၂ဝ၁၅ ရွေးကောက်ပွဲ တရားမျှတစွာကျင်းပရေး အမေရိကန် အလေးထား ကူညီပံ့ပိုးသွားမည်

 မြန်မာနိုင်ငံမှာ အစိုးရနဲ့ ပြည်သူတွေ ပူးပေါင်းဆောင်ရွက်မှုတွေကြောင့် ကနဦး တိုးတက်တဲ့ အပြောင်းအလဲတွေကို ကိုယ်တိုင်တွေ့မြင်ခဲ့ရပြီး စိန်ခေါ်မှုတွေလည်း အများကြီးရှိနေကြောင်း၊ အမေရိကန်ပြည်ထောင်စုအနေနဲ့ ၂ဝ၁၅ ရွေးကောက်ပွဲ လွတ်လပ်ပြီး တရားမျှတစွာကျင်းပနိုင်ရေးကို အထူးအလေးထား ကူညီပံ့ပိုးသွားမယ်လို့ အမေရိကန်နိုင်ငံခြားရေး ဝန်ကြီး John Kerry က ပြောကြားလိုက်ပါတယ်။

အမေရိကန်ပြည်ထောင်စု ဟာဝိုင်ယီပြည်နယ်၊ ဟိုနိုလူလူမြို့က ဟာဝိုင်ယီတက္ကသိုလ်မှာရှိတဲ့ East West Center မှာ ဗုဒ္ဓဟူးနေ့က ပြောကြားတဲ့ အာရှခရီးစဉ်နဲ့ အမေရိကန် မူဝါဒအကြောင်း ပြောကြားတဲ့ မိန့်ခွန်းမှာ အခုလို ပြော ကြားခဲ့တာဖြစ်တယ်လို့ မနေ့က ထုတ်ပြန်တဲ့ အမေရိကန်နိုင်ငံခြားရေးဝန်ကြီးဌာန ထုတ်ပြန်တဲ့ မိန့်ခွန်းအပြည့်အစုံမှာ ဖော်ပြထားပါတယ်။

မြန်မာနိုင်ငံဟာ ရှေ့ဆက်သွားရမယ့်ခရီးက အများကြီးရှိနေပါတယ်။ ဒီမိုကရေ စီပြုပြင်ပြောင်းလဲရေး လုပ်ဆောင်နေကြသူတွေ အနေနဲ့ အခုအခါမှာ အခက်ခဲဆုံး၊ အနက်နဲဆုံး စိန်ခေါ်မှုတွေဖြစ်တဲ့ အနာဂတ်မှာ စစ်တပ်အတွက် အခန်းကဏ္ဍ၊ ဖွဲ့စည်းပုံအခြေခံဥပဒေ ပြုပြင်ပြောင်းလဲရေး၊ လွတ်လပ်တရားမျှတတဲ့ရွေးကောက်ပွဲ ကျင်းပရေး၊ ဆယ်စုနှစ်တွေချီကြာမြင့်နေတဲ့ ပြည်တွင်းစစ် အဆုံးသတ်ရေး၊ နာမည်အရသာ ကတိပေးထားတဲ့ လူ့အခွင့်အရေးတွေ တရားဝင် လက်တွေ့ရရှိရေး၊ စတာတွေကို ကိုင်တွယ်ဖြေရှင်းနေကြရပါတယ်လို့ Mr. Kerry က ပြောသွားတာပါ။

တချိန်ထဲမှာလည်း နိုင်ငံခြားရင်းနှီးမြုပ်နှံမှုရရေး၊ အဂတိလိုက်စားမှုတိုက်ဖျက်ရေး၊ တိုင်းပြည်ရဲ့ သစ်တောနဲ့ တခြားသယံဇာတတွေ ထိန်းသိမ်းရေးတွေလည်း လုပ်ဆောင်နေကြကြောင်း၊ အမေရိကန်ပြည်ထောင်စု အနေနဲ့ မြန်မာနိုင်ငံ က ပြုပြင်ပြောင်းလဲရေး လုပ်ဆောင်နေသူတွေကို အမြဲတမ်း အားပေး ကူညီနေမှာဖြစ်ပြီး အထူးသဖြင့် ၂ဝ၁၅ ရွေးကောက်ပွဲအောင်မြင့်စွာ ကျင်းပရေးကို ကူညီအားပေးသွားမှာဖြစ်ကြောင်း၊ အမေရိကန်နိုင်ငံခြားရေး ဝန်ကြီးက ပြောပါတယ်။

ဒါပေမယ့် တကယ်တမ်းဆုံးဖြတ် လုပ်ကိုင်ရမှာက မြန်မာနိုင်ငံက ခေါင်းဆောင်တွေပဲ ဖြစ်ပါတယ်လို့လည်း Mr. Kerry က ပြောကြားထားပါတယ်။

RFA Burmese
https://www.facebook.com/pages/RFA-Burmese/39218993127?ref=br_tf