တပ်မတော်က ဖမ်းထားတဲ့ ရမ်းဗြဲဒေသခံတဦး သေဆုံး



Share/Bookmark
ရခိုင်ပြည်နယ် မောင်တောမြို့မှာ တပ်စွဲထားတဲ့ မြန်မာစစ်တပ် တပ်ဖွဲ့ဝင်များ။ (သြဂုတ် ၃၁၊ ၂၀၁၇)
ရခိုင်ပြည်နယ်မှာ လုံခြုံရေးတပ်ဖွဲ့တွေက ဖမ်းဆီးထားစဉ် ဒေသခံတစ်ဦး သေဆုံးသွားတဲ့ အကြောင်းပြောပြပါမယ်။ ဗွီအိုအေမြန်မာပိုင်းသတင်းထောက် ကိုသက်နိုင်က သတင်းပေးပို့ထားပါတယ်။

ရခိုင်လက်နက်ကိုင်အဖွဲ့ AA နဲ့ ဆက်နွယ်တယ်ဆိုတဲ့ သံသယနဲ့ တပ်မတော်က စနေနေ့မှာပဲ ဖမ်းဆီးခဲ့တဲ့ ရမ်းဗြဲမြို့နယ် အလယ်ချောင်းကျေးရွာက ဒေသခံ ခြောက် ဦး ထဲက တစ်ဦးဟာ ရဲစခန်းမှာ မနေ့က သေဆုံးခဲ့တာပါ။ သေဆုံးသူဟာ ကိုယ့်ကိုယ်ကို အဆုံးစီရင်သွားတာဖြစ်တယ်လို့ ရဲတပ်ဖွဲ့က အကြောင်းကြားခဲ့ကြောင်း အလယ်ချောင်းကျေးရွာအုပ်ချုပ်ရေးမှူး ဦးမြင့်လွင် ကပြော ပါတယ်။

"ဖမ်းထားတဲ့ ခြောက် ယောက်ထဲက တစ်ယောက်ဆုံးတာကတော့ မနေ့က တစ်နာခွဲလောက်မှာ ရဲစခန်းက ဖုန်းဆက်ပါတယ်။ စောမြင့်ထွန်း ကြိုးဆွဲချပြီး ဆုံးတယ်ဆိုပြီးတော့ ကျတော်က မိသားစုတွေကို ခေါ်ပြီးတော့ တခါတည်း မအီ ကို လိုက်တယ်။ ကျန်တဲ့ ငါး ယောက်နဲ့လည်း မိသားစုက တွေ့ရမယ်ဆိုပြီး လိုက်လာကြတယ် ဟိုရောက်တော့ ကျန် တဲ့ မိသားစုနဲ့ တွေ့ခွင့်မပေးဘူး။ ကျနော်တို့ကို စိုးမင်းထွန်းကတော့ ကြိုးဆွဲချပြီး ဆုံးတယ်။ ဆေးရုံမှာ ရှိတယ်ဆိုပြီး တော့ ပြောတယ်။ အလောင်းက မနေ့က ညနေ ၅ နာရီလောက်မှာ သယ်လာတယ်။ ဒီနေ့ ရွာမှာ သင်္ဂြိုလိုက်တယ်။"

တပ်မတော်ဘက်ကတော့ ဇွန်လ ၂၃ ရက်နေ့တုန်းက လုံခြုံရေးတပ်ဖွဲ့ဝင်တွေ သံသယနဲ့ စစ်ဆေးခဲ့သူတွေထံက မေးမြန်းဖော်ထုတ်ချက်တွေအရ အလယ်ချောင်းကျေးရွာက လူ ခြောက် ဦးကို ဒီလ ၁၂ ရက်နေ့မှာပဲ ဖမ်းဆီးခဲ့တာဖြစ်ပြီး မအီမြို့မ ရဲစခန်းက သီးသန့်အဆောက်အဦးမှာ ထားရှိစဉ် ချည်ထားတဲ့ ကြိုးကိုဖြည်ပြီး ခေါင်မိုးထုပ်တန်းမှာ ကြိုးဆွဲချ အဆုံးစီရင်သွားတာဖြစ်ကြောင်း ဒီကနေ့ပဲ သတင်းထုတ်ပြန်ထားပါတယ်။ သေဆုံးသူ အပါအဝင် ဖမ်းဆီးထားသူ ခြောက် ဦးဟာ ရခိုင်လက်နက်ကိုင် AA အဖွဲ့ရဲ့ အမာခံတွေ ဖြစ်ကြောင်းလည်း ဖော်ပြထားပါတယ်။

အလယ်ချောင်းကျေးရွာအုပ်ချုပ်ရေးမှူး ဦးမြင့်လွင်ကတော့ အလယ်ချောင်းကျေးရွာက ဖမ်းဆီးခံထားရသူတွေဟာ လယ်ယာလုပ်ငန်း လုပ်ကိုင်သူတွေနဲ့ ငါးဖမ်းလုပ်ငန်း လုပ်ကိုင်တွေဖြစ်ပြီး ကျေးရွာမှာပဲ အမြဲနေထိုင်သူတွေ ဖြစ်တယ်လို့ ပြောပါတယ်။

"ကျန်တဲ့ ငါး ယောက်ကိုတော့ ဘယ်မှာထားလဲလို့ မနေ့ကလည်း မေးပါတယ်။ သူတို့ကတော့ မရှိဘူးလို့ပဲ ဖြေတယ်။ မိသားစုနဲ့ တွေ့ချင်တယ် တွေ့ခွင့်ရမလားလို့မေးတဲ့ အခါတော့ ဗိုလ်ကြီးကတွေ့ခွင့်မပေးဘူး။ သူတို့ကတော့ ကျနော်တို့ရွာမှာ ကောင်းကောင်းမွန်မွန်လုပ်စားနေကြတာ။ ပြီးတော့ ဂဏ္ဏန်းရှာတယ်။ လယ်လုပ်တဲ့ သူတွေ သူတို့က နောက်နေရာသို့လည်း သွားတာတော့မရှိဘူး။ ရက် ၃၀ ရှိရင် သူတို့က ချောင်းထဲမှာ ရက်ပေါင်း ၂၀လောက်နေတယ်။ ချောင်းထဲမှာ လှေနဲ့သွားပြီး ဂဏ္ဏန်းရှာတာ။"

တပ်မတော်ဘက်ကတော့ ကျန်တဲ့ ငါး ယောက်ကိုလည်း ဥပဒေနဲ့အညီ စစ်ဆေးနေတယ်လို့ ဒီကနေ့ထုတ်ပြန် ချက်မှာ ဖော်ပြထားပါတယ်။

နိုင်ငံရဲ့လုံခြုံရေးနဲ့ ကာကွယ်ရေးကို တာဝန်ယူထားတဲ့ အဖွဲ့အစည်းတစ်ခုအနေနဲ့ ဖမ်းဆီးထားတဲ့သူတွေကို ဥပဒေနဲ့အညီဆောင်ရွက်သင့်ပြီး ဖမ်းဆီးထားသူတွေရဲ့ အခွင့်အရေးတွေကိုလည်း ပေးသင့်သလို သံသယနဲ့ ဖမ်းထားသူတွေဟာ တရားခံမဟုတ်သေးတဲ့အတွက် တရားရင်ဆိုင်ဖို့အခွင့်အရေးကို ပေးသင့်တယ်လို့လည်းလို့ ရမ်းဗြဲမြို့နယ် အမျိုးသားလွှတ်တော်ကိုယ်စားလှယ် ဒေါ်ထုမေက ပြောပါတယ်။ ဖမ်းဆီးထားစဉ်သေဆုံးသွားတာနဲ့ ပတ်သတ်ပြီး တပ်မတော်မှာ တာဝန်အပြည့်အဝရှိတယ်လို့ သူကပြောပါတယ်။

"သူတို့အဖွဲ့အစည်းက အင်မတန်မှ လုံခြုံရေးနဲ့ ကာကွယ်ရေးကို တာဝန်ယူထားတဲ့ အဖွဲ့အစည်းကနေပြီးတော့ တာဝန်ယူမှု တာဝန်ခံမှု အပြည့်အဝရှိရပါမယ်။ ဒါကမတော်တဆ လက်လွန်သွားတာပါဆိုပြီးတော့ အကြောင်းပြချက် ပေးကောင်းပေးနိုင်ပါတယ်။ ဒါပေမဲ့ တကယ်တမ်းကျတဲ့အခါ ဒီလိုမျိုးကျူးလွန်ပြီးတော့မှ ဖြစ်သွားတဲ့ လူတွေအပေါ်မှာ ကျူးလွန်ခဲ့တဲ့ သူတွေ ဒီလိုခြေလွန်လက်လွန် ဖြစ်သွားတယ်ဆိုလို့ရှိရင်လည်း ဒီဟာကိုနေပြီးတော့ သက်ဆိုင်ရာ အထက်အရာရှိအဆင့်ဆင့်ကနေပြီးတော့ သူတို့မှာရှိတဲ့ ဥပဒေနဲ့ အရေးယူရမှာဖြစ်ပါတယ်။ အဲလိုမျိုးအရေးမယူဘူးဆိုလို့ရှိရင်တော့ ကျမတို့ ပြည်သူတွေက အင်မတန်မှ ယုံကြည်မှုအားနည်းတဲ့ အဖွဲ့အစည်းအဖြစ် မြင်ကောင်းမြင်လာနိုင်တယ်ရှင်။"

ဖမ်းဆီးခံထားရစဉ် ရမ်းဗြဲဒေသခံ သေဆုံးသွားတာနဲ့ ပတ်သတ်ပြီး သက်ဆိုင်ရာတာဝန်ရှိသူတွေက ဥပဒေနဲ့ ဆောင်ရွက်ပေးဖို့အတွက် သက်ဆိုင်ရာဝန်ကြီးဌာနတွေဆီကို စာတင်ထားတယ်လို့လည်း ဒေါ်ထုမေက ပြောပါတယ်။

"ကျမတို့ရဲ့ပြည်သူတွေကို အမှန်တကယ်ဆိုလို့ရှိရင် လွှတ်တော်ကိုယ်စားလှယ်တစ်ဦးအနေနဲ့ ကာကွယ် ပေးရပါမယ်။ ဒါပေမဲ့ အခုအခြေအနေမှာ သံသယနဲ့ ဖမ်းဆီးတယ်။ ဒီကိစ္စနဲ့ပတ်သတ်ပြီး သက်ဆိုင်ရာတွေက တာဝန်ယူကြဖို့ ဥပဒေနဲ့အညီ ဆောင်ရွက်ကြဖို့အတွက် နေပြီးတော့ ကျမအနေနဲ့ ဒီနေ့ဆိုရင် ကာကွယ်ရေးရယ် ပြည်ထဲရေးရယ် ရခိုင်ပြည်နယ်ဝန်ကြီးချုပ် နယ်စပ်ရေးရာနဲ့ လုံခြုံရေးဝန်ကြီးဌာနက ဝန်ကြီးတွေကို စာအသီးသီး ပို့ထားပါတယ်။"

ပြီးခဲ့တဲ့ဧပြီလအစောပိုင်းကလည်း ပုဏ္ဏားကျွန်းမြို့နယ်က ဖမ်းဆီးခံရထားသူ ငါး ဦးကို တပ်မတော်ရေယာဉ်နဲ့ ခေါ်ဆောင်သွားစဉ် ထိုးကြိတ်မေးမြန်းခဲ့တဲ့ ဗွီဒီယိုဖိုင်တခု ပျံ့နှံ့ခဲ့တဲ့အတွက် ဝေဖန်သံတွေလည်း ထွက်ပေါ်ခဲ့တာပါ။ တပ်မတော်ကတော့ စည်းကမ်းနဲ့မညီတဲ့ တပ်မတော်သားတချို့ကို အရေးယူမှာဖြစ်ကြောင်း ပြောဆိုထားပါတယ်။

ရခိုင်ပြည်နယ်က လက်နက်ကိုင် ပဋိပက္ခတွေအတွင်း အရပ်သားတွေ ဖမ်းဆီးခံရတာ၊ ထိခိုက်သေဆုံးတာတွေ ရှိနေတဲ့အပေါ် ကုလသမဂ္ဂနဲ့ နိုင်ငံတကာ လူ့အခွင့်အရေး အဖွဲ့တွေကလည်း စိုးရိမ်မကင်းတဲ့ သဘောထားတွေ ပြောဆိုထားကြပါတယ်။

သက်နိုင်  / ဗွီအိုအေ ( မြန်မာပိုင်း)
https://burmese.voanews.com/a/rakhine-conflict/5503680.html

Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Advertisement

 

အသစ် တင်သမျှ သတင်းများ အလို အလျှောက်ပို့ ပေးပါမည်

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ