ရခိုင်ပြည်နယ်မြောက်ပိုင်းမှ မွတ်စလင်ဒုက္ခသည်များအရေး သတင်းဓာတ်ပုံများရိုက်ကူးရန် ဘင်္ဂလားဒေ့ရ်ှနိုင်ငံသို့ သွားရောက်နေသော မြန်မာနိုင်ငံသား ဓာတ်ပုံသတင်းထောက် နှစ်ဦးကို သူလျှိုလုပ်မှုစွပ်စွဲချက်ဖြင့် ဘင်္ဂလားဒေ့ရ်ှအာဏာပိုင်များက ဖမ်းထားသည်ဟု AFP သတင်းတစ်ပုဒ်တွင် ဖော်ပြထားသည်။
ရန်ကုန်အခြေစိုက် အလွတ်တန်းဓာတ်ပုံသတင်းထောက်များဖြစ်သည့် ကိုမင်းဇေယျာဦး နှင့် ကိုခွန်းလတ်တို့နှစ်ဦးသည် ဂျာမန်အခြေစိုက် ဂျီအိုမဂ္ဂဇင်းအတွက် ဓာတ်ပုံများရိုက်ကူးရန် ဘင်္ဂလားဒေ့ရှ်-မြန်မာနယ်စပ်အနီးရှိ ဒုက္ခသည်စခန်းများရှိရာ ကော့ဘဇားဒေသသို့ ယခုလဆန်းပိုင်းက ရောက်ရှိပြီးနောက်ဖမ်းဆီးခံရခြင်းဖြစ်ကြောင်း AFP သတင်းတွင် ရေးသားဖော်ပြထားသည်။
၎င်းတို့နှစ်ဦး ဘင်္ဂလားဒေ့ရ်ှနိုင်ငံသို့ဝင်ရောက်ခဲ့ရာတွင် သတင်းထောက်ပြည်ဝင်ခွင့်ဗီဇာဖြင့် ဝင်လာခြင်းမဟုတ်ဘဲ ခရီးသွားအလည်အပတ်ဗီဇာဖြင့် ဝင်ရောက်လာခဲ့ခြင်းဖြစ်ကြောင်း ဘင်္ဂလားဒေ့ရ်ှရဲတပ်ဖွဲ့က စွပ်စွဲထားပြီး ၎င်းတို့နှစ်ဦးအား အယောင်ဆောင်မှု၊ မှားယွင်းသော သတင်းအချက်အလက်များပေးပို့မှုများဖြင့် စွဲချက်တင်ထားသည်။
“မြန်မာပြည်ကလာတဲ့ ရိုဟင်ဂျာတွေနေတဲ့ပတ်သက်ပြီး ဒီနှစ်ယောက်က သတင်းအချက်အလက်တွေ လိုက်ယူနေတာပါ” ဟု ကော့ဘဇားပြည်နယ်ရှိ ရဲဌာနအကြီးအကဲ ရန်ဂျစ်ကူးမားဘာယူရာက AFP သတင်းဌာနကို ပြောသည်။
ကိုမင်းဇေယျာဦးနှင့် ကချင်ပြည်နယ်မှ ကိုခွန်းလတ် တို့မှာ မြန်မာနိုင်ငံ သတင်းဓာတ်ပုံလောကတွင် ထင်ရှားသော လူငယ်သတင်းထောက်များဖြစ်ကြပြီး ၎င်းတို့၏ စွမ်းဆောင်မှုအတွက် သတင်းဓာတ်ပုံဆိုင်ရာ နိုင်ငံတကာဆုများရရှိထားသူများဖြစ်သည်။ ကိုမင်းဇေယျာဦးသည် ရိုက်တာသတင်းဌာနအတွက် လုပ်ကိုင်ခဲ့ဖူးပြီး ကိုခွန်းလတ်သည် ပေါ်ပြူလာဂျာနယ်အတွက် လုပ်ကိုင်ခဲ့ဖူးသူဖြစ်သည်။
Myanmar Now
https://www.facebook.com/myanmarnownews
ထိပ်တန်းမြန်မာဓာတ်ပုံသတင်းထောက်နှစ်ဦး ဘင်္ဂလားဒေ့ရ်ှတွင် ဖမ်းဆီးခံရ
Reviewed by THITHTOOLWIN
on
18:31
Rating: