သမ္မတနဲ့ နိုင်ငံတော်အတိုင်ပင်ခံပုဂ္ဂိုလ်တိုက်ရိုက်ထိတွေ့သူများ ရောဂါပိုးမတွေ့

နိုင်ငံတော်သမ္မတ ဦးဝင်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်။ (ဓာတ်ပုံ - Myanmar State Counsellor Office - သြဂုတ် ၁၉၊ ၂၀၂၀)

နိုင်ငံတော်သမ္မတ ဦးဝင်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့နဲ့ တိုက်ရိုက်ဖြစ်စေ၊ သွယ်ဝိုက်ဖြစ်စေ ဆက်စပ်သူအားလုံးကို မနေ့ကနဲ့ ဒီနေ့ COVID-19 ရောဂါစစ်ဆေးတာမှာ ဘယ်သူ့မှာမှ ရောဂါပိုးကူးစက်ထားတာ မတွေ့ရဘူးလို့ နိုင်ငံတော်အတိုင်ပင်ခံပုဂ္ဂိုလ်ရုံး ညွှန်ကြားရေးမှူးချုပ် ဦးဇော်ဌေးက သမ္မတအိမ်တော် သတင်းထောက်တွေအတွက် ဒီကနေ့ ထုတ်ပြန်ချက်တခုမှာ ပြောထားပါတယ်။

သမ္မတရော၊ အတိုင်ပင်ခံပုဂ္ဂိုလ်ပါ ကျန်းမာရေးကောင်းမွန်ပြီး လုပ်ငန်းတာဝန်တွေ ပုံမှန်အတိုင်း လုပ်ဆောင်နေတယ်လို့လည်း ဆိုပါတယ်။

သမ္မတအိမ်တော်နဲ့ သမ္မတရုံးက ဌာနတွေအားလုံး အလုပ်မပိတ်ဘဲ ဝန်ထမ်းအင်အား တဝက်စီခွဲ ရုံးတက်တဲ့စနစ်နဲ့ လုပ်ကိုင်နေကြပြီးတော့ ယန္တရားတွေ ပုံမှန်အတိုင်း လည်ပတ်နေတယ်လို့ ပြောပါတယ်။

သမ္မတအိမ်တော်က သူအပါအဝင် ဒုတိယညွှန်ကြားရေးမှူးချုပ် နှစ်ဦးနဲ့ ဓာတ်ပုံဆရာတစ်ဦးတို့ စစ်ဆေးတာမှာလည်း ရောဂါပိုး ကင်းရှင်းတယ်လို့ ပြောပါတယ်။

သူတို့ဌာနတွေထဲက ရောဂါပိုးကူးစက်ခံထားရတယ်လို့ သတင်းထွက်ထားသူဟာ အရာရှိကြီးအဆင့်မဟုတ်ဘဲ လက်ထောက်ညွှန်ကြားရေးမှူး တစ်ဦးသာဖြစ်ပြီးတော့ လူကြီးတွေနဲ့ တိုက်ရိုက်ထိတွေ့ရသူ မဟုတ်ဘူးလို့ ဦးဇော်ဌေးကပြောပါတယ်။

အဲဒီ လက်ထောက်ညွှန်ကြားရေးမှူးနဲ့ ဌာနတူ ဝန်ထမ်း ၁၁ ဦးကို စစ်ဆေးတာမှာ အားလုံး ရောဂါကင်းရှင်းပြီး သူနဲ့ တွေ့ထားသူ၊ မတွေ့ပေမယ့်လည်း အနေနီးထားသူအားလုံးကို သီးခြားခွဲနေခိုင်းပြီး စစ်ဆေးတာလို့လည်း ပြောပါတယ်။

သမ္မတအိမ်တော် သတင်းထောက်တွေထဲက ဓာတ်ခွဲနမူနာယူ စစ်ဆေးခံရမယ့် သတင်းထောက်တွေအနေနဲ့ စိတ်မပူကြဖို့နဲ့ ကျန်းမာရေးစည်းမျဉ်းတွေကို ဂရုပြုလိုက်နာကြဖို့ ဦးဇော်ဌေးက တိုက်တွန်းထားပါတယ်။

ဗွီအိုအေ (မြန်မာပိုင်း)

https://burmese.voanews.com/a/myanmar-president-and-dssk-covid-negative/5576679.html