တိုင်းရင်းသားတပ်တွေဆီ ခိုလှုံလာသူ CDM ဝန်ထမ်းတချို့ရဲ့ ရင်ဖွင့်သံ



Share/Bookmark

မြန်မာနိုင်ငံအနှံ့ နေ့စဉ်နဲ့အမျှ ဖြစ်ပွားနေတဲ့ ဆန္ဒပြပွဲ တွေကို အာဏာသိမ်းစစ်တပ်က အကြမ်းဖက် ဖြိုခွင်း ၊ ဖမ်းဆီးတာတွေ အဆက်မပြတ် လုပ်လာတာကြောင့် ဒီလိုစိုးရိမ်ဖွယ် အခြေအနေကေို ရှောင်ရှားဖို့ တိုင်းရင်းသား လက်နက်ကိုင်အဖွဲ့တွေရှိရာ နယ်စပ်ဒေသတွေကို တိမ်းရှောင်လာသူတွေလည်း အများအပြား ရှိနေပါတယ်။ စစ်အာဏာသိမ်းမှု ဆန့်ကျင်လှုပ်ရှားရင်း နယ်စပ်ဒေသတွေကို တိမ်းရှောင် လာကြရသူတွေ အကြောင်း AFP သတင်းကို အခြေခံပြီး ကိုဉာဏ်ဝင်းအောင်က ပြောပြမှာပါ။

အာဏာသိမ်းကောင်စီရဲ့ တပ်တွေက မြို့တွေမှာရော နယ်တွေမှာပါ ချီတက် ဆန္ဒပြသူတွေနဲ့ သပိတ်စခန်း ခံတပ်တွေကို ပစ်ခတ်ဖြိုခွင်းနေတာကြောင့် နေ့စဉ်ဆိုသလို လူသေဆုံးမှု ရှိနေပါတယ်။

စစ်ကိုင်းတိုင်း ကလေးမြို့ တာဟန်းအရပ်က သပိတ်စခန်း ဖြိုခွဲခံရတာ ၊ အခုရက်ပိုင်းထဲ တမူးမြို့နဲ့ ပဲခူးမြို့ပေါ်က သပိတ်ခံတပ်တွေကို ပစ်ခတ်ဖြိုခွင်းနေတာကို လူမှုကွန်ယက်ပေါ်က ဗီဒီယိုမှာ မြင်နေရတာပါ။

ဒါ့အပြင် ပုဒ်မ(၁၄၄) ညမထွက်ရအမိန့်ထုတ်ထားတဲ့ ညဖက်ကာလအတွင်း အာဏာသိမ်းမှု ဆန့်ကျင်တဲ့ သပိတ်ခေါင်းဆောင်တွေ ၊ CDM လုပ်ရှားမှုမှာ ပါဝင်သူတွေ ၊ ပုဒ်မ ၅၀၅-က နဲ့ ဖမ်းဝရမ်းထုတ်ထားတဲ့ နာမည်ကြီး အနုပညာရှင်တွေ၊ သတင်းသမားတွေကိုပါမကျန် လိုက်လံဖမ်းဆီးနေတာ ဖြစ်ပါတယ်။ တချို့ကိုတော့ ဖမ်းမိသွားပြီး တချို့ကလည်း ရှောင်တိမ်းနေဆဲ ဖြစ်ပါတယ်။

ဒီလို စိုးရိမ်ဖွယ် အခြေအနေတွေ ကြုံလာတာကြောင့် သူတို့အနေနဲ့ ထိုင်းမြန်မာနယ်စပ်က ကရင်အမျိုးသားအစည်းအရုံး KNU ထိန်းချုပ်နယ်မြေကို တိမ်းရှောင်လာရတာဖြစ်ကြောင်း CDM မှာပါဝင်တဲ့ မီးရထားဝန်ထမ်း စက်ခေါင်းမောင်းဆရာ ဦးမြတ်လ ွင်က ပြောပါတယ်။

" ကျနော်တို့ကတော့ ငြိမ်းငြိမ်းချမ်းချမ်းပဲ အဲဒီတုန်းက ဒီလိုပဲ။ ရိုးရိုးသားသား အေးအေးဆေးဆေး ဆန္ဒပြတာ။ မီးခိုးဗုံးတွေ ကြားတို့၊ မျက်ရည်ယိုဗုံးတွေ ကြားတို့ ပြေးခဲ့ရတဲ့ ရက်တွေလည်း ရှိပါတယ်။ ဒါပေမဲ့ အကြမ်းဖက် နှိမ်နင်းတော့ ကျနော်တို့ ပြေးခဲ့ရတဲ့ ကာလလည်း ရှိခဲ့ပါတယ်။ ကျနော်တို့ကို ဖမ်းရင်လည်း သူတို့က ရှင်းရှင်း ပြောရရင်လည်း အရှင် ထားမှာ မဟုတ်ပါဘူး။ အသေဘဲ ရမှာပါ။ ဒါကြောင့် ထွက်ပြေးလာတာ။ "

အာဏာသိမ်းကောင်စီက CDM လုပ်ဆောင်နေသူတွေကို ဖမ်းဝရမ်းထုတ် လိုက်လံ ဖမ်းဆီးနေတာကြောင့် အားကိုးရမယ်လို့ ယုံကြည်ထားတဲ့ KNU နယ်မြေကို ဝင်ရောက်ခိုလှုံလာတာ ဖြစ်တယ်လို့ ကရင်ပြည်နယ်ထဲက အမည်မဖေါ်လိုတဲ့ CDM ကျောင်းဆရာမတဦးက ပြောပါတယ်။

" ပထမဦးဆုံး ကျမတို့ CDM လုပ်တဲ့ ဝန်ထမ်းတွေ ဖမ်းဝရမ်း ထုတ်ပြီးတော့ အားကိုးရာ ဆိုလို့ ဒီ တိုင်းရင်းသား လက်နက်ကိုင်တွေဘဲ ရှိတာပေါ့။ ဒါသည် ပြည်သူတရပ်လုံးနဲ့ ဆိုင်တယ်၊ တနိုင်ငံလုံးနဲ့ ဆိုင်တဲ့ အတွက်ကြောင့်မို့လို့ မြဝတီမြို့ကလည်း လူထုသပိတ် စစ်ကြောင်းထဲ ပါဝင်မယ်ဆိုလို့ ကျမတို့ ဌာနဆိုင်ရာ ဝန်ထမ်းတွေ စုပြီးတော့ ဒီသပိတ် စစ်ကြောင်းထဲ ပါဝင်တာပါ။ ဒီ ဝန်ထမ်းတွေနဲ့ တိုင်းရင်းသား လက်နက်ကိုင်တွေနဲ့ အထူးသဖြင့် ယုံကြည်မှုလည်း ရလာတယ်။ သူတို့ဘက်က ကူညီတယ်ပေါ့နော်။ နွေးနွေးထွေးထွေး ဖြစ်လာတယ်။ စ ဝင်လာကတည်းက ကျမတို့က ပြောထားပြီးသား ကျမတို့ဖက်က ကူညီနိုင်မယ့် ဘယ်လို အရာမျိုးမဆို အကူအညီတောင်းပါ။ ကူညီဖို့ အသင့်ပါလို့ ။ "

အခုလို KNU နယ်မြေထဲ ခိုလှုံလာကြတယ်ဆိုပေမဲ့ KNU ထိန်းချုပ်ဧရိယာထဲက တချို့ တပ်မဟာ နယ်မြေတွေကို မြန်မာစစ်တပ်က ပြီးခဲ့တဲ့ သတင်းပတ်အတွင်း လေကြောင်း ထိုးစစ်နဲ့ တိုက်ခိုက်ခဲ့လို့ ဒဏ်ရာရသူအများအပြား ရှိခဲ့ပါတယ်။ အခြား တိုင်းရင်းသားလက်နက်ကိုင် နယ်မြေတွေဖြစ်တဲ့ KIA ၊ TNLA စတဲ့ ကချင်နဲ့ ရှမ်းမြောက် နယ်မြေတွေမှာလည်း မြန်မာစစ်တပ်နဲ့ ခုရက်ပိုင်းအတွင်း ကြိုကြားကြိုကြားတိုက်ပွဲတွေ ဖြစ်နေပါတယ်။


ကိုဉာဏ်ဝင်းအောင်/ VOA Burmese

https://burmese.voanews.com/a/myanmar-protesters-flee-to-ethnic-armed-gorup-territory/5849025.html



Share/Bookmark

မွတ္ခ်က္ေရးသားလုိတဲ့ စာဖတ္ပရိတ္မ်ား ေတာင္းဆုိခ်က္အရ ဖြင့္ေပးလုိက္ပါျပီ။ မွတ္ခ်က္မ်ား ေရးသားႏုိင္ပါျပီ။

အချိန်နဲ့တပြေးညီ သတင်းများ ဖတ်ရှုနိုင်ဖို့ facebook "like" ကို နှိပ်ပါ။ thithtoolwin9@gmail.com ကို လည်း သတင်းများ ဆက်သွယ်ပေးပို့နိုင်ပါသည်။
 

Last 7 days Pageviews

ကျန်းမာရေးနှင့် ဖျော်ဖြေရေး

တစ်ပတ်အတွင်း စိတ်ဝင်စားဖွယ်ရာ သတင်းများ