ဒေါ်အောင်ဆန်းစုကြည်နဲ့ ဦးဝင်းမြင့်အပါအဝင် လက်ရှိ NLD အမတ်အများစု ရွေးကောက်ပွဲပြန်ဝင်မယ်

နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် (ညာ) နဲ့ သမ္မတ ဦးဝင်းမြင့် (၀ဲ)။

နိုဝင်ဘာ ၈ ရက်နေ့ ကျင်းပမယ့် ရွေးကောက်ပွဲမှာ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ သမ္မတ ဦးဝင်းမြင့် အပါအဝင် အမျိုးသားဒီမိုကရေစီအဖွဲ့ချုပ် (NLD) ပါတီ ကိုယ်စားလှယ်ဟောင်းအများစု ပြန်လည်ယှဉ်ပြိုင်မှာဖြစ်ကြောင်း ဒီနေ့ပဲ ကြေညာလိုက်တဲ့အကြောင်း ပြောပြပါမယ်။ ဗွီအိုအေမြန်မာပိုင်းသတင်းထောက် မမေခက သတင်းပေးပို့ထားပါတယ်။

NLD ပါတီ ထိပ်တန်း ခေါင်းဆောင်တွေ အပါအဝင် ၂၀၁၅ ခုနှစ် ရွေးကောက်ပွဲမှာ ယှဉ်ပြိုင်ခဲ့ဖူးတဲ့ ကိုယ်စားလှယ်တွေထဲက ၈၀ ရာခိုင်နှုန်းလောက် ပြန်အရွေးခံမှာဖြစ်ကြောင်း ဒီနေ့ပဲ သတင်းထုတ်ပြန်လိုက်တာပါ။ ဒီတကြိမ် ရွေးကောက်ပွဲအတွက် ကိုယ်စားလှယ်လောင်း ရွေးချယ်ရာမှာတော့ ပြီးခဲ့တဲ့ အစိုးရနဲ့ လွှတ်တော် သက်တမ်းအတွင်း ဆောင်ရွက်ခဲ့တာတွေ ပါတီအပေါ် သစ္စာရှိရှိနဲ့ အနစ်နာခံသူတွေကို ဦးစားပေး ရွေးချယ်ခဲ့ကြောင်းလည်း ပါတီထိပ်တန်းခေါင်းဆောင် ဒေါ်အောင်ဆန်းစုကြည်က အင်တာနက် လူမှုကွန်ရက်မှာ ဗွီဒီယိုနဲ့ ရှင်းပြခဲ့ပါတယ်။

"ကိုယ်စားလှယ်တွေကို ရွေးတဲ့နေရာမှာ ဘာကိုအဓိကထားလဲဆို သစ္စာရှိမှုနဲ့ အတွေ့အကြုံရှိမှုကို အဓိကထားတယ်။ ဘာလို့အလေးထားရလဲဆိုတော့ အဖွဲ့ချုပ်က ဖြတ်သန်းလာတဲ့လမ်း အင်မတန်ကြမ်းပါတယ်။ ရှည်လည်း ရှည်တယ်။ လမ်းဆုံးလည်း မရောက်သေးပါဘူး။ ကြမ်းတမ်းမှု မပြီးသေးပါဘူး။ ဒါကြောင့် ခံနိုင်ရည်ရှိမှုနဲ့ သစ္စာခိုင်မြဲမှုကို ပိုပြီး အင်မတန်မှ အလေးထားပါတယ်။"

ဒီအထဲမှာ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ သမ္မတ ဦးဝင်းမြင့် အပါအဝင် NLD ပါတီထိပ်တန်းခေါင်းဆောင်တွေလည်း ပါဝင်မှာဖြစ်ကြောင်း ပါတီပြောခွင့်ရ ဒေါက်တာဇော်မြင့်မောင်က နေပြည်တော်မှာ သတင်းထောက်တွေကို ပြောလိုက်တာပါ။

"ဒေါ်အောင်ဆန်းစုကြည်က ကော့မှူးမြို့နယ်က ပြည်သူ့လွှတ်တော်ကနေ ဝင်ပြိုင်ပါမယ်။ သမ္မတကြီး ဦးဝင်းမြင့်က တာမွေ ပြည်သူကနေ ဝင်ပြိုင်ပါမယ်။ ဝန်ကြီးချုပ်တွေပြိုင်မှာလားဆိုတော့ ယေဘူယျပြိုင်ခွင့်ရှိတယ်။ မပြိုင်ရဘူးလို့ ပြောခွင့်မရှိဘူး။ တော်တော်များများ ပြန်တင်ပါတယ်။ တော်တော်များများ တင်ထားပါတယ်။"

အမျိုးသားလွှတ်တော်မှာ ၁၆၁ နေရာ၊ ပြည်သူ့လွှတ်တော်မှာ ၃၁၉ နေရာ၊ ပြည်နယ်နဲ့တိုင်းဒေသကြီး လွှတ်တော်မှာ ၆၂၂ နေရာ၊ တိုင်းရင်းသားရေးရာဝန်ကြီး ၂၉ နေရာအတွက် စုစုပေါင်း ကိုယ်စားလှယ်လောင်း ၁,၁၃၁ ဦးကို NLD ရွေးချယ်ထားတာပါ။ ဒါပေမဲ့လည်း တိုင်းရင်းသားဒေသတွေက မဲဆန္ဒနယ် တချို့မှာတော့ NLD ပါတီက ယှဉ်ပြိုင်မှာ မဟုတ်ဘူးလို့လည်း ပါတီပြောခွင့်ရ ဒေါက်တာဇော်မြင့်မောင်က ပြောပါတယ်။

"တိုင်းရင်းသားတွေဆိုရင် အြဲ့ပည်နယ်မှာ ရှိတဲ့ တိုင်းရင်းသားတွေပါတယ်။ တိုင်းရင်းသားပါတီတွေ ဆက်ဆံရေးမှာ NLD ဘက်ကနေ ပါတီကြီးအနေနဲ့ သုံးနေတာတွေ ရှိတယ်။ ကျနော်တို့ တိုင်းရင်းသားနယ် မြေတွေမှာ အဲမှာရှိတဲ့ တိုင်းရင်းသားနယ်တွေက NLD အဖွဲ့ဝင်တွေကို ရွေးတာဖြစ်ပါတယ်။ ပြည်မကနေ သွားမပြိုင်ပါဘူး။ မပြိုင်တဲ့နေရာရှိတယ်။ ရခိုင်တို့ ဘာတို့ကို သွားမပြိုင်ပါဘူး။ ရခိုင်မှာ ပြည်သူ ငါး နေရာမပြိုင်ဘူး။ ရှမ်းမှာလည်း ရှိတယ်။ ခြုံကြည့်ရင် အမျိုးသား ခြောက် နေရာ၊ ပြည်သူ့ ၁၁ နေရာ မပြိုင်နိုင်ဘူး။ အဲ့ထဲ မကျင်းပနိုင်တာ ပါကောင်းပါမယ်။ ပြည်နယ်တိုင်းမှာလည်းဒီလိုပဲ။ ယေဘူယျကြည့်ရင် ၂၀၁၅ ထက် ပိုပြိုင်နိုင်တယ်။ ၃၊ ၄ နေရာတိုးပြိုင်နိုင်ခဲ့တယ်။"

လက်ရှိ ပြည်နယ်နဲ့ တိုင်းဒေသကြီး ဝန်ကြီးချုပ်အများစုဟာလည်း လာမယ့်ရွေးကောက်ပွဲမှာ ပြန်လည်အရွေးခံမှာ ဖြစ်ပေမဲ့ ပြီးခဲ့တဲ့ အစိုးရသက်တမ်းအတွင်း အငြင်းပွားစရာတွေနဲ့ ဝေဖန်မှုတွေ ကြုံခဲ့ရတဲ့ ရန်ကုန်တိုင်းဝန်ကြီးချုပ် ဦးဖြိုးမင်းသိန်းကတော့ ကျန်းမာရေး အကြောင်းပြချက်နဲ့ အရွေးခံမှာ မဟုတ်ကြောင်းလည်း ဒေါက်တာဇော်မြင့်မောင်က ပြောပါတယ်။

ဒီတကြိမ်ရွေးကောက်ပွဲမှာ လူဟောင်းတွေ အများစု ပြန်လည်အရွေးခံဖို့ NLD ပါတီက ဆုံးဖြတ်ခဲ့တဲ့ အပေါ်မှာတော့ နိုင်ငံရေးလေ့လာသုံးသပ်သူ ဒေါက်တာရန်မျိုးသိမ်းကတော့ အခုလို သုံးသပ်ပါတယ်။

"မဲဆန္ဒရှင် ပြည်သူတွေရဲ့ ဆန္ဒနဲ့ဖီလာဆန့်ကျင်နေတယ်လို့ မြင်ပါတယ်။ ပြည်သူလူထုရဲ့ အသံတွေကို နားထောင်ပြီးတော့ လွှတ်တော်မှာ တင်ပြဆွေးနွေးတာမှာ အားနည်းတဲ့ လွှတ်တော်ကိုယ်စားလှယ်တွေကို လာမယ့်ရွေးကောက်ပွဲမှာ ချန်လှပ်ထားမယ်ထင်ခဲ့တယ်။ လက်ရှိမှာတော့ လွှတ်တော်ကိုယ်စားလှယ်ဟောင်း ၈၀ ရာခိုင်နှုန်းလောက်ကို ကိုယ်စားလှယ်လောင်းအဖြစ် ရွေးချယ်ထားလို့ ဒါဟာ လာမယ့်ရွေးကောက်ပွဲမှာ NLD အနိုင်ရဖို့အတွက် ကြီးမားတဲ့ စိန်ခေါ်မှု အကြပ်အတည်း တခုဖြစ်လာနိုင်တယ်လို့ သုံးသပ်ပါတယ်။"

နိုဝင်ဘာလထဲ ကျင်းပမယ့် ရွေးကောက်ပွဲမှာ ဝင်ရောက်ယှဉ်ပြိုင်ကြမယ့် နိုင်ငံရေးပါတီပေါင်း ၉၇ ပါတီအနေနဲ့ ကိုယ်စားလှယ်လောင်း အမည်စာရင်းတွေကိုတော့ သြဂုတ်လ ၇ ရက်နေ့မှာ နောက်ဆုံးထားပြီး ပြည်ထောင်စုရွေးကောက်ပွဲ ကော်မရှင်ကို တင်ပြရမှာပါ။ ရွေးကောက်ပွဲမှာ မဲပေးခွင့်ရှိသူ ၃၇ သန်းကျော် ရှိမယ်လို့ ကော်မရှင်က ခန့်မှန်းထားပေမဲ့ COVID-19 ကပ်ရောဂါကြုံနေရချိန် အကန့်အသတ်တွေနဲ့ ပြည်ပရောက် မြန်မာနိုင်ငံသား အများစု မဲပေးခွင့်ရနိုင်ပါ့မလားဆိုတာကို စိုးရိမ်မှုတွေလည်း ရှိနေပါတယ်ရှင်။

မေခ  / ဗွီအိုအေ ( မြန်မာပိုင်း)
https://burmese.voanews.com/a/myanmar-eletion-dassk-uwinmyint/5514491.html