ပါတီရုံးချုပ်ညပိုင်းဖောက်ထွင်းဝင်ရောက်မှု NLD သတင်းစာရှင်းလင်း

NLD ပါတီရုံးချုပ်မှာ လုပ်တဲ့ သတင်းစာရှင်းလင်းပွဲမြင်ကွင်း။ (ဖေဖော်ဝါရီ ၂၃၊ ၂၀၂၁)

NLD ပါတီရုံးချုပ်ကို ညအချိန် လူတစုက ဝင်ရောက် ဖောက်ထွင်းခဲ့တာနဲ့ ပတ်သက်လို့ ရဲစခန်းမှာ အမှုဖွင့်ထားပေမဲ့ ရဲအာဏာပိုင်တွေဘက်က တုံ့ပြန်ကိုင်တွယ်မှုအပေါ် NLD ပါတီဘက်က ကျေနပ်အားရမှု မတွေ့ရပါဘူး။ ဒီကိစ္စနဲ့ပတ်သက်လို့ NLD ပါတီရုံးချုပ်မှာ သတင်းစာရှင်းလင်းပွဲလုပ်ခဲ့တာကို ဗွီအိုအေ သတင်းထောက်ကိုဇော်ထက် သတင်းပေးပို့ထားပါတယ်။

ရန်ကုန်တိုင်း၊ ဗဟန်းမြို့နယ်က NLD ပါတီရုံးချုပ်ကို ဖေဖော်ဝါရီ ၉ ရက် ည ၁၀ နာရီမှာ လူတစုက ဖောက်ထွင်း ဝင်ရောက်ခဲ့တာကြောာင့် NLD ဘက်က သက်ဆိုင်ရာရဲစခန်းမှာ အမှုဖွင့်တိုင်ကြားခဲ့တယ်လို့ပြောပါတယ်။ ဒီအမှုကို ဖေဖော်ဝါရီ ၁၁ ရက်မှာ သက်သေခံပစ္စည်းနဲ့ တရားလို ထွက်ဆိုချက်တွေ ယူမယ်လို့ ဗဟန်းမြို့နယ် ရဲစခန်းက အကြောင်းကြားထားပေမဲ့ မလာခဲ့ကြောင်း NLD ပါတီဝင် ဦးစိုးလေးက ပြောပါတယ်။ အဲဒီနောက်ပိုင်းလည်း ဗဟန်းမြို့နယ် ရဲစခန်းကို အကြိမ်ကြိမ်သွားပြီး အမှုသက်သေ စစ်ချက်ယူပေးဖို့ တာဝန်ရှိသူတွေကို တိုက်တွန်းခဲ့ပေမဲ့ ပျက်ကွက်ခဲ့ကြောင်း သူက ဒီနေ့သတင်းစာ ရှင်းလင်းပွဲမှာ ပြောလိုက်တာပါ။

“၂၂ ရက်မှာ ဦးလေးတို့ အစည်းအဝေးထိုင်တယ်။ ဒီလူကြီးတွေအားလုံး၊ ဒီရုံးချုပ် ဖောက်ထွင်းခံရတာနဲ့ ပတ်သက်လို့၊ အခု သက်သေခံ ပစ္စည်းတွေ မအပ်ဘူး၊ ထွက်ဆိုချက်တွေလည်း မယူဘူး၊ တို့တွေ ဘာတွေဆက်လုပ်မလဲ။ သူတို့ကတော့ ရှောင်နေပြီ ပြောရရင်။ အဲဒီတော့ မနေ့က အစည်းအဝေးလုပ်ပြီး ဒီနေ့တော့ သတင်းစာရှင်းလင်းပွဲလေးတခု ဦးလေးတို့ လုပ်မယ်ဆိုပြီး ဒီအခြေအနေ အရပ်ရပ်ကို သတင်းမီဒီယာအဖွဲ့ကို တင်ပြတာ ဖြစ်ပါတယ်။”

ဖေဖော်ဝါရီ ၁၀ ရက် ည ၆ နာရီမှာ ဗဟန်းရဲစခန်းက ဒီအမှုကို လက်ခံခဲ့ပါတယ်။ အဲဒီနောက် ပုဒ်မ ၄၂၇/ ၄၅၇ နဲ့ အမှုဖွင့်ပေးထားကြောင်း ၁၅ ရက်နေ့မှာ အကြောင်းပြန်တယ်လို့ ဦးစိုးလေးက ပြောပါတယ်။ စာရွက်စာတမ်းတွေနဲ့ ဘဏ်စာရင်းတွေ ယူဆောင်သွားသလို ရုံးလုံခြုံရေးကင်မရာ စနစ်တချို့လည်း ဖျက်ဆီးခံရတယ်လို့ ဆိုပါတယ်။

စစ်တပ်က အာဏာသိမ်းပြီးနောက်ပိုင်း ခဏတာပိတ်ထားတဲ့ NLD ရုံးချုပ်ကို ဖေဖော်ဝါရီ ၈ ရက် နေ့လယ်ပိုင်းမှာ ရုံးတာဝန်ရှိသူတချို့က ပြန်ဖွင့်ခဲ့ပြီး အဲဒီနေ့မှာပဲ ရဲကားတစီး ရုံးအနီးနားမှာ စောင့်ကြည့်နေသလို ဖောက်ထွင်းခံရတဲ့ ဖေဖော်ဝါရီ ၉ ရက်အထိ အဲဒီရဲကားရှိနေကြောင်း ဦးစိုးလေးက ပြောပါတယ်။

“ဒီလိုအခြေအနေမျိုးမှာ ဒီလိုလုံခြုံရေး ရဲကားတစီး ရှိတဲ့နေရာ၊ ဒီလိုနေရာကို ဖောက်ထွင်းဝင်ရောက်ဖို့ဆိုတာ သာမန်သူခိုး မဖြစ်နိုင်ဘူး။ ဦးလေးတို့ပြောပြီး ဦးလေးတို့ CCTV မှတ်တမ်းအရ ရဲဝတ်စုံနဲ့ ပုဂ္ဂိုလ်တွေပါတယ်။ စစ်သားဝတ်စုံ စစ်ယူနီဖောင်းနဲ့ ပုဂ္ဂိုလ်တွေ ပါတယ်။ နောက်အရပ်ဝတ် အရပ်ဝတ်ဆိုတာမှာ SP လည်း ပါနိုင်တာပဲ။ ရပ်ကွက်က အုပ်ချုပ်ရေးမှူးတွေလည်း ပါနိုင်တာပဲပေါ့။ ဦးလေးတို့က မတရားခံထားရတာ။ အဲဒီတော့ တရားခံဟာ ဘယ်သူတွေ ဖြစ်နိုင်လဲဆိုတာ အားလုံးလည်း မှန်းလို့ ရသွားပြီ။”

သက်သေခံပစ္စည်းတွေ သိမ်းဖို့ကိစ္စ၊ တရားလိုဆီက ထွက်ဆိုချက်တွေ ယူဖို့ကိစ္စတွေကို ဗဟန်းမြို့နယ်ရဲစခန်းက ပျက်ကွက်နေတဲ့အတွက် ပထမအဆင့်အနေနဲ့ စာပေးပို့မှာဖြစ်ပြီး ဆက်ပြီး ပျက်ကွက်ရင်တော့ ခရိုင်အဆင့်၊ တိုင်းအဆင့် အဲဒီနောက် ပြည်ထဲရေး ဝန်ကြီးဌာနအထိ အဆင့်ဆင့် တိုင်ကြားဆောင်ရွက်သွားမယ်လို့ ဆိုပါတယ်။

ဖေဖော်ဝါရီလ ၁၅ ရက်မှာလည်း ရဲကား အမြောက်အများနဲ့ ရဲအင်အား ၁၀၀ လောက်ဟာ NLD ရုံးချုပ်ကို ရောက်လာပြီး ဗဟိုအလုပ်အမှုဆောင်တွေဖြစ်တဲ့ ဦးအောင်ကြည်ညွန့်နဲ့ ဒေါ်မေဝင်းမြင့်ကို လာရောက်ရှာဖွေကြပါတယ်။ အဲဒီနောက် NLD ရုံးချုပ်ရှေ့ကို လူအင်အား ထောင်ချီ ရောက်ရှိလာပြီး ဝန်းရံခဲ့ပါတယ်။ ဖမ်းဆီးချင်တဲ့သူတွေ မတွေ့တဲ့အခါမှာ ညှိနှိုင်းမှုတွေရပြီး ရဲတပ်ဖွဲ့ဝင်တွေကို ပြန်ရုပ်သိမ်းသွားပါတယ်။

ကိုမိုးဇော်/ VOA Burmese

https://burmese.voanews.com/a/nld-myanmar-military-coup/5789483.html