ရပ်ကွက်ကျေးရွာတွေထဲမှာ ဂျပန်ဦးနှောက်ရောင်ရောဂါ ကာကွယ်ဆေးထိုးလုပ်ငန်း စတင်တော့မည်

ဂျပန်ဦးနှောက်ရောင်ကာကွယ်ဆေး အစုလိုက်ထိုးနှံခြင်းလုပ်ငန်း သတင်းစာရှင်းလင်းပွဲကို ရန်ကုန်မြို့ Park Royal ဟိုတယ်မှာ ကျင်းပစဉ်/ Photo: Thant Zin Oo/ RFA

လာမယ့် ဒီဇင်ဘာလ ၁၁ ရက်နေ့ကနေ ၂၀ ရက်နေ့အထိ ဂျပန်ဦးနှောက်ရောင်ရောဂါ ကာကွယ်ဆေးထိုးတဲ့ လုပ်ငန်းကို ရပ်ကွက်ကျေးရွာတွေထဲမှာ စတင်ထိုးနှံပေးတော့မှာဖြစ်ကြောင်း ကျန်းမာရေးနဲ့အားကစားဝန်ကြီးဌာန၊ ကမ္ဘာ့ကျန်းမာရေးအဖွဲ့တို့က ဦးဆောင်ပြီး ဒီကနေ့ ရန်ကုန်မြို့ Park Royal ဟိုတယ်မှာ ရှင်းလင်းပွဲပြုလုပ်ခဲ့ပါတယ်။

ပြည်သူလူထုအခြေပြု ကာကွယ်ဆေးထိုးတဲ့လုပ်ငန်းအတွက် ပိုမိုစိတ်ချရတဲ့အစီအစဉ်တွေကို စီစဉ်ထားတယ်လို့ ကျန်းမာရေးနှင့်အားကစားဝန်ကြီးဌာန၊ ပြည်သူ့ကျန်းမာရေးဦးစီးဌာန ညွှန်ကြားရေးမှူးချုပ် ဒေါက်တာသာထွန်းကျော် က ပြောပါတယ်။

ကလေးတွေကို ကာကွယ်ဆေးထိုးသင့်မသင့် စမ်းသပ်ပေးမယ့် ဆရာဝန်တွေကိုလည်း ထားရှိပေးမှာဖြစ်ပါတယ်။

ဒါ့အပြင် ကာကွယ်ဆေးထိုးပြီးတဲ့အခါ ရှိပြီးသားရောဂါအခံတစ်ခုခုကြောင့် အန္တရာယ်ဖြစ်လာမယ်ဆိုရင်လည်း အချိန်မီကုသပေးနိုင်အောင် စက်ကိရိယာတွေလည်း ထားရှိပေးသွားမယ်လို့ သိရပါတယ်။

စာသင်ကျောင်းတွေမှာ ကာကွယ်ဆေးထိုးစဉ်ကာလအတွင်း ကလေး ၅ ဦးသေဆုံးခဲ့တဲ့ဖြစ်စဉ်ကြောင့် မိဘတွေက စိုးရိမ်မှုတွေရှိနေပါတယ်။

အဲဒီသေဆုံးခဲ့တဲ့ကလေးငယ်တွေဟာ ကာကွယ်ဆေးကြောင့်မဟုတ်ဘဲ အရင်ရှိပြီးသားရောဂါအခံတွေကြောင့် ဖြစ်ကြောင်း စစ်ဆေးချက်တွေအရ သိရှိရတယ်လို့ ပြောပါတယ်။

လက်ရှိစာသင်ကျောင်းတွေမှာ နိုဝင်ဘာလ ၁၅ ရက်နေ့ကနေ ၂၄ ရက်နေ့အထိ ကျောင်းသား/ကျောင်းသူ ၈.၂ သန်းအထိ ကာကွယ်ဆေးထိုးပေးနိုင်ခဲ့ပြီး ဒီဇင်ဘာလ ၁၁ ရက်ကနေ ၂၀ ရက်နေ့အထိ ရပ်ကွက်တွေထဲက အသက် ၉ လ ကနေ ၅ နှစ်အထိ ကလေးငယ်တွေကို ထိုးနှံပေးသွားမှာလည်း ဖြစ်ပါတယ်။

RFA Burmese
http://www.rfa.org/burmese