ရန်ကုန် ဒီဇင်ဘာ ၁၄
ရန်ကုန်တောင်ပိုင်းခရိုင်၊ သန်လျင်မြို့နယ်၊ ခြောက်လမ်းသွားလမ်းမ၌ ဒီဇင်ဘာ ၁၃ ရက် (၀၁း၀၀) အချိန်က ၂၂ ဘီးအငှားယာဉ် အရှိန်လွန်ရာမှ လမ်းဘေးရပ်ထားသော YBS ၂၃ ယာဉ်အား ၀င်ရောက်တိုက်မိခဲ့ကြောင်းသိရသည်။
ဖြစ်စဉ်မှာ သန်လျင်မြို့ ခြောက်လမ်းသွား လမ်းမအတိုင်း မြောက်မှတောင်သို့ ယာဉ်မောင်း ဇော်ကိုကိုဝင်း အသက် (၃၈)နှစ်၊ အမှတ်-၃၉၄၊ ထနီးလမ်း၊ ကမ်းနားရပ်ကွက်၊ အင်းစိန်မြို့နယ်နေသူ မောင်းနှင်လာသော 1L/---- ISUZU အမျိုးအစား ၂၂ ဘီး လိမ္မော်ရောင် အငှားယာဉ်သည် ငါးပြေမကျေးရွာ လမ်းထိပ်အရောက် အရှိန်မထိမ်းနိုင်ဘဲ တစ်ဖက်ယာဉ်ကြောသို့ ရောက်ရှိကာ လမ်း၏ ညာဘက်တွင် ရပ်တန့်ထားသော ယာဉ်အမှတ် 7D/---- ဟွန်ဒိုင်း အစိမ်းရောင် YBS ၂၃ လိုင်းမှ ယာဉ်မောင်း ယာဉ်ပိုင်ရှင် (စီစစ်ဆဲ) ယာဉ်အား ၀င်ရောက်တိုက်မိခဲ့သည်။
ထိုသို့ ၀င်ရောက်တိုက်မိသဖြင့် ၂၂ ဘီး ယာဉ်မောင်း ဇော်ကိုကိုဝင်းတွင် ဦးခေါင်းပေါက်ပြဲ၊ ညာဘက်ခြေသလုံး ပေါက်ပြဲ၊ ဘယ်/ညာ ခြေထောက် ပွန်းခြစ်၊ ဘယ်ဘက် လက်ပွန်းဒဏ်ရာ ရရှိသဖြင့် စံပြဆေးရုံကြီး အတွင်းလူနာ (မစိုးရိမ်ရ)ဖြင့်ဆေးကုသလျက်ရှိပြီး ယာဉ် ၂ စီးပျက်စီးခဲ့ကြောင်း သိရသည်။
အဆိုပါ ယာဉ်အား မဆင်မခြင် မောင်းနှင်ပြီး တစ်ဖက်ယာဉ်ကြောသို့ ရောက်ရှိကာ လမ်း၏ ညာဘက်ဘေးတွင် ရပ်တန့်ထားသော ယာဉ်အား ၀င်ရောက်တိုက်မိသဖြင့် လူဒဏ်ရာရရှိ၊ ယာဉ် ၂ စီး ပျက်စီးစေသူ ယာဉ်မောင်း ဇော်ကိုကိုဝင်းအား သန်လျင်မြို့မ ရဲစခန်းမှ အမှုဖွင့် အရေးယူထားကြောင်း သိရသည်။
သက်ခိုင် (သန်လျင်)
Myanmaalinn
https://www.facebook.com/MYANMAALINNNEWS/
၂၂ ဘီး ယာဉ် အရှိန်လွန်ရာမှ လမ်းဘေးရပ်ထားသော YBS ၂၃ ယာဉ်အား ၀င်ရောက်တိုက်မိ
Reviewed by THITHTOOLWIN
on
18:40
Rating:
Reviewed by THITHTOOLWIN
on
18:40
Rating:
