ထိုင်းမှာ ၈ လောင်းပြိုင် လူသတ်မှုကျူးလွန်သူ ၆ ဦးကို သေဒဏ်ချမှတ်

ထိုင်းနိုင်ငံတောင်ပိုင်း ကရာဘီခရိုင်မှာ ၂၀၁၇ ခုနှစ် ဇူလိုင်လကဖြစ်ပွားခဲ့တဲ့ ရွာသူကြီးတစ်ဦးနဲ့ သူ့မိသားစုဝင် ၇ ဦး သတ်ဖြတ်ခံရမှုနဲ့ပတ်သက်လို့ ပြစ်မှုကျူးလွန်သူ ၆ ဦးကို တရားရုံးက ဒီကနေ့ သေဒဏ်အမိန့် ချမှတ်လိုက်ပါတယ်။

ရွာသူကြီးရဲ့မိသားစုကို သေနတ်သမားတွေက ဖမ်းဆီးခေါ်ဆောင်သွားပြီး၊ ရွာသူကြီးရောက်လာတဲ့အထိ နာရီအတန်ကြာအောင် ပြန်ပေးဆွဲထားခဲ့တာပါ။ ရွာသူကြီးရောက်လာတဲ့အခါ သူနဲ့တကွ မိသားစုဝင် ၇ ဦးရဲ့ ဦးခေါင်းတွေကို ပစ္စတိုသေနတ်တွေနဲ့ ပစ်ခတ်သတ်ဖြတ်ခဲ့ပါတယ်။ အဲဒီ ၈လောင်းပြိုင် လူသတ်မှုကြီးဟာ ထိုင်းပြည်သူလူထုအကြား အံ့အားတုန်လှုပ်သွားစေခဲ့တဲ့ အထင်ကရ ဖြစ်ရပ်တစ်ခုလည်း ဖြစ်ပါတယ်။

ရွာသူကြီးနဲ့ သေနတ်သမားခေါင်းဆောင်တို့အကြား မြေယာပိုင်ဆိုင်မှုအငြင်းပွားရာက အခုလို လူသတ်မှုကြီးဖြစ်ပွားခဲ့တာလို့ ဆိုပါတယ်။ ဒီသတ်ဖြတ်မှုအတွင်း ဒဏ်ရာရရှိသူ ၃ ဦးရှိခဲ့ပေမယ့် အသက်ရှင်သန်ခဲ့ပါတယ်။ သေဆုံးသူတွေထဲမှာ အမျိုးသမီးတွေပါဝင်သလို အသက် ၄ နှစ်၊ ၈ နှစ်နဲ့ ၁၁ နှစ်အရွယ် မိန်းကလေးငယ်တွေလည်း ပါဝင်ပါတယ်။

ထိုင်းနိုင်ငံမှာ အခုလို သေဒဏ်အမိန့်ချမှတ်တာ ဆက်ရှိနေဆဲဆိုပေမယ့် ၂၀၀၉ ခုနှစ်ကစလို့ အကျဉ်းသားတွေကို သေဒဏ်ကွပ်မျက်မှု မရှိပါဘူး။

RFA Burmese
https://www.facebook.com