မြန်မာလူငယ်နှစ်ဦးအမှု မိမိတို့ဘက်က ၇၀ ရာခိုင်နှုန်း သေချာကြောင်း သံအမတ်ကြီး ပြော

ထိုင်းနိုင်ငံ ခိုထောင်းကျွန်း လူသတ်မှုမှာ စွပ်စွဲဖမ်းဆီး ခံထားရတဲ့ မြန်မာ လူငယ်နှစ်ဦး အတွက် အမှုမှန် ပေါ်ပေါက်ရေး ကြိုးပမ်း နေရာမှာ မိမိတို့ဘက်က အသာစီး ရရှိဖို့ ၇၀ ရာခိုင်နှုန်း မျှော်လင့် ထားတယ်လို့ ထိုင်းနိုင်ငံ ဆိုင်ရာ မြန်မာ သံအမတ်ကြီး ပြောကြား လိုက်ပါတယ်။

ဒီအမှုနဲ့ ပတ်သက်လို့ ထိုင်းရှေ့နေများ ကောင်စီအပြင် ဗြိတိန်အစိုးရ၊ ထိုင်းအစိုးရတို့နဲ့ပါ ပူးပေါင်း ဆောင်ရွက် နေတယ်လို့ သံအမတ်ကြီး ဦးဝင်မောင်က RFA ကို ဒီကနေ့ ပြောကြား လိုက်တာပါ။

"ကျနော်တို့က ၇ဝ ရာခိုင်နှုန်းကတော့ ကိုယ့်ဖက်ကရှိနေပါတယ်၊ ကျနော်တို့ဖက်က လုပ်စရာရှိတာတော့ လုပ်ထားပါပြီ၊ တချို့ဟာတွေ ပြောလို့မရလို့ မပြောတာပေါ့နော်၊ ကျနော်တို့ဖက်က ခိုင်လုံတဲ့သက်သေတွေ ရှာထားပြီးသားရှိပါတယ်၊ ပြန်ချေပဖို့ ရှေ့နေများကောင်စီနဲ့ ညှိနှိုင်းရှာဖွေထားပြီးဖြစ်တယ်၊ တချို့အချက်အလက်တွေကတော့ ကျနော်တို့က တရားခွင်မှာ ချေပရမယ့်အချက်တွေ ဖြစ်တဲ့အတွက် ပြောလို့မရတာတွေ ရှိနေပါတယ်၊ အားလုံးက အဖြစ်မှန်ပေါ်ပေါက်အောင်လို့ ထိုင်း၊ မြန်မာ၊ ဗြိတိန်ရယ် ပူးပေါင်းပြီးတော့ ဆောင်ရွက်နေပါတယ်"

ထိုင်းနိုင်ငံမှာ သတ်ဖြတ်ခံခဲ့ရတဲ့ ဗြိတိန်နိုင်ငံသား နှစ်ဦးရဲ့ မိသားစုတွေက လက်ရှိဖမ်းဆီးထားတဲ့ မြန်မာနိုင်ငံသား နှစ်ဦးက ပြစ်မှုကျူးလွန်ခဲ့ကြောင်း အထောက်အထားတွေ ခိုင်လုံနေတယ်လို့ မနေ့က ထုတ်ဖော်ပြောကြားလိုက်ပါတယ်။ ဒီအမှုအတွက် ထိုင်းနိုင်ငံကို သွားရောက်စုံစမ်းခဲ့တဲ့ စကော့တလန်ယာ့ဒ် ခေါ် ဗြိတိန်စုံထောက်ရဲတပ်ဖွဲ့ထံက မိသားစုတွေကို သူတို့ရဲ့ရှာဖွေတွေ့ရှိချက်တွေကို ပေးအပ်ခဲ့ပြီးတဲ့နောက် အခုလို ပြောကြားလိုက်တာပါ။

အဲဒီ့သက်သေအထောက်အထားတွေအရ စက်တင်ဘာလက ဖြစ်ပွားခဲ့တဲ့ အဲဒီလူသတ်မှုကို မြန်မာနိုင်ငံသား ကိုဇော်လင်းနဲ့ ကိုဝင်းဇော်ထွန်းတို့ ကျူးလွန်ခဲ့ကြောင်း ပေါ်လွင်ထင်ရှားပါတယ်လို့ မိသားစုဝင်တွေက သောကြာနေ့က ပြောပါတယ်။ ဒါပေမယ့် မိသားစုဝင်တစ်ဦးကတော့ နှစ်ဖက်သက်သေထွက်ချက်တွေကို စောင့်ကြည့်လေ့လာသင့်ကြောင်း ပြောပါတယ်။

မြန်မာနိုင်ငံသား ၂ ဦးကတော့ အဲဒီ လူသတ်မှုကို သူတို့ ကျူးလွန်ခဲ့ခြင်းမရှိကြောင်းနဲ့ ထိုင်းရဲတွေက ညင်းပန်းနှိပ်စက်ပြီး အဓမ္မဝန်ခံခိုင်းခဲ့ကြောင်း ပြောဆိုထားပါတယ်။ ဒီအမှုကို လာမယ့်တနင်္လာနေ့ကျရင် ထိုင်းနိုင်ငံတရားရုံးမှာ စတင်ကြားနာစစ်ဆေးတော့မှာ ဖြစ်ပါတယ်။

RFA Burmese
https://www.facebook.com/pages/RFA-Burmese/39218993127