November 12,2021/Kachin News group
စစ်ကိုင်းတိုင်း၊ ကောလင်းမြို့အနောက်ခြမ်းရှိ မိုနံကျေးရွာ၊ ဥက္ကံရွာ၊ ချောင်းနား စသည့်ကျေးရွာများမှ နိုဝင်ဘာလ လဆန်းပိုင်းတွင် စစ်ကောင်စီတပ်ဖမ်းဆီးသွားသည့် ဒေသခံပြည်သူ ၇ ဦး သေနတ်ဒဏ်ရာ၊ ဓါးဒဏ်ရာများဖြင့် အသတ်ခံထားရကြောင်း ဒေသခံများမှ သိရသည်။
"ကျနော်တို့ ကြားရသလောက်တော့ ၁၆ နှစ်အရွယ် ကလေးတစ်ဦးကိုဘဲ မှတ်မိတယ်လို့ သိရတယ်။ အဲကလေးက ချောင်းနားရွာကလို့တော့ သိရပြီ။ ကျန်တဲ့ ၆ယောက်ကတော့ မျက်နှာဘယ်သူဘယ်ဝါမှန်း မသိနိုင်လောက်အောင် နှိပ်စက်ခံထားရတယ်လို့ သိရတယ်" ဟု ဒေသခံတစ်ဦးက ပြောသည်။
သေဆုံးနေသည့် အလောင်း ၇ လောင်းအား ယနေ့နံနက် ၉နာရီဝန်းကျင် မိုနံရွာအနီး (ဦးတင်ဦးကုန်းနားလေးက မန်ကျည်းပင်ရေစပ်)အနားမှာ တွေ့ရှိခဲ့ကြကြောင်း ၎င်းက ဆက်ပြောသည်။
ဒေသခံများ၏ ခန့်မှန်းချက်အရ ကလေးငယ်၏ အလောင်းအပြင် ကျန်အလောင်း ၆ လောင်းသည် မိုနံရွာမှ ၅ ဦးနှင့် ဥက္ကံရွာ ၁ ဦးဖြစ်နိုင်ကြောင်း ပြောဆိုသည်။
"ပြီးခဲ့တဲ့ ၄ရက်လောက်က စစ်ကောင်စီတပ်က အဲရွာက ဒေသခံတွေကို ဖမ်းဆီးသွားတာတွေရှိတယ်။ ဖမ်းသွားတာ ဘယ်နှစ်ယောက်လဲ တိတိကျကျ မသိလိုက်ကြဘူး။ ခုသတ်ခံရတဲ့သူတွေတောင် ရုပ်ကမမှတ်မိတော့ ဘယ်သူဘယ်ဝါမှန်း တိတိကျကျ မပြောနိုင်ဘူး ခန့်မှန်းတာလောက်ဘဲရှိမယ်" ဟု အထက်ပါဒေသခံက ထပ်ပြောသည်။
မိုနံကျေးရွာ၊ ဥက္ကံရွာ၊ ချောင်းနား စသည့်ကျေးရွာတို့သည် တစ်ဆက်တည်းရှိပြီး ကောလင်းမြို့၏ အနောက်ဘက်ခြမ်း ၂၆မိုင်ခန့် အကွာတွင် တည်ရှိသည်။
ကောလင်းနယ် အနောက်ဘက်ခြမ်းကျေးရွာအချို့တွင် ၂ ရက်အတွင်း စစ်ကောင်စီတပ်သည် ဒေသခံပြည်သူ ၁၀ဦးခန့် ဖမ်းဆီးသတ်ဖြတ်ပြီးဖြစ်သည်။
လက်ရှိ ယင်းကျေးရွာများတွင် ဖုန်းလိုင်းအချို့နှင့် အင်တာနက်များ ဖြတ်တောက်ခံထားရသည့်အတွက် ပြည်သူမည်မျှ အသတ်ခံရသည်ကို သိရှိနိုင်ရန် ခက်ခဲနေဆဲဖြစ်သည်။
Kachin News Group
Reviewed by THITHTOOLWIN
on
20:24
Rating:
No comments:
Post a Comment