ကျောက်မဲမှ ရန်ကုန်သို့ ပို့ဆောင်မည့် ခေါပုတ်အထုပ်များ အတွင်းမှ စိတ်ကြွဆေးပြားများ တွေ့ရှိ

ရှမ်းပြည်နယ် (မြောက်ပိုင်း) ကျောက်မဲမြို့ရှိ ကြံ့ခိုင်ရေးကားဝန်းအတွင်း ရွှေကျောက်မဲ ခရီးသည်တင် ယာဉ်လိုင်းဂိတ်မှတစ်ဆင့် စိတ်ကြွဆေးပြားများအား ကျောက်မဲမှ ရန်ကုန်သို့ ပို့ဆောင်ရန်ကြိုးစားခဲ့သူ(၂)ဦးကို နိုဝင်ဘာလ(၇)ရက်နေ့ ညပိုင်းက ကျောက်မဲမြို့မရဲစခန်းမှ နယ်ထိန်းခေါင်းဆောင် ဦးဆောင်သည့် အဖွဲ့ဖြင့် ဖမ်းဆီးရမိခဲ့ကြောင်း ကျောက်မဲမြို့မရဲစခန်းမှ သိရှိရသည်။

ကျောက်မဲမြို့ အမှတ်(၁)ရပ်ကွက်၊ နယ်မြေ(၅)တွင်နေထိုင်သည့် သက်နိုင်ထွေး နှင့် ကျော့ကျော့ခိုင်တို့မှ ကျောက်မဲ - ရန်ကုန် ခရီးသည်တင်ယာဉ်လိုင်းဂိတ်တစ်ခုဖြစ်သည့် ရွှေကျောက်မဲ ခရီးသည်တင် ကားဂိတ်သို့ မသင်္ကာဖွယ်ရာ ခေါပုတ်(၅)ထုပ်အား ရန်ကုန်မြို့တွင် နေထိုင်သည့် အမျိုးသမီးတစ်ဦးထံသို့ ပါဆယ်ပို့ရန် လာရောက်အပ်နှံသွားသဖြင့် ဂိတ်မှူးဖြစ်သူမှ သက်ဆိုင်ရာသို့ အကြောင်း ကြားခဲ့ခြင်းဖြစ်ကြောင်း သိရသည်။

မသင်္ကာဖွယ်ရာ ခေါပုတ်(၅)ထုပ်အား ကျောက်မဲမြို့မရဲစခန်းမှ နယ်ထိန်းခေါင်းဆောင် ဒုရဲအုပ် ကောင်းမြတ်ကျော် ဦးဆောင်သည့် ရဲတပ်ဖွဲ့ဝင်များနှင့် အသိသက်သေများက ဖွင့်ဖောက်စစ်ဆေးရာ ခေါပုတ်(၁) ထုပ်အတွင်း စိတ်ကြွရူးသွပ်ဆေးပြား အပြား(၂၀၀)စီပါ အထုပ်(၂)ထုပ်အား အပြာရောင်ကပ်ခွာ အိတ်ဖြင့် ထည့်လျက်တွေ့ရှိရသဖြင့် ပါဆယ်ထုပ်လာရောက်ပို့ဆောင်သွားသူ (၂)ဦး၏ နေအိမ်အား ရှာဖွေခွင့် ဝရမ်းဖြင့်ထပ်မံရှာဖွေမှုများ ပြုလုပ်ခဲ့ကြောင်း နှင့် နေအိမ်သို့ သွားရောက် ရှာဖွေရာတွင် မူးယစ်ဆေးဝါးများ ထပ်မံမတွေ့ရှိရဘဲ ၎င်းတို့အား တွေ့ရှိရ၍ ဖမ်းဆီးခဲ့ကြောင်း သိရသည်။

စိတ်ကြွရူးသွပ်ဆေးပြားများအား ရန်ကုန်သို့ သိုဝှက်ပို့ဆောင်ရန် ကြိုးစားသူ ၎င်းတို့ နှစ်ဦးအား မယ(ပ)၂၈/ ၂၀၁၇၊ မူး/စိတ် ပုဒ်မ ၁၅/၁၉(က)/၂၁ အရ ကျောက်မဲမြို့ မြို့မရဲစခန်းတွင် အမှုဖွင့် အရေးယူထားကြောင်းသိရှိရသည်။

သတင်း - နေဖြိုးမြင့်
Tachileik News Agency
http://www.tachileik.net