တစ်နှစ်အတွင်း အကောက်ခွန်မဲ့ပစ္စည်း ကျပ်သန်း ၈၀၀၀ နီးပါး ဖမ်းဆီးရမိ

တစ်နှစ်အတွင်း အကောက်ခွန်မဲ့ပစ္စည်း ကျပ်သန်း ၈၀၀၀ နီးပါး ဖမ်းဆီးရမိပါတယ်/ အကောက်ခွန်လှုပ်ရှားစစ်ဆေးရေးအဖွဲ့

အကောက်အခွန် ဦးစီးဌာန လက်အောက်ရှိ အကောက်ခွန် လှုပ်ရှားစစ်ဆေးရေးအဖွဲ့က တစ်နှစ်အတွင်း ဖမ်းဆီးရမိတဲ့ အမှုက ၂၆၁ မှု ရှိပြီး၊ ဖမ်းမိခဲ့တဲ့ အကောက်ခွန်မဲ့ ပစ္စည်းတန်ဖိုးဟာ ကျပ်သန်းပေါင်း ၈၀၀၀ နီးပါး ဖမ်းဆီးရမိခဲ့တယ်လို့ သတင်းထုတ်ပြန် ပါတယ်။

ဖမ်းဆီးရမိတဲ့ အမှုက ၂၆၁ မှု ဟာ အကောက်ခွန် လှုပ်ရှားစစ်ဆေးရေးအဖွဲ့ စတင်ဖွဲ့စည်းခဲ့တဲ့ ၂၀၁၈ ဇန်နဝါရီ ၁၅ ရက် ကနေ ၂၀၁၉ မေလ ၃ ရက် အထိ ဖမ်းမိခဲ့တာဖြစ်ပြီး စုစုပေါင်းတန်ဖိုး ကျပ်သန်း ၇၉၈၂ ဒသမ ၄ သန်း ရှိတယ်လို့ ဆိုပါတယ်။

အဲဒီ အကောက်ခွန်မဲ့ ပစ္စည်းတွေကို မန္တလေး- လားရှိုး - မူဆယ် ပြည်ထောင်စုလမ်းမကြီး၊ မြဝတီ-ဘားအံ- ရန်ကုန် ကုန်သွယ်မှု လမ်းမကြီး၊ ရန်ကုန်ဘူတာ၊ လမ်းဘူတာတွေနဲ့ ရန်ကုန် အပြည်ပြည်ဆိုင်ရာလေဆိပ် စတဲ့ နေရာတွေမှာ ဖမ်းဆီးရမိခဲ့တယ်လို့ ဆိုပါတယ်။

ဖမ်းဆီးရမိတဲ့ ပစ္စည်းတွေမှာ ကျောက်စိမ်း၊ တန်ဖိုးကြီး ဖိနပ်၊ ခါးပတ်နဲ့ ဦးထုပ်၊ အသုံးအဆောင် ပစ္စည်းနဲ့ အဝတ်အထည်၊ နိုင်ငံခြားဖြစ် စီးကရက်၊ ဓာတ်မြေသြဇာ၊ Apple နဲ့ Samaung တံဆိပ် လက်ကိုင်ဖုန်းများ၊ ကားတာယာ ကားအပိုပစ္စည်းတွေနဲ့ ဆိုင်ကယ် အပိုပစ္စည်း၊ ဘေထုပ်၊ အခွန်ပေးဆောင်ထားခြင်းမရှိတဲ့ သကြားများ၊ DRC ရရှိထားခြင်း မရှိတဲ့ ဆေးဝါးတွေနဲ့ ဆေးပစ္စည်း၊ Sodium Cyanide များ၊ အမိုနီယမ် နိုက်ထရိတ်များ၊ FDA ရရှိထားခြင်း မရှိတဲ့ စားသောက်ကုန်၊ အေးခဲအသားတွေနဲ့ ကွမ်းစားဆေးတွေ ပါဝင်တယ်လို့ အကောက်ခွန် လှုပ်ရှားစစ်ဆေးရေးအဖွဲ့ရဲ့ သတင်းထုတ်ပြန်မှာ ပါရှိတယ်။

BBC Burmese
https://www.bbc.com