ကိုဗစ်ကာကွယ်ဆေးထိုးပေးဖို့ မြန်မာပညာရေးဝန်ထမ်းစာရင်း ကောက်ယူနေ

မြန်မာနိုင်ငံမှာ ကပ်ရောဂါကြောင့် ပိတ်ထားရတဲ့ ကျောင်းတွေ ပြန်မဖွင့်သေးခင်မှာပဲ ပညာရေးဝန်ထမ်းတွေကို ကိုဗစ်ကာကွယ်ဆေး ထိုးပေးဖို့ ပြင်ဆင်နေတဲ့အကြောင်း ပြောပြပါမယ်။ ဗွီအိုအေမြန်မာပိုင်း သတင်းထောက် မအဂ္ဂနွန်က သတင်းပေးပို့ထားပါတယ်။

ကိုဗစ်ရောဂါကာကွယ်ဆေး စတင်ထိုးပေးနေတဲ့ မြန်မာနိုင်ငံမှာ ပညာရေးဝန်ထမ်းတွေကိုပါ ထိုးနှံပေးနိုင်ဖို့ သက်ဆိုင်ရာ ပညာရေးဌာနတွေကို စာရင်းကောက်ယူနေပါတယ်။ ရောဂါကူးစက်မှု ဒုတိယအများဆုံးဖြစ်တဲ့ မန္တလေးတိုင်းမှာ ဆိုရင်လည်း ကာကွယ်ဆေးထိုးနိုင်ဖို့ ပညာရေးဝန်ထမ်း စာရင်းတွေကို ကျန်းမာရေးဝန်ကြီးဌာနထံ ပေးပို့ထားတယ်လို့လည်း တိုင်းပညာရေးမှူး၊ ဒုတိယညွှန်ကြားရေးမှူးချုပ် ဦးမောင်ကြယ်က ပြောပါတယ်။

“ကျနော်တို့ ပညာရေးဌာနက ဆရာ၊ ဆရာမပေါင်း ၄၉,၆၆၇ ပါခင်ဗျာ၊ အကုန်လုံးပါခင်ဗျ။ ပို့လိုက်ပြီ၊ မနေ့က နောက်ဆုံးပို့လိုက်ပြီ.. မနေ့ကချုပ်လိုက်တာ၊ ဆရာမတွေရော ရုံးဝန်ထမ်းတွေရော ဝန်ထမ်းပေါင်းပေါ့။ ကျနော်တို့ကို ဒီစာရင်းလေပဲတောင်းတယ်ဆိုတော့ ကျနော်တို့ကို ဘယ်အဆင့်သတ်မှတ်သလဲတော့ ကျနော်တို့လည်း ပြောလို့မရပါဘူးခင်ဗျာ။ ကျနော်တို့ ထိုးနိုင်မယ့်နေရာကတော့ ကျနော်တို့ရဲ့ မြို့နယ်ဆိုမြို့နယ်ပညာရေးမှူး၊ ခရိုင်ဆိုရင် ခရိုင်ပညာရေးမှူးရုံး၊ တိုင်းဆိုရင် တိုင်းပညာရေးမှူးရုံးပါ စာရင်းအနေနဲ့ ကျနော်တို့ အဲ့လိုမျိုးပို့လိုက်ပါတယ်။”

အိန္ဒိယနိုင်ငံက ချစ်ကြည်ရေးလက်ဆောင်အဖြစ် ပေးအပ်ထားတဲ့ Covishield ကိုဗစ်ကာကွယ်ဆေး ၁,၅၀၀,၀၀၀ ကို အသုံးပြုပြီး စတင်လိုက်တဲ့ အစီအစဉ်မှာတော့ ကပ်ရောဂါတိုက်ဖျက်ရေး ရှေ့တန်းက ဆောင်ရွက်နေတဲ့ ကျန်းမာရေးဝန်ထမ်းတွေကို ဦးစားပေးခဲ့တာပါ။ နောက်တဆင့် အနေနဲ့ အစိုးရအရာရှိတွေ၊ သက်ကြီးရွယ်အိုတွေ ဝန်ထမ်းတွေကိုလည်း ကာကွယ်ဆေးထိုးပေးမှာ ဖြစ်ပါတယ်။ တိုင်းရင်းသားဘာသာ သင်ကြားပေးနေတဲ့ ဆရာ၊ ဆရာမအပါအဝင် ပညာရေးနဲ့ဆက်စပ်တဲ့ ရုံးဝန်ထမ်း ၁၈,၀၀၀ ကျော်ရှိတဲ့ မွန်ပြည်နယ်မှာလည်း စာရင်းပြုစုပြီး တင်ပြထားတယ်လို့ ပြည်နယ်ပညာရေးမှူး ဒေါက်တာချိုချိုမြတ်အောင်ကပြောပါတယ်။

“ဟုတ်ကဲ့။ စာရင်း ဇယားတွေ ကျမတို့ ပြုစုလို့ပြီးနေပါပြီ၊ ပေးပို့ပြီးနေပါပြီးရှင်။ ပညာရေးဝန်ထမ်း ၁၈,၀၀၀ ကျော်ရှိပါတယ်ရှင်။ အားလုံးပါရှင် ကျမတို့ ပြည်နယ်ပညာရေးမှူရုံး၊ ခရိုင်ပညာရေးမှူးရုံး၊ မြို့နယ်ပညာရေးမှူးရုံး ပြီးတော့အခြေခံပညာကျောင်း အားလုံးပေါ့နော်။ အဲ့ဒါအပြင်ကို အဲ့ဒီမှာ ရှိနေတဲ့ ရုံးဝန်ထမ်း၊ သင်ကြားရေးဝန်ထမ်း၊ စီမံရေးရာဝန်ထမ်း အားလုံးအပြင်ကို နေ့စားလပေးနဲ့ဆောင်ရွက်နေတဲ့ တိုင်းရင်းသားဘာသာသင် ဆရာ၊ ဆရာမများစာရင်းလည်း ပါပါတယ်နော်။ အဲ့ဒါတွေ အားလုံးကျမတို့ပေးပို့ထားပါတယ်ရှင်။”

မြန်မာနိုင်ငံမှာ ပုံမှန်ထက် နောက်ကျပြီးမှ ဖွင့်ခဲ့တဲ့ ကျောင်းတွေကိုတော့ ကပ်ရောဂါ ကူးစက်မှုတွေကြောင့် ပြန်ပိတ်ခဲ့ရတာ အခုဆိုရင် ပညာသင်နှစ် ၁ နှစ်နီးပါး ရှိနေပါပြီ။ ကျောင်းတွေပြန်ဖွင့်မယ့်အချိန် အတိအကျမကြေညာသေးပေမဲ့ ပြန်ဖွင့်တဲ့အခါ အသင့်ဖြစ်အောင် ပြင်ဆင်နေတယ်လို့လည်း မန္တလေးတိုင်းပညာရေးမှူး ဦးမောင်ကြယ်က ပြောပါတယ်။

“ကျောင်းဖွင့်နိုင်ရေးကတော့ ကျနော်တို့ရဲ့ ဒီကိုဗစ်ကာကွယ်ထိန်းချုပ်ရေးက ညွှန်ကြားချက်နဲ့ပဲ လုပ်သွားမှာဆိုတော့ ကျနော်တို့ရဲ့ အခြေခံပညာဦးစီးဌာနကတော့ ဖွင့်မှာဆိုရင် အဆင်သင့်ဖြစ်အောင်လို့ ကျနော်တို့ ပြင်ဆင်ထားဖို့ အဲ့ဒီလိုပဲ ညွှန်ကြားထားလို့ ကျနော်တို့လည်း ကျောင်းတွေမှာတော့ အဲ့ဒီလို နှိုးဆော်ထားပါတယ်ခင်ဗျ။”

ကိုဗစ်ကာကွယ်ဆေး စထိုးပေးနေပေမဲ့လည်း ရောဂါအန္တရာယ်ကို သတိပြုဖို့နဲ့ အပြင်သွားရင် နှာခေါင်းစည်းတပ်တာ၊ လက်ဆေးတာ၊ လူစုလူဝေး ရှောင်တာတွေလို ကျန်းမာရေးဆိုင်ရာ ညွှန်ကြားချက်တွေကို ဆက်လက် လိုက်နာကြဖို့လည်း မနေ့တုန်းက ကျန်းမာရေး ဝန်ထမ်းတွေကို ကာကွယ်ဆေးစထိုးပေးတဲ့ နေပြည်တော်က အခမ်းအနားမှာ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က တွန်းတိုက်ထားပါတယ်။

ကျန်းမာရေးနဲ့ အားကစားဝန်ကြီးဌာနရဲ့ ဒီကနေ့ အစောပိုင်းအထိ ထုတ်ပြန်ထားတဲ့စာရင်းအရဆိုရင်တော့ မြန်မာနိုင်ငံမှာ ကပ်ရောဂါကြောင့် သေဆုံးသူ ၃,၀၀၀ ကျော်နဲ့ ကူးစက်ခံရသူ အတည်ပြုလူနာပေါင်းက ၁၃၈,၀၀၀ ကျော်ရှိနေပါတယ်။

အဂ္ဂနွန်/ VOA Burmese

https://burmese.voanews.com/a/myanmar-covid-education/5754947.html