Texas က တရုတ်ကောင်စစ်ဝန်ရုံးပိတ်တဲ့ အမေရိကန် အကြောင်းပြချက်



Share/Bookmark
US orders to close Chinese consulate in Houston
အမေရိကန် ဉာဏပစ္စည်းမူပိုင်ခွင့်ကို တရုတ်ဘက်က မကြာခဏ ခိုးယူမှုကြောင့် တက္ကဆက်ပြည်နယ် ဟူစတန်က တရုတ်ကောင်စစ်ဝန်ရုံးကို ပိတ်ပစ်ဖို့ အမိန့်ပေးခဲ့ကြောင်းအမေရိကန်နိုင်ငံခြားရေးဝန်ကြီး Mike Pompeo က ဗုဒ္ဓဟူးနေ့က ပြောကြားခဲ့ပါတယ်။

ဒိန်းမတ်နိုင်ငံရောက်ရှိနေတဲ့ Mike Pompeo က ဗုဒ္ဓဟူးနေ့က ပြုလုပ်တဲ့ သတင်းစာရှင်းလင်းပွဲမှာ တရုတ်ကွန်မြူနစ်အစိုးရရဲ့ အမူအကျင့်နဲ့ပတ်သက်လို့ အမေရိကန်က ရှင်းရှင်းလင်းလင်း စည်းသတ်မှတ်လိုက်တာဖြစ်တယ်လို့ ပြောခဲ့ပါတယ်။ တရုတ်က မလုပ်ဆောင်ဘူးဆိုရင် အမေရိကန်ပြည်သူတွေနဲ့ နိုင်ငံရဲ့ လုံခြုံရေး၊ စီးပွားရေးနဲ့ အလုပ်အကိုင်တွေကို ကာကွယ်ဖို့ အမေရိကန်အစိုးရက အရေးယူဆောင်ရွက်ဖို့ရှိနေကြောင်း နိုင်ငံခြားရေးဝန်ကြီးက ဆိုပါတယ်။

၀န်ထမ်း ၆၀ လောက်ရှိနေတဲ့ ဟူစတန်က တရုတ်ကောင်စစ်ဝန်ရုံးကို သောကြာနေ့ နောက်ဆုံးထား ပိတ်ဖို့ အချိန်ပေးထားပါတယ်။ အခုလို အမေရိကန်အစိုးရရဲ့ အမိန့်ဟာ မကြာသေးခင်က ကမ္ဘာ့စီးပွားရေး ထိပ်တန်းအင်အားကြီး အမေရိကန်နဲ့ တရုတ်ကြား မကြာသေးခင်က ဖြစ်လာတဲ့ ဆက်ဆံရေး တင်းမာမှုကို အခု အမေရိကန်အစိုးရရဲ့ အမိန့်က ပိုပြီး အရှိန် မြင့်မားလာစေတာပါ။

သတင်းစာရှင်းလင်းပွဲအတွင်း Pompeo ကပြောကြားရာမှာ တရုတ်ရဲ့ ဟူစတန် လုပ်ရပ်ဟာ ကျယ်ပြန့်တဲ့ အကျိုးသက်ရောက်မှုတွေရှိနေတယ်လို့ ဆိုပါတယ်။ အမေရိကန် တနိုင်ငံတည်းသာမက ဥရောပရဲ့ ဉာဏပစ္စည်းမူပိုင်ခွင့်ပါ တရုတ်က ခိုးယူနေပြီး အလုပ်ပေါင်း ထောင်နဲ့ချီ ဆုံးရှုံးနစ်နာ စေခဲ့တယ်လို့ သူက ပြောပါတယ်။

တရုတ်နိုင်ငံမှာ စတင်ခဲ့တဲ့ ကိုရိုနာဗိုင်းရပ်စ်ကူးစက်မှုအခြေအနေ ပြန်ကောင်းလာဖို့မတိုင်ခင် အမေရိကန်မှာ ပိုပြီး ဆိုးရွားလာဖို့ရှိနေကြောင်း သမ္မတ Donald Trump ကဝန်ခံ ပြောကြားပြီးနောက် တရက်မှာ အခုလို တရုတ်ကောင်စစ်ဝန်ရုံးပိတ်ဖို့ ညွန်ကြားချက် ထွက်လာတာ ဖြစ်ပါတယ်။ အမေရိကန်မှာ ပြီးခဲ့တဲ့ သီတင်းပတ်က ကိုရိုနာဗိုင်းရပ်စ်ကူးစက်မှု တနေ့ကို ပျမ်းမျှ ၆၆၀၀၀ အထိတိုးခဲ့ပြီး သေဆုံးသူ စုစုပေါင်း ၁၄၂၀၀၀ အထိရှိခဲ့ပါတယ်။

ဗွီအိုအေ (မြန်မာပိုင်း)
https://burmese.voanews.com/a/us-order-to-close-chinese-consulate-in-huston-/5513757.html

Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Advertisement

 

အသစ် တင်သမျှ သတင်းများ အလို အလျှောက်ပို့ ပေးပါမည်

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ