သမ္ဘာန်ကျေးရွာတွင်နေသူတစ်ဦးကို ဓားဖြင့် ၃၄ ချက်ခန့် ထိုးသတ်ခဲ့သူမှာ သေသူ၏တူဖြစ်နေ


သထုံ ဩဂုတ် ၁၅

မွန်ပြည်နယ်၊ သထုံမြို့နယ်၊ ဒူးရင်းဆိပ်ကျေးရွာအုပ်စု၊ သမ္ဘာန်ကျေးရွာတွင်နေသူတစ်ဦးကို ဓားဖြင့် ၃၄ ချက်ခန့် ထိုးသတ်ခဲ့သူအား သုဓမ္မတီနယ်မြေရဲစခန်းမှ စုံစမ်းစစ်ဆေးခဲ့ရာ သြဂုတ်လ ၁၅ ရက်၊ နံနက်က စစ်ဆေးပေါ်ပေါက်ခဲ့ပြီး သတ်သူမှာ တစ်ရွာတည်းနေ သေသူ၏ တူတော်စပ်သူ ဖြစ်နေကြောင်း သိရသည်။

အရက်အတူသောက်ရင်း အမွေဆိုင်ခြံမြေကိစ္စ၊ သေသူက ၎င်း၏မိန်းမဖြစ်သည့် အဒေါ် ဖြစ်သူနှင့် ပေးစားသည်တို့ကို မကျေနပ်၍ စကားများရာမှ ဒေါသအလျောက် ဓားဖြင့် ထိုးသတ်ခဲ့ခြင်း ဖြစ်ကြောင်း သတ်သူဟုဆိုသူ ကိုဖိုးပျို(ခ) မောင်ဝင်း (၄၆)နှစ်၊ သမ္ဘာန်ကျေးရွာနေသူက လူသတ် ရာတွင် အသုံးပြုသည့် သက်သေခံပစ္စည်းများနှင့် ကျူးလွန်ပုံအား သွားရောက်ပြသရာ၌ ပြောကြားသည်။

သမ္ဘာန်ကျေးရွာနေ ဦးဖားတစ်ဘော (ခ) စံရီ (၆၈) နှစ်၊ (ဘ) ဦးလှရွှေဆိုသူမှာ သြဂုတ်လ ၇ ရက်၊ မွန်းလွဲပိုင်းက နေအိမ်မှထွက်သွားပြီး ပြန်လည် ရောက်ရှိ လာခြင်းမရှိဘဲ ပျောက်ဆုံးနေရာမှ သြဂုတ်လ ၉ ရက်၊ နံနက်က ကြာပန်း-၀ီယော် ခရိုင်ချင်းဆက် လမ်းပေါ်ရှိ သမ္ဘာန်နှင့် အင်းရှည် ကျေးရွာစပ်တံတားအနီး ချောင်းထဲ၌ ဦးခေါင်း ပေါက်ပြဲဒဏ်ရာ၊ ၀ဲယာ မျက်လုံးအောက် ပေါက်ပြဲ ဒဏ်ရာ တစ်ချက်စီ၊ ရင်ဘတ်တွင် ထိုးသွင်းဒဏ်ရာ ၁၉ ချက်၊ ကျော၌ ထိုးသွင်းဒဏ်ရာ ၁၅ ချက်နှင့် ခြေသလုံးပွန်းပဲ့ ဒဏ်ရာတစ်ချက်တို့ဖြင့် သေဆုံးနေသဖြင့် စုံစမ်းဖော်ထုတ်အရေးယူပေးပါရန် ၎င်း၏ သားမက်ဖြစ်သူက တိုင်ကြားရာ (ပ)၁၅၉/၂၀၁၇၊ ရာဇသတ်ကြီးပုဒ်မ ၃၀၂၊ အမှုကြီးအမှတ်စဉ် (၂/၂၀၁၇) ဖြင့် အမှုဖွင့်လှစ်ကာ စုံစမ်းစစ်ဆေးဖော်ထုတ်ခဲ့ခြင်းဖြစ်ကြောင်း သုဓမ္မ၀တီနယ်မြေ ရဲစခန်းမှ သိရသည်။

“အလောင်းတွေ့တဲ့ သြဂုတ် ၉ ရက်မှာ သေသူနဲ့အရက်တူတူတွဲသောက်တဲ့ ဖိုးပျို ကို စစ်တယ် ၁၀ ရက်မှာ ဖိုးပျိုရဲ့အမျိုးသမီးကိုစစ်တယ် အဲ့ဒီမှာ ကွဲလွဲချက်လေးတွေရှိနေတော့ သူ့ကို အမှုနဲ့ပတ်သတ်ပြီး မသင်္ကာလို့ ဖမ်းဆီးစစ်ဆေးခဲ့တာပါ” ဟု သုဓမ္မတီနယ်မြေစခန်းမှူး ရဲအုပ် အေးမြင့်က ပြောသည်။

အမှုနှင့်ပတ်သတ်၍ တရားလို တစ်ဦး၊ သက်သေ ၁၅ ဦးနှင့် မသင်္ကာသူတစ်ဦး ပေါင်း ၁၇ ဦး အား စစ်ဆေးခဲ့ပြီး မသင်္ကာသူ ကိုဖိုးပျိုအား သြဂုတ်လ ၁၀ ရက် ညက ဖမ်းဆီးကာ ရမန်ယူ၍ ဆက်လက်စစ်ဆေးခဲ့ရာမှ သြဂုတ်လ ၁၅ ရက် နံနက်က စစ်ဆေးပေါ်ပေါက်ခဲ့ခြင်းဖြစ်ကြောင်း ၎င်းက ဆက်လက်ပြောကြားသည်။

အဆိုပါဖြစ်စဉ်တွင် ဦးဖားတစ်ဘော (ခ) စံရီအား ဒဏ်ရာများရရှိပြီး သေဆုံးအောင် ပြုလုပ်ခဲ့ သူ ကိုဖိုးပျို(ခ) မောင်ဝင်းအား ဥပဒေအရ တရားစွဲဆိုနိုင်ရေး ဆောင်ရွက်လျက်ရှိကြောင်း သုဓမ္မ၀တီ နယ်မြေရဲစခန်းမှ သိရသည်။

သက်ဦး(သထုံ)
Myanmaalinn
https://www.facebook.com/MYANMAALINNNEWS/
သမ္ဘာန်ကျေးရွာတွင်နေသူတစ်ဦးကို ဓားဖြင့် ၃၄ ချက်ခန့် ထိုးသတ်ခဲ့သူမှာ သေသူ၏တူဖြစ်နေ သမ္ဘာန်ကျေးရွာတွင်နေသူတစ်ဦးကို ဓားဖြင့် ၃၄ ချက်ခန့် ထိုးသတ်ခဲ့သူမှာ သေသူ၏တူဖြစ်နေ Reviewed by THITHTOOLWIN on 18:56 Rating: 5
Powered by Blogger.