မြန်မာနိုင်ငံသား ၁၀၀၀ ကျော် မလေးရှားက ပြန်ပို့မှု ကုလစိတ်ပျက်

ဖေဖော်ဝါရီ ၂၃ ရက်နေ့က မြန်မာနိုင်ငံသား ၁၀၀၀ ကျော် ကို မလေးရှားအစိုးရက ပြန်ပို့

မလေးရှားနိုင်ငံ ထိန်းသိမ်းရေးစခန်းတွေက မြန်မာနိုင်ငံသား ၁ ထောင်ကျော်ကို နေရပ်ပြန်ပို့လိုက်တဲ့အတွက် စိတ်ပျက်မိကြောင်း ကုလသမဂ္ဂ လူ့အခွင့်အရေး အထူးကိုယ်စားလှယ်တွေ ပြောဆိုလိုက်ပါတယ်။

နေရပ်ပြန်ပို့မယ့် အစီအစဉ်ကို ဆိုင်းငံ့ထားဖို့ တရားရုံးက အမိန့်ချထားတဲ့ကြားက အမျိုးသမီးနဲ့ ကလေးတွေ အပါအဝင် မြန်မာနိုင်ငံသား ၁ ထောင်ကျော်ကို မလေးရှား အာဏာပိုင်တွေက ပြန်ပို့ဖို့ ဆုံးဖြတ်ခဲ့တာဟာ စိတ်ပျက်စရာ ဖြစ်ရကြောင်း ညှဉ်းပမ်းနှိပ်စက်မှု၊ လူမဆန်တဲ့ လုပ်ရပ်မှုတွေ တားဆီးရေးဆိုင်ရာ အထူးကိုယ်စားလှယ် Nils Melzer ရွှေ့ပြောင်းအလုပ်သမားဆိုင်ရာ အထူးကိုယ်စားလှယ် Felipe González Morales တို့ အပါအဝင် ကုလသမဂ္ဂ အထူးကိုယ်စားလှယ် ၇ ယောက်က ဗုဒ္ဓဟူးနေ့မှာ ပူးတွဲကြေညာချက် ထုတ်ပြန် ပြောဆိုခဲ့တာပါ။

မလေးရှား အာဏာပိုင်တွေ အင်္ဂါနေ့က ပြန်ပို့လိုက်တဲ့ မြန်မာနိုင်ငံသား ၁၀၈၆ ယောက်မှာ အုပ်ထိန်းသူ မပါတဲ့ ကလေးတွေ၊ အသက် ၃ နှစ်အထိ ငယ်ရွယ်သူတွေ ပါဝင်ကြောင်းလည်း ထုတ်ပြန်ချက်မှာ ဖော်ပြထားပါတယ်။

ဖေဖော်ဝါရီလ ၁ ရက်နေ့က မြန်မာနိုင်ငံမှာ စစ်တပ်က အာဏာသိမ်းလိုက်ပြီးနောက် အခြေခံလူ့အခွင့်အရေး ချိုးဖောက်ခံရမှုတွေ ကျယ်ကျယ်ပြန့်ပြန့် ဖြစ်ပွားနေကြောင်း ကုလသမဂ္ဂ လူ့အခွင့်အရေး ကောင်စီမှာပါ တင်ပြထားတဲ့ အချိန်မျိုးမှာ နေရပ်ပြန်ပို့ခံရသူတွေ အန္တရာယ်ဖြစ်မှာ စိုးရိမ်ကြောင်းလည်း ပြောပါတယ်။

ကလေးတွေကို မိသားစုနဲ့ တကွဲတပြားထားတာမျိုး မလုပ်သင့်သလို၊ သူတို့အတွက် အကျိုးရှိမရှိ ဆိုတာကို ကိုယ်တိုင် မဆုံးဖြတ်နိုင်တဲ့ အခြေအနေမျိုးမှာ နေရပ်ပြန်ပို့တာဟာ မလုပ်သင့်တဲ့ လုပ်ရပ်ဖြစ်ကြောင်းလည်း ကုလသမဂ္ဂ ကျွမ်းကျင်သူတွေက ပြောဆိုထားကြပါတယ်။

မလေးရှားနိုင်ငံက ထိန်းသိမ်းရေး စခန်းတွေမှာ လွတ်ရက်စေ့နေပေမဲ့ နေရပ်မပြန်နိုင်သေးသူတွေ အပါအဝင် ကိုဗစ်ကပ်ရောဂါကာလ သောင်တင်နေသူတွေကို ၂ နိုင်ငံ တာဝန်ရှိသူတွေကြား ညှိနှိုင်းပြီး နေရပ်ပြန်ပို့နေတာပါ။ ဒါပေမဲ့လည်း မြန်မာနိုင်ငံမှာ စစ်တပ်က အာဏာသိမ်းလိုက်ပြီးနောက် နိုင်ငံရေး အခြေအနေတွေ မတည်မငြိမ် ဖြစ်နေချိန်မှာ နေရပ်ပြန်ပို့မယ့် အစီအစဉ်တွေကို ဆိုင်းထားဖို့ လူ့အခွင့်အရေး လှုပ်ရှားမှုအဖွဲ့တွေကလည်း တောင်းဆိုနေကြပါတယ်။

ဗွီအိုအေ (မြန်မာပိုင်း)

https://burmese.voanews.com/a/malaysia-deport-back-myanmar-immigrants/5791530.html