအနေဖြင့် တစ်မြို့နယ်ကို သန်း၂၆၀ နဲ့ ၄.၄၂ ဘီလီယံကို ခွဲဝေသုံးစွဲခဲ့တယ်။ ဒီငွေတွေကိုတော့ အရင်စဉ်ဆက်ကတော့ သုံးစွဲခဲ့ခြင်းမရှိဘဲ နိုင်ငံတော်ကို ပြန်အပ်ရပါတယ်။ ခုကတော့ ပြည်နယ်အစိုးရအနေဖြင့် လုပ်ထုံးလုပ်နည်းအရ သုံးစွဲလို့ရတယ်လို့နည်းဥပဒေတွေပါတဲ့အတွက် ပြည်နယ်အတွင်းမှာ လိုအပ်နေတာတွေအများကြီးရှိနေတဲ့အတွက် ဒါတွေကို သုံးလိုက်မယ်ဆိုပြီး လုပ်ထုံးလုပ်နည်းအတိုင်း သုံးစွဲခဲ့တာဖြစ်ပါတယ်”ဟု အခွန်၊ဘဏ္ဍာ၊စီမံကိန်းနှင့် စီးပွားရေးဝန်ကြီး ဦးကျော်အေးသိန်းမှဆိုသည်။
အဆိုပါငွေများအား မြို့နယ်အသီးသီးတွင် ဦးစားပေးလုပ်ငန်းများအား ပြုလုပ်ပေးရန် ရခိုင်ပြည်နယ်အစိုးရအဖွဲ့၏ ကက်ဘိနက်အစည်း တွင် ဆုံးဖြတ်ခဲ့ခြင်းဖြစ်ကာ ဆောက်လုပ်မည့်လုပ်ငန်းများအတွက်လည်း တင်ဒါခေါ်ယူရေးအဖွဲ့များဖွဲ့စည်းကာပြုလုပ်ခဲ့သည်ဟု ဆိုသည်။
ရခိုင်ပြည်နယ်အစိုးရအဖွဲ့မှငွေကျပ်၎.၄၂ဘီလီယံအားအသုံးပြုခြင်းနှင့် ပတ်သက်ပြီးအမ်းမြို့နယ် ပြည်သူ့လွှတ်တော်ကိုယ်စားလှယ်ဒေါက်တာအေးမောင်မှ ပြည်သူ့လွှတ်တော်တွင် မေးမြန်းထားသည်ကို ဖြေကြားရန် ပြည်နယ်အစိုးရအနေဖြင့် ပြည်ထောင်စုအစိုးရထံ ပေးပို့ထားပြီးဖြစ်ကြောင်းသိရသည်။
ဇွဲလင်းနိုင် (စစ်တွေ)
Rakhine Gazette
https://www.facebook.com/RakhineGazetteJournal/
ရခိုင်ပြည်နယ်အတွင်းဌာနများမှ ပိုလျှံငွေများအား ပြည်နယ်အစိုးရအနေဖြင့် ဘဏ္ဍာရေးစည်းမျဉ်းနှင့် အညီသုံးစွဲခဲ့ဟုဆို
Reviewed by THITHTOOLWIN
on
23:00
Rating:
Reviewed by THITHTOOLWIN
on
23:00
Rating:
