အမေရိကန်ကို ကိုဗစ်ပစ္စည်းလိမ်လည်ရောင်းချသူ ဗီယက်နမ်နိုင်ငံသား ၃ ဦး ဖမ်းခံရ

ဗီယက်နမ် လုံခြုံရေး ရဲတဦးကို တွေ့ရစဉ်

အမေရိကန်တွေကို ပစ်မှတ်ထားပြီး ကိုရိုနာဗိုင်းရပ်စ် ကပ်ရောဂါဆိုင်ရာ ပစ္စည်းတွေ အွန်လိုင်းကနေ ရောင်းချပြီး လိမ်လည်မှု နဲ့ ဗီယက်နမ်နိုင်ငံသား ၃ ဦးကို ဗီယက်နမ် အာဏာပိုင်တွေက ဖမ်းဆီးလိုက်ပါတယ်။

ဗီယက်နမ်ဆိုင်ရာ အမေရိကန် သံရုံးနဲ့ ကောင်စစ်ဝန်ရုံးက ထုတ်ပြန်တဲ့ ကြေညာချက် အရ ဗီယက်နမ်နိုင်ငံသားတွေဖြစ်တဲ့ Phan Dinh Thu ၊ Tran Quoc Khanh နဲ့ Nguyen Duy Toan ၃ ယောက်က ဝက်ဆိုက်ဘ်ပေါင်း ၃၀၀ ကျော်နဲ့ လုပ်ငန်း လည်ပတ်ခဲ့ကြောင်း၊ သူတို့က အမေရိကန်က ဆိုင်တွေမှာ ပြတ်လပ်နေတဲ့ လက်သန့်ဆေးရည် နဲ့ တခြားပစ္စည်းတွေကို အွန်လိုင်းကနေ ကြော်ငြာ ရောင်းချပြီး ဝယ်သူတွေဆီကို မပေးပို့ဘဲ နေခဲ့ကြောင်း ဖော်ပြထားပါတယ်။ အမေရိကန် ပြည်ထောင်စုတွင်း ပြည်နယ် ၅၀ က ပစ္စည်းမှာယူသူ လူပေါင်း ၇၀၀၀ လောက်ဆီကို အမေရိကန် ဒေါ်လာ ၁ သန်းနီးပါးတန်ဘိုးရှိတဲ့ ပစ္စည်းတွေ ရောင်းချလိမ်လည်ခဲ့တာဖြစ်ပါတယ်။

လိမ်လည်သူတွေက အမေရိကန်အခြေစိုက် ငွေပေးချေမှုစနစ်ကို အသုံးပြုသလို ရာချီတဲ့ အီးမေးလ် အကောင့် တွေနဲ့ ဝက်ဘ်ဆိုက် အသုံးပြုသူ user အကောင့်တွေကို ဖွင့်ထားပြီး ပစ္စည်းတွေ လိမ်လည် ရောင်းချခဲ့တာ ဖြစ်ပါတယ်။ အဲဒီလို ရောင်းချနေတာကို ဥပဒေစိုးမိုးရေး အရာရှိ တွေ မသိအောင် လုပ်ထားခဲ့တာကိုလည်း အမေရိကန် ပြည်တွင်း လုံခြုံရေးဝန်ကြီး ဌာနက စစ်ဆေးတွေ့ ရှိခဲ့ပါတယ်။ လိပ်စာတွေနဲ့ ဖုန်းနံပါတ် အမှားတွေ ဝက်ဘ်ဆိုဒ်တွေပေါ်မှာ ဖော်ပြထားတာကြောင့်လည်း လိမ်လည်သူတွေနဲ့ မသက်ဆိုင်တဲ့လူတွေနဲ့ ကုမ္ပဏီတွေကို အလိမ်ခံရသူတွေက တိုင်တန်းမှုတွေ မှားယွင်း ပြုလုပ်ခဲ့မိကြပါတယ်။

အခုလို လိမ်လည်မှုတွေနဲ့ ပတ်သက်တဲ့ သတင်းအချက်အလက်တွေကို အမေရိကန် ပြည်တွင်း လုံခြုံရေးဝန်ကြီး ဌာနက ဗီယက်နမ် ပြည်သူ့လုံခြုံရေး ဝန်ကြီးဌာနကို ပေးပို့ခဲ့တာကြောင့် နောက်ဆုံးမှာ လိမ်လည်သူတွေကို ဖမ်းဆီးလိုက်နိုင်တာ ဖြစ်ပါတယ်။

ဗွီအိုအေ (မြန်မာပိုင်း)

https://burmese.voanews.com/a/covid-protection-online-fake-sellers-form-vietnam-/5548772.html