လားရှိုးမြို့နယ်အတွင်း လက်နက်ကိုင်တပ်ဖွဲ့များ စစ်ရေးတင်းမာ လူထုစစ်ဘေးရှောင်နေရ

နိုဝင်ဘာလ ၂၀ ရက် ၂၀၁၈

သျှမ်းပြည်မြောက်ပိုင်း လားရှိုးမြို့နယ်အတွင်း TNLA နှင့် ပြည်သူ့စစ်တပ်ဖွဲ့တို့ပစ်ခတ်တိုက်ခိုက်မှုဖြစ်ပွါးခဲ့ပြီး အစိုးရတပ်မတော်မှလည်း နီးကပ်စွာလှုပ်ရှားသဖြင့် စစ်မြေပြင်အတွင်းရှိဒေသခံလူထု စစ်ဘေးလွှတ်ရာသို့တိမ်းရှောင်နေကြကြောင်းသိရသည်။

နိုဝင်ဘာလ ၂၀ ရက်နေ့ မနက် ၈ နာရီခွဲအချိန်ခန့်က လားရှိုးမြို့နယ် နမ့်ပေါင်တိုက်နယ် နားနန်းကျေးရွာအုပ်စု လွယ်ပန်လုံးမ်တွင်စခန်းချထားသော မန်ပန်ပြည်သူ့စစ်တပ်ဖွဲ့နှင့် TNLA တပ်ဖွဲ့တို့ တိုက်ပွဲဖြစ်ပွါးခဲ့ခြင်းဖြစ်သည်။

နားနန်းအုပ်စုဒေသခံ အသက် ၄၀ ကျော်အမျိုးသားတဦးက- ကျနော်တို့ ရွာက ယောက်ကျားလေးတွေ ၁၅ ယောက်လောက်ရှိတယ် မနေ့ညကတည်းက ဒီဝမ့်တင်းခမ်း ရွာကိုတိမ်းရှောင်လာခဲ့ကြတာပါ။ ခုထိမပြန်ရဲသေးဘူး။ ပြည်သူ့စစ်စခန်းကို TNLA က တက်တိုက်တာလို့ကြားတယ်။ ဟုသျှမ်းသံတော်ဆင့်အားပြောသည်။

လက်ရှိတွင် TNLA တပ်များသည် နားနန်းအုပ်စုအတွင်းရှိ ၀မ့်ဟောင်၊ နှင့် ၀မ့်လုံတို့တွင်ရှိနေပြီး အစိုးရစစ်တပ်မှာမူ တွန်းနေရွာနှင့် ၀မ့်ဟိုဆာ ရွာတို့တွင်လှုပ်ရှားကြောင်း ထို့အတွက် အချိန်မရွေးတိုက်ပွဲဖြစ်ပွါးမည်ကိုစိုးရိမ်နေကြကြောင်း ဆိုပါသည်။

တိုက်ပွဲဖြစ်ပွါးသည့်နေရာသည် လားရှိုးမြို့အရှေ့တောင်ဘက်တွင်တည်ရှိပြီး မိုင်းဟက်အုပ်စုနှင့် နမ့်ပေါင်တိုက်နယ်ကြားတွင် ဖြစ်ပွါးခဲ့ကြခြင်းဖြစ်သည်။ အဆိုပါအုပ်စုအတွင်းရှိ ၀မ့်လုံ၊ ၀မ့်ဟောင်၊ ၀မ့်နားနေ၊ ၀မ့်ကောင်းရွာသားများမှာ မုံးပိုင်ဘုန်းကြီးကျောင်းသို့လည်းကောင်း၊ ၀မ့်လုံ ၊ ၀မ့်ဟောင်ရွာမှ ရွာသားများမှာ ၀မ့်ကတ်ဘုန်းကြီးကျောင်းသို့လည်းကောင်း ထွက်ပြေးတိမ်းရှောင်နေကြပြီး ဘုန်းကြီးကျောင်းသို့မရောက်ဘဲ လယ်တောအတွင်းရှိတဲများတွင်လည်း တချို့မှာခိုလှုံနေကြကြောင်း သိရသည်။

မုံးပိုင်ဘုန်းကြီးကျောင်းရောက် စစ်ဘေးရှောင်အမျိုးသမီးတဦးက - ကျမတို့ ဒီနေ့အစောကြီးရွာကနေထွက်လာတာ။ တိုက်ပွဲက နာရီဝက်လောက်ဖြစ်တယ်။ မုံးပိုင်ဘုန်းကြီးကျောင်းမှာက အမျိုးသမီး ကလေးနဲ့ သက်ကြီးတွေများတယ် - ဟုသျှမ်းသံတော်ဆင့်အားပြောသည်။

ယနေ့တနေ့လုံး လားရှိုးနှင့်နမ့်ပေါင်ကြား ဒေသတို့တွင် TNLA ၊ ပြည်သူ့စစ်နှင့် အစိုးရတပ်မတော်တို့ သုံးဖွဲ့စလုံးလှုပ်ရှားကာစစ်ရေးတင်းမာနေသဖြင့် ၀န်ထမ်းကားများပါမချန် ခရီးသွားဒေသခံပြည်သူလူထုများ လမ်းတွင်တားဆီးစစ်ဆေးခံခဲ့ရကြောင်း သိရသည်။

သျှမ်းသံတော်ဆင့်၊ ဟွမ်ဟိန်း
Panglong(Burmese)
https://www.facebook.com/ShanNewsBurmese/