မမြသွဲ့သွဲ့ခိုင် ကျည်အစစ်နဲ့ပစ်ခံရတာဖြစ်ကြောင်း ဆရာဝန်တွေ အတည်ပြု

နေပြည်တော်က ဆန္ဒပြပွဲအတွင်း သေနတ်ဒဏ်ရာကြောင့် သေဆုံးသွားသူ မမြသွဲ့သွဲ့ခိုင်ဟာ သေနတ်ကျည်အစစ်နဲ့ ပစ်ခတ်ခံခဲ့ရတာဖြစ်ကြောင်း ဆရာဝန်တွေက အတည်ပြုလိုက်ပါတယ်။

ဒီကနေ့ မွန်းလွဲပိုင်းမှာပဲ နေပြည်တော် ကုတင် ၁၀၀၀ ဆေးရုံမှာ ကွယ်လွန်သွားတဲ့ မမြသွဲ့သွဲ့ခိုင်ကို ခွဲစိတ်စစ်ဆေးရာက ကျည်ဆံအစစ်နဲ့ ပစ်ခတ်မှုကြောင့် ဦးခေါင်းမှာ ဒဏ်ရာရ သေဆုံးခဲ့တယ်ဆိုတာ ကုသပေးနေတဲ့ ဆရာဝန်တွေက အတည်ပြုခဲ့တာဖြစ်ကြောင်း မိသားစုဝင်တဦးဖြစ်တဲ့ ဦးကျင်သန်းက ပြောပါတယ်။

"အထဲကတွေ့တဲ့ ကျည်ဆံက ဘယ်လိုကျည်ဆံမျိုးလည်း ကျနော်မေးတော့ ဒါသတ္ထုကျည်ဆံပါတဲ့ ။ ပစ်တာကလည်း သေနတ်ပါ။ ဆရာဝန်ကြီးတွေက ကျနော်၂ ခါလောက်မေးတော့ သူတို့အဲဒီအတိုင်းရှင်းပြပါတယ်"။

ဦးခေါင်းထဲက ထုတ်ယူရရှိထားတဲ့ ကျည်ဆံအစကိုလည်း သက်သေခံအဖြစ် ဆရာဝန်တွေက သိမ်းဆည်းထားတယ်လို့ ပြောပါတယ်။ ဖေဖော်ဝါရီလ ၉ ရက်နေ့က နေပြည်တော် ဆန္ဒပြပွဲတစ်ခုအတွင်း လုံခြုံရေးတပ်ဖွဲ့တွေရဲ့ ပစ်ခတ်မှုကြောင့် ကွယ်လွန်သွားတဲ့ မမြသွဲ့သွဲ့ခိုင်ကိုတော့ တနင်္ဂနွေနေ့မှာ သဂြိုဟ်ဖို့ စီစဉ်ထားတယ်လို့လည်း ပြောပါတယ်။

ပြီးခဲ့တဲ့ ၁၇ ရက်နေ့ကလုပ်တဲ့ သတင်းစာရှင်းလင်းပွဲအတွင်းမှာတော့ ဗိုလ်မှူးချုပ်ဇော်မင်းထွန်းက ရော်ဘာကျည်ဆန်သုံးပြီး ပစ်တယ်၊ ကျည်စစ်ကျည်မှန်နဲ ပစ်တယ်လို့ ထုတ်ပြန်ထားတာမရှိတဲ့အကြောင်းနဲ့ ဒီဖြစ်စဉ်နဲ့ပတ်သက်ပြီး မေးမြန်းနေတယ်လို့ ဖြေဆိုသွားပါတယ်။ သေနတ်ဒဏ်ရာရရှိခဲ့တယ်လို့ သုံးနှုန်းထားတာဖြစ်ပြီး ဒါနဲ့ပတ်သက်ပြီး မေးမြန်း ဆောင်ရွက်နေကြောင်းနဲ့ တရားဥပဒေနဲ့အညီ ဆောင်ရွက်သွားမှာဖြစ်တယ်လို့ ဖြေဆိုခဲ့ပါတယ်။အခု ဆရာဝန်တွေရဲ့ စစ်ဆေးချက် ထွက်လာပြီးတဲ့နောက်ပိုင်းမှာတော့ စစ်ကောင်စီဘက်က ဘာမှ တုံ့ပြန်ပြောဆိုတာမရှိသေးပါဘူး။

စစ်တပ်က အာဏာသိမ်းတာကို ဆန့်ကျင်တဲ့ လှုပ်ရှားမှုတွေအတွင်း ပထမဆုံး သေဆုံးမှုဖြစ်ရပ်အတွက် နေပြည်တော်၊ ရန်ကုန်၊ မန္တလေး စတဲ့ မြို့ကြီးတွေမှာလည်း အမှတ်တရ အခမ်းအနားတွေ ကျင်းပကြပါတယ်။

နိုင်ငံတကာ လူ့အခွင့်အရေး လှုပ်ရှားမှု အဖွဲ့တခုဖြစ်တဲ့ HRW ရဲ့ အာရှရေးရာ လက်ထောက်ညွှန်ကြားရေးမှူး Phil Robertson ကတော့ သေဆုံးမှုအတွက် ရဲတပ်ဖွဲ့မှာ တာဝန်ရှိကြောင်း ဒီကနေ့ပဲ ကြေညာချက်ထုတ်ပြန်ပြောဆိုခဲ့တာပါ။

ရဲတပ်ဖွဲ့နဲ့ ခပ်လှမ်းလှမ်းမှာ ရှိနေတဲ့ မမြသွဲ့သွဲ့ခိုင်ဟာ လက်ထဲမှာလည်း တစုံတရာမရှိပဲ နောက်ပြန်လှည့်ချိန်မှာ ပစ်ခတ်ခံခဲ့ရတာကို ဗွီဒီယိုမှတ်တမ်းမှာ တွေ့ရတဲ့ ရဲတပ်ဖွဲ့ရဲ့ လုပ်ရပ်ဟာ လက်ခံနိုင်စရာ မရှိကြောင်းနဲ့ စုံစမ်းစစ်ဆေးဖို့လည်း တောင်းဆိုထားပါတယ်။ 

ဗွီအိုအေ (မြန်မာပိုင်း)

https://burmese.voanews.com/a/ma-mya-twet-twet-khaing-was-shot-dead-live-bullet/5784826.html