ထိုင်းမှာ တရားမဝင် မြန်မာနိုင်ငံသားတွေ ပါလာတဲ့ကား မှောက်ပြီး ၄ ဦးဒဏ်ရာရ

မြန်မာနိုင်ငံသားတွေကို လူကုန်ကူး သယ်ဆောင်လာပြီး တိမ်းမှောက်ခဲ့တဲ့ကား။ (သြဂုတ် ၂၉၊ ၂၀၂၀ ဓာတ်ပုံ - ထိုင်းနယ်ခြားစောင့်တပ်)

မြန်မာဘက်မှာ ကပ်ရောဂါကူးဆက်မှုတွေ များလာတယ်ဆိုပြီး ထိုင်းနယ်စပ်တွေမှာ လုံခြုံရေး တင်းကျပ်ချိန် ထိုင်း-မြန်မာနယ်စပ် တာခ့်ခရိုင်ထဲမှာ မြန်မာနိုင်ငံသားတွေကို လူကုန်ကူးသူတွေ သယ်ဆောင်လာတဲ့ကား တိမ်းမှောက်တာကြောင့် ကားပေါ်ပါလာတဲ့ မြန်မာနိုင်ငံသား ၄ ဦး ဒဏ်ရာရသွားပါတယ်။ အပြည့်အစုံကို ထိုင်းအခြေစိုက် ဗွီအိုအေ မြန်မာပိုင်း သတင်းထောက် မအေးအေးမာ တင်ပြပေးထားပါတယ်။

မြန်မာနိုင်ငံတွင်းမှာ ကိုဗစ်ကပ်ရောဂါပိုး တွေ့ရှိသူတွေ တိုးလာတာကြောင့် နယ်စပ် ၁၀ နေရာကို စောင့်ကြည့်ဖို့အတွက် ထိုင်းပြည်ထဲရေးဝန်ကြီးဌာနကနေ သတိပေးထားချိန်မှာပဲ ထိုင်း-မြန်မာနယ်စပ် တာခ့်ခရိုင် မယ်လမ အမှတ် ၂ ကျေးရွာအုပ်စုအနီးမှာ လူကုန်ကူးသမားတွေ တင်ဆောင်လာတဲ့ မြန်မာနိုင်ငံသား ၁၃ ဦးပါတဲ့ကား တိမ်းမှောက်ခဲ့တာပါ။

ထိုင်း-မြန်မာနယ်စပ်အခြေစိုက် မြန်မာပြည်သားများအရေး ပူးတွဲလှုပ်ရှားမှုကော်မတီ ဥက္ကဋ္ဌ ဦးမိုးကြိုးကတော့ အခုလိုပြောပြပါတယ်။

“ဒီမနက် ထိုင်း-မြန်မာနယ်စပ် မဲဆောက်မြို့ မြောက်ဘက်မှာရှိတဲ့ မယ်လမမြို့နယ် အမှတ် ၂ ကျေးရွာအုပ်စုအနီးမှာ ကားလမ်းဘေး ကင်းပုန်းချ စောင့်ကြည့်စစ်ဆေးနေတဲ့ နယ်ခြားစောင့်အဖွဲ့တွေကို တွေ့မြင်သွားတဲ့ လူကုန်ကူးပြီး သယ်ဆောင်လာတဲ့ကား ၂ စီးက ဖြတ်မောင်းပြေးတော့ ကားပေါ်မှာပါတဲ့ ၁၃ ယောက်ထဲက ၄ ယောက်က ဒဏ်ရာပြင်းထန်စွာ ရသွားတယ်။ ၁၃ ဦးဆိုတာ အမျိုးသမီး ၃ ဦး၊ အမျိုးသား ၁၀ဦး ဖြစ်ပါတယ်။”

ရှေ့ကကားတစီးကတော့ နောက်ကလိုက်လာတဲ့ ရဲတပ်ဖွဲ့ဝင်တွေရဲ့ ဖမ်းဆီးမှုကို လွတ်အောင်မောင်းပြေးသွားခဲ့ပြီး ကျန်ကားတစီးကတော့ အရှိန်မထိန်းနိုင်ဖြစ်ပြီး လမ်းမပေါ်မှာ တိမ်းမှောက်သွားခဲ့တာပါ။ ဒီအတွက် ကားပေါ်မှာ ပါလာသူတွေထဲက ၄ ဦး ဒဏ်ရာရသွားတာ ဖြစ်ပါတယ်။

ကားမောင်းသူ ထိုင်းနိုင်ငံသားကိုလည်း လူမှောင်ခိုမှုနဲ့ ဆက်လက်စစ်ဆေးမှုတွေ လုပ်ဆောင်နေပြီး ဖမ်းမိထားတဲ့ မြန်မာနိုင်ငံသားတွေကိုတော့ Disease Act B.E. 2558 ကပ်ရောဂါ အရေးပေါ်ဥပဒေနဲ့ အရေးယူသွားမှာဖြစ်တယ်လို့ ထိုင်းအာဏာပိုင်တွေက ဆိုပါတယ်။

ကိုဗစ်ရောဂါကပ်ဆိုး ထိန်းချုပ်နိုင်ရေးအတွက် ထိုင်း-မြန်မာနယ်စပ် တာ့ခ်ခရိုင် မဲဆောက်မြို့ကို ထိုင်းဗိုလ်ချုပ် Chalongchai Chaiyakham လာရောက်စစ်ဆေးခဲ့ပြီး တရားမဝင် နယ်စပ်ဖြတ်ကျော် ဝင်ရောက်လာသူတွေကို သတိနဲ့ စောင့်ကြည့်စစ်ဆေးဖို့ ညွှန်ကြားခဲ့ပြီး နောက်တရက်အကြာမှာ ခုလိုဖြစ်ပွားခဲ့တာပါ။

သြဂုတ်လ ၂၈ ရက်နေ့ကတော့ ထိုင်းနိုင်ငံရဲ့ နယ်စပ်နေရာ ၃ ခုလောက်ကနေ ဝင်လာတဲ့ မြန်မာအလုပ်သမား ရာဂဏန်းလောက်ကိုလည်း ဖမ်းဆီးခဲ့ပါတယ်။

မအေးအေးမာ/ ဗွီအိုအေ ( မြန်မာပိုင်း)

https://burmese.voanews.com/a/myanmar-illegal-migrant-workers-car-accident/5562974.html