မြန်မာနိုင်ငံသားတွေ ပြန်ပို့မှု မလေးရှား ဆိုင်းငံ့မည်



Share/Bookmark
မှတ်တမ်းဓါတ်ပုံ - ဖေဖော်ဝါရီ ၂၃ ရက်နေ့က မလေးရှားနိုင်ငံက မြန်မာနိုင်ငံသားများကို ပြန်ပို့စဉ်

မြန်မာနိုင်ငံအရေး အရှေ့တောင်အာရှ နိုင်ငံများအသင်း (Asean) အရေးပေါ် အစည်းအဝေးခေါ်ယူမယ့် အစီအစဉ် ပြီးဆုံးတဲ့ အချိန်အထိ မလေးရှားရောက် မြန်မာနိုင်ငံသားတွေ နေရပ်ပြန်ပို့ရေး ဆိုင်းငံ့ထားဖို့ မလေးရှားအာဏာပိုင်တွေ ဆုံးဖြတ်လိုက်ပါတယ်။

မြန်မာနိုင်ငံမှာ စစ်တပ်က အာဏာသိမ်းပြီးနောက်ပိုင်း နိုင်ငံရေး အကျပ်အတည်းတွေနဲ့ ပတ်သက်လို့ အာဆီယံအသင်းမှာ အရေးပေါ် အစည်းအဝေး ကျင်းပဖို့ အဆိုပြုထားတဲ့ အစီအစဉ် နောက်ပိုင်းအထိ မြန်မာနိုင်ငံသားတွေ နေရပ်ပြန်ပို့နေတာတွေကို ဆိုင်းငံထားဖို့ ဗုဒ္ဓဟူးနေ့က အစိုးရအဖွဲ့ အစည်းအဝေးမှာ တင်ပြခဲ့ကြောင်း အစိုးရအသိုင်းအဝန်းနဲ့ နီးစပ်သူတွေကို ကိုးကားပြီး ရိုက်တာ သတင်းက ဖော်ပြခဲ့တာပါ။

မြန်မာနိုင်ငံမှာ ဖေဖော်ဝါရီလ ၁ ရက်နေ့က အရပ်သား အစိုးရခေါင်းဆောင်တွေကို ဖမ်းဆီးဖယ်ရှားပြီး စစ်တပ်က အာဏာသိမ်းလိုက်ပြီး သီတင်းပတ် အနည်းငယ် အတွင်းမှာပဲ မလေးရှားရောက် မြန်မာနိုင်ငံသား ၁ ထောင်ကျော်ကို မြန်မာရေတပ် စစ်သင်္ဘောတွေနဲ့ နေရပ်ပြန်ပို့လိုက်တဲ့အတွက် လူ့အခွင့်အရေး လှုပ်ရှားသူတွေကြား စိုးရိမ်မှုတွေလည်း ထွက်ပေါ်ခဲ့ပါတယ်။ လူဝင်မှုကြီးကြပ်ရေး ဥပဒေနဲ့ ဖမ်းဆီးခံထားရသူတွေ အပါအဝင် မြန်မာနိုင်ငံသားတွေကို တရားရုံးက နေရပ်ပြန်မပို့ဖို့ ဆုံးဖြတ်ထားတဲ့ ကြားမှာပဲ မလေးရှား အာဏာပိုင်တွေက အစီအစဉ်အတိုင်း ပြန်ပို့လိုက်တဲ့အတွက်လည်း ဝေဖန်မှုတွေ ထွက်ပေါ်ခဲ့တာပါ။

နေရပ်ပြန်ပို့ခံရသူတွေထဲမှာ မြန်မာနိုင်ငံရောက်ရင် အပြစ်ပေး အရေးယူခံရမယ့် အန္တရာယ်ရှိသူတွေနဲ့ အရွယ်မရောက်သေးသူတွေ ပါဝင်ကြောင်းလည်း ပြောဆိုခဲ့ကြပါတယ်။ မြန်မာအာဏာပိုင်တွေကတော့ မလေးရှားရောက် မြန်မာတွေကို နေရပ်ပြန်ပို့ဖို့ နောက်ထပ် စစ်သင်္ဘောတွေ စေလွှတ်ခွင့်ပြုဖို့ အကြောင်းကြားထားတယ်လို့လည်း တာဝန်ရှိသူတွေနဲ့ နီးစပ်သူတဦးကို ကိုးကားပြီး သတင်းက ဖော်ပြပါတယ်။

မြန်မာနိုင်ငံမှာ စစ်အာဏာသိမ်းမှုကို ဆန့်ကျင်သူတွေအပေါ် လုံခြုံရေးတပ်ဖွဲ့တွေက အကြမ်းဖက် နှိမ်နင်းမှုတွေကြောင့် သေကျေထိခိုက်မှုတွေနဲ့ ဖမ်းဆီးမှုတွေ တိုးလာနေချိန်မှာပဲ မြန်မာနိုင်ငံလည်း အဖွဲ့ဝင်ဖြစ်တဲ့ အာဆီယံအသင်းက အရေးပေါ် အစည်းအဝေးခေါ်ဖို့ အလှည့်ကျဥက္ကဋ္ဌဖြစ်တဲ့ ဘရူနိုင်းနိုင်ငံကို အင်ဒိုနီးရှားနိုင်ငံက ပြီးခဲ့တဲ့ သီတင်းပတ်ထဲမှာပဲ တိုက်တွန်းထားတာပါ။ အင်ဒိုနီးရှား နိုင်ငံရဲ့ တိုက်တွန်းချက်ကိုတော့ မလေးရှားနိုင်ငံကလည်း ထောက်ခံထားပါတယ်။


ဗွီအိုအေ (မြန်မာပိုင်း)

https://burmese.voanews.com/a/myanmar-malaysia-deportation-/5827266.html



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ