ခွဲထွက်ရေး ထောက်ခံတဲ့ ကက်တလိုးနီးယားအတွက် အတူတကွပါတီ၊ ကက်တလိုးနီးယား ရီပတ်ဘလီကန် လက်ဝဲပါတီနဲ့ အများဆန္ဒနဲ့ ညီညွတ်ရေးပါတီ တို့က အမတ်နေရာ ၇၀ ရရှိ |
ကက်တလန်ဒေသမှာ အောက်တိုဘာလ ၂၇ ရက်နေ့က လွတ်လပ်ရေး ကြေညာခဲ့တဲ့အတွက် စပိန် ဝန်ကြီးချုပ် မာရီယားနိုး ရဟွိုင်းက ကိုယ်ပိုင်အုပ်ချုပ်ခွင့် ရုပ်သိမ်းပြီး အခုလို ရွေးကောက်ပွဲ ကျင်းပစေခဲ့တာ ဖြစ်ပါတယ်။
ကက်တလိုးနီးယားဒေသကို စပိန်ရဲ့ တစိတ်တပိုင်း ကိုယ်ပိုင်အုပ်ချုပ်ခွင့်ရဒေသ ဖြစ်ဖို့ပဲ လိုလားတဲ့ နိုင်ငံသားများ ပါတီကတော့ အင်အားအကြီးဆုံး ပါတီဖြစ်နေပြီး ခွဲထွက်ရေး ထောက်ခံသူ ပါတီ အရေအတွက် များနေတဲ့အတွက် ဘယ်သူက အစိုးရ ဖွဲ့ခွင့်ရမလဲဆိုတဲ့ ကိစ္စကတော့ မရှင်းလင်းသေးပါဘူး။
မဲတွေ အားလုံးနီးပါး ရေတွက်အပြီးမှာ ခွဲထွက်ရေး ထောက်ခံတဲ့ ကက်တလိုးနီးယားအတွက် အတူတကွပါတီ၊ ကက်တလိုးနီးယား ရီပတ်ဘလီကန် လက်ဝဲပါတီနဲ့ အများဆန္ဒနဲ့ ညီညွတ်ရေးပါတီ တို့က အမတ်နေရာ ၇၀ ရရှိပြီး ၁၃၅ နေရာရှိတဲ့ ပါလီမန်မှာ အမတ် အများစုအဖြစ် အသာရခဲ့တာပါ။
နိုင်ငံသားများပါတီကတော့ မဲရာခိုင်နှုန်းရဲ့ ၂၅ ရာခိုင်နှုန်းရရှိပြီး အမတ်နေရာ ၃၇ နေရာ ရခဲ့ပါတယ်။
ဘယ်လ်ဂျီယံနိုင်ငံ ဘရပ်ဆဲမြို့ကို ရောက်ရှိနေတဲ့ မစ္စတာ ပုဂ်ျဒမွန့်နဲ့ လုပ်ဖော်ကိုင်ဖက်တွေ အောင်ပွဲခံ |
အခု ရွေးကောက်ပွဲရလဒ်ကို ကက်တလန် နိုင်ငံတော်က အနိုင်ရခဲ့တာ ဖြစ်ပြီး စပိန် ဗဟို အစိုးရက ဆုံးရှုံးသွားတာပဲလို့ ဘယ်လ်ဂျီယံနိုင်ငံ ဘရပ်ဆဲမြို့ကို ရောက်ရှိနေတဲ့ မစ္စတာ ပုဂ်ျဒမွန့်က မှတ်ချက်ပေးခဲ့ပါတယ်။
မစ္စတာ ပုဂ်ျဒမွန့်ကော မစ္စတာ ယွန်ကဲရက်စ်တို့ဟာ စပိန်အစိုးရကို ပုန်ကန်မှုနဲ့ စွဲချက်တင် ခံထားရတာ ဖြစ်ပြီး မစ္စတာ ယွန်ကဲရက်စ်ကတော့ ပြည်တွင်းမှာ ထောင်ကျနေခဲ့တာ ဖြစ်ပါတယ်။
ဒီရွေးကောက်ပွဲကို မဲပေးခွင့်ရှိသူရဲ့ ၈၀ ရာခိုင်နှုန်းက လာရောက် မဲပေးခဲ့ပြီး ကက်တလန် ဒေသတွင်းမှာ စံချိန်တင်ခဲ့တာလည်း ဖြစ်ပါတယ်။
ဒီရွေးကောက်ပွဲရလဒ်နဲ့ ပတ်သက်ပြီး စပိန်ပြည်တွင်း ကိစ္စသာ ဖြစ်တဲ့အတွက် မှတ်ချက် မပေးလိုဘူးဆိုပြီး ဥရောပ ကော်မရှင်က သတင်း ထုတ်ပြန်ထားပါတယ်။
BBC Burmese
http://www.bbc.com/burmese
ကက်တလန်ရွေးကောက်ပွဲမှာ ခွဲထွက်ရေးသမားတွေနိုင်
Reviewed by THITHTOOLWIN
on
09:44
Rating: