ကရင်ပြည်နယ်တွင်း စစ်တပ်ရိက္ခာပို့ကားတန်းတွေ KNU တိုက်ခိုက်



Share/Bookmark
Karen National Union (KNU) soldiers stand guard with their assault weapons at Oo Kray Kee village in Karen State near Thai-Myanmar border on January 30, 2012. The Karen National Union (KNU) is waging the world's longest-running insurgency, launched 63 yea

ကရင်ပြည်နယ်ထဲမှာ စစ်တပ်နဲ့ KNU ကရင်အစည်းအရုံးတပ်တွေ တိုက်ပွဲဆက်ဖြစ်နေတာမှာ စစ်တပ်ရိက္ခာပို့ ကားတန်းတွေကို KNU ဖက်ကတိုက်ခိုက်ခဲ့ပါတယ်။ ဒီအခြေအနေကို ဗွီအိုအေ မြန်မာပိုင်းသတင်းထောက် နိုင်ကွန်းအိန်က သတင်းပေးပို့ထားပါတယ်။

စစ်ရေးပဋိပက္ခတင်းမာနေတဲ့ ကရင်ပြည်နယ်ဖာပွန်မြို့နယ်ထဲမှာ မြန်မာစစ်တပ်ရဲ့ရိက္ခာထောက်ပို့ကားတွေနဲ့ တပ်စခန်းတွေကို ကရင်အမျိုးသားအစည်းအရုံး KNU လက်အောက်ခံ တပ်မဟာ ၅ တပ်ဖွဲ့တွေကနေ ပစ်ခတ်တိုက်ခိုက်တာပါ။ မြန်မာစစ်တပ်ရဲ့ရိက္ခာတင်ပို့တဲ့ ကားတန်းတွေကို ကမာ့မောင်းမြို့နဲ့ ကတိုင်တိရွာအကြားမှာ KNU ဘက်က မနေ့က တိုက်ခိုက်ခဲ့တယ်လို့ ကတိုင်တိ ရွာ ဒေသခံတစ်ဦးကပြောပါတယ်။

“၁၄ ရက်နေ့ ၁၂ နာရီနောက်ပိုင်းပေါ့။ ကမာ့မောင်း ကတိုင်တိ မိုင်တိုင် ၅၀ လောက်မှာ တိုက်ခိုက်မှုဖြစ်ပွါးတယ်။ အဲဒီမှာရိက္ခာပို့ကား ၂ စီးကတော့ မီးလောင်ပျက်စီးသွားတာပေါ့နော်။ ရိက္ခာပို့ကား။ လက်နက်ကြီးမှန်တာ။ အဲဒီမှာ ကျဆုံးသွားတာကတော့ တပ်မတော်ဘက်က ကျဆုံးတာ ၆ ဦး။ ဒဏ်ရာရတာ ၇ ဦးပေါ့နော်။”

ဒီ ထိခိုက် သေဆုံးတဲ့ အရေအတွက်နဲ့ပတ်သက်လို့ ဗွီအိုအေက သီးခြားအတည်မပြုနိုင်ပါဘူး။

တပ်မဟာ ၅ ပြောခွင့်ရ ပဒိုမန်းမန်းကတော့ ခရီးလွန်နေတာကြောင့် တိုက်ပွဲအခြေအနေ မသိရသေးဘူးလို့ပြောပါတယ်။

နေရာတော်တော်များများမှာ မြန်မာစစ်ယဉ်တန်းတွေ မနေ့က တိုက်ခံရကြောင်း JMC-S ပြည်နယ်အဆင့် ပစ်ခတ် တိုက်ခိုက်မှု ပူးတွဲစောင့် ကြည့်ရေးကော်မီတီဝင် နော်မေလာထူးက ပြောပါတယ်။

“အခုဒီယာဉ်တန်းတွေကျတော့ သူတို့ရိက္ခာပို့ဖို့ဆိုတာ ဒီကနေလာဖို့လည်းမလွယ်ကူဘူး။ မနေ့ကကျတော့မှ ကတိုင်တိမှာလည်း ပစ်ခံထိတယ်။ ဝှေဆန်မှာလည်း ပစ်ခံထိတယ်။”

ဧပြီ ၁၄ ရက်ညပိုင်းမှာ ဖာပွန်မြို့အနားက စစ်ဗျူဟာကုန်းတစ်ခုကို KNU ဘက်ကတိုက်ခိုက်ခဲ့အပြီး အပြန်လှန်ပစ်ခတ်မှုရှိလို့ ရွာသားတချို့တိမ်းရှောင်နေရတယ်လို့လည်း နော်မေလာထူးက ပြောပါတယ်။

“ရှမ်းကိုင်းကျတော့အခုဗျူဟာတပ်ရှိတဲ့နေရာပေါ့နော်။ ဗျူဟာရဲ့အရှေ့မှာပေါ့။ ဖာပွန်မြို့နဲ့တဆက်ထဲပဲ။ မနေ့ညက ၈ နာရီ ၁၃ မိနစ်လောက်။ လက်နက်ကြီးတွေကျတယ်။ မနေ့ကမှ ကွက်သစ်မှာဆိုရင် နည်းနည်း စစ်ဘေးရှောင်အဖွဲ့တွေရှိတယ်။ ရပ်ကွက် ၄ ဆရာတော်ဘက်ပိုင်းမှာတော့ ပုန်းအောင်းနေတယ်သူတို့။”

မနေ့က ပစ်ခတ်တိုက်ခိုက်မှုကြောင့် ဖာပွန်မြို့နဲ့မြိုင်ကြီးငူဒေသဘက်ကို ရွာသားတချို့ ထွက်ပြေး တိမ်းရှောင်နေရတယ်လို့လည်း သူက ပြောပါတယ်။

KNU က မူတြော်ခရိုင်လို့ခေါ်တဲ့ ဖာပွန်ခရိုင် လူသော၊ ဒွယ်လိုး၊ ဘူးသို၊ မြို့နယ် သုံးခုအတွင်းမှာလည်း မြန်မာစစ်တပ်ရဲ့ ရိက္ခာထောက်ပို့လမ်းကြောင်းတွေကို KNU တပ်တွေက ကြားဖြတ်ပိတ်ဆို့ တိုက်ခိုက်နေတာတွေလည်းရှိပါတယ်။ လက်ရှိ စစ်ရေးတင်းမာနေတဲ့ KNU တပ်မဟာ ၅ ထိန်းချုပ်ထားတဲ့ ဖာပွန်ခရိုင်ဘက်ကို ပဲခူးတိုင်း ကျောက်ကြီးမြို့နယ်ဖက်ကနေတဆင့် မြန်မာတပ်မတော်က ရိက္ခာနဲ့စစ်အင်အားပို့ဆောင်နေတာမှာ KNU တပ်မဟာ ၃ အဖွဲ့တွေနဲ့လည်း ပစ်ခတ်တိုက်ခိုက်မှုတွေရှိနေတယ်လို့ KNU တပ်မဟာ ၃ အဖွဲ့ဝင်တဦးကပြောပါတယ်။

“ဟိုမနေ့ကဆိုရင် စစ်ကားတွေ လားတွေ မြင်းရယ် ဒီလိုတက်နေကြတယ်။ မူသဲဘက် တပ်မဟာ ၅ ဘက်ကို သူတို့သွားနေကြတယ်။ ကားအစီး ၃၂ စီးလောက်ရှိတယ်။ ရိက္ခာတွေလည်း သူတို့သွားနေကြတယ်။ ပြီးတော့တပ်အင်အားတွေလဲ ကား ၁၆ စီးလောက် သူတို့တက်တယ်။ ကျောက်ကြီးဘက်မှ၊ာ ကြားမှာတော့ ပစ်ခတ်မှုတော့ရှိတာပေါ့။ သူတို့အင်အား အလုံးအရင်းနဲ့တက်လာတယ်ဆိုတော့လည်း ကျောက်ကြီး မူသဲလမ်းပါတ်ဝန်းကျင်မှာဖြစ်တာပေါ့ ပစ်ခတ်မှုတွေ။”

အခုလို တပ်မတော် ထောက်ပို့စစ်ကြောင်းတွေကို KNU ကတိုက်ခိုက်တယ်ဆိုတဲ့ သတင်းတွေနဲ့ပတ်သက်လို့ စစ်ကောင်စီပြောခွင့်ရကို ဆက်သွယ်ခဲ့ပေမဲ့ မရခဲ့ပါဘူး။

ကေအန်ယူ တပ်မဟာ ၅ ထိန်းချုပ်နယ်ထဲမှာသာမက တပ်မဟာ ၁ ထိန်းချုပ်တဲ့ သထုံခရိုင်၊ တပ်မဟာ ၃ ထိန်းချုပ်တဲ့ ညောင်လေးပင်ခရိုင်၊ တပ်မဟာ ၄ ထိန်းချုပ်တဲ့ ထားဝယ်ခရိုင်၊ တပ်မဟာ ၆ ထိန်းချုပ်တဲ့ ဒူးပလာယားခရိုင်တွေဖက်မှာလည်း စစ်တပ်နဲ့ တိုက်ပွဲတွေ ကြိုကြား ကြိုကြားဖြစ်နေပါတယ်။

ဖာပွန်ခရိုင်ဖက်မှာ KNUနဲ့ နစက စစ်ကောင်စီတပ်တို့ စစ်ရေးတင်းမာမှုကြောင့် ထိုင်းနယ်စပ်ဖက် ထွက်ပြေးတိမ်းရှောင်နေကြရတဲ့ ပြည်တွင်းဒုက္ခသည် သောင်းနဲ့ချီ ရှိနေပါတယ်။


ဗွီအိုအေ (မြန်မာပိုင်း)

https://burmese.voanews.com/a/knu-ambushed-military-track/5854287.html



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ