သတ္တုတူးဖော်ရေးလုပ်ငန်းတွင် အသုံးပြုသည့် ဆာရာနိုက် ဓာတုပစ္စည်းများ ကျိုင်းတုံတွင် ဖမ်းဆီးရမိ

ရှမ်းပြည်နယ် (အရှေ့ ပိုင်း) ကျိုင်းတုံမြို့ လောက်ဝိုးရွာရှိ ဂိုဒေါင်တစ်ခုအား နိုဝင်ဘာလ (၇)ရက်နေ့ ညပိုင်းက ပူးပေါင်းအဖွဲ့ဖြင့် ဝင်ရောက်စစ်ဆေးရာ တရုတ်နိုင်ငံမှ တရားမဝင် တင်သွင်းလာသည့် ဆာရာနိုက်ဓာတုပစ္စည်း (၈၀၀၀)ကီလိုအား ဖမ်းဆီးရမိကြောင်း သိရသည်။

"သတ္တုတူးဖော်ရေးလုပ်ငန်းတွေမှာ သုံးတဲ့ ဆာရာနိုက်ဓာတုပစ္စည်းတွေကို တရားဝင်လိုင်စင်ပါတဲ့ တခြားပစ္စည်းတွေနဲ့  အတူရောပြီး မိုင်းလားကနေတစ်ဆင့် မိုင်းယန်း-မိုင်းခတ်လမ်းကနေ ကျိုင်းတုံကို သယ်လာတယ်ဆိုပြီးတော့ ကျွန်တော်တို့ ဆီကို သတင်းပေးတိုင်ကြားလာတဲ့အတွက် ချက်ချင်းပဲ စစ်ဆေးမှုတွေလုပ်ခဲ့တာဖြစ်ပါတယ်"ဟု ကျိုင်းတုံခရိုင်စားသုံးသူအငြင်းပွားမှုဖြေရှင်းရေးအဖွဲ့ မှ အတွင်းရေးမှူး ဦးသန်းစိုးက တာချီလိတ်သတင်းအေဂျင်စီသို့ ပြောသည်။

ကျိုင်းတုံခရိုင်စားသုံးသူအငြင်းပွားမှုဖြေရှင်းရေးအဖွဲ့၊ မူးယစ်တပ်ဖွဲ့၊ နယ်ထိန်း၊ ကျိုင်းတုံမြို့နယ် ဒုမြို့နယ်အုပ်ချုပ်ရေးမှူး၊ အကောက်ခွန်မှူး၊ စရဖ၊ ရပ်ကွက်အုပ်ချုပ်ရေးမှူးများပါဝင်သည့် ပူးပေါင်းအဖွဲ့ သည် သတင်းအရ လောက်ဝိုးရွာရှိ ဦးစိုင်းစွမ်ဖွမ်း၏ ဂိုဒေါင်အတွင်းတွေ့ရသည့် (၆)ဘီးယာဉ်အား စစ်ဆေးရာ တရားဝင် တင်သွင်းခွင့်ပြုထားသည့် ကုန်ပစ္စည်းများနှင့်အတူ ဆာရာနိုက်ဟု ယူဆရသော အဖြူရောင်အခဲ(၅၀)ကီလိုပါ (၁၆၀)အိတ်အား စစ်ဆေးတွေ့ ရှိခဲ့ပြီး အဆိုပါ ဆာရာနိုက်ဓာတုပစ္စည်းများ တင်သွင်းရန် တရားဝင်ထောက်ခံချက်နှင့်လိုင်စင်မပါရှိကြောင်း စစ်ဆေးတွေ့ ရှိခဲ့သဖြင့် ကျိုင်းတုံမြို့မရဲစခန်းသို့  ပို့ဆောင်ထားခြင်းဖြစ်ကြောင်း သိရသည်။

" လက်ရှိမှာ ဆာရာနိုက်နဲ့  ပတ်သက်ပြီး တရားဝင်လိုင်စင်က ရှမ်း(အရှေ့ )မှာ ဘယ်သူကမှ မရထားဘူး။ တိုင်တဲ့လူကလည်း ဒါကိုသိလို့  ကျွန်တော်တို့ ကို တိုင်တာပါ။ နောက်တစ်စီးကိုတော့ ရပ်ကွက်(၄)ထဲမှာ တွေ့ တယ်။ ဒါပေမဲ့ အဲဒီကားပေါ်မှာတော့ ဆာရာနိုက်မပါဘူး။ တရားဝင်လိုင်စင်ပါတဲ့ တခြားပစ္စည်းတွေကိုပဲ စစ်ဆေးတွေ့ ခဲ့တယ်"ဟု ကျိုင်းတုံခရိုင်စားသုံးသူအငြင်းပွားမှုဖြေရှင်းရေးအဖွဲ့ မှ အတွင်းရေးမှူး ဦးသန်းစိုးက ပြောသည်။

ပူးပေါင်းအဖွဲ့ မှ ဖမ်းဆီးရမိခဲ့သည့် ဆာရာနိုက်(၁၆၀)အိတ်နှင့် ယာဉ်ပိုင်ရှင် ဦးစိုင်းစွမ်ဖွမ်းတို့ ကို နိုဝင်ဘာလ (၇)ရက်နေ့ ည(၈)နာရီခန့် တွင် ကျိုင်းတုံမူးယစ်ရဲတပ်ဖွဲ့ သို့  လွှဲပြောင်းပေးထားပြီး အရေးယူ ဆောင်ရွက်ရေးအတွက် ဆက်လက်လုပ်ဆောင်နေကြောင်း သိရသည်။

သတင်း - ဇွဲမြတ်
ဓါတ်ပုံ - ကျိုင်းတုံခရိုင် စားသုံးသူအငြင်းပွားမှုဖြေရှင်းရေးအဖွဲ့
Tachileik News Agency
http://www.tachileik.net