ကျောက်မဲမြို့နယ်အတွင်း ကျွဲတင်ကား ထပ်မံပစ်ခတ်ခံရ ၁ ဦးသေ ၁ ဦးဒဏ်ရာရ

 ကျောက်မဲသတင်း – ကျည်ဆံထိမှန်သေဆုံးသည့် ကားသမားအလောင်းနှင့် ဒဏ်ရာရသူများအား ဆေးရုံသို့ ကူညီပို့ဆောင်ပေးနေကြစဉ်

သျှမ်းပြည် မြောက်ပိုင်း ကျောက်မဲမြို့နယ်အတွင်း ကျွဲများ တင်ဆောင်လာသည့်ကားတစီး ထပ်မံ ပစ်ခတ်ခံရကာ တဦးသေဆုံးခဲ့ကြောင်း သတင်းရရှိသည်။

သြဂုတ်လ ၁၃ ရက် ယနေ့မနက် ၈ နာရီခန့်က ကျွဲများတင်ဆောင်လာသည့် ၁၂ ဘီး ကားများ နောင်ချိုမှ ကျောက်မဲဘက်သို့ မောင်းနှင်လာစဉ် ကျောက်မဲမြို့နယ် ခိုမုန်းအုပ်စု ခိုအုံးကျေးရွာ တွင် အမည်မသိ လက်နက်ကိုင် က ချောင်းမြောင်း ပစ်ကာ ယာဉ်နောက်လိုက် တဦး သေဆုံးပြီး၊ ယာဉ်မောင်း တဦး ပြင်းထန်စွာ ဒဏ်ရာရရှိကြောင်း သိရသည်။

“ ယာဉ်နောက်လိုက်ကတော့ လက်မောင်း၊ နံရိုးဖောက်ထွက်၊ ဝမ်းဗိုက် ၃ချက် သေနတ်ပစ်ခံရပြီး သေသွားတယ်။ နောက် ယာဉ်မောင်း ကတော့ ဦးခေါင်းထိပ်၊ ဂျိုးစောင်းပေါက်ပြဲ ၂ချက် ပစ်ခံရတယ်။ ဒဏ်ရာ ပြင်းထန်တယ်။” ဟု ကျောက်မဲ ဒေသခံ တဦးဖြစ်သည့် ကိုကျော်ဦး ကပြောသည်။

အဆိုပါပစ်ခတ်ခံရသည့် ကားသည် ကရင်အမျိုးသားအဖွဲ့အစည်း (KNU) တံဆိပ် တရားဝင် ပါရှိထားသည့် စာရွက်စာတမ်းကိုင်ဆောင်ကာ ကျွဲ ၂၄ ကောင် တင်ဆောင်လာကြောင်း ရဲမှတ်တမ်းအရသိရသည်။

ယမန်နေ့ သြဂုတ် ၁၂ ရက် ကလည်း တရုတ်ပြည် သို့ပို့ဆောင်မည့် နွားများ တင်လာသည့် ကားတစီး ပစ်ခံရပြီး လူတဦး သေဆုံးကာ၊ တဦး ဒဏ်ရာ အပြင်းအထန် ရရှိခဲ့သည်။

သျှမ်းပြည်နယ်မြောက်ပိုင်း သီပေါမြို့နယ် နှင့် ကျောက်မဲမြို့နယ်တွင် နွားများ တင်ဆောင်သည့် ကားများ မကြာခဏ ချောင်းမြောင်း ပစ်ခံရပြီး၊ ယခင်က ညဘက်အချိန်သာ ပစ်ခံရပြီး၊ လက်ရှိမှာမူ လူမြင်ကွင်း မနက်ခင်းများတွင်ပင် ပစ်ခံနေရကြောင်းဒေသခံ များ ပြောပြချက် အရ သိရသည်။

“ အရင်က နွားကားတွေညဘက် မိုးချုပ်မှ ပစ်ခံရတာ။ အခု လူမြင်ကွင်း နေ့ဘက်၊ မနက်ဘက်တွေပါ ပစ်ခံနေရပြီ။ ကားသမားနဲ့ ယာဉ်နောက်လိုက်တွေပဲ သေဆုံးနေရတယ် ” ဟု သီပေါမြို့ ဒေသခံ စိုင်းအိုက် က ပြောသည်။

တရုတ်ပြည်ပို့မည့် ကျွဲနွားတင်ကားများသည် နယ်မြေ ဒေသရှိ လက်နက်ကိုင် အဖွဲ့အစည်းများကို ငွေပေးဆောင်မှု မရှိသဖြင့် ပစ်ခံရခြင်းသာဖြစ်နိုင်ကြောင်း၊ ကျွဲနွားများ တင်ဆောင်သည့် ကားများ မကြာခဏပစ်ခတ်ခံရသဖြင့် ယာဉ်မောင်းနှင့် ယာဉ်နောက်လိုက်များသေဆုံးမှုအထိရှိခဲ့ သော်လည်း မည်သည့် လက်နက်ကိုင် ပစ်သည်ကို ယခုတိုင်မသိရှိရကြောင်း နီးစပ်သည့်အသိုင်းအဝိုင်းကပြောသည်။

အလားတူ သီပေါဒေသခံ စိုင်းအိုက်ကလည်း – “ ကျနော် သိသလောက်တော့ ကျွဲနွားကားတွေ အခွန်ဆောင်ထားတဲ့အရေအတွက်ထက်ပိုပြီးတင်တာ။ သူတို့အခွန်မဆောင်ချင်ဘဲ ခိုးတင်တဲ့သဘောပေါ့။ ကျနော်သိသလောက်က ကျွဲနွားတကောင် ကို ငွေကျပ် ၂ သောင်းပေးရတယ်” ဟု သျှမ်းသံတော်ဆင့် သို့ ပြောသည်။

သီပေါမြို့နယ် နှင့်ကျောက်မဲမြို့နယ် တွင် လက်နက်ကိုင် ပေါင်းစုံ ကျင်လည်သည့် နေရာ ဒေသဖြစ်ပြီး၊ မည်သည့် လက်နက်ကိုင် အဖွဲ့ မှ ကျွဲ၊နွားများ တင်သည့် ကားကို ပစ်သည်ကို ပြောဆိုရန် ခက်ခဲကြောင်း၊ ထိုကိစ္စသည် နိုင်ငံရေး နှင့် ဆက်နွယ်နေသည် ဟု ကျောက်မဲမြို့နယ် အမှတ်(၁) မဲဆန္ဒနယ် ပြည်နယ်လွှတ်တော် ကိုယ်စားလှယ် စိုင်းထွန်းမြင့် က သျှမ်းသံတော်ဆင့်ကို ပြောသည်။

“ ကျနော်တို့စဉ်းစားစရာ ၂ခုဖြစ်တယ်။ လက်နက်ကိုင်အဖွဲ့ကို သူတို့က အခွန်မပေး လို့လား။ နောက်တခုက အရပ်ဝတ်နဲ့ လက်နက်ကိုင်တဲ့တပ်မတော်သားတွေ လမ်းမပေါ်သွားလာနေတာတွေရှိတယ်။ ဒါကြောင့် ပစ်ခတ်မှုလက်သည်ကို ဘယ်အဖွဲ့ဆိုတာ ကျနော်တို့ ခန့်မှန်းရခက်နေတယ် ။ တရားဥပဒေ စိုးမိုးမှုကတော့ လုံးဝမရှိတော့ဘူး။ အဓိက နိုင်ငံရေး ပါပဲ။နိုင်ငံရေး အရ မပြေလည်မှုတွေ ကြောင့်ပါ။ ” ကျောက်မဲမြို့နယ် လွှတ်တော်အမတ် စိုင်းထွန်းမြင့် က သုံးသပ်ပြောဆိုလိုက်သည်။

ယခုနှစ် ၂၀၁၉ ခုနှစ်အတွင်း ကျွဲ၊နွားတင်သည့်ကားများ ပစ်ခံရပြီး သေဆုံးမှု ၄ ဦး နှင့် ဒဏ်ရာရရှိသူ ၅ဦး ရှိကြောင်း သိရသည်။

Panglong(Burmese)
https://www.facebook.com/ShanNewsBurmese

မှတ်ချက်ရေးသားလိုတဲ့ စာဖတ်ပရိတ်များ တောင်းဆိုချက်အရ ဖွင့်ပေးလိုက်ပါပြီ။ မှတ်ချက်များ ရေးသားနိုင်ပါပြီ။

အချိန်နဲ့ တပြေးညီ သတင်းများ ဖတ်ရှုနိုင်ဖို့  facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့ နိုင်ပါသည်။
နောက်ဆုံးရ သတင်းများကို အောက်ပါ Tweets မှာ ဖော်ပြထားပါတယ်။ Tweets ရဲ့ ဘေးဘောင်တန်းကို ဆွဲချပြီ မိမိတို့ စိတ်ဝင်စားတဲ့ သတင်းခေါင်းစဉ် အောက်က Link ကို နှိပ်ပြီ အပြည့်အစုံဖတ်ရှုနိုင်ပါတယ်။
 

Advertisement

 

အသစ် တင်သမျှ သတင်းများ အလို အလျှောက်ပို့  ပေးပါမည်

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ