ဗကသ ဥက္ကဋ္ဌဟောင်း ကိုကျော်ကိုကိုရဲ့ ချစ်သူနဲ့ လူငယ်နှစ်ဦးကို ဖမ်းဆီး



Share/Bookmark

ဗကသ ဥက္ကဋ္ဌဟောင်းလည်း ဖြစ်သလို GSC သပိတ်ကော်မတီအဖွဲ့ဝင်တယောက်လည်း ဖြစ်တဲ့ ကိုကျော်ကိုကိုရဲ့ ချစ်သူ မစုဇာလီရှိန်းနဲ့ တခြားလူငယ် ၂ ယောက်ကို အရပ်ဝတ်နဲ့လူတချို့က ဧပြီလ ၆ ရက်က ဖမ်းဆီးခေါ်ဆောင်သွားခဲ့ပါတယ်။

“ဇာလီက စေပိုင်ဆောက်လုပ်ရေး ကုမ္ပဏီရဲ့ဝန်ထမ်းပါ။ သူက စေပိုင်ကုမ္ပဏီရဲ့ sales executive ပါ။ အိမ်ခြံမြေအရောင်းအဝယ်လုပ်ဖို့အတွက် စျေးကွက်ရှာဖို့ခရီးထွက်တာပါ။ သူက အရင်ကလည်း အဲသလို ခရီးထွက်နေကျပါ။ အခုအဲသလို ခရီးထွက်တုန်းလမ်းမှာ အဖမ်းဆီးခံလိုက်ရတာပါ။”လို့ မစုဇာလီရှိန်းရဲ့ မိသားစုနဲ့နီးစပ်သူတယောက်က ဘီဘီစီကို ပြောပါတယ်။

မစုဇာလီရှိန်းနဲ့အတူ အဖမ်းခံရသူ လူငယ်နှစ်ဦးကတော့ ဒဂုံတက္ကသိုလ် ကျောင်းသား ကိုမျိုးမြင့်ထွန်းနဲ့ လီဆူအမျိုးသား ကိုငွားဂျာတို့ ဖြစ်ကြပါတယ်။ ရန်ကုန်ကနေ လွိုင်ကော်သွားတဲ့ ခရီးစဥ်အတွင်းမှာ သူတို့ အားလုံး အဖမ်းဆီးခံခဲ့ရတာပါ။

ရန်ကုန်ကနေ လွိုင်ကော်သွားတဲ့ ခရီးစဥ်အတွင်းမှာ ညမထွက်ရကာဖျူးအမိန့်ကြောင့် တောင်ငူမှာ တညအိပ်တည်းခိုခဲ့ကြရတယ်လို့ ဆိုပါတယ်။

“တောင်ငူမှာ တညအိပ်ပြီး နောက်တနေ့မနက်မှာ နေပြည်တော်ကို ဖြတ်တဲ့ ပေါင်းလောင်းလမ်းအတိုင်း ပင်လောင်းကနေ လွိုင်ကော်ကို သွားတာပါ။ နေပြည်တော်ကောင်စီအဝင် သာဝတ္ထိဂိတ်မှာ ခရီးသည်တင်ကားပေါ်တက် စစ်ဆေးမေးမြန်းပြီး ဖမ်းဆီးသွားခဲ့တာလို့ ကားသမားက ပြန်ပြောပါတယ်။ သူတို့ ၃ ယောက်ကို မှတ်ပုံတွေတွေကြည့်ပြီးတော့မှ စိတ်မရှိပါနဲ့ ခဏနေခဲ့ပါဦးလို့ပြောပြီး ခေါ်သွားတာတဲ့ဗျ။ သူတို့ဖုန်းတွေကိုလည်း သိမ်းသွားတယ်လို့ ကားသမားက ပြန်ပြောပါတယ်။”

သူတို့ဟာ ဘာဒိုယာဥ်လိုင်းနဲ့ ခရီးသွားနေစဥ် လမ်းကဂိတ်မှာ အရပ်ဝတ်၊ ဝတ်ထားသူတွေက ကားပေါ်တက် စစ်ဆေးပြီး ဖမ်းဆီးခေါ်ဆောင်သွားတာဖြစ်ပါတယ်။ ဂိတ်မှာ ရဲနဲ့ စစ်သားတွေရှိပေမဲ့ ဖမ်းဆီးခေါ်ဆောင်သွားသူတွေကတော့ အရပ်ဝတ်တွေဖြစ်တယ်လို့ ဆိုပါတယ်။

“သူတို့က ဇာလီကို ကျော်ကိုကို့ဆီ သွားမယ်ထင်လို့ ကျော်ကိုကို ဘယ်မှာရှိသလဲဆိုတာ စစ်ဆေးဖို့ဖမ်းတာ ထင်ပါတယ်။ ဒါပေမဲ့ အခု ၄၈ နာရီကျော်လာပြီ။ ပြန်လည်းလွှတ်မပေးသေးဘူး။ ဘယ်ရောက်နေမှန်းလည်း မသိဘူး။ မိသားစုကိုလည်း မဆက်သွယ်ဘူးဆိုတော့ သိပ်စိတ်ပူလာလို့ပါ”လို့မိသားစုနဲ့ နီးစပ်သူက ဘီဘီစီကို ပြောပါတယ်။

မစုဇာလီရှိန်းနဲ့ အတူတူအဖမ်းဆီးခံရသူနှစ်ဦးဟာ မစုဇာလီရှိန်းနဲ့ ပတ်သက်ရင်းနှီးမှု ရှိမရှိကို မိသားစုက မသိဘူးလို့ဆိုပါတယ်။

“မျိုးမြင့်ထွန်းကတော့ တက္ကသိုလ်ကျောင်းသားလို့ပြောကြတော့ သူတို့ချင်းသိချင်လည်း သိမှာပေါ့။ မပြောတတ်ဘူး။ ကိုငွားဂျာဆိုတာကိုတော့ မကြားဖူးဘူး။”လို့ မိသားစုနဲ့နီးစပ်သူက ဘီဘီစီကို ပြောပါတယ်။

မစုဇာလီရှိန်းရဲ့ချစ်သူ ကိုကျော်ကိုကိုဟာ အာဏာသိမ်းစစ်ကောင်စီက ဖမ်းဝရမ်းထုတ်ခံထားရသူဖြစ်ပါတယ်။

မတ်လ ၃ ရက်နေ့က တာမွေမြို့နယ် GSC သပိတ်စစ်ကြောင်းကို ရဲနဲ့လုံခြုံရေး အဖွဲ့တွေက ရိုက်နှက်ဖမ်းဆီးစဥ်မှာ ကိုကျော်ကိုကိုဟာ အဖမ်းဆီးခံရပြီးမှ ပြန်လည်လွတ်မြောက်လာသူ ဖြစ်ပါတယ်။

ဖမ်းဆီးသူ ရဲတွေက ကိုကျော်ကိုကိုကို နာမည်ရင်း မသိဘဲ ကိုဆန်းထွန်းအောင် အဖြစ်သာ သိထားခဲ့ပါတယ်။ ကိုကျော်ကိုကိုဟာ ကျန်းမာရေးမကောင်းဘူးဆိုလို့ သူနာပြုကားပေါ်မှာ ဖမ်းဆီးထားစဥ် ကျောင်းသားတွေက သူနာပြုကားပေါ်တက်လုကြလို့ ပြန်လည် လွတ်မြောက်လာခဲ့တာ ဖြစ်ပါတယ်။

အဲဒီဖြစ်စဥ်ကို စစ်ကောင်စီအစိုးရက သတင်းထုတ်ပြန်ပြီး ကိုကျော်ကိုကိုကို ဖမ်းဝရမ်းထုတ်ခဲ့ပါတယ်။ ကိုကျော်ကိုကိုဟာ အခုအခါ သူ့ရဲ့နေအိမ်မှာ မရှိတဲ့အတွက် တိမ်းရှောင်နေတယ်လို့ ယူဆရပါတယ်။

မစုဇာလီရှိန်း အလုပ်လုပ်တဲ့ စေပိုင်ကုမ္ပဏီဟာ ဦးမောင်ဝိတ်ပိုင်ဆိုင်တဲ့ ကုမ္ပဏီဖြစ်ပြီး ဦးမောင်ဝိတ်ကိုလည်း အာဏာသိမ်းစစ်ကောင်စီက ဖမ်းဆီးထားပါတယ်။ အခုမစုဇာလီရှိန်းကို ဖမ်းဆီးမှုဟာ ဦးမောင်ဝိတ်ကို ဖမ်းဆီးမှုနဲ့ ဆက်စပ်ခြင်းရှိမရှိကိုလည်း မသိရပါဘူး။


BBC Burmese

https://www.bbc.com/burmese/live/burma-56582387



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ