တောင်ကုတ်တွင် ကားမှောက်၍ လူ ၃၀ ဒဏ်ရာရ

(မိုးတွင်းတွင် ကားဖြင့် ရခိုင်ခရီးသွားများသည် ဓာတ်ပုံပါအတိုင်း အခက်အခဲများနှင့် ကြုံလေ့ရှိကြသည်။)

 တောင်ကုတ်၊ သြဂုတ် ၂

ရခိုင်ပြည်နယ် တောင်ကုတ်မြို့နှင့် မအီမြို့အကြား လုပ်ငန်းခွင်ကားတစ်စီး တိမ်းမှောက်ရာမှ လူပေါင်း ၃၀ ဒဏ်ရ ရရှိသွားကြောင်း သတင်းရရှိသည်။

ယာဉ်မောင်း ဦးရဲသူရကျော် မောင်းနှင်လာသော ကားနံပါတ် ( ၉တ/၂၆၂၆၂ ) သည် သြဂုတ်လ ၁ရက် နံနက် ၇ နာရီ ၃၀ အချိန်တွင် တောင်ကုတ်မြို့နှင့် မအီအကြား မိုင်တိုင်အမှတ် ၃၃မိုင် ၅ဖာ လုံတွင် တိမ်းမှောက်ခဲ့ခြင်း ဖြစ်သည်။

ကားပေါ်တွင် ပါလာသူ အမျိုးသား ၁၈ဦး နှင့် အမျိုးသမီး ၁၂ဦး၊ စုစုပေါင်း ပေါင်း ၃၀ဦးမှာ ဒဏ်ရာ ပြင်းထန်စွာ ရရှိသွားသဖြင့် တောင်ကုတ် ဆေးရုံ တွင်ဆေးကုသမှု ခံယူ လျက်ရှိကြောင်း တောင်ကုတ်မြို့နေ ကိုရဲမာန်ခိုင်က ပြောသည်။

သံတွဲခရိုင် သတင်းတပ်ဖွဲ့ ရုံးသို့ နိရဉ္စရာမှ ဆက်သွယ်မေးမြန်းရာ တာဝန်ရှိသူတစ်ဦးက “ မအီမြို့နဲ့ လမူးရွာ အကြား ကြက်ဆင်တောင်မှာ ဂီယာမနိုင်ဘဲတောင်ကပြုတ်ကျတာပါ။ ခရီးသည်တင်ကား မဟုတ်ပါဘူး။ တာဝါ တိုင်တွေ လိုက်စိုက်နေတဲ့ အဖွဲ့ကားပါ။ လမူးကနေ မအီကိုသွားနေတုန်း တောင်ပေါ်က ပြုတ်ကျပြီး တိမ်းမှောက်တာ ဖြစ်တယ်။ ယာဉ် တိမ်းမှောက်မှုကြောင့် သေဆုံးသူတော့မရှိပါဘူး။ ခြေကျိုး လက်ကျိုးနဲ့ ပွန်းပဲ့ဒဏ်ရာ တွေရကြတယ်။ အဲဒီ လူနာတွေကို တောင်ကုတ် ဆေးရုံပို့ ဆောင်ပြီး ကုသမှုခံယူနေကြပါတယ်” ဟု ပြောဆိုသည်။

အဆိုပါယာဉ်တိမ်းမှောက်မှုနှင့် ပါတ်သက်၍ အသေးစိတ် သိရှိနိုင်ရန် တောင်ကုတ်မြို့နယ် ရဲတပ်ဖွဲ့မှူးရုံး၊ တောင်ကုတ်မြို့နယ် ရဲတပ်ဖွဲ့နှင့် မအီမြို့နယ်ရဲတပ်ဖွဲ့များသို့ ဆက်သွယ် ခဲ့သော်လည်း ဖုန်းလိုင်းဆက်သွယ်မှု အခက်အခဲကြောင့် ခေါ်ဆိုဆက်သွယ်၍ မရခဲ့ပါ။

နေဇော်(သံတွဲ)
Arakan State
https://www.facebook.com/NarinjaraNews