စစ်တွေမြို့နယ် ရွှေမင်းဂံချောင်းတွင် လူသေအလောင်းတွေ့

နိရဉ္စရာ၊ စက်တင်ဘာ ၂၀

ရခိုင်ပြည်နယ်၊ စစ်တွေမြို့နယ်၊ ချောင်းနွယ်အုပ်စု၊ သုံးဆောင်ကျေးရွာ၊ ရွှေမင်းဂံချောင်းရေစပ်အနီး တွင် လူသေအလောင်း တစ်လောင်းကို ယနေ့နံနက်က တွေ့ရှိခဲ့သည်ဟု သတင်းရရှိသည်။

၎င်းအလောင်းအား စစ်တွေမြို့နယ် မီးသတ်စခန်းမှ ဦးစီးအရာရှိ ဦးဟန်စိုး ဦးဆောင်၍ ရှာကယ် တပ်ဖွဲ့ဝင် (၁၀) ဦးမှ လူနာတင်ယာဉ် (၁) စီးဖြင့် သွားရောက်ခဲ့ပြီး မြန်မာနိုင်ငံရဲတပ်ဖွဲ့ဝင်များ၊ ကျေးရွာ အုပ်ချုပ်ရေးမှူးနှင့် အတူ စစ်တွေမြို့ပြည်သူ့ဆေးရုံသို့ ပို့ဆောင်ခဲ့သည်ဟု သိရသည်။

စစ်တွေမီးသတ်စခန်းမှ ဦးဟန်စိုးက “ ကျွန်တော်တို့ သတင်းရတာက ၇ နာ၁၀ မိနစ်လောက်မှာ လူသေအလောင်းတွေ့တယ်လို့ သတင်းရပါတယ်။ ၇နာရီ ၁၅မိနစ်လောက်မှာ ဒီကနေ သွားကြပြီး အလောင်းကို စစ်တွေဆေးရုံကြီးကို ကူညီ ပို့ဆောင်ပေးခဲ့ပါတယ်” ဟု နိရဉ္စရာ သတင်းဌာနသို့ ပြောဆိုသည်။

၎င်းအလောင်းတွင် အုတ်ခဲ တစ်ခဲကို လည်ပင်းတွင် ကြိုးချည်ကာတွေ့ရှိခဲ့ရသည်ဟု သိရသည်။

“ ကြိုးနဲ့ အုတ်ခဲလည်းတွေ့တယ် ခင်ဗျား။ ဘာကြောင့်သေတယ်။ ဘယ်သူ ဘယ်ဝါ ဖြစ်တယ်ဆိုတာ ရဲကစစ်ဆေးဆဲပါ။ ဘယ်သူဆိုတာကိုတော့ ကျွန်တော်တို့ မသိပါဘူး” ဟု ပြောကြားသည်။

သေဆုံးသူ၏ ခန္ဓာကိုယ်တွင် ဆေးမင်ကြောင်များတွေ့ရှိသဖြင့် သေဆုံးသူမှာ ရခိုင်လူမျိုးဖြစ်နိုင်ကြောင်း ရဲက ယူဆထားသည်ဟု ၎င်းက ပြောသည်။

“ ရခိုင်လူမျိုးဖြစ်မယ်လို့ ယူဆတာပေါ့နော်။ ဖြစ်တယ်လို့ ပြောတာမဟုတ်ဘူး။ ဆေးမင်ကြောင်တွေလည်း တွေ့တယ်ဆိုတော့လေ” ဟု ပြောဆိုသည်။

အဆိုပါ လူသေအလောင်းနှင့် ပတ်သက်ပြီး ပိုမို သိရှိနိုင်ရန် စစ်တွေအမှတ်(၁) ရဲစခန်းသို့ ဆက်သွယ်ရာ စခန်းမှူးမှ ၎င်းဧရိယာမှာ အမှတ်(၂) စခန်းနှင့် သက်ဆိုင်သဖြင့် အမှတ်(၂) စခန်းသို့ မေးပါဟု ပြောဆိုသည်။ သို့အတွက် ဖုန်းဖြင့် အမှတ်(၂) ရဲစခန်းသို့ ဆက်သွယ်ရာ နယ်ထိန်း အရာရှိမှ သူအလုပ်များနေသဖြင့် အမှတ်(၂) စခန်းမှူးသို့ ဆက်ပါဟု ပြောရာမှ ဆက်လက်၍ အမှတ်(၂) စခန်းမှူးအား ဆက်သွယ်ရာ အမှတ် (၂) စခန်းမှူးမှလည်း ၎င်းမှာ တရားရုံးသို့ ရောက်ရှိနေ၍ နောက်ထပ် ၂ နာရီမှ ဆက်သွယ်ပါဟု ဆိုသဖြင့် လူသေမှုနှင့် ပတ်သက်ပြီး အသေးစိတ် တင်ပြနိုင်ခြင်း မရှိသေးပါ။

(ဓာတ်ပုံ- ရခိုင်ပြည်နယ် မီးသတ်)
Narinjara
https://www.facebook.com/Narinjara