ရခိုင်ပြည်နယ် နုယ်ခြားစောင့်ရဲယာဉ်တန်း တိုက်ခိုက်ခံရ

၂၀၁၆ စက်တင်ဘာ ၂၄ ရက်တုန်းက မြန်မာ နယ်ခြားစောင့်ယာဉ်တန်းတခုကို တွေ့ရစဉ်

ရခိုင်ပြည်နယ် ၊ ရသေ့တောင်မြို့နယ်နဲ့ အောင်ဗလကျေးရွာကြား မောင်တောမြို့နယ်သွားတဲ့လမ်းပေါ်မှာ ဒီနေ့ သြဂုတ် ၁ရက် မနက် ၈နာရီလောက်မှာ မိုင်းပေါက်ကွဲမှုတခုဖြစ်ခဲ့ပြီး နယ်ခြားစောင့်ရဲတပ်ဖွဲ့ ယာဉ်တန်းကို တိုက်ခိုက်ခံရတယ်လို့ တပ်မတော်ဘက်က အတည်ပြုပါတယ်။ ဒါက ရခိုင်လက်နက်ကိုင်အဖွဲ့ AA ကြောင့်လို့ တပ်မတော်ဘက်က ပြောထားပေမဲ့ AA ဘက်ကို ဆက်သွယ်လို့မရခဲ့တာကြောင့် အတည်မပြုနိုင်ခဲ့ပါဘူး။ ဗွီအိုအေမြန်မာပိုင်းသတင်းထောက် ကိုဇော်ထက် မေးမြန်းပေးပို့ထားပါတယ်။

ဒီနေ့မနက် ရခိုင်ပြည်နယ် မောင်တောသွားတဲ့ ကားလမ်းပေါ်မှာ မိုင်းပေါက်ကွဲမှုတခုဖြစ်ခဲ့ပြီး နယ်ခြားစောင့် ရဲတပ်ဖွဲ့ရဲ့ ယာဉ်တန်းတိုက်ခိုက်ခံရပါတယ်။ ဒီတိုက်ခိုက်မှုက ရခိုင်လက်နက်ကိုင်တပ်ဖွဲ့ AA ဘက်ကလုပ်တာလို့ တပ်မတော် သတင်းမှန်ပြန်ကြားရေး ပြောရေးဆိုခွင့်ရှိသူ ဗိုလ်မှုးချုပ်ဇော်မင်းထွန်းက ဗွီအိုအေကို ပြောပါတယ်။

“ အငူမော်နဲ့ ကျောက်ပန်းနုကြား ကားလမ်းမပေါ်မှာဖြစ်တာလို့ပြောပါတယ်။ မနက်က ၈နာရီကျော်ကျော်လောက်မှာ ဖြစ်တယ် တပ်မတော်ယာဉ်တန်း မဟုတ်ပါဘူး။ နယ်ကြားစောင့်ရဲတပ်ဖွဲ့လေးတခု တပ်လဲလှယ်တာလေး ရှိပါတယ်။ ကားတွေနဲ့လဲလှယ်တာပါ။ အဲဒီမှာ မိုင်းဆွဲခံရတယ်လို့ သိရပါတယ်။ ကျနော်တို့သိရသလောက်ကတော့ AA ကလုပ်တယ်လို့သိရပါတယ်။ ထိခိုက်ဒဏ်ရာရတာမျိုး မရှိဘူး။ ကားတစီးတော့ အနည်းငယ်ပျက်စီးသွားပါတယ်။”

ဒါနဲပတ်သက်ပြီး ရခိုင်လက်နက်ကိုင် AA တပ်ဖွဲ့ကို ဗွီအိုအေက ဆက်သွယ်လို့မရခဲ့တာကြောင့် သီးခြားအတည်ပြုလို့တော့ မရနိုင်ခဲ့ပါဘူး။ မနေ့ကလည်း မြောက်ဦး၊ ပုဏ္ဏားကျွန်း၊ ကျောက်တော်၊ မင်းပြားမြို့တွေက နေရာ ၆ခုမှာ တိုက်ပွဲတွေဖြစ်ခဲ့ပါတယ်။ ဘူးသီးတောင် အရှေ့ဘက်မှာ တိုက်ပွဲတွေပြင်းထန် လာနေပြီး ICRC နဲ့ ပူးတွဲလုပ်ဆောင်နေတဲ့ ရခိုင်ကြက်ခြေနီလူငယ်တွေဟာ သက်ကြီးရွယ်အိုတွေကို ကယ်ထုတ်ခဲ့ရပါတယ်လို့ ဘူးသီးတောင် ပြည်သူ့ လွှတ်တော်ကိုယ်စားလှယ် ဦးအောင်သောင်းရွှေက ပြောပါတယ်။

“ ICRC အဖွဲ့တွေ အဲဒီလူတွေကို သွားကယ်တဲ့အခါမှာ ရွာထဲကိုဝင်လို့မရဘူးလို့ပြောတယ် သူတို့ကလေ အပြင်ကနေရတယ်၊ ဆိုတော့ လမ်းလျှောက်လာတဲ့သူတွေကို ခေါ်ယူလာတယ်။ ၂ယောက်ကျန်ခဲ့တယ်ပေါ့နော။ ရွာထဲမှာကတပ်တွေရှိတယ် အဲဒါကြောင့်သူတို့ ဒီနှစ်ယောက်ကို ထားခဲ့ရတာ။”

ဇူလိုင် ၃၀ရက်က ရသေ့တောင် မန်ကျည်းချောင်းကျေးရွာဘက်မှာ မိုင်း ၂လုံးပေါက်ခဲ့သလို ဇူလိုင် ၃၁ရက် မနေ့ကလည်း ပုဏ္ဏားကျွန်းမြိ်ု့နယ် ရန်ကုန်-စစ်တွေလမ်းပေါ်မှာ ဗုံးနှစ်လုံးပေါက်ခဲ့ပါသေးတယ်။ တပ်မတော်နဲ့ ရခိုင်လက်နက်ကိုင် AA တို့ဖြစ်ပွားခဲ့တဲ့ တိုက်ပွဲတွေကြောင့် ထွက်ပြေးတိမ်းရှောင်နေရတဲ့ စစ်ရှောင်ဦးရေဟာ ထပ်တိုးလာပြီး ၅၅၀၀၀ ကျော်သွားပြီလို့ ရခိုင်တိုင်းရင်းသားမျိုးနွယ်များအစည်းအရုံး REC ရဲ့ စစ်တမ်းမှာ ဖော်ပြထားပါတယ်။

ဇော်ထက်  / ဗွီအိုအေ (မြန်မာပိုင်း)
https://burmese.voanews.com