CDM လှုပ်ရှားမှုမှာ ပါဝင်သူတွေ အာဏာသိမ်းစစ်ကောင်စီ ဖမ်းဆီးဖြိုခွဲနေ

ရန်ကုန်မြို့ စစ်အာဏာဖီဆန်ဆန္ဒပြသူ ရန်ကုန်မြို့ခံများ။ (ဖေဖော်ဝါရီ ၁၈၊ ၂၀၂၁)

စစ်တပ်က အာဏာသိမ်းတာကို ဆန့်ကျင်တဲ့ မြန်မာနိုင်ငံအဝန်းက လှုပ်ရှားမှုတွေမှာ ပါဝင်ကြတဲ့ ဝန်ထမ်းတွေကို အာဏာပိုင်တွေ ဖမ်းဆီးတာတွေ၊ ဖိအားပေးတာတွေ ရှိနေပါတယ်။ နိုင်ငံခြားရေးဝန်ကြီးဌာနက ဝန်ထမ်းတချို့ အပါအဝင် ဖမ်းဆီးခံရသူတွေ၊ ဖိအားပေးခံရသူတွေ ရှိနေပေမဲ့လည်း အလုပ်မဆင်းဘဲ အနုနည်းနဲ့ဆန့်ကျင်တဲ့ လှုပ်ရှားမှုတွေမှာ ဆက်လက် ပါဝင်နေသူတွေလည်း ရှိပါတယ်။ ဒီအကြောင်းအပြည့်အစုံကို ဗွီအိုအေ မြန်မာပိုင်းသတင်းထောက် မအိမ့်သန္တာထွန်းက ပြောပြပါမယ်။

လမ်းပေါ်ထွက် ဆန္ဒပြပွဲတွေ၊ အလုပ်မဆင်းဘဲ ငြိမ်းချမ်းတဲ့နည်းနဲ့ ဆန့်ကျင်လှုပ်ရှားမှုတွေ သီတင်း ၂ ပတ်လောက် ရှိလာချိန်မှာပဲ လှုပ်ရှားမှုတွေနဲ့ ဆက်နွယ်ပြီး ဝန်ထမ်းတွေကို အာဏာပိုင်တွေက ဖမ်းဆီးတာ ခြိမ်းခြောက်တာတွေ လုပ်လာနေတာပါ။ CDM လို့ခေါ်ကြတဲ့ အနုနည်းနဲ့ အာဏာဖီဆန်တဲ့ လှုပ်ရှားမှုမှာ ပါဝင်နေသူ ဝန်ထမ်းရာကျော်ရှိတဲ့ အစိုးရရုံးစိုက်ရာ နေပြည်တော်က နိုင်ငံခြားရေးဝန်ကြီးဌာနရုံး ဝန်ထမ်း ၁၁ ယောက်ကိုလည်း ဒီကနေ့ အစောပိုင်းမှာပဲ အာဏာပိုင်တွေ ဖမ်းဆီးသွားကြောင်း လုပ်ဖော်ကိုင်ဖက်တဦးက VOA ကိုပြောပါတယ်။

“ကျနော်တို့ သိရသလောက်ကတော့ ဒီနေ့မနက် ၄ နာရီမှာ သူတို့နေတဲ့ အိမ်ပေါ့နော်။ အဲ့ဒီအိမ်ကို လာဖမ်းသွားတယ်တဲ့၊ လာဖမ်းတော့ ဖမ်းခံရတဲ့သူတွေကလည်း ကျနော်တို့ဆီကို ဖုန်းဆက်တယ်။ မနက် ၄ နာရီကြီးဖြစ်တော့ ဖုန်းကို မကိုင်လိုက်မိဘူး၊ သူတို့က သူတို့ဖမ်းခံရတဲ့ အကြောင်းကို Message လေးပဲပို့ထားခဲ့တယ်။ အဲ့ဒီ Message ပဲ ကျနော်တို့ ရတယ်ပေါ့နော်။ ကျနော်တို့ ခုသူတို့နဲ့ အဆက်အသွယ်မရဘူး။ သူတို့ဖုန်းကို သိမ်းထားတယ်လို့ သိရပါတယ်။”

နိုင်ငံခြားရေး ဝန်ကြီးဌာနက ဖမ်းဆီးခံရသူ ဝန်ထမ်းတွေမှာ အကြီးတန်းနဲ့ အငယ်တန်းစာရေးတွေ ပါဝင်ကြောင်းလည်း ပြောပါတယ်။ အလုပ်မဆင်းဘဲ အာဏာဖီဆန်တဲ့ လှုပ်ရှားမှုကြောင့် အစိုးရနဲ့ ပုဂ္ဂလိကလုပ်ငန်းတွေ တော်တော်များများ ရပ်ဆိုင်းနေချိန်မှာပဲ လုပ်ငန်းတွေ ပြန်လည်ပတ်နိုင်အောင် အာဏာပိုင်တွေ ဖိအားပေးနေတာပါ။ ရပ်ဆိုင်းနေတဲ့ လုပ်ငန်းတွေ လည်ပတ်နိုင်အောင် မကြာသေးခင် ရက်တွေကစလို့ အာဏာပိုင်တွေ ဖိအားပေးခံနေရတဲ့ အထဲမှာတော့ မီးရထားလုပ်ငန်းလည်း တခုအပါအဝင် ဖြစ်ပါတယ်။ မြန်မာ့မီးရထား ဝန်ထမ်းတဦးကတော့ ဖမ်းဆီးအရေးယူဖို့အထိ ဖိအားပေးဖို့ စီစဉ်နေတဲ့သတင်းတွေ ထွက်ပေါ်နေတယ်လို့ ပြောပါတယ်။

ရန်ကုန်မြို့ ၁၃ ရက်မြောက် ဆန္ဒပြပွဲမြင်ကွင်းများ

“တိုင်းတာဝန်ခံဆိုတာက စစ်တပ်ကလာတဲ့အတွက် သူကတော့ ကျနော်တို့ကို ဖိအားတွေအရမ်းပေးတယ်။ နောက်ဆုံးဖမ်းခိုင်းတဲ့ အဆင့်ထိအောင်တောင်မှ ကျနော်တို့ ပြန်ကြားရတယ်။ အတိအကျတော့ ကျနော်တို့ ဆီတော့ ရောက်မလာဘူး။ ဆက်ပြီးတော့ ကျနော်တို့ကတော့ အဆုံးထိကိုလုပ်ဖို့ CDM ကို အဆုံးထိလုပ်မှာပါ။ ကျနော်တို့လည်း အဆိုးဆုံးထိ တွက်ထားပြီးသားပါ။ ဒါပေမဲ့ အကောင်းဆုံး ပြင်ဆင်ထားပါတယ်။”

မနေ့ညကလည်း မန္တလေးမြို့ကနေ မြစ်ကြီးနားကိုသွားမယ့် ရထားကို ဝန်ထမ်းတွေ တားဆီးဆန္ဒပြတဲ့ သတင်းတွေ ထွက်ပေါ်ခဲ့ပြီးနောက် မန္တလေးဘူတာကြီးအနီး ၃၄ လမ်း၊ ၇၈ လမ်းနဲ့ ၇၉ လမ်းကြား ရထားလမ်းတလျှောက် လုံခြုံရေးတပ်ဖွဲ့တွေ သေနတ်ပစ်ဖောက် လူစုခွဲခဲ့ပါတယ်။

အကြမ်းမဖက်ဘဲ အာဏာဖီဆန်တဲ့ လှုပ်ရှားမှုတွေမှာ ပါဝင်သူတွေကို အာဏာပိုင်တွေ ဖိအားပေးတာတွေ ရှိနေပေမဲ့လည်း လှုပ်ရှားမှုတွေမှာ ဆက်လက် ပါဝင်သူတွေလည်း ရှိနေပါတယ်။ ဒီသီတင်းပတ် အစောပိုင်းမှာပဲ လုံခြုံရေးတပ်ဖွဲ့တွေက အင်အားသုံး နှိမ်နင်းဖို့ ကြိုးပမ်းခဲ့တဲ့ ရှမ်းပြည်နယ်၊ တောင်ကြီးမြို့က စဝ်စံထွန်းဆေးရုံမှာ ဆိုရင်လည်း အလုပ်ပြန်ဆင်းဖို့ ဖိအားပေးတာတွေကို ဝန်ထမ်းတွေ ကြံ့ကြံ့ခံ ရင်ဆိုင်နေကြတယ်လို့ ပါဝင်လှုပ်ရှားနေသူ ဆရာဝန်တစ်ဦးက ပြောပါတယ်။

“ခုကတော့ ဆေးရုံထဲက ဆရာဝန်အဆောင်ရော သူနာပြုအဆောင်ရော CDM ကြေညာထားတဲ့သူရော မကြေညာထားတဲ့သူရော ဒီအဆောင်တွေမှာ ဘယ်သူမှ မနေရဲကြတော့ဘူးပေါ့၊ အဆောင်ပြောင်းပြီးပဲ နေကြတာပေါ့နော်။ ကိုယ့်လုံခြုံရေးအတွက်ပေါ့။ သူတို့က ဘာရည်ရွယ်ချက်နဲ့ လာမှန်းမသိတဲ့အတွက် ဒါမျိုးက တရားခံဖမ်းတဲ့ ပုံစံမျိုးမဟုတ်ဘဲနဲ့ ခံတပ်တော့ ရန်သူစခန်းတို့ကို စီးတဲ့ ပုံစံမျိုးဖြစ်တော့လေ အထဲမှာ မနေရဲကြတော့ အပြင်ပဲ ပြောင်းနေကြတယ်ဗျ။”

အာဏာဖီဆန်ရေး လှုပ်ရှားမှုမှာ ပါဝင်ကြတဲ့ လေကြောင်းထိန်းသိမ်းရေး လုပ်ငန်းက ဝန်ထမ်းတချို့ဟာလည်း ပြီးခဲ့တဲ့တပတ်ထဲမှာပဲ အာဏာပိုင်တွေက ဖမ်းဆီးတာ၊ ဖိအားပေးတာတွေ ခံနေရတာပါ။ ကုလသမဂ္ဂနဲ့ နိုင်ငံတကာ အသိုင်းအဝန်းကတော့ ငြိမ်းချမ်းတဲ့ ဆန္ဒပြလှုပ်ရှားမှုတွေကို အာဏာပိုင်တွေက အင်အားသုံးနှိမ်နင်းတာတွေ၊ ဖမ်းဆီးတာတွေ မလုပ်ဖို့နဲ့ အရပ်သားအစိုးရ ခေါင်းဆောင်တွေ အပါအဝင် ဖမ်းဆီးထားသူတွေကို ပြန်လွှတ်ပေးဖို့လည်း တောင်းဆိုထားပါတယ်။ 

အိမ့်သန္တာထွန်း/ VOA Burmese

https://burmese.voanews.com/a/myanmar-military-protest/5783146.html