 |
| လွန်းညတောင်ခြေတွင် ကျောက်ထုတ်နေသည့် နေရာတစ်နေရာ ( ပုံ-ဒေသခံ) |
ဖားအံမြို့နယ် လွန်းညတောင်ခြေရှိ ကျောက်မိုင်းထုတ်လုပ်သည့် နေရာကို သွားရောက်ကြည့်ရှုခဲ့သည့် ဒေသခံကျေးရွာ လူငယ် ခေါင်းဆောင်များကို နိုဝင်ဘာလ ၁၅ ရက်နေ့က အမည်မသိ သေနတ်သမားများ၏ ပစ်ခတ်ခြိမ်းခြောက်ခံရမှု ဖြစ်ပွားခဲ့သည်ဟု ခြိမ်းခြောက်ခံရသူများဘက်က ကေအိုင်စီသို့ ပြောသည်။
လမ်းခင်းကျောက်ထုတ်လုပ်သည့် ကျောက်မိုင်းတွင်းများစွာရှိသည့် လွန်းညတောင်ခြေတွင် ဒေသခံကျေးရွာလူငယ်ခေါင်း ဆောင်နှင့် ဘုန်းကြီးကျောင်း ဒါယကာအပါအဝင် ၁၃ ဦးက ကျောက်မိုင်းတွင်း အခြေအနေကို သွားရောက်ကြည့်ရှုခဲ့စဉ် ယခုလို ပစ်ခတ်ခြိမ်းခြောက်ခံရခြင်း ဖြစ်သည်ဟု လွန်းညကျေးရွာ လူငယ်ဥက္ကဌ စောခိုက်ခိုက်က ယခုလိုပြောသည်။
“ကျနော်တို့တောင်ကို တူးလိုက်တာ တော်တော်ကုန်သွားပြီး။ ရွာအုပ်ချုပ်ရေးမှူးဆီမှာ ခွင့်တောင်းပြီး ကျနော်တို့တွေ ကျောက်မိုင်းအခြေအနေသွားကြည့်တာ ပြန်ခါနီးမှာ ကားအဖြူတစ်စီးက ကြမ်းကြမ်းနဲ့ ကားမောင်းလာပြီး ကားထဲမှာဘဲ ကျနော်တို့ကို သေနတ်နဲ့ ဖြတ်ပြီးပစ်တာ ၁၀ ချက်ကျော်တယ်။ နောက်မ သွားရဲအောင် အထက်စီးပြီး ဒေသခံကြောက် သွားအောင် သေနတ်နဲ့ခြိမ်းခြောက်တာ။ လက်နက်ကိုင်နောက်ခံနဲ့ ကျနော်တို့ကိုခြိမ်းခြောက်တယ်။ လောလောဆယ် ကျနော်တို့ ဘာဆက်လုပ်မလဲတော့ မသိသေးဘူး။”ဟု ၎င်းက ပြောသည်။
အဆိုပါ တောင်တွင် ကျောက်မိုင်းတွင်းပေါင်း ၂၀ ကျော်ရှိပြီး ကျောက်မိုင်းထုတ်လုပ်သူများအား ဒေသခံများက ဒီဇင်ဘာလ အထိသာ ထုတ်လုပ်ခွင့် ပေးထားတော့သည်ဖြစ်သည့်အတွက် ကျောက်ထုတ်သည့်အခြေအနေများကို မှတ်တမ်းယူနိုင်ရန် ကျေးရွာလူငယ်များက ကွင်းဆင်း လေ့လာခြင်းလည်း ဖြစ်သည်ဟု ဆိုသည်။
လွန်းညတောင် အနောက်ဘက်ခြမ်းတွင် ဒေသခံရွာသားများ လုပ်ကိုင်နေသည့် ကျောက်မိုင်းတွင်း ၁၁ တွင်း၊ အရှေ့ဘက်ခြမ်းတွင် အပြင်လူမှ လာရောက်လုပ်သည့် ကျောက်မိုင်းတွင်း ၁၂ တွင်း ရှိကာ အချို့ကျောက်မိုင်းတွင်းများမှာ လုပ်ငန်းရပ်လိုက်ပြီးဖြစ်သော်လည်း အချို့မှာ ဆက်လက်နေဆဲရှိသည်ဟုလည်း လူငယ်ခေါင်းဆောင် စောခိုက်ခိုက်က ဖြည့်စွက်ပြောသည်။
ထို့အပြင် လတ်တလောတွင် ၎င်းတောင်ခြေရှိ ကျောက်မိုင်းထုတ်လုပ်ရာနေရာတွင် လက်နက်ကိုင်အဖွဲ့များက ဝင်ထွက်မှုရှိ လာပြီး အခြားဒေသရှိ ကျောက်ထုတ်လုပ်သည့် အလုပ်သမားများစွာရှိသည့်အပြင် မြန်မာစကား မပြောတတ်သည့် တရုတ် လူမျိုးများလည်း ဝင်ထွက်လျက်ရှိလာသည့်အပေါ် ဒေသခံအတွက် ခြိမ်းခြောက်မှုများရှိလာနိုင်သည်ဟု လွန်းည ဒေသခံများက ပြောသည်။
 |
| လွန်းညတောင်ခြေတွင် ကျောက်ထုတ်နေသည့် နေရာတစ်နေရာ ( ပုံ-ဒေသခံ) |
လွန်းညတောင်ခြေတွင် ယခင်နှင့်လက်ရှိ ကျောက်ထုတ်လုပ်သည့်ကျောက်မိုင်းတွင်းများသည် ကျောက်တွင်း ၁ တွင်းကို တစ်နှစ်လျှင် ကျပ် ၁ သိန်းမှ ကျပ် ၂ သိန်းအထိ ကျေးရွာဖွံ့ဖြိုးရေးအတွက် ထောက်ပံ့ပေးသည်ဟု အုပ်ချုပ်ရေးမှူးက ဆက်ပြောသည်။
အဆိုပါ တောင်ကို အိန္ဒု-ကော့ကရိတ် နိုင်ငံတကာဆက်သွယ်ရေး လမ်းမကြီးတိုးချဲ့ဖောက်လုပ်ရာတွင် အသုံး ပြုရန် ပြည် နယ်အစိုးရခွင့်ပြုချက်ဖြင့် ချစ်လင်းမြိုင်တိုယိုတာကုမ္ပဏီ လီမိတက် မှ ၃ နှစ်စီမံကိန်း ကျောက် ထုတ် လုပ်ရန် အိန္ဒု တိုက်နယ် သံဃာ့နာယက အဖွဲ့ဝင်ဆရာတော်များအပါအဝင် လွန်းညကျေးရွာ အုပ်ချုပ်ရေးမှူးတို့မှ စက်တင်ဘာလ ၂၁ရက်နေ့တွင် သဘောတူလက်မှတ်ထိုးလိုက်ပြီးဟုလည်း ဒေသခံများက ပြောသည်။
ကေအိုင်စီ
http://kicnews.org
ကျောက်ထုတ်သည့် လွန်းညတောင်ခြေတွင် ဒေသခံရွာသားများ အမည်မသိ သေနတ်သမား၏ ပစ်ခတ်ခြိမ်းခြောက်မှုခံရ
Reviewed by THITHTOOLWIN
on
05:10
Rating:
Reviewed by THITHTOOLWIN
on
05:10
Rating:
