ကြားဖြတ်ရွေးကောက်ပွဲ မဲဆန္ဒနယ် ၂ နေရာမှာ အနိုင်ရဖို့ ခက်ခဲနိုင်တယ်လို့ ၀န်ကြီးချုပ်ပြော

မန္တလေးတိုင်း ၀န်ကြီးချုပ် ဒေါက်တာ ဇော်မြင့်မောင် ကို တွေ့ရစဉ်

အမျိုးသားဒီမိုကရေစီအဖွဲ့ချုပ် NLD ပါတီ အနေနဲ့ လာမယ့် နိုဝင်ဘာလ ကြားဖြတ်ရွေးကောက်ပွဲမှာ မဲဆန္ဒနယ် ၂ နေရာမှာ အနိုင်ရရှိဖို့ ခက်ခဲတယ်လို့ မန္တလေးတိုင်း ၀န်ကြီးချုပ် ဒေါက်တာ ဇော်မြင့်မောင် က ပြောလိုက်ပါတယ်။

ကြားဖြတ်ရွေးကောက်ပွဲအတွက် စစ်တမ်းကောက်ယူမှုတွေ ပြုလုပ်ထားတဲ့ အချက်တွေအပေါ်မူတည်ပြီး ပြောနိုင်တာဖြစ်ပေမယ့် နိုင်ငံတော် အတိုင်ပင်ခံကတော့ ၀င်ရောက်ယှဉ်ပြိုင်တဲ့ နေရာအားလုံးမှာ အနိုင်ရဖို့ ဆန္ဒရှိတယ်လို့ မန္တလေးတိုင်း၊ သပိတ်ကျင်းမြို့နယ်က ဒေသခံတွေနဲ့ NLD ပါတီဝင်တွေ ဒီနေ့ တွေ့ဆုံပွဲမှာ ၀န်ကြီးချုပ်က ပြောခဲ့ပါတယ်။

ကြားဖြတ်ရွေးကောက်ပွဲအတွက် ဘယ်နေရာတွေက ခက်ခဲတယ်ဆိုတာကိုတော့ ၀န်ကြီးချုပ်က ထုတ်ဖော် ပြောကြားခဲ့ခြင်း မရှိပါဘူး။

၂၀၂၀ အထွေထွေ ရွေးကောက်ပွဲဟာ လွယ်ကူမှာမဟုတ်ဘဲ ၂၀၁၅ ရွေးကောက်ပွဲထက် အများကြီး ခက်ခဲမှာ ဖြစ်ကြောင်း၊ ကြားဖြတ်ရွေးကောက်ပွဲမှာ ၁၃ နေရာလုံး အနိုင်ရဖို့ ကြိုးစားနေကြောင်း၊ ၂၀၂၀ ရွေးကောက်ပွဲအတွက် ပြည်သူတွေယုံကြည်နေသေးသလား ဆိုတာကို ၂၀၁၈ ကြားဖြတ်ရွေးကောက်ပွဲမှာ သုံးသပ်လို့ရမှာဖြစ်ကြောင်း နဲ့ ၂၀၂၀ မှာလည်း NLD ပါတီ အနိုင်ရရှိခဲ့မယ်ဆိုရင် ဒီမိုကရေစီပန်းတိုင်ကို သွားနိုင်ပြီဖြစ်ကြောင်း ဒေါက်တာ ဇော်မြင့်မောင်က ပြောခဲ့ပါတယ်။

ဒါ့အပြင် NLD ပါတီက စီးပွားရေးလုပ်နေတာမရှိဘဲ ပါတီက ကိုယ်စားလှယ်တွေ၊ ၀န်ကြီးတွေရဲ့ လစာထဲက ၂၅ ရာခိုင်နှုန်းနဲ့ ပါတီ လိုအပ်ချက်တွေ ထောက်ပံ့လုပ်ဆောင်နေပြီး နေပြည်တော်မှာ ပါတီရုံးဆောက်ဖို့ ကြိုးစားနေတယ် လို့ သိရပါတယ်။

၂၀၂၀ ရွေးကောက်ပွဲဟာ မြန်မာနိုင်ငံအတွက် အရေးအကြီးဆုံးပွဲဖြစ်လို့ သုတေသနစစ်တမ်းတွေက အခြေခံပြီး ဆက်လက်ဆောင်ရွက်သွားမှာ ဖြစ်တယ်လို့ ဒေါက်တာ ဇော်မြင့်မောင်က ပြောပါတယ်။

RFA Burmese
https://www.rfa.org